Mataayo Ikulongwi itsilongola
Ikulongwi itsilongola
ƗLivangɨli ndʉwʉ lyavɨgilwe nʉ Mataayo kɨtabu kɨninie mu sitabu sinni isitatsi mu Lwɨdɨngʼano ʉLʉpya isikwolela ikulongwi tsa Yɨɨsʉ Kɨlɨsiti. Avɨmbi vikwɨdɨngʼana ʉkʉta ɨkɨtabu kya Mataayo kyavɨgilwe mu mwaka ʉgwa sitsigo ntanato (60) Waholilwe ʉYɨɨsʉ Kɨlɨsiti. Ikange vikwɨdɨngʼana ʉkʉta ʉmbɨgi va kɨtabu ɨkɨ vɨ Mataayo, aavɨgile wʉ alɨ mu vʉtsenge wa Yelusalemu. ɄMataayo aale inninie va vapositili kɨtsigo na vavɨlɨ.
ɄMataayo aavavɨgye ɨkɨtabu ɨkɨ aVayahudi avaakɨmanyile ʉkwɨmba. Ɨkulongwi ɨjɨ jikɨvonia pavʉvalasu manya ɨkɨtabu kya Mataayo kɨlɨ ni sitita sya mamenyu isilʉtɨɨlye pa sitsigo ntanato isihʉma mu Lwɨdɨngʼano ʉLʉlaala. Ʉvʉsumbe wa kʉvavɨgɨla waale ʉkʉvavonia ʉkʉta ʉYɨɨsʉ vɨ Mesiya, ʉmalwa va Ngʉlʉve, ʉvɨ avanyamalago vaatsovile ikulongwi tsa mwene. Ikange ʉMataayo aavavɨgye ikulongwi nyongosu itsa Lʉdeeva lwa Ngʉlʉve.
AVayahudi vaahʉʉvɨlaga ʉkʉta ʉMesiya aale iiva Nkʉlʉdeeva ikange ntsosi va kulongwi tsa silikali, ʉnya kʉlongotsa ʉlʉdeeva lwa mu kɨlʉnga. Ʉkʉkongana nʉ vʉmanyi ʉwa, ʉMataayo kʉ lwʉtsi ʉlʉvaha, aabeetsiitse amasaago ago kʉ nzɨla jya kʉganula ʉmwʉ lʉveelye ʉLʉdeeva lwa Ngʉlʉve.
ƗLivangɨli lya Mataayo likwaganitsa ikulongwi tsa Lwɨdɨngʼano ʉLʉlaala ni tsa Lwɨdɨngʼano ʉLʉpya. Avɨmbi vivona ʉkʉta ʉMataayo aagelile ʉkwɨgɨlɨla ʉlʉvaatɨko lwa sitabu sihaano isitatsi sya Lwɨdɨngʼano ʉLʉlaala. Ʉngatoole amamenyu ga Yɨɨsʉ ga kʉ kɨdugala (Mataayo 5-7) giweesa ʉkʉlɨngʼaanitswa nɨ kɨɨnu ɨkyʉ aavombile ʉNgʉlʉve ʉpwʉ aampye ʉMoose indagɨlo ʉkʉ kʉ kɨdugala ɨkya Sinai (Simiilitso tsa Ndagɨlo 19:3–23:33).
Aktuálne označené:
Mataayo Ikulongwi itsilongola: zga
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2019, Wycliffe Bible Translators, Inc. All rights reserved.