Maqtaeq 27
27
Yeqsur-anr, Pirlav Jawr-eu Gar Sheuqghae-euq
Mk 15:2-5; Lk 23:3-5; Yh 18:33-38
1Uqbya byalar ngae, pirma aqyuif deuq hawr-eu mirkhanq-euq aqyuif aqtsu deuq dawqtawvluf, Yeqsur-anr bishir ma laer bawqtsaev-euq mae. 2Khoernar-aq, aqyawfmaf, aqyawf-anr paf-awr meuqsanr Boqtiv Pirlav jawr-eu gar sheuqghae-awr, aqyawf-anr a’naeq-euq mae.
Yurdav, Yawqhar Yawqha Pafsaef-euq
Ghkh 1:18-19
3Khoerngae, Yeqsur-anr anqdzaq-euq Yurdav khoerghaq, yarkhaq dartsaev dzeur-euq gar ya’mawr ngae, aqyawf noeqpov lar-awr, pyur khoer 30 byav pirma aqyuif deuq hawr-eu aqyuif aqtsu deuq jawr-eu gar bifkhof ha-ir-euq mae.
4Aqyawf aer-eu, “Ngar iqbax maqanr-eu tsawrhaq-anr anqdzaq-euq mirnae, ngar iqbax mr-euq mir-a.” Khoerngae, aqyawfmaf aer-eu, “Khoer-aq, nawq-euq garkawv taef mae, nga’maf-anr aqjeq taf-eu la?”
5Yurdav-aq, pyur khoer uqduq tanqnymr nymrma-euq lafkhoer biqanr yaf-awr dov-ir-awr nae, yawqhar yawqha pafsaef-ir-euq mae.
6Aerkhawf, Pirma aqyuif deuq, pyur khoer ghovkhof-awr aer-eu, “Pyur heu-aq, shiq-euq arpoeq mirnae, uqduq tanqnymr nymrma-euq pyur naeq-aer maq dawvkeuq khmq-a.” 7Khoermirnae, aqyawfmaf tiqkawv lof-aer bawqdzaq-awr, maqsiq maqsux-eu tsawrhaq shir ngae bafpanq-eu gharduq, pyur khoer nae oeqlanq taev-eu tsawrhaq-euq mirtsaq tiq tsanr zeur-euq mae. 8Khoermirnae, mirtsaq khoertsanr-anr iqnan keuvni, Shiq-euq Mirtsaq laer kurluf-eu mae.
9Khoerngae, Miqyaer gharduq ngaeqdan-eu Yeqlaqmir nae aertaq-euq dawq heudawq byanlar-euq mae,
“Irsaqleqlav tsawrhaq deuq nae tsawrhaq tiq ghaq-euq arpoeq aertsaev-euq lof-aer, aqyawfmaf pyur 30 byav yur-awr, 10Sanqpaq Miqyaer nae ngaq-anr dawq biftaq-euq lof-aer, oeqlanq taev-eu tsawrhaq-euq mirtsaq tiq tsanr-euq poeq bif-euq mae.” (Zkl 11:12-13)
Pirlav, Yeqsur-anr Narhaq-euq
Mk 15:2-5; Lk 23:3-5; Yh 18:33-38
11Yeqsur, meuqsanr-euq maeqshi yawfluf ngae, meuqsanr, aqyawf-anr narhaq-eu, “Nawr, Yurdav tsawrhaq-euq Sanqpaq le lor?” Khoerngae, Yeqsur, aqyawf-anr aerkhof naeq-eu, “Nawr aer-eu lof-aer ngeur ma.” 12Pirma aqyuif deuq hawr-eu aqyuif aqtsu deuq, Yeqsur-euq khoertav iqbax taq ngae, aqyawf tiqjeq-iq maq aerkhof naeq-a. 13Khoerngae, Pirlav, aqyawf-anr narhaq-eu, “Aqyawfmaf, nawq-anr coeqlar-eu sarkir kamq-eu gar nawq-anr maq gaqlar nya lor?” 14Aerkhawf, Yeqsur, aqyawf-anr dawq tiq dawq taef-aer khawf maq aerkhof naeq-a. Khoermirnae, meuqsanr khoerghaq zanq duidui ler-euq mae.
Yeqsur Yashirni Dartsaev-euq
Mk 15:6-15; Lk 23:13-25; Yh 18:39-19:16
15Tsawrhaq armaf mafma deuq, kuv-anr ur-eu tsawrhaq tiq ghaq bi pyaeqdov mawf-eu lof-aer, yawbuibui ngae, meuqsanr pyaeqdov naeq-eu zanr jav-eu mae. 16Khoerngae yamq-anr, tsawrmyanr dov-eu Baqlaqbar laer kur-eu tiq ghaq kuv-anr ur-eu mae. 17Tsawrhaq armaf mafma uiqlar-awr jawr-eu gar, Pirlav, aqyawf maf-anr narhaq-eu, “Nawmaf, ngaq nae aqgeu ghaq-anr bi pyaeqnaeq mawf-eu nya? Baqlaqbar-anr lor? Maqngeur nar-aq, Kali laer kur-eu Yeqsur-anr laq?” 18Aqyawfmaf, Yeqsur-anr myavnav nav-eu mirnae, aqyawf jawr-eu gar nyaefha lar-euq nga laer Pirlav siqnya-eu mae.
19Pirlav yarkhaq dar-eu nuirmanq-anr nuirluf ngae, aqyawf-euq nymrdanq dawqtsaf heulof-aer tsafanr lef-euq mae, “Nawr, tsaq-awr dawr-eu tsawrhaq teughaq-anr tiqjeq-iq taqjanr. Iqnan ngar yufmav mav-eu lafkhoer, aqyawf-euq baqda’nae shaqzanq yadaq duidui-euq ma.”
20Baqlaqbar-anr pyaeq-awr Yeqsur-anr saef-awq laer aer de-eq laer pirma aqyuif deuq hawr-eu aqyuif aqtsu deuq, tsawrhaq armaf mafma-anr cawqtawv-euq mae.
21Khoernar-aq, meuqsanr narhaq-eu, “Tsawrhaq heu nyiq ghaq-euq lafkhoer nae, nawmaf, ngaq nae aqgeu ghaq-anr bi pyaeqnaeq mawf-eu nya?” Aqyawfmaf aer-eu, “Baqlaqbar!”
22Pirlav, aqyawf maf-anr narhaq-eu, “Tox-aer mar-iq, Kali laer kur-eu Yeqsur-anr ngar aqjox-aer ya janrnaeq-eu la?” Khoerngae, aqyawfmaf dawqtawvluf aer-eu, “Aqyawf-anr lafyaq-euq khoertav tafsaef-awq!” 23Khoerngae, Pirlav narhaq-eu, “Aqjeq mirnae? Aqyawf yawdoer aqgeu jeq mr-euq la?” Khoerngae, aqyawfmaf yawkhav-aer pargur-eu, “Aqyawf-anr lafyaq-euq khoertav tafsaef-awq!”
24Pirlav, aqyawf tiqjeq ghaenae-iq maq ghaqler nya-eu uqtaf, tsawrhaq luiqgha lar-eu taef ngar-a laer hawmawr ngae, ircuf ciq-awr tsawrhaq armaf mafma-euq maeqshi aqlaf dzuifdzuif-aer aer-eu, “Tsaq-awr dawr-eu tsawrhaq heughaq-euq shiq lavdov-euq iqbax ngaq-anr maqtaf de-eq, nawmaf-euq navni bijav ma.”
25Khoerngae, tsawrhaq armaf mafma dawqtawvluf aer-eu, “Aqyawf-euq shiq lavdov-euq arpoeq, nga’maf hawr-eu nga’maf-euq zaqdeuq-euq khoertav keuvle luf-ur.”
26Khoermirnae, Pirlav, aqyawf maf-euq gharduq Baqlaqbar pyaeqdov naeq-awr, Yeqsur-anr-aq, yanqcav nae yawkhav-aer juif-awr lafyaq-euq khoertav bi tafsaef-eu laer, aqyawf maf-euq aqlaf-euq lafkhoer a’naeq-euq mae.
Yeqsur-anr Aqjaf Jafnaeq-euq
Mk 15:16-20; Lk 22:63-65; Yh 19:2-3
27Khoerngae, meuqsanr-euq guirzaq deuq, Yeqsur-anr guirmaf dzoeqnymr-euq lafkhoer sheuqur lef-awr, guirzaq tiq mur murlanni, Yeqsur jawr-eu gar tiqjawq bi uiqlar-euq mae. 28Aqyawfmaf, aqyawf-euq paerkhanq nyaeflaev-awr, aqyawf-anr nertseuvni ghae-eu paerkhanq paermanr tiq kanr gheudm naeq-euq mae. 29Aqyawfmaf, aqgan cirni nae uqdzanq lof-aer dzeuf-awr, aqyawf-euq uqduq-anr bikhov-euq mae. Aqyawf-euq armar laf-anr artof-euq arkanq tiq kanq bi tuvtaeq-awr, aqyawf-euq maeqshi pawqtsuif pawqdmq dmq-awr aqjaf jafjaf-aer aer-eu, “Yurdav tsawrhaq-euq Sanqpaq zirbaw zirza luf-ur.” 30Khoerngae, aqyawfmaf, aqyawf-anr duqkhaq khashaeq-awr, artof-euq arkanq yur-awr, aqyawf-euq uqduq-anr juif-euq mae. 31Aqyawfmaf, aqyawf-anr aqjaf jafnaeq ghaq-euq nar-aq, aqyawf dmluf-eu paerkhanq paermanr nyaeflaev-awr, aqyawf-euq maeqtsoeq parbi dmkhof-awr nae, lafyaq-euq khoertav tafsaef-ir-eu laer aqyawf-anr sheuqdov ghae-euq mae.
Yeqsur-anr Tafsaef-euq
Mk 15:21-32; Lk 23:26-43; Yh 19:17-27
32Aqyawfmaf dov-ir luf ngae, Kurleqniq-anr jawr-eu Sirmoq laer kur-eu tiq ghaq-anr mawr-awr, aqyawf-anr katir-awr nae, Yeqsur-euq lafyaq bibaf-euq mae. 33Aqyawfmaf, Uqduqkhmq laer aermawf-eu, Gawrlaqgawrda laer kur-eu tsanr-anr lekeuv-euq mae. 34Guirzaq deuq, Yeqsur-anr pyaqkuir keuqtaq-euq aqgaf dzaruir yawcaer bidawr-euq mae. Aerkhawf, aqyawf myeufhaw-euq gar nae maqdawr-a.
35Khoerngae, aqyawfmaf, aqyawf-anr lafyaq-euq khoertav taftaeq-awr nae, aqyawf-euq maeqtsoeq shaevtsaq tsaq-awr birgeuf-euq mae. Khoer-aq, Miqyaer gharduq ngaeqdan-eu deuq nae aertaq-euq dawq heudawq byanlar-euq mae, “Aqyawf maf-euq yawkaq, ngaq-euq maeqtsoeq lafnyir kanr bifgeuf-awr, Ngaq-euq paerkhanq lafkhoer kanr shaevtsaq tsaqgeuf-euq mae.” (Jc 22:18)
36Khoernar-aq, aqyawfmaf khoergar nuir-awr, aqyawf-anr lofluf-eu mae. 37Aqyawfmaf iqbax taq-eu sanqbof heulof-aer bof-awr, aqyawf-euq uqduq-euq laftav pawdzer tafmyanq taq-euq mae: TSAWRHAQ HEUGHAQ-AQ, YURDAV TSAWRHAQ-EUQ SANQPAQ YEQSUR MAE.
38Khoerngae, tanrjoe nyiq ghaq-anr khawf, aqyawf naeq-aer tiqkawv lof-aer, armar paw tiq ghaq, arcar paw tiq ghaq laer lafyaq-euq khoertav taftaeq taq-euq mae. 39Khoergar nae irtsaev lartsaev luf-eu deuq naqlaf zeuvzeuv-aer, Yeqsur-anr yaeqbawq saerlu-aer aer-eu mae. 40Aqyawfmaf aer-eu, “Uqduq tanqnymr nymrma pyavdzae-awr, smq nan-euq lafkhoer tsovparkhof ma laer aer-eu ghaq-or! Yawqhar yawqha bibuq-ir-awq lawr. Nawr, Miqyaer-euq Zaqyo ngeur nar-aq, lafyaq-anr nae zafkale sher-eq.”
41Pirma aqyuif deuq, zanr maeq-eu deuq hawr-eu aqyuif aqtsu deuq khawf, aqyawf-anr khoerlof-aer aqjaf jafjaf-aer aer-eu, 42“Aqyawf, aqcawq-anr bibuq-ir nya-eu khawf, yawqhar yawqha maqbi buq-ir nya nga-eq. Aqyawf, Irsaqleqlav tsawrhaq-euq Sanqpaq ngeur nar-aq, nymq-mr aqyawf, lafyaq-euq khoertav nae bi zafka le-awq, aqduimaf, aqyawf-anr jan ma. 43Aqyawf, ‘Ngar-aq, Miqyaer-euq Zaqyo ma’ laer aer-eu mae. Aqyawf, Miqyaer-anr ghoe-eu ngar-a, Miqyaer, aqyawf-anr hageuf nar-aq, nymq-mr nae aqyawf-anr bibuq-ir luf-ur.”
44Aqyawf naeq-aer tiqkawv lof-aer lafyaq-euq khoertav bi taftaeq taq-euq tanrjoe khawf, aqyawf-anr khoerlof-aer aerdoer-eu mae.
Yeqsur, Lafyaq-euq Khoertav Shir-euq
Mk 15:33-41; Lk 23:44-49; Yh 19:25-37
45Nanlov caelar ngae nae, uqciftaw naqliq smr laf-anr keuvni, mirtsaq dawqtawvluf zanrtsuini pyeuf-ir-euq mae. 46Uqciftaw naqliq smr laf keuvlar ngae, Yeqsur tersar yawkhav-aer gur-eu, “Erlir, Erlir, laqmaq saqbartaqniq?” Dawqtsuif-aq, heulof-aer aermawf-eu mae,
“Ngaq-euq Miqyaer-or! Ngaq-euq Miqyaer-or! Aqjeq mirnae nawr, ngaq-anr byaerdzae naeqlaf-euq le?” (Jc 22:1)
47Khoergar yawfluf-eu tsawrhaq tiqpavnav deuq, aqyawf gur-eu gar yagaq-awr aer-eu, “Teughaq-aq, Erlirya-anr kur-eu nya!” 48Aqyawf maf-euq lafkhoer-euq tiq ghaq yawkawr-aer caevghae-awr, iqmalavshav-euq arhmr tiq pyaeq caermyawvni ghae-eu aqgaf dzaruir-anr dawvduiv-awr, artof-euq arkanq-anr ganrcuf-awr nae, Yeqsur-anr cawqmir naeq-awr bi cuvdawr-euq mae. 49Nuideuq aer-eu, “Taqtaeq law siq, Erlirya, aqyawf-anr kakhofle nga lor laer haw kar-eur.” 50Yeqsur tersar yawkhav-aer tiq ter par gurdov laf-awr saf tsaev-euq mae.
51Khoerngae, hawsher-eq, uqduq tanqnymr nymrma-euq lafkhoer tawtaq-euq lawvkaq saqpar khoer, laftav-anr nae lafov keuvni, nyiq pav-aer pyaqdov ghae-euq mae. Mirluv luvlar-awr, khaqlo loma deuq tsawqpav lar-euq mae. 52Lmqbymr khawf panlar-awr, yufkhavdzeur taq-euq tsawrshawr ghawqmya ghaq ghofdaef lar-euq mae. 53Yeqsur ghofdaeflar ghaq-euq nar-aq, aqyawfmaf lmqbymr-anr nae dovlar-awr, shawr-eu meuq-anr urlar-eu gar, tsawrhaq ghawqmya’ni aqyawf maf-anr ya’mawr-euq mae.
54Khoerngae, yardzoeq guirhuq hawr-eu aqyawf naeq-aer Yeqsur-anr lofluf-eu guirzaq deuq, mirluv luv-eu gar hawr-eu khar pyeuflar-euq deuq-anr ya’mawr ngae, guv duidui-ir-awr aer-eu, “Tsawrhaq heughaq-aq, aqdirma-aer Miqyaer-euq Zaqyo ngar-a!”
55Zaqmiq aqbur ghawqmya ghaq khoergar nae uicuiv garmanr kaq-eu gar jawr-awr hawluf-eu mae. Aqyawf maf-aq, Yeqsur, Gaqliqlaer mirkhanq-anr nae dovle ngae nae, aqyawf-euq maeqnan cantae cantae-aer, hawqmr dzarsafghae naeq-euq deuq mae. 56Aqyawf maf-euq lafkhoer, Maqliv Maqgaqdaqlar, Yaqkov hawr-eu Yorsaev-euq aqma Maqliv hawr-eu Zeqbeqdaer-euq zaqyo nyiq ghaq-euq aqma, khoerdeuq jawr-eu mae.
Yeqsur-anr Bafpanq-euq
Mk 15:42-47; Lk 23:50-56; Yh 19:38-42
57Uqcif cifle ngae, Aqlirmaqtaeq-anr jawr-eu Yorsaev laer kur-eu smrmuiq smrbaw tiq ghaq lar-euq mae. Aqyawf khawf Yeqsur-euq zaqlanr mae. 58Aqyawf, Pirlav jawr-eu gar le-awr, Yeqsur-euq mawrdo sharler-euq mae. Khoerngae, aqyawf-anr bi bafghae-awq laer Pirlav dawq bif-euq mae. 59Yorsaev, Yeqsur-euq mawrdo bafka-awr, shawrjaevni ghae-eu sheqsha#27:59 Sheqsha Heudawq-aq, Heqbyaer dawq mae. “Pishta” laer kur-eu arbawq-anr nae janrdov laf-euq zawr poeq-eu saqpar-anr aermawf-eu mae. saqpar nae mawrtawv tawv-euq mae. 60Khoernar-aq, aqyawf, yawqha-euq gharduq khaqlo-anr taftaq-euq lmqbymr yawshuif-euq lafkhoer bafpanq-ir-euq mae. Lmqbymr-euq ghaqkhaeq-anr khaqlo loma nae laeqtsoeq yaf-awr ghofler-euq mae. 61Khoerngae yamq-anr, Maqliv Maqgaqdaqlar hawr-eu Maqliv laer kur-eu yawqghaqyawq khawf, khoergar lmqbymr paw maeqshiq ciqpyawr-awr nuirluf-eu mae.
Lmqbymr-anr Bilof-euq
62Zanr janr-eu gharduq laeqhmq-eu nishawq ngae nan, pirma aqyuif deuq hawr-eu Paqliqsaer deuq Pirlav jawr-eu gar uiqlar-awr heulof-aer aernaeq-euq mae, 63“Sanqpaq-or! Aqcawq-anr sheuqbanq-eu khoerghaq daefluf ngae, aqyawf, ‘Smq nan byanlar nar-aq, ngar ghofdaeflar ma’ laer aer-eu gar nga’maf noeqtaq-euq ma. 64Khoermirnae, aqyawf-euq zaqlanr deuq uqcif paw aqyawf-euq mawrdo bafkhoeq-ir-awr, ‘Aqyawf shir-euq gar nae ghofdaef lar-euq mae’ laer aqcawq-anr maqya ja’naeq-ir ni, smq nan keuvni lmqbymr-anr yawmuiq-aer lofpir-awq laer dawq bif-awq. Maqngeur nar-aq, yawbae sheuqbanq-euq navmaqtser, arnan sheuqbanq-eu-aq, par doerdzaeq taef-a.”
65Pirlav, aqyawf maf-anr aernaeq-eu, “Nawmaf, lofpir-eu tsawrhaq jawr-eu mae. Ghof-ir-awr yawmuiq-aer bi lofpir-ir-awq.”
66Khoernar-aq, aqyawfmaf lofpir-eu deuq sheuq-awr ir-awr, khaqlo-anr zifdanni laefghoeq-awr, lmqbymr-anr yawmuiq-aer bi lofpir-euq mae.
Aktuálne označené:
Maqtaeq 27: AKA
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
2018 ©
Bibles International ®
The Bible Society of Baptist Mid-Missions
