Maqkuv 3
3
Lafshir Shir-eu Bi Taqler-euq
Mt 12:9-14; Lk 6:6-11
1Yeqsur, zanrdawq khawqnymr-anr par urler ngae, khoergar, aqlaf tiq pyawq shir-euq zaqyo aqli tiq ghaq jawr-eu mae. 2Aqyawfmaf, Yeqsur-euq yawlaeq pov-awr daqler nya’ni, aqyawf landaw jawrnan ngae nan, nar-eu khoerghaq-anr lavtaqnaeq nga lor laer hawtsov taq-euq mae. 3Khoerngae, aqlaf tiq pyawq shir-euq khoerghaq-anr Yeqsur aernaeq-eu, “Heugar maeqhu paw yawflar-awq.”
4Yeqsur, aqyawf maf-anr narhaq-eu, “Landaw jawrnan ngae nan aqjeq mrkhmq-eu la? Yawmuiq jeq lor, yawdoer jeq laq, aqcawq-euq zir-anr bibuq-ir-eu lor, maqngeur nar-aq, lavsaef-eu laq?” Aerkhawf, tsawrhaq khoerdeuq ciqcurni jawr-eu mae.
5Yeqsur nuima paerpaer-aer aqyawf maf-euq tiqjawq haw-euq mae. Aqyawfmaf nuima ghanr-eu mirnae, Yeqsur noeqshaq-awr khoerghaq-anr aernaeq-eu, “Nawq-euq aqlaf cawqja-awq.”
Khoerghaq aqlaf cawqja ngae, taqler-awr yawqlafyawq lof-aer durlar-euq mae. 6Khoerngae, Paqliqsaer deuq dov-ir-awr, aqjox-aer ghae-awr nae Yeqsur-anr lavsaef-eu paq nga laer, tiqpov taef-aer Heqlor-euq tsawrhaq deuq naeq-aer bawqdzaq-ir-euq mae.
Tsawrhaq Armaf Mafma Uiqle-euq
7Yeqsur, aqyawf-euq zaqlanr deuq naeq-aer lan jav-eu paw ir ngae, Gaqliqlaer mirkhanq hawr-eu Yurdav mirkhanq-anr jawr-eu tsawrhaq ghawqmya’ni aqyawf-euq maeqnan cantae ghae-euq mae. 8Yeqlursaqlaeq, Irdurmaer mirkhanq, Yawrdaq lawrbaq-euq nanrma dovkhaeq paw, Durlu mirkhanq hawr-eu Sirdoq mirkhanq-anr jawr-eu tsawrhaq, aqyawf mrluf sharluf-eu garkawv yagaq-euq mirnae, baqmaf purjeq-aer Yeqsur jawr-eu gar oe-euq mae. 9Khoermirnae, tsawrhaq armaf mafma, aqyawf-anr maqya tanqsuf larni, aqyawf-euq gharduq lawq lawqzaq tiq lawq laeqhmq sher-eq laer Yeqsur, zaqlanr deuq-anr khaer-euq mae. 10Aqyawf, tsawrhaq ghawqmya ni-anr lavtaq naeq-euq mirnae, shaqzanq nargawr myaq-eu tsawrhaq dawqtawvluf, aqyawf-anr ya toeqcivni, aqyawf jawr-eu gar tan’urler luf-eu mae. 11Naef yawjawf deuq, aqyawf-anr kharmawr ngae, aqyawf-euq maeqshi awbyav-awr gur-eu, “Nawr-aq, Miqyaer-euq Zaqyo mae.” 12Aerkhawf, aqyawf, aqsur ghaq pyeuf-eu la laer taqbi siq de-eq laer Yeqsur, aqyawf maf-anr dawq yawkhav-aer bif-euq mae.
Ghaqkhaer 12 Ghaq Tserdov-euq
Mt 10:1-4; Lk 6:12-16
13Khoernar-aq, Yeqsur, gawqjawq-anr davler-awr, aqyawf nuima tsaq-eu tsawrhaq-anr kur ngae, aqyawfmaf, aqyawf jawr-eu gar lar-euq mae. 14Yeqsur, aqyawf naeq-aer bijawr-awr, dawqmaeq bimaeq-ir-eu gharduq, aqyawf maf-euq lafkhoer nae 12 ghaq-anr tserdov-euq mae. 15Aqyawf maf-anr nargawr lavsav-eu hawr-eu naef taedov-eu baoq bifnaeq-euq mae. 16Yeqsur nae Beqtuvluv laer myanrnaeq-euq Sirmoq, 17Zeqbeqdaer-euq zaqyo Yaqkov hawr-eu Yaqkov-euq aqnyir Yorhaq, Yeqsur, aqnyaf nmr-anr Bawrneqgaer laer myanrnaeq-euq mae. Dawqtsuif-aq, “Mqjeq tsawqtaev-euq Zaqyo” laer aermawf-eu mae. 18Aqdaeqlaeq, Pirlirpuv, Baqtawrlaqmaer, Maqtaeq, Tormav, Aqlaqpaer-euq zaqyo Yaqkov, Taqdaer, Kaqnaqnir-euq armur-anr taf-eu Sirmoq hawr-eu, 19Yeqsur-anr anqdzaq-euq Yurdav Irsaqgaqliqoq.
Yeqsur Hawr-eu Beqsaqburlar
Mt 12:22-32; Lk 11:14-23; 12:10
20Khoernar-aq, Yeqsur, irkanr-euq lafkhoer urler ngae, tsawrhaq armaf mafma par uiqlar-euq mirnae, aqyawfmaf hawqdzaq khawf maq dzaqnya-a. 21Yeqsur-euq aqyuif aqnyir deuq garkawv heu-anr yagaq ngae, “Aqyawf uq-ir-euq ngar-a” laer aer-awr, aqyawf-anr gheunaq-ir-eu laer dov-ir-euq mae.
22Khoerngae, Yeqlursaqlaeq-anr nae oe-euq zanr maeq-eu deuq aer-eu, “Aqyawf-euq lafkhoer Beqsaqburlar ur-eu nga. Teumirnae, aqyawf, naef sanqpaq-anr ghoe-awr naef-anr taedov nya-eu nga.”
23Khoerngae, Yeqsur, aqyawf maf-anr kuruiq laf-awr, yawjeq majeq dawq-anr nae heulof-aer maeqnaeq-euq mae: “Naef Saqdaq, naef Saqdaq-anr aqjox-aer taedov nya-eu? 24Mirkhanq tiq khanq-euq lafkhoer, birpav-awr muir-eu jeq jav nar-aq, mirkhanq khoerkhanq maqzif nya-ar. 25Nymrkhanq tiq khanq-euq lafkhoer, birpav-awr muir-eu jeq jav nar-aq, nymrkhanq khoerkhanq khawf, maqzif nya-ar. 26Naef Saqdaq khawf yawqhar yawqha birpav-awr, aqyawxyawf puiq-awr muir nar-aq, aqyawf khawf maq zifnya-aer piq-ir byov-ir taef-a. 27Tsawrhaq tiqghaq-iq, ghaqkhav aqda tiq ghaq-euq nymr-anr urler-awr, aqyawf-euq myawqganq maq yurgeuf nya-ar; Ghaqkhav aqda khoerghaq-anr jeqhu pafcuf ghaq-awr nae taef-aer, aqyawf-euq nymr-euq lafkhoer jav-eu myawqganq yurgeuf nya-eu mae.
28“Ngar, nawmaf-anr aqdirma-aer aernaeq nyar, tsawrhaqzaq nae mrbanq-euq yawqjeq navluf hawr-eu yaeqbawq saerlu-aer aer-euq yawqjeq navluf-euq iqbax-anr pyaeqnaeqnya taef-a. 29Aerkhawf, Yawshawr Saflar-anr yaeqbawq saerlu-aer kharaer-eu tsawrhaq-euq iqbax-anr-aq, tiqjawr-iq maq pyaeqnaeqni, khoerghaq mqmaq maqbyav yarzir iqbax naf-eu tsawrhaq pyeuf taef-a.” 30Zanr maeq-eu deuq, “Aqyawf, naef yawjawf ur-eu nga” laer aer-eu mirnae, Yeqsur khoerlof-aer aernaeq-euq mae.
Yeqsur-euq Aqma Hawr-eu Aqnyir Deuq
Mt 12:46-50; Lk 8:19-21
31Khoerngae, Yeqsur-euq aqma hawr-eu aqyawf-euq aqnyir deuq lar-euq mae. Aqyawfmaf lafnyir paw yawftawq-awr, Yeqsur-anr bi kurdov laqler-euq mae. 32Tsawrhaq armaf mafma, Yeqsur-euq tiqjawq nuirluf-eu mae. Aqyawfmaf, aqyawf-anr aernaeq-eu, “Nawqma hawr-eu nawq-euq maernmr deuq, nawq-anr povpov-aer lafnyir dawqluf-eu mae.”
33Khoerngae, Yeqsur, aqyawf maf-anr aerkhof naeq-eu, “Aqsur ghaq la, ngaq-euq aqma? Aqsur ghaq la, ngaq-euq maernmr?”
34Yeqsur, aqyawf-euq tiqjawq nuirluf-eu deuq-anr haw-awr aer-eu, “Haeq, ngaqma hawr-eu ngaq-euq maernmr deuq-anr hawsher-eq! 35Miqyaer nuima tsaqni kharmr-eu tsawrhaq deuq-aq, ngaq-euq maernmr, ngaq-euq dmrma hawr-eu ngaqma mae.”
Aktuálne označené:
Maqkuv 3: AKA
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
2018 ©
Bibles International ®
The Bible Society of Baptist Mid-Missions
