PIENCILNA 2
2
1Tua bangin van le lei le a sunga na om zosie kiman sieng hi. 2Tuale a ni sagina ni-in Pasien in a nasep zosie man a, a ni sagi ni-in a sepna zosie panin a tawlnga hi.#Heb 4:4, 10 3Tuaci’n Pasien in ni sagi ni thupha pie-in siengthosah hi, bangzieh ahei cile Pasien in siemcil nasepna zosie manin tua ni-in a tawlnga hi.#Pei 20:11
4Tamte pen a kisiemcil lai-a van le lei tangthu ahi hi.
Siemcilna Thu adang Khat
(Pien 1:26-30)
Topa Pasien in van le lei a bawl ni-in 5leitungah singkung lopa kici a po nai sih hi. Azieh pen Topa Pasien in leitungah guo a zusah nai sih hi, lo hlo ding zong koima a om nai sih hi. 6Ahi vangin lei nei panin tuihu phulto-in leitung zosie a nomsah hi. 7Tua ciengin Topa Pasien in lei panin leivui#2:7 Ahi sihle “lei (Heb “adamah”) panin “leivui tawh mihing” (Heb “adam”) bawl hi. tawh mihing bawl a, a nahkuo sungah hinna hu mop hi; tuale mipa pen hinna nei mihing a suoh hi.#1Cor 15:45 8Topa Pasien in nisuona lamah Eden um khat a bawl hi; ama in tua munah a siemsa mipa koi hi. 9Topa Pasien in lei sung panin a etlawm, a tuituoh singkung namcin posah a, um laikimah hinna singkung le a sie le a pha theina singkung zong a posah hi.#Kln 2:7; 22:2, 14
10Um a nomsah dingin Eden panin gun khat luong a, khum mun panin tua gun kikhenzahin gun li a pha hi. 11Gun masa pen a min Pishon hi a, kham pienna Havilah gamsung zosie kuolkhumin a luong pen ahi hi. 12Tua gama khamte hoi thei mama a, khum munah bedolak singnai le onyx suong manpha a pieng hi. 13Gun a nina pen a min Gihon hi a, Cush gam kuolkhumin a luong pen ahi hi. 14Gun a thumna pen a min Tigris hi a, Assyria gam nisuona lamah a luong hi. Gun a lina pen a min Euphrates ahi hi.
15 Topa Pasien in Eden um hlo ding le a cing dingin mipa koi hi. 16Tuale Topa Pasien in tua mipa kungah, “Um sunga singga zosie na dei bangin na ne thei ding hi; 17hinanle a sie le a pha theina singga na ne sih ding hi, azieh pen na neh ni-in na si ding hi,” ci-in thu a pie hi.
18Tua ciengin Topa Pasien in, “Mipa ama guoha a op ding hoi lo hi; ama a hu ding kithuopi khat ka bawlpieh ding hi,” a ci hi. 19Tuaci’n Topa Pasien in lei panin gamsa zosie le vana leng va zosie siem a, a min uh bang ahisah eimah ci-in a thei nuom ziehin mipa kungah tuate a peipi hi; hinna a nei zosie, tua mipa’ law bangbang a min uh hi paipai hi. 20Tua mipa in ganhing zosie, vana leng va zosie le gamsa zosie min a vaw ciet hi; ahi vangin mipa#2:20 Ahi sihle “Adam adingin” a hu thei ding mi khat zong a om sih hi. 21Tuaci’n Topa Pasien in tua mipa a kimut suohsah mama a, tuale ama a kimu hi; tua ciengin ama in a nahgu khat la a, a lahna mun teng a telin a tuomsahkia hi. 22Topa Pasien in mipa tung pana a lah a nahgu pen numei khatin bawl a, mipa kungah tua nu a zawpi hi. 23Tua ciengin mipa in,
“Tam pen ka gute pana ka gu le
ka tel pana ka tel ahi hi;
ama pen Mipa#2:23 Heb “ish” sung pana
kila ahi ziehin
Numei#2:23 Heb “ishshah” kici ding hi,”
a ci hi. 24Tua ahi ziehin pasal in a nu a pa nuasie-in a zi tawh kigawm a, ama gel pum khat a suoh uhi.#Mat 19:5; Mrk 10:7-8; 1Cor 6:16; Eph 5:31 25Tuale mipa le a zi a guohtangin a om tuoh gel a, a maizum sih uhi.
Aktuálne označené:
PIENCILNA 2: ZBOTF01
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Zo Bible © Bible Society of Myanmar, 2018.