Jọn 10
10
Ananaḍikiḍikiḅọ Ḅe Kaḅo Mị Ḅe Ḅẹrẹ
1Jizọs Ḅe nwọ ḅẹmẹ, “À kọkọmaye ḍuko ọ́ pịrịaḅẹ: na ḅọkọ mị ḅụ wẹrị ananama simearị nyọ sọka, se jịn nyọ ḅụ wẹrị tanjị sọ ḅọ ḅe, ori furuḅọ-ẹ, pịkị angarafịḅọ-ẹ. 2Ḅọkọ mị ḅụ wẹrị sọ ḅọ ḅe ori mị ananaḍikiḍikiḅọ ḅe-ẹ. 3Odoḅọkọ koru ḅọ ḅe ḅọkọ mị finji ọ̀ pịrịmẹ, ori ẹrẹ se oria ananama chịn sịkị, àrị ọ̀ pụkọ naamẹ, se ori arịa tọrọkọ ịsụn pakamẹ. 4Ori àrị ọkịpakụmaḅo sịkị, ori arịa tọrọkọ ịsụnmẹ se ananama ò ḍukomẹ, anịatịḅị àrị ọ̀ pụkọ nemimẹ. 5Àrị jịnḅọ ḍuko ḍụkụ ẹkẹ anịkanịka, àrị iniḅọ ḍiki mangịḅịa, anịatịḅị àrị iniḅọ pụkọ nemikẹ.”
6Jizọs Ḅe mị kaḅo mị kọn ini pịrịmẹ, ọkụma ò ḍuko ini pịrịarịye mị ini kaịnḅokẹ.
Jizọs Iḅi Ananaḍikiḍikiḅọ Ḅe-ẹ
7Anị Jizọs Ḅe pịkịna nwọḅẹye-ẹ, “Kọkọmaye à nwọ ḍuko ọ́ pịrịaḅẹ: ị̀rị̀ anị ananama arịa ḅọkọ mị-ẹ. 8Ma à ḅoka se tatarị ḅo apụ mamgba furuapụ na angarafịapụ na-ẹ, ọkụma ananama àrị ini pokikẹ. 9Ị̀rị̀ anị ḅọkọ mị-ẹ. Ị̀ ḅụ ḅọrọ ḅie sọ ḅọ goyegoye iniḅọ ḍụaḅọrọma nyanaḅịa; ọ̀ sọ ḅo se pịkị pakaḅịa, se fịfịye nwọ ḍọkị ọrịḅịa. 10Furuḅọ ḅe furu kẹngẹ mị ò gose ḅo ye-ẹ, ḅaa na, yesima na. Ị̀rị̀ à ḅomẹ mịẹse ó ḍumo nyanaḅịa ḅara—ḍumo mị anịḅe nyanaḅakama ḅụ.
11“Ị̀rị̀ iḅi ananaḍikiḍikiḅọ ḅe-ẹ, anị ḅereni se fị ananama pịrịḅịa ḅọ ḅe. 12Ini ọkọḅọ ḅe, ori ananaḍikiḍikiḅọkẹ, ori pịkị ananama nyanakẹ, ò piri obiri ḅoarị ọkụ nwọ ọrị sịkị, ori ananama wẹrịso se mangị somẹ, anịgose piri obiri ḅe ananama kun se àrị galagalamamẹ. 13Ini ọkọḅọ ḅe ọ̀ mangị somẹ, anịatịḅị ori, ini ori ọkọmẹ, ọ̀ pịkị ananama abalakẹ. 14Ị̀rị̀ anị iḅi ananaḍikiḍikiḅọ ḅe-ẹ. 15Ḍaḅọ Ḅe nwọ ị̀ nemi, ị̀rị̀ sọnị nwọ Ḍaḅọ Ḅe nemi ḅara mị, anị gbọrị ḅara mị à nwọse ị̀ya ananama nemimẹ, ị̀ya ananama pịkị ọkọ se ị̀ nemimẹ. À pịkị ḅimẹ à fị àrị pịrị. 16Sime ị̀ pịrị jịn anana pịkị omi-ẹ, mị anana ogbo mị ḅie oforikaye. À pịkị àrị sọnị ọkịḅoḅịa àrị ị̀ pụkọ pokiḅịa, àrị pịkị ḅo gbọrị anana ogbo nwọ sọḅịa se gbọrị ananaḍikiḍikiḅọ àrị ḍikiḍikiḅịa.
17“Ḍaḅọ Ḅe ori ị̀ ḅẹlẹmamẹ anịatịḅị à ḅerenimẹ ị̀ ḍumo nwọ pịrị mịẹse à pịkị anị nyana ọkịḅịaye gose. 18Ị̀ ḅara ị̀ ḍumo nwọ ọkị gbọrịḅọ sọ ofori-ẹ. Ị̀rị̀ ngẹrị ḅereni se anị pịrịmẹ, à kụrọ nyanamẹ anị pịrị, à pịkịna kụrọ nyanamẹ anị ọkị. Mịn mị anị ị̀ Ḍaḅe tọn ị̀ pịrị mịẹ nwọḅẹye mị-ẹ.”
19Pua pịkị Juapụma ogboku pakaḅomẹ ma ọkwẹịn ma gose. 20Tọn apụ inia ḅie nwọ ḅẹaḅẹ, “Sitẹmẹ ò ḅie omi-ẹ! Ọ̀ nọmụaḅẹ! Nde ó gose ò pokiarịye?”
21Ọkụma ísíapụma nwọ ḅẹaḅẹ, “Sitẹmẹ ḅie ḅụ simeḅọ ineda ḅe ḅọ ḅe ọkwẹịn àrị ḅara mị se ọkwẹịn ẹkẹ! Nde sitẹmẹ ineda tọrụmgbọlụ pụn apụ tọrụmgbọlụma nwọ finjiḅịa ọkụ?”
Ini Jizọs Ḅe Sịkịmẹ
22Fọngụ sịkị mị ḅụ, ini Jerusalẹm mị ḅie Oputẹkẹwarị mị Mịẹfịafịama Alalị nwọ fịaḅẹ. 23Jizọs Ḅe Oputẹkẹwarị mị ḅie ini Sọlọmọn Iḅoma nwọse chịn nyọ ḅie nwẹngịma ḅọrọaḅẹ, 24tomonima anịsịkị Ò gbori kelema se nwọ ḅẹmẹ, “Ị́ ḅifie wa pịrịka mun nde sịkị laḅe? Kọkọmaye ḍuko wa pịrị Mẹsaya Ḅe ị́rị́?” 25Jizọs Ḅe pẹkẹrẹmẹ, “À ḍuko ọ́ pịrị ḅọrọsam, ọkụma ómine ị̀ ḅereni ḍụkụkẹ. Ị̀ Ḍaḅe kụrọ ḅụ à wẹrị nwẹngị fịrịma ị̀ tọrụ ḍinma ọkwẹịn-aḅẹ, 26ọkụma ó ḅereni ḍụkụkẹ, anịatịḅị ómine ị̀ya ananakẹ. 27Ị̀ya ananama àrị ị̀ pụkọ pokimẹ; ị̀rị̀ àrị nemimẹ, àrị pịkị ị̀ ḍukomẹ. 28À simegbaso ḍumo se àrị pịrịmẹ, àrị pịkị ngịsị fị ẹkẹ. Ị̀ ḅara ḅie àrị kun ọkịḅịa ḅọ ofori-ẹ. 29Ị̀ Ḍaḅe se ị̀ pịrịsaye mị ḍụḅa ye mamgba nẹngịmẹ, se ineda Ḍaḅọ Ḅe ḍikiḍikiarịye kun ọkịḅịa ḅọ ofori-ẹ. 30Ḍaḅọ Ḅe na ị̀rị̀ na gbọrịye-ẹ.”
31Anịsịkị tomonima pịkịna imgbele deki ò gbinḅịa ẹrẹchị ḍọkịmẹ. 32Jizọs Ḅe nwọse ini ḅẹmẹ, “Ḍaḅọ Ḅe se ị̀ pịrị nwẹngị nwọḅẹ tọn-a iḅi-a fịrị ọ́mịna ogboku à nwọ nwẹngịsam, fịrịma ḅụ nde ye gose ómine imgbele se ị̀ gbin-e tọn-ao?”
33Ini pịkị ọ̀ pẹkẹrẹmẹ, “Wa iḅi-a fịrị gose imgbele se ị́ gbin-e tọnkẹ, ọkụma ị́ wẹrị Tamụnọ Ḅe wọlọarị ḅara mị gose-ẹ! Ị́rị́ tomoniḅọ-ẹ, ọkụma ị́ ḅụ ị́ nwọse Tamụnọ mịẹ-aḅẹ!”
34Jizọs Ḅe pẹkẹrẹmẹ, “Ọ́mịna Oloko ḅie gịẹịn waraḅẹ na Tamụnọ Ḅe nwọḅẹmẹ, ‘Ómine tamụnọ-ẹ.’ 35Wa nemimẹ na fịafịa ḍiri mị ḍukoye mị kọkọmaye sọ gbasomẹ se Tamụnọ Ḅe oru nwọse ini chịnmẹ, ini oria oku mị se fịrịma apụma. 36Ị̀rị̀ ọkụma, Ḍaḅọ Ḅe ị̀ sẹlẹ se ị̀ se tomonikiri mị fịrịmamẹ. Nde anịọkụma, ómine ineda ḅẹḅịa ọkụ na à Tamụnọ Ḅe wọlọmẹ, anịatịḅị à nwọḅẹmẹ, ị̀rị̀ Tamụnọ Tọkụ-ẹ? 37Anịọkụma ómine ị̀ ḅereni ma, à nemikase ị̀ Ḍaḅe fịrịma nwọ nwẹngịkẹ ḅẹḅẹ. 38Ómine ị̀ ḅerenikẹ nwọḅẹ sọnị, ị̀ya fịrịma ọ́ nwọ ḅereni mịẹse anị ọ́ ḅụ okoroḅịa ḅara na Ḍaḅọ Ḅe ori ị̀ ḅie omi-ẹ, ị̀rị̀ sọ pịkị Ḍaḅọ Ḅe ḅie omi-ẹ.”
39Ini pịkị jịn sịkị se ò kun ḍọkịmẹ, ọkụma ori inia ḅara pẹlẹma somẹ.
40Jizọs Ḅe vinpịkị Jọdan Tọrụ mị saḅa Jọn ḅe mengi se nweni sara sime nyọ mị mun mẹ, se anịnyọ simemẹ. 41Tọn apụ ọ̀ damaḅomẹ, ini nwọḅẹmẹ, “Jọn ḅe ọ̀ ḅụgbiripuma fịrị nwẹngịkẹ, ọkụma ò ḅe tomoniḅọ ḅe ḅụ ḍukoye goyegoye kọkọmaye-ẹ.” 42Se anịnyọ tọn apụ ò ḅerenimẹ.
Aktuálne označené:
Jọn 10: OBTP
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
The Bible Society of Nigeria
