John 7
7
NAKATA 7
Jesus katangutaillu
1Kinguagun Jesus Galileemi aullainakpaktuk Judeamun tikihimaitumik Jewmiut tukutumamayyuk. 2Tapfumani Jewmiut negiaktugviat, tupilengnik, kanituk. 3Talva Jesusim katangutaita ukallautiyaat “Hamanga aullagin Judeamun tikitkuvlutin maligutivit tautukuvlugit havaatin. 4Inuk naunaegumagumi inungnun tautugnaitunik havayuituk. Havaguvin hapkuninga ilingnik takupkailutin inungnun.” 5Katangutaillu ukpegngitkaluaktun tapfumunga. 6Jesusim ukallautiyain, “Pivikhaga ilaa tikingituk, pivikhili hamanihimayugaluak. 7Nunaum inungita nagugiyuilimaitaahi nagugiyuitagaluanga uvanga, ukautigigapkit inuit havaangit ihuitpiangmata. 8Takki ilipfi negiaktugvigmungaugitti, tayya uvanga piyunaitunga pivikhaga tikinginman.” 9Talva taima ukagami Galileemi naiyuinaktuk.
10Kinguagunli katangutait negiaktugvigmun akuikaaktillugit inmi akuiyuk kihimgiukhuni tautugnaitkaluakhuni. 11Talva negiaktugvigmi Jewmiut kenigiaktuktun tapfuminga ukakhutik, “Tamna nanitpa?” 12Inugiektuni amihut ukautigiyaat Jesus ilait ukakhutik, “Inuk tamna nagutpiaktuk”, allat ukaktillugit, “Imanak, tapfuma inuit ulamnektilegamigit.” 13Inuilli ukautigingitagaluangat Jesus tuhaanaktumik ekhigigamitigit Jewmiut.
Jerusalemi Jesus ilihauyyiyuk kaithimagami inmi Godmin
14Negiaktugvik innektinagu, Jesus angayyuvikpagyuamun pulaaktuk ilihauyyinahualekhuni. 15Jewmiullu agligutautigigamitku ukaktun, “Kanuk una inuk ilihimakpiakka hikulhimaitkaluakhuni ilihauyyitun?” 16Jesusim kiuyain, “Ilaa ilihauyyutitka kaitauhimayun tiliyimnin kihimi uvangaungitumik. 17Inuk Godim piyumayanganik piyumagumi tamna ilitukhiniaktuk ilihauyyutimnik Godmin kaitaumangata, ukalemangangmalunin uvamnik uvanga. 18Inuk inminik ukagumi nagugiyauyumainaktuk inminik, inuklunin piyumagumi tiliyaminik tamna nagugiyaukuvlugu kihimi, ilumuktuk ilaa, ihuitumik pikangnginami umatimini. 19Mosesim pitkuyainik tuningilahi? Pitkuyainigli tamapfi maliyuitpiakaluaktuhi. Hug tukutumavihinga?” 20Inuillu kiuyun, “Agiuktuliuyutin, kia tukutumavaatin?” 21Jesusim kiuyain, “Atauhengmik havakpagama Sabbathiutillugu agliguhukpiaktuhi. 22Mosesim ilaa naunaikuhekuvluhi timipfingni pitkuvagaahi kipikuvlugit – tamna pitkuhek kaitauyugaluak hivullipfingnin – Sabbathiutillugulunin naunaikuhekpaktuhi. 23Sabbathmi ilaa inuk naunaikuhekumi kipiyauvluni Mosesim pitkuyanga maliktaukuvlugu, ilipfi ningautiginiakkipfinga uvanga inum timaa naguhipkagapku Sabbathiutillugu? 24Inuit kaaningnait uktugiaktuktailugit uktugiaktugupfi ilumuktumik piluhi.”
25Jerusalemiut ilangit ukallaktun, “Tamna inuk, inuit tukutumayaat, tamnaungilak? 26Ata ukainakpaktuk tautugnakaluaktillugu, tapkuali nipliyuitugaluit tapfumunga. Atanivut ilitakhilekkat Christiuman ilumun? 27Una kihimi nakin pimangan ilihimayakkut, Christ tikitpanli tamna nakin pimangan inuit ilihimalimaitpiaktun.” 28Jesuslu angayyuvikpagyuami ilihauyyitillugu ukaktuk, “Ilitagiyapfinga nakin pimangangmalu ilihimagaluaktuhi. Uvangali uvamnik kaithimangngitkaluaktunga tapfumali tiligaminga inmi ilumugniuyuk, tamnalu ilipfi ilitagingitagaluakhi. 29Uvanga ilihimayaga tamna tapfumanga kaihimagama, tapfumalu tilimanga.” 30Talva tapkua tigunahualektaat pingitagaluangat Jesusim pivikhaa tikingitpiangman. 31Inuillu ilait tapfumunga ukpegamik ukaktun, “Christ tikikumi uma naunaikutainin amigaikiyanik piniakka?”
32Pharisekut tuhaagamitigit inuit ukautigilegmayyuk Jesus, tapkua angayyuvikpagyuakut ataningitalu kivgatik tiliyain tigukuvlugu. 33Jesus ukaktuk, “Naiyukhimanialengmiyunga ilipfingni, kinguagunli tiliyimnun ainiaktunga. 34Ilaa kenigiaktugniakipfinga katkagunaitagaluapfingali innikhamnun ilipfi kaiyunainapfi.” 35Jewmiut ingmingnik ukaktun, “Namunlunin una aullangniakka uvangut katkakunagu? Jewmiunun apfimayunun Jewmiungituni-itunun aullangniakka ilihautiyumavlugit Jewmiungitun? 36Uma ukakhimayain kanu-itpat, 'Ilaa kenigiaktugniakipfinga katkagunaitagaluapfingali innikhamnun ilipfi kaiyunainapfi'?”
Imekun inugutilikun
37Talva negiaktugvium uvluangita kingullia tikinman Jesus nangekhuni ukaktuk, “Inuk kinalika imekigumi uvamnun kaili imekuvlugu. 38Ukauhit tiitigakhimangmata, 'Ukpeguhutuk uvamnun tapfuma umataanin imek inugutilik kuvingnakhunguyuk.' ” 39Taima Jesusim Anengnek Naguyuk ukautigiyaa ukpeguhuktun tamna piniagmayyuk, tapfumanili Anengnek Naguyuk tuniyaungitugaluak Jesus maiyugngiman.
40Inuit ilaita tapkua ukauhiit tuhaagamitigit ukaktun, “Una nalautaiyiuyuk ilumun.” 41Allat ukaktun, “Christiuyugaluak una”, allatauk ukaktun, “Christ kainiakka Galileemin? 42Ukauhit unipkautigiyaat Christ kaitauniangman 'Davidim kitungainin' aahin 'Bethlehemin', Davidim iglukagvianin?” 43Taimataun pivlugu inuit ihumakatigilimaektun. 44Ilaita tiguyumainaktaat, pingitagaluangat.
45Kivgaillu utektun angayyuvikpagyuakut ataningingnun Pharisekununlu. Tapkua apegiyain, “Hug kagitingitpihiuk?” 46Kivgailli kiuyain, “Tapfumatun inuit alla ukayuitpiagmata.” 47Pharisekut tapkununga kiuyugaluit, “Ilipfitauk ulamnektitaulekkihi 48Atanit, Pharisekullunin ilaitalunin ukpegipayyuk? 49Hapkuali inuit pitkuyainik ilihimangngitun huniaktauyun akhun.” 50Nicodemusli, hivungani kaihimavaktugaluak Jesusmun, ilagigamigit ukallautiyain, 51“Pitkuyaptingnin inuk uktuktauhimava apekhuktautinani huliyangillu tuhaanaktinagit?” 52Tapkua kiuyaat, “Ilvitauk Galileemin kaivakpin? Ukauhiit kenigiaktugupkin ilihimangniaktutin nalautaiyi kailimainman Galileemin.” 53Tamangmiglu angilgaktun,
Aktuálne označené:
John 7: Sperry
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©1972 Canadian Bible Society
