Maqtaeq 24
24
Uqduq Tanqnymr Nymrma Yapyav-ir-eu
Mk 13:1-2; Lk 21:5-6
1Yeqsur, uqduq tanqnymr nymrma-anr nae dovle-awr canluf ngae, aqyawf-euq zaqlanr deuq lar-awr, uqduq tanqnymr nymrma tsovmuiq taq-euq gar aqyawf-anr toeqmaeq-euq mae. 2Yeqsur, aqyawf maf-anr aernaeq-eu, “Nawmaf heudeuq dawqtawv luf-anr mawrluf-eu ngar-a. Ngar, nawmaf-anr aqdirma-aer aernaeq nyar, khaqlo tiqsiq-euq khoertav tiqsiq jav-eu heudeuq dawqtawvluf, tiq siq taef-aer khawf maqbi dzaeqlarni yabi daepyav dzaejir taef-a.”
Arsaq Saq-eu Aryamq Paelar-euq
Mk 13:3-14; Lk 21:7-19
3Yeqsur, Saqloq gawqjawq-anr nuirluf ngae, zaqlanr deuq taef-aer ciqcurni aqyawf jawr-eu gar lar-awr Yeqsur-anr narhaq-eu, “Heudeuq aqmyan pyeuflar-eu la? Nawr zafka le-eu hawr-eu mirtsaq heu arsaqsaq ngae pyeuflar-eu deuq, bisiq bimawr-eu jeq aqjeq jav-eu la laer nga’maf-anr ja’maeq naeqlaf-awq.”
4Khoerngae, Yeqsur, aqyawf maf-anr heulof-aer aerkhof naeq-euq mae: “Nawmaf, aqcawq nae maqbi sheuqbanq ghaeni yanr-awq. 5Aqjeq mirnae aernar-aq, tsawrhaq ghawqmya’ni, ngaq-euq tsawrmyanr-euq lafkhoer oe-awr, ‘Ngar-aq, Kali ma’ laer aeraer-aer, tsawrhaq ghawqmya ni-anr sheuqbanqghae taef-a. 6Guirdeuv deuvluf-eu gar hawr-eu guirdeuv deuv-eu laer ghaeluf-eu gar nawmaf yagaq taef-a. Aerkhawf, taq tsawqguv-ir. Aqjeq mirnae aernar-aq, khoerdeuq dawqtawvluf maq pyeuflar-aer maq ghaenya-a. Aerkhawf, arsaq saq-eu maqngeur-a siq. 7Tsawrjeuq tiqjeuq tirjeuq, mirkhanq tiqkhanq tirkhanq deuvcaecae taef-a. Ghawqmya gar maef-awr shuf-eu jeq, zawr ghae-eu nargawr hawr-eu mirluv luvlar taef-a. 8Heudeuq dawqtawvluf shaqdui zanq duidui-eu ardanq bae-eu taef-a siq.
9“Khoerngae, aqyawfmaf, nawmaf-anr khaeq-awr khav-eu jeq-euq lafkhoer a’naeq-awr nawmaf-anr saef taef-a. Ngaq-euq tsawrmyanr baqda’nae, mirkhanq-euq tsawrjeuq dawqtawvluf nawmaf-anr byae taef-a. 10Khoerngae, tsawrhaq ghawqmya’ni, ngaq-anr sanqtif tif-awr byaerdzae taef-a. Aqyawfmaf tiqghaq tirghaq anqdzaq-awr, tiqghaq tirghaq byae taef-a. 11Khoeruqtaf, Miqyaer gharduq ngaeqdan-eu jaqmyawf deuq ghawqmya’ni dovle-awr, tsawrhaq ghawqmya ni-anr sheuqbanqghae taef-a. 12Zanrdawq-anr leur-eu jeq myaqlar-eu mirnae, tsawrhaq ghawqmya ghaq-euq gaq-eu jeq, ngaeq-aer nar-aq ngaeq-aer cof-ir byov-ir taef-a. 13Aerkhawf, arsaqsaq ngae keuvni zif-eu tsawrhaq-aq, yabuq-ir taef-a. 14Miqyaer uvlanr-eu guiqlanqdawq heu, mirtsaq tanqkhawr doeni dawqmaeq ya’maeq-ir-awr, mirkhanq-euq tsawrjeuq dawqtawv luf-anr sarkir ya kamqnaeq-ir taef-a. Khoernar-aq, arsaq saq-eu aryamq keuvle taef-a.
Shaqdui Zanq Duidui-eu Jeq
Mk 13:14-23; Lk 21:20-24
15“Miqyaer gharduq ngaeqdan-eu Daqyeqlar nae aertaq-euq lof-aer, nawmaf, ‘Ardzaeq-aer jawf-awr lavcawvbyov jirnya-eu jeq’ yawshawr jawrduq-anr katur taq-euq gar ya’mawr ngae,” (Yaerbof heu-anr gui-eu tsawrhaq ghovshaw luf-ur).
16“Yurdav mirkhanq-anr jawr-eu tsawrhaq deuq, danrtav caevdav ler-awq. 17Nymrmq-anr dav-eu tsawrhaq zafkale ngae, irkanr-euq lafkhoer myawq taq yurlaqler. 18Daeyar-anr jawr-eu tsawrhaq ghofler-awr yawqha-euq maeqtsoeq taq yurlaqler. 19Khoerngae yamq-anr aqnyir piluf-eu deuq hawr-eu aqcoer dawr-eu zaqnanq-euq aqma deuq, ghawqshar shaq-aer ya ghaesaef taef-a. 20Nawmaf yacaev-eu arnan aryamq khoer, tsanqgav yamq hawr-eu landaw jawrnan-anr maqya tsaqlarni guiqlanq shar-awq. 21Aqjeq mirnae aernar-aq, mirtsaq bae ngae nan-anr nae iqnan keuvni maq pyeuflar haw-euq uqtaf, aqkar khawf maq pyeuflar-eu shaqdui zanq duidui-eu jeq khoerngae keuvle taef-a. 22Arnan aryamq khoer maq lavnymr nar-aq, tsawrhaq tiqghaq-iq maqbuq-ir nya-ar. Aerkhawf, tserdov taq-euq tsawrhaq deuq-euq gharduq sharnoeq-awr, arnan aryamq khoer lavnymr taef-a.
23“Khoerngae, tsawrhaq tiqghaqnav, nawmaf-anr, ‘Hawlar-awq, Kali heugar jawr nga.’ ‘Kali khoergar jawr mae’ laer aernaeq laf-eu khawf, nawmaf taqjan. 24Aqjeq mirnae aernar-aq, Kali jaqmyawf deuq hawr-eu Miqyaer gharduq ngaeqdan-eu jaqmyawf deuq dovle-awr, ghaenya nar-aq, Miqyaer nae tserdov taq-euq tsawrhaq deuq-anr sheuqbanq ghaeni, huiq duidui-eu bisiq bimawr-eu jeq hawr-eu zanq duidui ler paq-aer ghae-eu jeq, aqyawfmaf janrmaeq taef-a. 25Hawsher-eq, maq pyeuflar-euq minav-aer ngar, nawmaf-anr aernaeq-eu ma.
26Aqyawfmaf, nawmaf-anr, ‘Haw-ir-awq, Kali bawrtsanq-anr jawr mae’ laer aerlar-eu khawf, nawmaf taqhaw-ir. ‘Hawlar-awq, Kali, nymr-euq lafkhoer jav-eu kuvlawv-euq lafkhoer jawr mae’ laer aerlar-eu khawf, nawmaf taqjan. 27Aqjeq mirnae aernar-aq, nanrma dovkhaeq paw mqmyawf myawf-eu, nanrma gakhaeq paw byakeuv-ir-eu lof-aer, Tsawrhaq-euq Zaqyo zafkale ngae khawf khoerlof-aer dur taef-a. 28Shirtaq-euq mawrdo aqgar ga nar-aq, jeqshir khaqdzer khawf khoergar uiqler taef-a.
Tsawrhaq-euq Zaqyo Zafka Le-eu
Mk 13:24-27; Lk 21:25-28
29 “Shaq-awr zanq-eu aryamq khoer dzeur-euq naeq-aer, nanrma zanrtsuini pyeuf-ir-awr, bala khawf yawshaef maqpar bya-aer, aqguir deuq mq-anr nae gaka le-awr, mqtav-euq baoq dawqtawvluf nyaenyae-aer ghaelar taef-a. (Isy 13:10; 34:4)
30Khoerngae, Tsawrhaq-euq Zaqyo-euq bisiq bimawr-eu jeq mq-anr ya’mawr taef-a. Mirtsaq-euq khoertav-euq tsawrjeuq tsawrca dawqtawvluf tsawrngoerngoer taef-a. Tsawrhaq-euq Zaqyo, baoq hawr-eu huiq duidui-eu yawshaef khanqsaer-euq lafkhoer, mq-euq khoertav-euq mqdmr-anr dziq-awr nae zafka le-eu gar aqyawfmaf ya’mawr taef-a. 31Khoerngae, darhae yawkhav-aer baw-awr, aqyawf, mqtav ghaqkhaer deuq-anr khaerghae-awr nae, mirma oeqcoer oeqbawq-anr luf, mq heudzer-anr nae khoerdzer-anr dovni, aqyawf nae tserdov taq-euq tsawrhaq deuq-anr bi kuruiqlaf taef-a.
Siqguq Arbawr-anr Haw-awr Yamqlaw Tof-awq
Mk 13:28-31; Lk 21:29-33
32“Nawmaf, siqguq arbawr-anr haw-awr dzawgeuf-awq. Arbawr khoer, lafmyav-anr bawnmq nmqlar-awr, pafcoev coevlar-euq nar-aq, jawrla yamq dovle shaw-iq ngar-a laer nawmaf siqnya-eu mae. 33Khoerlof-aer durni, garkawv heudeuq dawqtawvluf pyeuflar luf-eu gar nawmaf ya’mawr ngae, aryamq khoeryamq paele luf-awr, ghovkhaeq-anr oekeuv-euq ngar-a laer siqnya-awq. 34Ngar, nawmaf-anr aqdirma-aer aernaeq nyar, khoerdeuq dawqtawvluf heuzir maqjir-euq minav-aer maq pyeuflar-aer maqdzeur-ir nya-ar. 35Mqmir byov-ir taef-a. Aerkhawf, ngaq-euq dawq tiqjawr-iq maqbyov-ir-ar.
Tiqghaq-iq Arnan Aryamq Maq Siqnya-a
Mk 13:32-37; Lk 17:26-30,34-36
36“Tiqghaq-iq arnan hawr-eu aryamq khoer-anr maq siqnya-a. Mq-euq khoertav jawr-eu mqtav ghaqkhaer deuq khawf maq siqnya-a. NgaqDa taef-aer siqnya-eu mae. 37Noraq-euq arnan-anr aqjox-aer pyeufyaf-euq ngeur nar-aq, Tsawrhaq-euq Zaqyo zafkale ngae khawf, khoerlof-aer pyeuflar taef-a. 38Noraq, lawq lawqma-euq lafkhoer urler ngae nan keuvni, ircuf maq danqpymq le-euq siq khoer, tsawrhaqzaq dzaqluf dawrluf-eu uqtaf, miqzaq sheuq, smrmir irluf-eu mae. 39Maqnoeq maqdur-aer jawr ngae, ircuf danqlar-awr, aqyawfmaf dawqtawv luf-anr gheupuf saefjir-euq mae. Tsawrhaq-euq Zaqyo zafkale ngae khawf, khoerlof-aer dur taef-a. 40Khoerngae, tsawrhaq nyiq ghaq, daeyar-anr jawrluf-eu gar, tiq ghaq-anr sheuqghae-awr, tiq ghaq-anr bi jawryaf taef-a. 41Zaqmiq aqbur nyiq ghaq caermeu laeqlaeq-aer jawrluf-eu gar, tiq ghaq-anr sheuqghae-awr, tiq ghaq-anr bi jawryaf taef-a.
42“Nawmaf-euq Sanqpaq Miqyaer aqgeu ngae nan oekeuv-eu la laer nawmaf maq siqnya-eu mirnae, yawbeur beur-aer jawr-awq. 43Aerkhawf, nawmaf heu-anr siqnya-awq. Nymrsanr ghaq, smrkhoeq khoeqlar-eu aryamq-anr siqnya lawnmr-aq, smrkhoeq khoerghaq, aqyawf-euq irkanr maqbi urlar-aer aqyawf-euq nymr maqbi daepyavni lofpir taef-a. 44Khoermirnae, nawmaf khawf yawmuiq-aer laeqhmqdan taq-awq. Aqjeq mirnae aernar-aq, nawmaf maqnoeq maqdur-aer jawr ngae, Tsawrhaq-euq Zaqyo zafkale taef-a.
Sarjax Zif-eu Hawr-eu Maqzif-eu Kuirlaf Zaqkhav
Lk 12:41-48
45“Sarjax zif-awr tsawrganr anr-eu kuirlaf zaqkhav aqgeu ghaq la? Yawsanr ghaq nae nymrkhanq-euq zaqdeuq-anr aryamq tsaq ngae, bidzaq bidawr-awr bi hawlanr-eu gharduq, khaertaq-euq kuirlaf zaqkhav khoerghaq mae. 46Aqyawf-euq yawsanr ghaq ghofle ngae, khoerlof-aer mrluf-eu kuirlaf zaqkhav ghaq-anr ya’mawr nar-aq, kuirlaf zaqkhav khoerghaq guiqlanqhuiq taef-a. 47Ngar, nawmaf-anr aqdirma-aer aernaeq nyar, nymrsanr ghaq, kuirlaf zaqkhav khoerghaq-anr myawqganq dawqtawv luf-anr hawlanr-eu ghaq bigeuf taef-a. 48Aerkhawf, kuirlaf zaqkhav yawdoer nar-aq, ‘Ngaq-euq yawsanr ghaq yawkawr-aer maq ghofle-ar’ laer, nuima-euq lafkhoer noeqnoeq-aer, 49danqbae-awr, kuirlaf zaqkhav nuideuq-anr diq-eu uqtaf, jirbaq dawryaef-eu tsawrhaq naeq-aer dzaqluf dawrluf nar-aq, 50kuirlaf zaqkhav khoerghaq, yawsanr ghaq-anr maqlofni jawr ngae nan, maq noeqkeuv-euq aryamq-euq lafkhoer, aqyawf-euq yawsanr ghaq ghofkeuvle taef-a. 51Khoernar-aq, aqyawf-anr nyiq tsaev coertsaev-awr, yawmuiq janrgeuf-eu tsawrhaq-anr lof-aer shaqbymr bi’of taef-a. Aqyawf khoergar jawr-awr noeqshaq duidui-eu lafkhoer ngoerngoer-aer seuq yateuf taef-a.
Aktuálne označené:
Maqtaeq 24: AKA
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
2018 ©
Bibles International ®
The Bible Society of Baptist Mid-Missions
