Lukə̀ 19

Yěsû pobə Sàkyâ

1Yěsû à lə̀ kwuunə̀ mə ndàŋə̀ amwuə àlaʼà Jèrikò. 2Àtwuə̀ ngàŋə̀ nkẅiirə̀ pɨ̀taghə̀ ghùtse à lə̀ pə ghu, nɨ̀linə̀ ɨ̀tse pə Sàkyâ nkɨ mbə ngàŋə̀ nkabə̀. 3À lə̀ mə ntàʼà a nɨ zəənə̀ ŋònə̀ nɨ Yěsû à lə̀ pənə ẅèrə, la mbə mətùmə ŋwùə̀, àpùŋə̀ pə̀ənə̀ a nàanə̀ e.

4À lə̀ làŋə̀ nkɨ̀ɨrə̀ ndèrə̀ a mbyə̀ nkoʼò àtwuə̀ àtɨ̀ghə sàa mbə̀ʼə zəənə̀ a Yěsû wə̀, ntiinə à lə̀ pənə làŋə̀ a nɨ̀pwùnə alyiʼə ghu. 5Nkwùə̀ nɨ Yěsû à lə̀ tônə mbyàa alyiʼə ghu, à lə̀ naŋə̀ àtɨ̀ghə nshwəŋə̀ ambo Sàkyâ lo, “Sàkyâ, faʼa nshwuʼə̀ àtwuə̀ àtɨ̀ghə za ntiinə mbɨ lyə̂ la a ndâ ghò sìnə̀ wə̀.”

6Sàkyâ à lə̀ tyiʼə̀ nkɨ̀ɨrə̀ nfurə̀ àtwuə̀ àtɨ̀ghə nshwuʼə̀, nkẅiirə̀ a Yěsû nɨ nɨ̀ghaʼà. 7Pànə̀ pɨ̀tsùmə̀ nɨ pɨ̀ lə̀ zəənə̀nə lə̀ pìʼnə̀ a nɨ lẅùmpə̀ nshwəŋə̀ lo, “À ghə̀ nkwuunə̀ a ndâ ngàŋə̀ ngɨ̀rə̀ ɨ̀nwùə̀ tɨ̀pòŋə̀ wə̀ lo kɨ ghaanə̀ e?”

8Sàkyâ à lə̀ tyiʼə̀ ndòo a ɨ̀shyə̂ nshwəŋə̀ ambo Ndòʼnə̀mbyə̂ lo, “Naŋə̀ mbǎ Ndòʼnə̀mbyə̂! Mbɨ ghàbə̀ ɨ̀pwuumə̀ ɨ̀pâ ŋŋâ taʼà àpàa ambo ngàŋə̀ àfumə̀, a pə lo ndə̀ ghɨ̀rə̀ mə nkòbə̀ aŋunə ŋwùə̀ nkẅiirə̀ àzwuumə̀ e, yi mbɨ kẅuə̀ zèrə nkwùə̀ nɨ̀kwàa.” 9Yěsû a tyiʼə̀ nshwəŋə̀ ambo ze lo, “Pànə̀ pɨ ndâ ghə̀ chwarə̀ ntiinə ŋònə̀ wə̀ à kɨ mbə la tyìʼə̀ moonə̀ ngẅàrə̀ Abràhamə̀. 10Mbə̀ʼnə Moonə̀ Ŋwùə̀ à lə̀ tô la a nɨ tàʼà pànə̀ pyə̀ nɨ pɨ pînə chwarə̀ a ghobə.”

Àshwəŋnə̀ nàanə nàanə mbə̀ʼə ɨ̀fò wa nɨ pànə̀ lə̀ twuunə̀nə e la

(Mat 25.14-30)

11Tsaʼnə pànə̀ lə̀ mənə nzhwiʼtə̀ ɨ̀nwùə̀ pèrə pə la, à lə̀ tyiʼə̀ nshwəŋə̀ àshwəŋnə̀ nàanə nàanə ambo pobə ntiinə a lə̀ kɨ pəla nɨ à lèrə̀ mə ntyiʼə̀ mmə nkwuunə̀ a Yèrusalèmə̀, pànə̀ tyiʼə̀ nkwàŋə̀ lo Nẅùə̀ à pìʼnə̀ a nɨ puʼtə̀ pə̀ənə̀ ɨ̀pe tyìʼə̀ nkwùə̀ ghu. 12Lenəla a shwəŋə̀ lo, “Nkùmə ɨ̀tse à lə̀ lèrə̀ àlaʼà a ndyə̌ sàa ɨ̀tse, pɨ̀ zoʼò e tsaʼa ɨ̀fò â pòŋə̀ kẅirə̀ kwə̂. 13À lə̀ kɨ furə̀ la mbyə̀ nfuŋə̀ ngàŋə àfàʼà ɨ̀ze nɨ̀ghumə̀, ŋŋâ ghobə nɨ taʼà taʼà nkabə̀ nshwəŋə̀ ambo pobə lo, ‘Nɨ̀ ghə̀ ntaŋə̀ a mɨ̀tàanə nɨ nkabə̀ zə̀ mbyàa njyə̂ nɨ mbɨ kẅirə̀ kwə̂.’ 14La ngàŋə àlaʼà ɨ̀ze za lə̀ mə mbàanə̀ e, a furə̀ ndèrə̀ pobə tyiʼə̀ ntsàa pə̀ənə̀ lo pɨ̀ zùŋə̀ e nshwəŋə̀ ambo ze lo, ‘Ka pəə kòŋə̀ a wəə lo ŋònə̀ wə̀ a pə ɨ̀fò ɨwəə.’

15“La pɨ lə̀ zoʼò a ŋònə̀ wa tsaʼa ɨ̀fò a kẅirə̀ nkwə̂. Tsaʼnə à lə̀ kẅirə̀nə nkwə̂ la, à lə̀ tyiʼə̀ ngɨ̀rə̀ pɨ fuŋə̀ ngàŋə àfàʼà ɨ̀ze za nɨ à lə̀ ŋânə nkabə̀ ambo pobə la mbə̀ʼə zhyə̂ àpìi nɨ pobə taŋə̀nə a mɨ̀tàanə mbə nɨ zèrə. 16Ghù ntsàambyə̀ a tô nshwəŋə̀ ambo ze lo, ‘Tǎ, ǹtaŋə̀ a mɨ̀tàanə wa mbə nɨ àpìi nkabə̀ nɨ̀ghumə̀ nkẅìʼnə̀ aŋunə maa mɨ̀tàanə wa.’

17“A shwəŋə̀ ambo ze lo, ‘Wə̀ ghɨ̀rə̀ ɨ̀shìʼnə̀ mbǎ ngàŋə̀ àfàʼà ɨ̀shìʼnə̀! Tsaʼnə wə̀ fàʼnə nɨ ntɨŋmə̀ o ɨ̀tsùmə̀ nɨ mɨlyiʼə nkabə̀ la, mbɨ ghɨ̀rə̀ wə̀ puʼtə̀ mɨ̀mbòmpə mɨ ɨ̀laʼà mɨ̀ẅùunə nɨ̀ghumə̀.’ 18Àpaatə̀ ngàŋə̀ àfàʼà wa a tô nshwəŋə̀ ambo ze lo, ‘Tǎ, ǹtaŋə̀ a mɨ̀tàanə nɨ nkabə̀ za nɨ wə̀ lə̀ ŋânə la mbə nɨ nkabə̀ ɨtaanə̀.’ 19A shwəŋə̀ ambo ze lo, ‘Wə̌ puʼtə̀ mɨ̀mbòmpə mɨ ɨ̀laʼà mɨ̀ẅùunə mɨntaanə̀.’

20“Àpaatə̀ ngàŋə̀ àfàʼà nɨ a lə̀ pənə nòmbàa pɨtarə a tô nshwəŋə̀ lo, ‘Nkabə̀ o za ɨ̀ zə̀, ndə̀ nkẅiirə̀ a zèrə la nkorə̀ amwuə àpàa atsəʼə ntsùŋə̀ ndòʼnə̀. 21Ndə̀ mə mbô mə̀ a ghò, ntiinə wə̀ wa ntsə̂ tɨsɨŋnə. Wə̀ wa ndyàa ɨ̀pwuumə̀ nɨ ka wə̀ nùŋə̀ o, mmə nfùʼù mɨ̀zɨghə̀ nɨ ka wə̀ pyə̀ o. 22Ngàŋə̀ àfàʼà tɨ̀pòŋə̀! Mbɨ lòo la tyìʼə̀ ɨ̀shwəŋnə̀ nɨ furə̀nə a ntswùə̀ ghò chyâ ngəʼə̀ àtwuə̀ ghò. Wə̀ zhyə̂ lo ngwa ntsə̂, ndòo ɨ̀pwuumə̀ alyiʼə nɨ ka nnùŋə̀ mə̀, nkɨ nfùʼù mɨ̀zɨghə̀ alyiʼə nɨ ka mbyə̀ mə̀. 23A lə̀ ghɨ̀rə̀ àkə wə̀ ka ghə̀ lòʼnə̀ o nkabə̀ mə̀ amwuə ndâ nɨ pɨ pa ndòʼnə̀ nkabə̀ amwuə mbə̀ʼə n̂tô kwə̂ nkẅiirə̀ a zèrə nɨ àpìi?’

24“A tyiʼə̀ nshwəŋə̀ ambo pànə̀ nɨ pɨ lə̀ təəmə̀nə alyiʼə ghu lo, ‘Nɨ̀ kẅiirə̀ nkabə̀ za ambo ze ŋŋâ ambo ŋònə̀ nɨ à twuʼtə̀nə nkabə̀ nɨ̀ghumə̀ la.’ 25Pobə shwəŋə̀ ambo ze lo, ‘Tǎ, à tyiʼə̀ mə nɨ nkabə̀ nɨ̀ghumə̀!’ 26A kẅùə̀ ambo pobə lo, ‘Ǹshwəŋə̀ ambo pɨghə lo, ŋònə̀ nɨ à pənə nɨ ɨ̀pwuumə̀ pɨ̀noʼnə, pɨ̌ kẅìʼnə̀, la ŋònə̀ nɨ ka à pə e nɨ àzwuumə̀, pɨ̌ myàanə̀ farə pə mɨlyiʼə nɨ a pənə ambo ze kẅiirə̀. 27La aŋunə ngàŋə kɨpaanə ɨ̀zâ zə̀, nɨ ka pobə lə̀ mə ntàʼà a ghobə lo mbə ɨ̀fò ɨghobə la, nɨ̀ lòo a ghobə ntô nzhwuutə̀ a mbyə̀ mɨ̀ŋə̀.’”

Yěsû kwuunə̀ a Yèrusalèmə̀ tsaʼa ɨ̀fò

(Mat 21.1-11; Mrk 11.1-11; Jòn 12.12-19)

28Tsaʼnə Yěsû à lə̀ shwəŋə̀nə la à lə̀ làŋə̀ nɨ mbyə̀ nkoʼò ndèrə̀ Yèrusalèmə̀. 29Tsaʼnə à lə̀ paatə̀nə àlaʼà Bethphage ghobə Betanì a Mbarə̀ Olìvə̀ la à lə̀ ntsàa ɨ̀zùŋə̀ ndzùmə̀ ɨ̀pe pa a mbyə̀, 30nshwəŋə̀ ambo pobə lo, “Nɨ̀ lèrə̀ amwuə àlaʼà zhyə̀ nɨ a pənə a mbyə̀ la, nɨ̌ mə kwuunə̀ zəənə̀ a moonə̀ ndzàkɨshyə̀ nɨ pɨ tɨ̀ŋnə̀nə, a pə zhyə̀ nɨ ŋwùə̀ laʼa mə koʼò e apə̀, nɨ̀ kyàa ntô nɨ ẅèrə. 31Ŋònə̀ ɨ̀tse a pəla mbyiitə̀ a wɨghə lo, ‘Nɨ̀ kyàa moonə̀ ndzàkɨshyə̀ wə̀ ntii àkə?’ Nɨ shwəŋə̀ ambo ze lo, ‘Ndòʼnə̀mbyə̂ à tàʼnə ẅèrə.’” 32Pobə pa pyə̀ nɨ à lə̀ twuumə̀nə a ghobə la lə̀ lèrə̀ nkɨ ndzəənə̀ mɨ̀nwùə̀ mɨ furə̀ tyìʼə̀ tsaʼnə à lə̀ shwəŋə̀nə ghobə. 33Tsaʼnə pobə lə̀ mənə nkyàa moonə̀ ndzàkɨshyə̀ wa la, ngàŋə̀ ndzàkɨshyə̀ wa a tô mbyiitə̀ ghobə lo, “Nɨ̀ kyàa moonə̀ ndzàkɨshyə̀ wə̀ ntii àkə?” 34Pobə kẅùə̀ lo “Ndòʼnə̀mbyə̂ à tàʼnə a ẅèrə.”

35Pobə lə̀ lòo a ẅèrə ntô ambo Yěsû, nnùŋə̀ pɨ̀kutə̀ ɨ̀pobə a nkàʼtə̀ moonə̀ ndzàkɨshyə̀ wa, ngɨ̀rə̀ Yěsû a koʼò nnwuunə̀ aŋunə. 36Tsaʼnə à lə̀ mənə ndèrə̀ pànə̀ lə̀ tyiʼə̀ nshànkə̀ ɨtsəʼə ɨ̀pobə a àlàŋə. 37Nkwùə̀ nɨ à lə̀ mənə mbaatə̀ a Yèrusalèmə̀, alyiʼə nɨ àlàŋə a shwuʼnə aŋunə Mbarə̀ Olìvə̀ ntô mbòmpə̀ la, àpùŋə̀ ɨ̀zùŋə̀ ndzùmə̀ ɨ̀pe pa pìʼnə̀ a nɨ ghaʼà, nkyiinə̀ nguʼtə̀ a Nẅùə̀ ntii mɨ̀nwùə̀ mɨ̀yerə̀nə yerə̀nə nɨ à lə̀ ghɨ̀rə̀nə pobə zəənə̀ la. 38Pobə lə̀ mə nkyiinə̀ nshwəŋə̀ lo, “Mborə̀ ɨ̀ chyə̂ ambo ɨ̀fò nɨ à wə̀ ntô aŋunə nɨ̀linə̀ nɨ Ndòʼnə̀mbyə̂ la! Àporə̀porə̀ â pə a nɨ̀pwuurə̀, àghuʼtə̀ â pə ambo Nẅùə̀ Àkoʼntsirə̀.” 39Pɨ̀Farìsî pɨ̀tse nɨ pɨ lə̀ pənə amwuə àpùŋə̀ pə̀ənə̀ za shwəŋə̀ ambo ze lo, “Ɨ̀nèrə̀ ɨ̀nwùə̀, saʼà ɨ̀zùŋə̀ ndzùmə̀ ɨ̀pô pə̀ lo pobə̂ zhwemnə̀.”

40A kẅùə̀ ambo pobə lo, “Ǹshwəŋə̀ a wɨghə lo pobə tə nzhwemnə̀, mɨ̀ghòorə tyiʼə̀ nkyiinə̀ nguʼtə̀ a Nẅùə̀.”

Yěsû a koorə̀ mɨ̀lɨŋə̀ mɨ pànə̀ pɨ Yèrusalèmə̀

41Nkwùə̀ nɨ à lə̀ tônə mbaatə̀, ndzəənə̀ mbòmpə àlaʼà Yèrusalèmə̀, à lə̀ yìi mbə̀ʼə zèrə, 42nshwəŋə̀ lo, “Nɨ̀ pəla nzhyə̂ àzwuumə̀ nɨ mbə̀ʼə a lòo àporə̀porə̀ ntô nɨ zèrə sìnə̀ wə̀! La tɨ̀tsòŋə̀ pɨ lə̀əmə̀ a zèrə ambo pɨghə. 43Nkwùə̀ ɨ̀ ghǎ tô nɨ ngàŋə kɨpaanə ɨ̀zɨghə ghǎ korə̀ nkaʼà kamnə̀ a wɨghə nnàanə̀ a wɨghə pɨ̀pàa pɨ̀tsùmə̀. 44Pobə ghǎ zhwuutə̀ a wɨghə pɨghə pɨ ɨ̀poonə̀ ɨ̀pɨghə amwuə mɨ̀ndâ ɨ̀mɨghə, myàʼtə̀ e nɨ̀ghòorə nɨ nwuunə̀ àtwuə̀ tsɨ̀tse apə̀, ntiinə ka nɨ̀ lə̀ zhyə̂ a wɨghə nkwùə̀ nɨ Nẅùə̀ à lə̀ tônə a nɨ chwarə̀ a wɨghə.”

Yěsû kwuunə̀ a Ndâ Mɨ̀shwàʼà Nẅùə̀ a Yèrusalèmə̀

(Mat 21.12-17; Mrk 11.15-19; Jòn 2.13-22)

45Yěsû à lə̀ tyiʼə̀ nkwuunə̀ a ndâ Mɨ̀shwàʼà Nẅùə̀ mbìʼnə̀ a nɨ kantə̀ pànə̀ nɨ pɨ lə̀ mənə nshwùunə̀ ɨ̀pwuumə̀ ghu, 46nshwəŋə̀ ambo pobə lo, “Pɨ ŋwàʼnə̀ amwuə àŋwàʼnə̀ Nẅùə̀ la lo, ‘Ndâ Mɨ̀shwàʼà mə̀ ɨ̀ ghǎ pə la ndâ àchàʼtə̀ Nẅùə̀.’ La nɨ̀ ghɨ̀rə̀ mə ɨ̀ tyiʼə̀ alyiʼə a nɨ lə̀əmə̀ pɨ̀zə̀ərə̀.”

47Yěsû à lə̀ tyiʼə̀ nnèrə̀ ànwùə̀ Nẅùə̀ amwuə Ndâ Mɨ̀shwàʼà Nẅùə̀ za njyə̂ ɨ̀tsùmə̀. La pɨ̀fò màʼà Nẅùə̀ ghobə pɨ̀nèrə̀ mbòomə nɨ pɨ̀lɨ̀ŋmə̂ lə̀ mə̀ ntàʼà àlàŋə a nɨ zhwuutə̀ e. 48La ka zəənə̀ a ghobə àlàŋə ntiinə pànə̀ pɨ̀noʼnə lə̀ pə ndzùŋə̀ e ntàʼà a nɨ zuʼù mɨ̀nwùə̀ nɨ a lə̀ mənə nshwəŋə̀.

Aktuálne označené:

Lukə̀ 19: pny

Zvýraznenie

Zdieľať

Kopírovať