Mat 9
9
Yeezu Naŋ Saŋ Gbɛre Kaŋ
(Mak 2:1-12; Luk 5:17-26)
1A Yeezu naŋ da wa kpɛ a gbori baare, O da ŋmaa la a mane a wa O meŋɛ teŋɛ. 2A lɛ poɔŋ la ka noba mine da tuo dɔɔ kaŋ naŋ gbɛre, ka o gaŋ pane zu ka ba de o wa ne a Yeezu zie. A Yeezu naŋ da wa nyɛ a ba yeldeebo, O da yeli ko la a dɔɔ gbɛre, “Nyɔge fo meŋɛ, N bidɔɔ, fo yelbebe nyɛ la sudi.” 3Lɛ la ka a Naaŋmen bege wulwulibo mine sɔgle yele ba pooreŋ, “A dɔɔ ŋa toorɔ la Naaŋmen zoma.” 4Kyɛ a Yeezu naŋ da baŋ a ba poteɛrɛ, lɛ la ka O soore ba, “Bonso ka yɛ teɛrɛ faaloŋ yɛ pooreŋ? 5Yɛ yeli ko ma, a ama buo yeluu la e mɔlɔ, ‘Ba di la a fo yelbebe suuri ko fo,’ bee N naŋ na yeli, ‘Vaa-iri dendeŋ a kyɛnɛ’? 6Kyɛ ka yɛ na sereŋ baŋ ka a Nensaala Bie taa la kpeɛ̃õ a teŋɛzu kyɛ ka O di yelbebe suuri ko noba,” O pãã da yeli ko la a dɔɔ gbɛre, “Vaa-iri de fo pane a kulo fo yiri.” 7Ka a dɔɔ vaa-iri a te kulo o yiri. 8A nembeɛoŋ naŋ da wa nyɛ a lɛ, dabeɛ̃ da kpɛ ba la yaga zaa, ka ba puuro Naaŋmen yuori, ane O naŋ de kpeɛ̃õ ŋa tɔ ko nensaalba.
Yeezu Naŋ Boɔle Matio
(Mak 2:13-17; Luk 5:27-32)
9A Yeezu naŋ da wa kyɛnɛ gɛrɛ, O da nyɛ la dɔɔ kaŋ yuori naŋ di Matio, ka o zeŋ zuyɔɔ die poɔ, ka a Yeezu yeli ko o, “Iri tuuro ma,” ka o vaa-iri a tuuro O.
10Kyɛ O naŋ da wa te kpɛ a Matio die a zeŋ ka O di diibu la ka a zuyɔɔ-derebɛ ane yelbe-erebɛ yaga da wa laŋ zeŋ ne a Yeezu ane O potuuribo a diibu zie. 11A Faraziimine naŋ da wa nyɛ a lɛ, ba da soore la a O potuuribo, “Bonso ka a yɛ Wulwullo laŋ dire ne zuyɔɔ-derebɛ ane yelbe-erebɛ?” 12Kyɛ a Yeezu naŋ da wa woŋ a lɛ, O da yeli ko ba la, “Noba naŋ taa laafeɛ ba boɔrɔ tegetegrɛ, kyɛ baalba la maŋ boɔrɔ tegetegrɛ. 13Yɛ gaa a te bɔ a yelbie ama tɛgɛ, ‘Nembaalonzoe la ka N boɔrɔ, a ba e bagmaale.’ N ba wa ka N boɔle nemmenne, kyɛ N waɛ la ka N boɔle yelbe-erebɛ.”
Ba Naŋ Soore Nɔleŋ Yɛlɛ
(Mak 2:18-22; Luk 5:33-39)
14Lɛ la ka Gyɔɔn Bati potuuribo da wa a Yeezu zie a wa soore O, “Bonso ka te ne a Faraziimine maŋ lenne noɔre boyi boyi kyɛ ka fo potuuribo ba lenne?” 15Ka Yeezu yeli ko ba, “Yɛ teɛrɛ ka a pɔgde tigri saama na toɔ̃ kono la kuori saŋ na a pɔgpaalaa serɛ naŋ be ba zie be? A beri waana la ka a serpaalaa koŋ la be ba zie, a lɛ saŋ la ka ba na maŋ leŋ noɔre. 16Neɛzaa daŋ ba de pɛmpaalaa liiri ne kpar-koraa, ka o naŋ e a lɛ a pɛmpaalaa na kyeɛ̃ yi la a kpar-koraa eŋɛ ka a lɛ vɛŋ ka a voɔre pãã maaleŋ waa kpoŋ lɛ. 17Kyɛ bee ka ba de dããpaala eŋ dããwo-korɔ poɔ. Ka anaŋ e a lɛ, ka a dãã wa fara, a woore na kyeɛ̃ la ka a dãã ne a woore zaa wɛ. Ba maŋ de la dããpaala eŋ wo-kpeɛne poɔ. Lɛ ka a dãã ne a woore zaa na are velaa.”
Yeezu Naŋ Seŋ Pɔglee Kaŋ Kũũ Poɔ Ane Pɔge Kaŋ Naŋ Nyɛ O Sammo
(Mak 5:21-43; Luk 8:40-56)
18A Yeezu naŋ da naŋ kyɛnɛ yele a yɛlɛ a korɔ ba la, ka a Naaŋmen die neŋkpoŋ kaŋ da wa o zie a wa gbi dumo, kyɛ yele, “Pampana ŋa ka n pɔgeyaa deɛ kpi, kyɛ wa de a fo nu pare o, o na leɛ-iri voorɔ la.” 19Ka a Yeezu ne O potuuribo iri a tuuro a dɔɔ. 20A tɔntɔbaalɛ la ka pɔge kaŋ naŋ da taa pɔg-pɛge baaloŋ a maŋ kyire zẽẽ faa zaa yuomo pie ne ayi, la wa gyeere a Yeezu puori a te seene O kpar-nɔzoɔrɔ, 21bonso, a pɔge da yeli la o poɔŋ, “Ka maa seene O bonsuuri yoŋ gba kyɛ N na nyɛ la sammo” 22A Yeezu naŋ wa leɛ kaa a nyɛ a pɔge la ka O yeli, “Nyɔge fo meŋɛ, N pɔgeyaa, fo yeldeebo eɛɛ la ka fo nyɛ sammo.” A tɔntɔbaalɛ ka a pɔge nyɛ sammo. 23A Yeezu naŋ da wa ta a puoruudie neŋkpoŋ na yiri, O da nyɛ la koŋkonemo ka ba ŋmaara kolaŋne, kyɛ ka neŋyaga daara taa, ka a zie zaa e nyambalaŋ lɛ, 24ka a Yeezu yeli, “Yɛ tage yi be; bonso, a pɔglee ba kpi, o gbire la.” O naŋ da yeli a ŋaa la ka a noba da laara O. 25Kyɛ a nembeɛoŋ naŋ da wa yi are a yeŋ poɔ, a Yeezu da te kpɛ la a zie na a pɔglee naŋ gaŋ, a te nyɔge o nu, ka o vaa-iri. 26A yɛlɛ ŋa pãã da yaare laare la a ba teŋɛ paaloŋ na zaa.
Yeezu Naŋ Saŋ Zɔnne Bayi
27A Yeezu naŋ da wa yi a be gɛrɛ, zɔnne mine bayi da tuuro O la, a kyeerɛ yele, “Zo te nyonono, Davil Bidɔɔ!” 28A Yeezu naŋ da wa te kpɛ a die, a dɔɔ zɔnne bama da wa la O zie; ka Yeezu soore ba, “Yɛ sage deɛ la ka N na toɔ̃ e la a yɛlɛ ama?” Ka ba yeli ko O, “Te sagɛɛ la Daana.” 29Lɛ la ka a Yeezu seene ba nimie kyɛ yeli, “Ka a e ko yɛ a seŋ lɛ yɛ naŋ sage de.” 30Ka a ba nimie da yuore. Lɛ la ka a Yeezu da kpãã ba nimizeɛ zaa, a yeli, “Yɛ ta wa manna a yeli ŋa korɔ neɛzaa.” 31Kyɛ ba da gaaɛ la a te ŋmɛ a Yeezu yɛlɛ yaare a ba teŋɛ paaloŋ zaa.
Yeezu Naŋ Saŋ Dɔɔ Muu Kaŋ
32Ba naŋ da wa gaa baare, ba da taa la dɔɔ kaŋ sefaare naŋ vɛŋ ka o e muu wa ne a Yeezu zie. 33A Yeezu naŋ wa digi a sefaa ka o yi baare la ka a muu ŋa da yele yɛlɛ, ka a lɛ maa a noba zaa noɔre, ka ba yele, “Te daŋ ba nyɛ a yeli ŋa tɔ a Izerayɛl teŋɛ poɔ.” 34Kyɛ ka a Faraziimine da yele, “A sefaare naa la ko O a kpeɛ̃õ ka O digre ne a sefaare bara.”
A Toma E La Yaga Kyɛ Ka A Tontonema Waa Fẽẽ
35Lɛ la ka a Yeezu da yoɔrɔ a teŋkponni ane a tembilii zaa poore a kanna a ba puoruuderi poore, a moɔlɔ a Ŋmen-yelnoore a kyaara ne a naaloŋ, kyɛ saŋna ba baaloŋ ane ba entol-boorɔ zaa. 36O naŋ da wa nyɛ a nembeɛoŋ, ba nembaaloŋ da kpɛ O la, bonso, ba da be la woore poɔ kyɛ ba taa soŋnɔ zaa, aŋa peere naŋ ba taa kyeenɛ. 37Lɛ la ka Yeezu yeli ko a O potuuribo, “A weɛ boma waa la yaga a seŋ kyeɛbo, kyɛ ka a kyɛkyeɛrebɛ waa fẽẽ lɛ. 38Azuiŋ, yɛ puoro sɔrɔ a weɛ soba ka o toŋ tontonema ka ba gaa te de a weɛ boma ka a kpɛ die.”
Aktuálne označené:
Mat 9: DNTTP
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First New Testament in Dagaare Language © The Bible Society of Ghana, 2013.
