Maqkuv 6
6
Naqzaqlaer Tsawrhaq, Yeqsur-anr Maq Hageuf-eu
Mt 13:53-58; Lk 4:16-30
1Khoernar-aq, Yeqsur khoergar nae dov-ir-awr, aqyawf-euq jawrkhanq-anr ghofler ngae, zaqlanr deuq khawf aqyawf-euq maeqnan cantae lef-euq mae. 2Landaw jawrnan keuvlar ngae, aqyawf, zanrdawq khawqnymr-euq lafkhoer danqbae-awr maeqnaeq tsovnaeq-euq mae. Yagaq-euq tsawrhaq deuq zanq duidui ler-awr heulof-aer aer-eu mae: “Tsawrhaq heughaq, teulof-aer aqgeugar nae mrnya laq-ir-euq nga? Aqyawf aqjox-aer ghae-eu zaqsiq tsawrganr zataq-awr, heunav nav-aer baoq huiq-eu gardeuq, aqyawf-euq aqlaf nae mrnya-eu nga! 3Aqyawf, lafmyawq lafsawv nya-eu khoerghaq maqngeur-a laq? Aqyawf, Maqliv-euq zaqyo, Yaqkov, Yorsaev, Yurdav hawr-eu Sirmoq, aqha maernmr-euq ardov dovsaq ghaq maqngeur-a lor? Aqyawf-euq dmrma deuq khawf heugar aqdui naeq-aer jawrluf-eu maqngeur-a laq?”
Aqyawfmaf, aqyawf-anr nuima maqsar-a. 4Yeqsur, aqyawf maf-anr aernaeq-eu, “Miqyaer gharduq ngaeqdan-eu tsawrhaq-aq, yawqgar navluf khanqsaer jav-eu mae. Aerkhawf, yawqha-euq jawrkhanq, yawqha-euq aqyuif aqnyir hawr-eu yawqha-euq nymrkhanq-euq lafkhoer-aq, khanqsaer maqjav-a.”
5Khoergar, Yeqsur baoq huiq-eu gar maq mrnya-aq. Aerkhawf, nar-eu tsawrhaq heumyav ghaq-anr aqlaf bafdav-awr lavtaq naeq-euq mae. 6Aqyawfmaf maqjan-eu mirnae, Yeqsur zanq duidui ler-euq mae. Khoernar-aq, Yeqsur khoergar tiqjawq jav-eu pudeuq-anr ir-awr, maeqnaeq tsovnaeq-ir-euq mae.
Ghaqkhaer 12 Ghaq-anr Khaerghae-euq
Mt 10:1,5-15; Lk 9:1-6
7Khoerngae, Yeqsur, ghaqkhaer 12 ghaq-anr kurlaf-awr, danqbae-awr nyiq ghaq tiqpaw, nyiq ghaq tiqpaw-aer bi’ir ngae, aqyawf maf-anr naef yawjawf deuq-anr ghaqler-eu aryaq bifnaeq-euq mae.
8Yeqsur, aqyawf maf-anr garma dov-ir-eu gharduq gawqyoeq maqngeur nar-aq, tiqjeq-iq taq yurghae, dzaqdzaq dawrdawr taq yurghae, paertanr taqshaf ghae, jofpaf-anr pyur khawf taq dawvanrghae. 9Paerkhanq nyiq kanr taq dmghae, saeqnawv nawqghae nar-aq ghaq-ar laer dawq bifnaeq-euq mae. 10Yeqsur, aqyawf maf-anr heulof-aer par aernaeq-euq mae: “Nawmaf aqgar irkeuv-euq maqkaq, nymr tiq nymr-anr naqler-euq nar-aq, khoergar nae dov-ir ngae keuvni, khoernymr-anr taef-aer jawr-awq. 11Aqgeugar jawr-eu tsawrhaq maqaer, nawmaf-anr maqha-aer, nawmaf-euq dawq maq narhaq nar-aq, nawmaf khoergar nae dov-ir ngae, aqyawf maf-euq yawlaeq bi dovlar-eu sarkir pyeufni, nawmaf-euq aqkuir paeqzaq-euq uqmov-euq khaqlaer byuqkhar yaf-awq. Ngar, nawmaf-anr aqdirma-aer aernaeq nyar, yarkhaqdar ngae nan, meuq khoermeuq-aq, Sordoq hawr-eu Gormorlav navmaqtser yadaq taef-a.”
12Khoernar-aq, ghaqkhaer deuq dov-ir-awr, tsawrhaqzaq noeqpov noeqpar-eu tsaq mae laer dawqmaeq maeq-ir-euq mae. 13Aqyawfmaf, naef ghawqmya mawr taedov-awr, nar-eu tsawrhaq ghawqmya ghaq-anr khawf tsir laefnaeq-awr bi taqler-euq mae.
Bartirsaq Mrnaeq-eu Yorhaq Shir-euq
Mt 14:1-12; Lk 9:7-9
14Khoerngae, Yeqsur-euq tsawrmyanr gaqdoe-ir luf-eu gar Sanqpaq Heqlor yagaq-awr aer-eu, “Bartirsaq mrnaeq-eu Yorhaq shir-euq gar nae ghofdaef lar-euq mirnae, baoq huiq duidui-eu khoerdeuq, Yeqsur mrdov luf-eu ngar-a.”
15Aerkhawf, tiqpavnav deuq aer-eu, “Aqyawf-aq, Erlirya nga.” Tiqpavnav deuq aer-eu, “Miqyaer gharduq ngaeqdan-eu tsawrhaq maqngeur nar-aq, arhuba-euq Miqyaer gharduq ngaeqdan-eu tsawrhaq-anr dur-eu tiq ghaq nga.”
16Aerkhawf, Heqlor yagaq ngae aer-eu, “Aqyawf-aq, ngaq nae uqduq tov-euq Yorhaq khoerghaq shir-euq gar nae ghofdaef lar-euq nga.”
17Heqlor heughaq-aq, aqyawf-euq maernmr Pirlirpuv-euq nymrdanq Heqlordir-anr sheuq-euq mae. Zaqmiq aqbur khoerghaq-euq baqda’nae, Heqlor, aqyawf-euq guirzaq-anr khaer-awr, Yorhaq-anr bi nyaeflaq-ir-awr, kuv-anr kaflanr taq-euq mae. 18Aqjeq mirnae aernar-aq, Yorhaq, Heqlor-anr heulof-aer aernaeq haw-euq mae, “Nawr, nawq-euq maernmr-euq nymrdanq-anr maq sheuqkhmq-a.” 19Khoermirnae, Heqlordir, Yorhaq-anr nuima paer duidui-awr saefmawf-eu mae. Aerkhawf, maq saefnya-a. 20Aqjeq mirnae aernar-aq, Yorhaq-aq, dawr-awr tsaq-eu uqtaf shawr-eu tsawrhaq tiq ghaq mae laer Heqlor siqnya-eu mirnae, aqyawf-anr guv-eu lafkhoer hawpir luf-eu mae. Heqlor-aq, Yorhaq maeq-eu dawq yagaq ngae, nuima tiqpawf-iq maqsar-eu khawf, aqyawf maeq-eu gar narhaqmawf duidui-eu mae.
21Khoerngae, lofluf-eu aryamq keuvlar-awr, Heqlor daefle-euq arnan-anr noeqkeuv-eu yawbuibui ngae nan, aqyawf-euq tsawrhuiq tsawrma deuq, sanrmr-eu yawgor deuq hawr-eu Gaqliqlaer mirkhanq-euq aqyuif deuq-anr kur-awr, dzaqtaf dawrtaf luf-eu mae. 22Khoerngae, Heqlordir-euq zaqmiq urlar-awr garnyae nyae-eu gar, Heqlor hawr-eu aqyawf naeq-aer jawq-awr dzaqluf-eu deuq nuikhanrshir duidui-eu mae.
Khoermirnae, Heqlor, aqbur khoerghaq-anr aernaeq-eu, “Nawr aqjeq geufmawf-eu nya laer ngaq-anr shar-awq. Nawr kharshar-eu jeq, ngar, nawq-anr bifnaeq ma.” 23Aqyawf, aqyawf-anr kamq-eu lafkhoer paraer-eu, “Nawr, ngaq-anr aqjeq shar-eu khawf, ngar, nawq-anr bif ma. Ngaq-euq mirkhanq tiq pav keuvni bif ma.”
24Khoerngae, aqbur khoerghaq dov-ir-awr, aqyawf-euq aqma-anr narhaq-eu, “Ngar aqjeq shar-eu paq nga?” Khoerngae, aqyawf-euq aqma aerkhof naeq-eu, “Bartirsaq mrnaeq-eu Yorhaq-euq uqduq shar-awq.”
25Khoerngae, aqbur khoerghaq, sanqpaq jawr-eu gar yawkawr-aer urler-awr aer-eu, “Bartirsaq mrnaeq-eu Yorhaq-euq uqduq, saerbyaer-anr dawvanr-awr nae, ngaq-anr yawkawr-aer ciqnaeq laf-eu gar geufmawf mir-a.”
26Sanqpaq noeqshaq duidui-eu khawf, aqyawf nae kamqtaq-euq baqda’nae hawr-eu, aqyawf naeq-aer jawq-awr dzaqluf-eu deuq-euq baqda’nae, aqyawf nae kamqtaq-euq dawq-anr maq leurmawf-a. 27Khoermirnae, tsawrhaq saef-eu tsawrhaq tiq ghaq-anr khaerghae-awr nae, Yorhaq-euq uqduq yawkawr-aer bi coerlaq-ir-euq mae. Tsawrhaq saef-eu khoerghaq kuv-anr ir-awr, Yorhaq-euq uqduq coertsaev-euq mae. 28Khoernar-aq, uqduq khoersiq saerbyaer-anr bafanr-awr, aqbur khoerghaq-anr ciqnaeq lar-euq mae. Aqbur khoerghaq khawf, aqyawf-euq aqma-anr ciqnaeq-ir-euq mae. 29Yorhaq-euq zaqlanr deuq garkawv khoer-anr yagaq ngae, Yorhaq-euq mawrdo baflaq lar-awr, lmqbymr-anr bafpanq-ir-euq mae.
Tsawrhaq 5,000 Ghaq-anr Bidzaq-euq
Mt 14:13-21; Lk 9:10-17; Yh 6:1-14
30Khoerngae, ghaqkhaer deuq, Yeqsur jawr-eu gar ghofuiq lar-awr, aqyawfmaf nae mr-awr shar-euq, maeq-awr tsov-euq jeq dawqtawvluf, aqyawf-anr dzawrnaeq lar-euq mae. 31Tsawrhaq ghawqmya’ni irtsaev lartsaev luf-eu mirnae, aqyawfmaf hawq dzaq-eu khawf maqdan-a. Khoermirnae, Yeqsur, aqyawf maf-anr aernaeq-eu, “Nawmaf lar-awq, bawrtsanq-anr cofngaerni ghae-eu gar ghaqnaq naq-ir kar-eur.” 32Khoermirnae, aqyawfmaf taef-aer lawq-anr ur-awr, bawrtsanq-anr cofngaerni ghae-eu gar ir-euq mae. 33Aerkhawf, aqyawfmaf dov-ir gar tsawrhaq baqmaf ya’mawr-awr, tsawrhaq ghawqmya’ni aqyawf-anr siqnya-euq mirnae, meuq yawqmeuq navluf-anr jawr-eu tsawrhaq deuq caevghae-awr, aqyawf maf-euq maeqhu nae caevkeuv taq-awr jawr-eu, Yeqsur jawr-eu gar lar-euq mae. 34Yeqsur, lawq-anr nae dovle ngae, tsawrhaq armaf mafma-anr ya’mawr-awr aqyawf maf-anr ghawqshaq gaq-eu mae. Aqjeq mirnae aernar-aq, aqyawf maf-aq, bo-eu ghaq maqjawr-eu yawr lof-aer dur-eu mae. Khoermirnae, Yeqsur, danqbae-awr aqyawf maf-anr garkawv ghawqmya jeq maeqnaeq tsovnaeq-euq mae.
35Uqcif cifle ngae, zaqlanr deuq, Yeqsur jawr-eu gar lar-awr aer-eu, “Heugar-aq, bawrtsanq nga. Uqcif khawf cifle shaw-iq ngar-a. 36Dzaq-eu jeq maqjav-eu mirnae, tsawrhaq heudeuq-anr pyaeq-awr dawqpae jav-eu meuqdeuq pudeuq-anr ir-awr, yawqha yawqha dzaqdzaq dawrdawr bi zeurdzaq-ir-awq.”
37Aerkhawf, Yeqsur, aqyawf maf-anr aernaeq-eu, “Nawmaf, aqyawf maf-anr tiqjeqpaq bidzaq-awq.”
Khoerngae, zaqlanr deuq aer-eu, “Nga’maf pyur 200 byav yur-awr, kaqmur zeurlaq-ir-awr nae, aqyawf maf-anr yabi dzaq-eu la laq?” 38Khoerngae, Yeqsur aer-eu, “Nawmaf ir-awr kaqmur armyav siq anr-eu nga laer haw-ir sher-eq.” Khoerngae, aqyawfmaf haw-ir-awr aerkhof-eu, “Kaqmur ngaq siq hawr-eu ngaqshaq nyiq mawr anr-eu nga.”
39Khoerngae, Yeqsur, aqyawf maf-anr dawq bif-awr nyoerjawfni ghae-eu yarmof-euq khoertav, tsawrhaq dawqtawv luf-anr armaf armaf-aer binuir-euq mae. 40Khoermirnae, tsawrhaq armaf mafma khoerdeuq, 100 ghaq tiq mur, 50 ghaq tiq mur laer armur armur-aer binuir-euq mae. 41Yeqsur, kaqmur khoer ngaq siq hawr-eu ngaqshaq khoer nyiq mawr yur-awr, mq paw haw-awr, Miqyaer-euq guiqlanq-anr jaceuq-euq mae. Khoernar-aq, kaqmur ngawqpyaeq-awr, zaqlanr deuq-anr ciqnaeq-awr nae, tsawrhaq armaf mafma deuq-euq maeqshi bi ciqtaq-euq mae. Ngaqshaq khoer nyiq mawr khawf tsawrhaq dawqtawv luf-anr birnaeq-euq mae. 42Aqyawfmaf yawqghaq navluf tiqdaev yadzaq-euq mae. 43Khoernar-aq, zaqlanr deuq dzaeqlar-euq kaqmur arpyaeq hawr-eu ngaqshaq arjaef deuq ghovuiq ngae, khavpuq 12 puq byanlar-euq mae. 44Kaqmur dzaq-euq tsawrhaq, zaqyo aqli taef-aer 5,000 ghaq byan-eu mae.
Yeqsur, Lan-euq Khoertav Can-euq
Mt 14:22-33; Yh 6:16-21
45Yeqsur, tsawrhaq armaf mafma deuq-anr bighof-ir luf ngae, zaqlanr deuq-anr-aq, lawq-anr yawkawr-aer biur-ir-awr, aqyawf-euq maeqhu nae lan-euq nuibaq paw jav-eu Baeqdzerdaq-anr bitsaev-ir tawq-euq mae. 46Yeqsur, tsawrhaq baqmaf deuq-anr pyaeq-awr bighof-ir-awr, aqyawf-aq, gawqjawq-anr le-awr guiqlanq sharler-euq mae.
47Uqcif cifle ngae, lawq khoerlawq, lan-euq ghanrcae irkeuv-awr, Yeqsur tiq ghaq taef-aer gawqjawq-anr jawrluf-eu mae. 48Jaqlaer baw-eu arpyawq maqtsaq-eu mirnae, zaqlanr deuq, lawq heu-eu ghaqdoerdoer duidui-eu gar aqyawf ya’mawr-euq mae. Uqbya byataw naqliq oeq laf-anr, aqyawf, lan-euq khoertav cancan-aer aqyawfmaf jawr-eu paw oeluf-awr, aqyawf, aqyawf maf-anr irdzeur-eu laer ghae-eu mae. 49Yeqsur, lan-euq khoertav canluf-eu gar zaqlanr deuq ya’mawr ngae, naef paq nga laer noeq-awr gur-eu mae. 50Aqjeq mirnae aernar-aq, aqyawfmaf yawqghaq navluf, aqyawf-anr ya’mawr-awr tsawqguv-ir-euq mae.
Khoerngae, Yeqsur, aqyawf maf-anr yawkawr-aer ngaeqcawq-awr aer-eu, “Taqguv, ngar le, nuima zifdanni ghae-awq.”
51Khoernar-aq, aqyawf, lawq-euq lafkhoer urler ngae, jaqlaer baw-eu naqler-euq mae. Khoerngae, aqyawfmaf zanq duidui ler-euq mae. 52Aqyawfmaf khoerlof-aer zanqler-eu-aq, nuima ghanrcawqni ghae-awr, kaqmur birnaeq-awr bidzaq-euq garkawv maq ghovshaw nya-eu mirnae mae.
Yeqsur-anr Toeqciv-euq Tsawrhaq Taqler-euq
Mt 14:34-36
53Khoerngae, aqyawfmaf, lan tsaevdov-awr, Geqneqsaqlaer mirkhanq-anr irkeuv-awr, lan landzer lawq paftawf yaf-euq mae. 54Khoernar-aq, aqyawfmaf, lawq-anr nae dov-ir ngae, tsawrhaq tiqpavnav deuq, Yeqsur nga laer tiqpov taef-aer hawsiq-euq mae. 55Tsawrhaq khoerdeuq, mirkhanq khoerkhanq doeni caevghae-awr, Yeqsur jawr mae laer kharaer-eu tsanr-anr, nar-awr gawr-eu tsawrhaq deuq-anr yufzar buibanq-anr nae baflaf-euq mae. 56Yeqsur khar irkeuv-euq pudeuq-anr, meuqdeuq-anr, yarkhanq yarlawq deuq-anr, aqcawq uiqlar duq-anr, nar-awr gawr-eu tsawrhaq-anr baftaq lar-awr, nar-awr gawr-eu heudeuq, nawq-euq paerkhanq paerdanq-anr taef-aer khawf bi toeqciv-awq laer Yeqsur-anr tanqshar-eu mae. Khoernar-aq, aqyawf-anr khar toeqciv-euq tsawrhaq dawqtawvluf taqler-euq mae.
Aktuálne označené:
Maqkuv 6: AKA
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
2018 ©
Bibles International ®
The Bible Society of Baptist Mid-Missions
