Genesis 8
8
1Dios tsi' ña'ta Noé yic'ot pejtelel bʌte'el yic'ot pejtelel alʌc'ʌl am bʌ ti barco. Tsi' choco tilel ic'. Tsa' caji ti sajp'el jini ja'. 2Tsa' tijq'ui ti ajñel jini cuxul bʌ ja' am bʌ ti tam bʌ i yajñib. Tsa' lajmi jini ja'lel tsa' bʌ yajli ti panchan. 3-4C'unte' tsa' sajp'i ja'. Sʌp'ʌlix jini ja' che' bʌ tsa' ñumi lujump'ejl i waxʌcc'al (150) q'uin. Tsa' c'ʌcle barco ti wits i c'aba' Ararat. 5Tsa' chʌn sajp'i jubel ja'. Che' ti lujump'ejlel uw ti ñaxan bʌ tsic, tsa' tsictiyi i jol tac wits.
6Che' bʌ tsa' ñumi cha'c'al q'uin, Noé tsi' jamʌ jini ventana tsa' bʌ i mele ti barco. 7Tsi' choco majlel x'ac'xi'. Tsa' wejli majlel. Tsa' wejli ñumel jinto tsa' tiqui jini lum. 8Tsi' choco majlel x'ujcuts cha'an mi' ña'tan mi sʌp'ʌlix ja'. 9Jini x'ujcuts ma'anic tsi' taja i t'uchlib. Tsa' sujti ti barco come anto ja' ti pejtelel pañimil. Noé tsi' loc'sa i c'ʌb. Tsi' cha' ch'ʌmʌ ochel ti barco. 10Tsa' to i pijta yambʌ wucp'ejl q'uin. Tsi' cha' choco loq'uel x'ujcuts ti barco. 11Che' iq'uix tsa' cha' c'oti x'ujcuts. Awilan, an i yopol olivote' ti' ñi' tsa' bʌ i ñip ch'ʌmʌ c'otel. Jini cha'an Noé tsi' ña'ta sʌp'ʌlix ja' ti lum. 12Tsi' cha' pijta yambʌ wucp'ejl q'uin. Tsi' cha' choco loq'uel x'ujcuts. Ma'anix tsa' chʌn c'oti.
13Che' ti lujunc'al i cha'bajc' yic'ot jump'ejl (601) i jabil, che' ti ñaxan bʌ uw, ti ñaxan bʌ tsic, tiquinix jini lum. Noé tsi' jambe i jol barco. Tsi' q'uele lum. Awilan, tiquinix. 14Che' ti cha'p'ejlel uw, ti wucp'ejl i cha'c'al tsic tiquinix jini lum. 15-16Dios tsi' sube Noé: Loq'uenla ti barco, jatet yic'ot a wijñam yic'ot a walobilob yic'ot i yijñamob a walobilob. 17Wets'ex loq'uel pejtelel cuxul tac bʌ ya' bʌ an a wic'ot, jini mut yic'ot bʌte'el yic'ot pejtel jʌlʌcña bʌ mi' majlel ti lum. La' pujquic majlel ti pejtelel lum. La' cha' p'ojlic, che'en. 18Jini cha'an Noé tsa' loq'ui majlel yic'ot winic bʌ i yalobilob yic'ot i yijñam yic'ot i yijñamob i yalobilob. 19Pejtelel bʌte'el yic'ot pejtelel jʌlʌcña bʌ mi' majlel ti lum, yic'ot pejtelel mut, yic'ot yan tac bʌ mu' bʌ ti xʌmbal ti pañimil, tsa' loq'ui tac ti barco ti jujunchajp.
20Noé tsi' melbe i pulʌntib i majtan lac Yum. Tsi' yajca sʌc bʌ alʌc'ʌl yic'ot sʌc bʌ mut ti jujunchajp. Tsi' yʌq'ue Dios pulbil bʌ i majtan ya' ti pulʌntib. 21Che' bʌ tsi' yubi lac Yum jini xojocña bʌ i yujts'il tsi' yʌlʌ ti' pusic'al: Ma'anix mi caj c cha' jisan jini lum cha'an i mul winicob che' bajche' tsac mele, anquese jontol chuqui mi' ña'tañob ti' pusic'al c'ʌlʌ che' ch'iton to. Ma'anix mi caj c chʌn tsʌnsan pejtelel cuxul tac bʌ che' bajche' tsac jisa. 22Che' woli ti jalijel pañimil mux i chʌn tilel i yorajlel pac' yic'ot c'ajbal, yic'ot tsʌñal yic'ot ticwal, yic'ot jajmel yic'ot ja'al, yic'ot q'uiñil yic'ot ac'ʌlel, che'en.
Aktuálne označené:
Genesis 8: CTU77
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Chol de Tumbalá Bible © Bible Society of Mexico, 1977. Active Translation in Process