Matfey 11
11
İoan Vaatizedicidän yollanmışlar
1Açan İisus verdi bu nasaatları oniki üürenicisinä, gitti oradan, ki üüretsin insanı hem nasaat etsin onnarın kasabalarında.
2İoan Vaatizedici kapandaykan işitti Hristozun işleri için.
3Yolladı kendi üürenicilerini#11:3 Kendi üürenicilerini: kimi tekstlerdä «ikisini üürenicilerin». sorsunnar Ona: «Sänsin mi O, Kim lääzım gelsin, osa başkasını mı bekleyelim?»
4İisus cuvap etti onnara: «Gidin da söleyin İoana, ne işidersiniz hem ne görersiniz:
5köörlar görerlär, topallar gezerlär, lepralılar paklanêrlar, saarlar işiderlär, ölülär dirilerlär, fukaaralara ii haber nasaat olêr.
6Mutlu o, kimin için Bän köstek olmayacam».
İisus şaatlık eder İoan için
7Açan onnar gittilär, İisus başladı sölemää insana İoan için: «Ne çıktınız görmää çolda? Bir saaz mı, ani lüzgerdän sallanar?
8Ne çıktınız görmää? Bir adam mı, yımışak rubaylan giiyimni? Onnar, kim giiyimni yımışak rubaylan, padişah binalarında yaşêêrlar.
9Ozaman neçin çıktınız? Bir prorok mu görmää? Aslı, hem deerim sizä, ani o taa büük, nekadar bir prorok.
10Odur, kimin için yazılı: „Tä Bän yollêêrım Senin önün sora habercimi, angısı hazırlayacek yol Sana“.
11Dooru söleerim sizä, ani onnardan, kim karıdan duudu, yok başka birkimsey taa büük İoan Vaatizedicidän. Hep okadar en küçüü Gök Padişahlıında taa büük ondan.
12İoan Vaatizedicinin vakıdından büünkü günä kadar Gök Padişahlıı için kuvet koyulur. Bir boyu kuvetlän bakêr ona el koymaa.
13Hepsi proroklar hem Zakon İoana kadar öncä söledilär, ne olacek.
14İstärseydiniz bunu kabletmää, odur İliya, angısı lääzımdı gelsin.
15Kimin var kulaa /işitsin deyni/, ko işitsin.
16Kimä benzedeyim bu boy insanı? Onnar benzeerlär uşaklara, angıları oturêrlar meydannarda da baarêrlar kafadarlarına:
17„Çaldık sizä kavallan, oynamadınız; çaldık sizä gamnı türkü, aalamadınız“.
18Geldi İoan, ne iyärdi, ne içärdi, deerlär: „Onda var fena duh“.
19Geldi Adam Oolu, hem iyer hem içer, deerlär: „Hobur hem içkici, harççıların hem günahkerlerin dostu!“ Hep okadar aariflik gösterer işlerindän, ani o doorudur».
Vay inansız kasabalara!
20Ozaman İisus başladı azarlamaa kasabaları, neredä en çok kudretli işlär yaptı, zerä günahlarından Allaha dönmedilär:
21«Vay sana, Horazin! Vay sana, Vifsaida! Zerä, eer bu kudretli işlär, ani sizdä yapıldı, Tir hem Sidon kasabalarında yapılaydı, çoktan çuvallan giiyimni hem kül üstündä oturup, günahlarından Allaha döneceydilär.
22Ama sizä söleerim, ani daava günündä taa ilin olacek Tir hem Sidon kasabalarına, nekadar sizä.
23Sän, Kapernaum, gökä kadar mı üüseklenecän? Diil, sän ölülär erinä düşecän. Zerä, eer bu kudretli işlär, ani sendä yapıldı, Sodom kasabasında yapılaydı, o ayakça duraceydı büünkü günä kadar.
24Ama sizä söleerim, ani daava günündä taa ilin olacek Sodom kasabasına, nekadar sana».
Boba hem Ool
25Ozaman İisus dedi: «Şükür ederim Sana, Boba, gökün hem erin Saabisi, ani sakladın bunnarı aarif hem fikirli olannardan da açtın evlatlara.
26Hakına, Boba, budur Senin istediin!
27Hepsini Bobam Benim elimä verdi. Kimsey heptän annamêêr Oolu, Bobadan kaarä, hem kimsey heptän annamêêr Bobayı, Ooldan kaarä, hem onnardan, kimä Ool isteer açmaa.
Bendä bulacenız raatlık canınıza
28Gelin Bana, hepsi yorgunnar hem üklü olannar! Bän sizä raatlık veririm.
29Alın üstünüzä Benim boyunduruumu, Bendän üürenin, zerä Bän yavaşım hem usluyum üreemdän, da siz canınıza raatlık bulacenız.
30Boyunduruum Benim iidir, hem üküm Benim ilin».
Aktuálne označené:
Matfey 11: GagNTL
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Bіblіyayı çevіrän İnstіtut, Moskva, 2006
