John 8
8
NAKATA 8
Kaumanekun inungnun
1Jesusli manilgulmun taiyauyumun Olivenik aavungaktuk 2Akagungumanlu kilamik angayyuvikpagyuamungaumiyuk. Aahin inuit tamangmik upagmayyuk ingivluni ilihautinahualektain tapfuma. 3Talva tiitigaktit Pharisekullu agitiyaat angnak allatukpangman. Tapkua nangektitaat akungani Jesusim tungani, 4ukautivlugu, “Ilihauyyi, una angnak tautugnakpaktuk allatuktillugu. 5Pitkuyaini Mosesim pitkuiyuk uvagut millukuvlugit uyaganik angnat umatun allatuktun. Ilvit kanuk ukakkin?” 6Taimaliyun uktugumavlugu ihuigiyumagamitku. Jesusli akuvittuni tikiminun tiitigagafuktuk nunamun. 7Talva apekhukpiagmayyuk Jesus makittuk ukautivlugit, “Ilipfingnin nalliaklunin huinekutikangngitkumi hivullengmik uyagamik millugliuk angnak.” 8Talva akuvittuni aahin tiitigagmiyuk nunamun. 9Tapkuali tamna tuhaagamitku atuni anilektun inutkuat hivulliuvlutik, aningmata tamangmik Jesus avaliektuk angnangmi. 10Jesus makinami ukallautiyaa angnak, “Angnak, nanitpat tapkua? Ihuigiyumangngitaatin?” 11Angnak ukaktuk, “Imanak, atanek.” Jesuslu ukallaktuk, “Uvangalu ihuigingitagin. Aigiagin huinekitailutin talvangaanin.”
Kaumanekun inungnun
12Aahin Jesusim ukautiyain, “Kaumaniuyunga uvanga inungnun, inum maliguminga taaktumun pihugunaituk kaumanekangniagami inugutilengmik.” 13Pharisekulli talva ukallautiyaat, “Tayya ukalegavin ilipkun ukauhitin itkumangngitun.” 14Jesusim kiuyagaluangit, “Ukagaluakuma uvapkun ukauhitka itkumayun nakin pimangangma ilihimagama naamungaktakhamniglu, ilipfili nakin pimangangma, naamungaktakhamniglu ilihimangngitpiaktuhi. 15Ilipfi inuktitun uktuinaktuhi, uvanga uktuyuitunga. 16Kihimi uktugumalunin uktugniga ilumuktuk avalinginama. Angutima tilivagaminga uvamniituk. 17Pitkuyapfingni tiitigakhimayuk inukguk malguk uniuyyikatigikumik tapkuak ukauhiit itkumayun. 18Uvanga ukainaktunga uvapkun, Angutimalu tiligaminga ukautigiyanga.” 19Tapkua ukallautiyaat, “Angutin nanitpa?” Jesus kiuyuk “Ilipfi ilihimangnginaptiguk Angutigalu. Ilihimagupfinga uvanga, atautikun ilihimangniaktakhi Angutigatauk.”
20Jesus taimatun ukainaktuk Angayyuvikpagyuam manikagviani ilihauyyitillugu Tapfuma pivikhaa tikingiman tigungitpagaat.
Aiyukangnit kaithunguyun
21Jesusim ukallautimiyain, “Aullangniagama kenigiaktugniakipfinga, tukuniagaluaktuhi huinekutipfingni. Tikiniagutimnun kailimaitkaluaktuhi.” 22Talva Jewmiut ukaktun, “Inminik tukuttiniakka ukakhimagami, 'Tikiniagutimnun kailimaitkaluaktuhi'?” 23Tapfuma ukallautiyain, “Ilipfi maunga kaiyauhimayuhi, uvangali tatpanga kaihimagaluaktunga. Ilaa Nunaum inungita nanminigiyaahi, tapkuali nanminigingitagaluangma uvanga. 24Taima ukakhimayunga ilipfingnun tukuniagapfi huinekutipfingni. Ilaa huinekutipfingni tukunakhavuhi ukpegingitkupfinga 'Tamnaugama'.” 25Talva ukallautiyaat, “Kinauvin ilaa?” Jesusim kiuyain, “Hug ukagvigivihi? 26Amihumigli ukayumalekkunga ilipfigun, uktuglungalu, tiliyigali inmi ilumugniuyuk, tapfumangalu tuhaagagama ayyikutaanik ukauyyiyunga inungnun.”
27Tapkuali ilihimangngitun Jesusim Anguni ukautigimagu. 28Jesus ukaktuk, “Ilipfi kangataktigupfiuk Inum engniga talva ilihimangniaktuhi uvanga 'Tamnaugama', kihipkunlu havayuinama, hapkuningali ukauyyiyunga ilihauyyauhimagama Angutimnin. 29Tiliyimali uvamniituk. Tapfumalu kimangngitpiaktanga tuhaavigigapku havakhunga.” 30Hapkuningalu ukaktillugu Jesus, amigaitun inuit ukpektun tapfumunga.
Jesus Jewmiullu ayyikiitumik ihumangitpiaktun
31Jesusim Jewmiut inminun ukpekhimayun ukallautiyain, “Ukauhitka tuhaavigigupfigit uvanga maligutigiyapfi akhun, 32ilumuktumiglu ilihimangniaktuhi ilumugnimlu kivgaktugunaektitaahi ihuitumun.” 33Tapkua kiuyaat, “Abraham kinguvagimatigut uvagut kivgaktuyuitpaktugut kimunlunin. Kanuk ukakkin, 'Kivgaktugunaektuhi'?” 34Jesusim kiuyain, “Ilumuktumik ukautigipfi, inuk ilaa kinalikalunin huinekigumi huinekinengmun kivgauyuk. 35Kivgak atanimi igluani naiyukhimangngitpiaktuk taimunga, atangumli engniga tamna kihimi angutimi igluanihimaniaktugaluak. 36Godim engningata kivgaktugunaektipahi talva kivgaktugunaekhunguyuhi ihuitumun akhun. 37Ilipfi Abraham kinguvagimahi ilihimayunga, umatipfingnili ukauhitka innikangngitpiangmata tukutumagipfinga ilipfi. 38Takuyamnik Angutmini uniuyyiyunga ilipfilu tuhaayapfingnik angutipfingnin pivaktuhi.”
39Tapkua kiuyaat “Abraham kitungagiyaatigut.” Jesusim ukallautiyait, “Ilipfi kitungagiyaugupfi Abrahamin, Abraham havaagingnik piniaktuhi. 40Tayyali tukunahualekipfinga, ukagaluaktillunga ilumuktumik tuhaayamnik Godmin ilipfingnun. Abraham ilaa taimaliyuitpiaktuk 41Angutipfi havaangit piyahi ilaa.” Kiuyaat, “Uvagut aniyuitugut paapaitumik, Angutikaktugut atauhengmik, Godmik.” 42Jesusim ukallautiyain, “Godim kitungagipahi ilipfi naguginiaktapfinga, kaithimagama Godmin hamaniitungalu. Uvapkun kaiyuitkaluaktunga Godim tilimanga. 43Hug ukauhimnik kangekhingitpihi? Tuhaalimainapfi ukauhimnun. 44Ilaa kaivaktuhi angutipfingnin Tupilauyuk tamna, aahin angutipfi piyumangit havagumayahi. Tamna inuakhimayugaluak hivunganin. Ilumugnengmin kaitaungituk ilumugnekangnginami ilumini. Ikugagami pitkuhini malingnaktaa ikutukpiagami ikukuiyiugami inmi. 45Uvangali ilumuktumik ukagaluaktunga, taimaligamalu ukpegingitkipfinga. 46Nallipfi huinekiyigivihinga? Ilumuktumik ukaguma hug ukpegingitpihinga? 47Inuk Godmin kaithimagumi Godim ukauhiit tuhaayain. Ilipfili kaihimangnginapfi Godmin tuhaalimaitpiaktuhi.
48Jewmiut kiuyaat, “Itkumayumik ukangngilavut ukagapta Samariamiutaugavin agiuktukagavillu?” 49Jesus kiuyuk, “Agiuktukangngitpiaktunga, Angutigali nagugiyaga, ilipfili nagugiyuitagaluapfinga. 50Nagugiyaukuvlunga piyumangngitugaluyunga, alla kihimi nagugiyaukuvlunga piyumayuk uktuinaktuglu tamna. 51Ilumuktumik ukautigipfi, inuk ukauhimnik maligumi tukuneminik kauyimayunaitpiaktuk.” 52Jewmiut ukallautiyaat, “Tayya ilihimayugut agiuktukagavin. Abraham, nalautaiyillu tukuvaktun, ilvilli ukagaluaktutin, 'Inuk ukauhimnik maligumi tukuneminik kauyimayunaitpiaktuk.' 53Ilvit Abrahamin hivulliptingnin tukuhimagaluaktumin ataniukiyauvin? Nalautaiyillu tukuhimayullu, kinaunahugivin ilingnik?” 54Jesus kiuyuk, “Uvanga nagugiguma uvamnik nagugiyauniga hungitpiaktuk. Angutimali nagugiyagaluanga, tamna pivlugu ukagaluaktuhi 'Tamna Godigiyakkut'. 55Ilipfili ilihimangngitakhi, uvangali ilihimayagaluaga, ukaguma, 'Ilihimangitaga' ilipfitun ikuniaktunga. Ilumun ilihimayaga malikhugulu ukauhia. 56Abraham hivullikhi kuviatakpiaktuk uvlukhamnik tautukpiagami, tautukpagamiuk kuviahukpiaktuk.” 57Jewmiut ukallautiyaat, “Abraham tautukpakpiuk ukiukangngitgaluaktillutin 50nik?” 58Jesusim kiuyain, “Ilumuktumik ukautigipfi, Abraham inukaktinagu tamna 'Inuyuk' itpaktuk, tamnauyungalu uvanga.” 59Tapkualu uyagagnik tiguhiyun millugumavlugu, Jesusli angayyuvikpagyuamin anivluni kimauyuk iyektitauvluni.
Aktuálne označené:
John 8: Sperry
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©1972 Canadian Bible Society
