मत्तायोस 20
20
अंगुर बटकी ता बनिहार आलर ही जोक्खा ख़ीरी
1मेर्ख़ा राजी गा ओर्त ख़ल्ल उर्बस लेक्खा र'ई। आस पैरिम अंगुर बटकी नू बनिहार हेलाब'आ उरखस। 2अरा आस बनिहार आलारिन बीड़ी पुत्ता गूटी ही बनी नन्ना ही ओन दॆनारी चि'ओन बाचास ती आरिन तंग्है अंगुर बटकी नू तइय्यस।
3अरा पैरी नौ बजे मंजा ख़ने आस उरखस ती नन्ना आलारिन बजार नू बेगर नलख इज्जका ईरयस। 4अरा आरिन बाचस, ‘नीम हूँ अंगुर बटकी नू कला, अरा ऎ बग्गे चि'अना र'ई अदिन ऎन निमा चि'ओन।’ 5होले आर हूँ केरर। अउर ओंग्होन आस लोहाड़ी बारा बजे अरा ओनबीड़ी तीन बजे उरखस ती अन्नेम नंजस।
6अरा पुत्तबारी पांच बजे उरखस ती आस नन्नारिन बेगर नलख इज्जका ईरयस ती बाचस, ‘नीम इसन एन्देर नना बेगर नू इज्जकादर?’ अबड़र बाचर, 7‘एमन नॆ हूँ बनी मल हेलाबाचर।’ आस आरिन बाचस, ‘नीम हूँ अंगुर बटकी नू कला।’
8बीड़ी पुत्तिया ख़ने, उर्बस तंग्है भंडारीसिन बाचस ‘बनीहारिन मॆख़ा ती ख़ॊख़ा हेलरकर ती मुन्द हेलरका गूटी ओर्मर गे बनी चि'आ उइय्या।’#लौव्य 19:13; व्य 24:15 9एका ओर्तर पुत्तबारी पांच बजे हेलरका रहचर आर बरचर, आर ओर्त ओर्त ओन ओन दॆनारी ख़क्खियर। 10नॆ मुन्द बरचर आर सोच'आ लगियर का नमा गे बग्गे ख़क्ख्र'ओ, लिकिन आर हूँ उनिम उनिम दॆनारी ख़क्खियर। 11अदिन इंझ्रर ती आर ख़ल्ल उर्बस मइय्याँ कुनमुनर'आ ती ब'आ हेलरर, 12‘इबड़ा ख़ॊख़ातर एगघड़ी नलख नंजर, अरा आरिन नीन एम्है लेक्खा कमचकय, लिकिन ऎम बीड़ी पुत्ता चिर्खी चेड्डकम अरा बिड़ना मोक्कम।’
13लिकिन आस आर ती ओर्तोसिन आनाकिर्ताचस, ‘अना संगी ऎन निंगन मल डाहदन। एन्देर नीन एंग्है ती ओन दॆनारी हो'आ गे मल गच्छरकाचकय? 14एवन्दा निंग्है र'ई अदिन हो'आ ती कला। एंग्है मने र'ई का ऎन ऎ बग्गे निंगा चि'ओन आ बग्गे पिसतस गे हूँ चि'ओन। 15एन्देर ईद जॊगे मल्ला का ऎन एंग्है जिनिस ती एन्देर नना बेद्दोन अदिन ननोन? नीन एंग्है दौ र'अना चड्डे एंगन अड्डे ऎरदय का?’
16एन्नेम ख़ॊख़ान्तर, मुन्द मनोर, अरा नॆ मुन्द र'अनर, आर ख़ॊख़ा मनोर।”#मत्ता 19:30; मर 10:31; लूक 13:30
येसुस तंग्है खे'अना ही पत्त नू तिसर खेप तेंगदस
(मर 10:32-34; लूक 18:31-34)
17येरुसलॆम कालो बारी येसुस तंग्है बारो चेलारिन भिन्गे मीख़ियस अरा डहरे नू बाचस। 18“ऎरा, नाम येरुसलॆम काला लगदत। मनवा ख़द्दन ऎन असन मुध नैगर अरा नॆग सिखाब'उर ती हॆंर'ओन। अरा आर एंगन पिटा गे बदी ननोर। 19अरा नॆ यहूदी मलनर आर ही ख़ेक्खा नू एंगन हींड़'आ गे तुप्प'आ गे अरा कोर्रा ती लौ'आ गे क्रुस नू अरग'आ ती पिटा गे चि'ओर। लिकिन ऎन उल मुन्द नू केचका ती उज्जा चो'ओन।”
ओन्टा अयंग ही गोहरारना
(मर 10:35-45)
20तहाँ जेबदयुसी तंग्आली तंग्दाबगर गने येसुस गुसन बरचा ती ऒड़ लग्गिया ती आस ती इन्द्रिइम नॆचा। 21आस अदिन बाचस, “नीन एन्देर बिद्ददी?” आद आसिन बाचा, “नीन एंग्है ती गच्छर'आ का नीन राजी ननो बारी एंग्है इबड़ा इरिब ख़द्दर ओर्तोस निंग्है तीना ओर्तोस निंग्है डेब्बा ओक्कोर।”
22येसुस आनाकिर्ताचस, “नीम एन्दरन ने'अदर अदही माने बलदर। ऎन एका रकम सस्ती सह'ऊ र'अदन अन्ने सस्ती नीम सह'आ ओंग्दर?”#लूक 12:50 अबडर बाचर, “ऎम ओंगोम।” 23येसुस आरिन बाचस, “ ऎन एका रकम सस्ती सह'ऊ र'अदन अन्ने सस्ती नीम सह'ओर। लिकिन नॆ एंग्है तीना अरा डेब्बा ओक्कोर ती एंग्है गने राजी ननोर, अदही फैसला धर्मेस नन्दस। आस अदन फैसला नंज ख़च्चिकादस।”
24दसों चेलर इदिन मेंजर ख़ने अबड़ा इरिब भइय्योर मइय्याँ गोसा मंजर। 25लिकिन येसुस आरिन तंग्है गुसन मीख़ियस ती बाचस,#लूक 22:25,26 “नीम अख़दर का ई ख़ॆख़ेल नू बॆलर अरा राजीख़ापुर तम्है आलर मइय्याँ आकुस ऎदनर ती आरिन राजी नन्नर। 26लिकिन निम्है नू एन्ने मल मनो, नीकईम निम्है नू कोहाँ मना बेद्ददस होले, आस नन्नर गे तेतर-सुसर ननुस मन्दस नेकअन। 27अरा नीकईम निम्है मझी नू पहिल अड्डा मना बेद्ददस, आस निम्है बिट्ठी ननू जॊंख़स लेक्खा तेतर-सुसर नन्ना र'ई।#मत्ता 23:11; मर 9:35; लूक 22:26 28एन्देरगेका मनवा ख़द्दन ऎन आलारिन तेतर-सुसर नन्त'आ गे मला आलर गे तेतर-सुसर नना गे, अरा आलारिन तम्है पाप ही दंडे ती नाड़ा गे दाँड़े लेक्खा एंग्है मने ती खे'आ गे ख़ॆख़ेल नू बरचकन।”
येसुस ऎंड़ अन्धहा आलारिन कोड़े नन्दस
(मर 10:46-52; लूक 18:35-43)
29अरा येसुस अरा आसी चेलर येरिहॊ नगरे ती उरखा लगियर ख़ने, ओन्टा कोहाँ गोंहड़ा आर ही ख़ॊख़ा बर'आ लगिया। 30अरा दुई झन अन्धहा आलर डहरे ही कूटी नू उक्का रहचर। इकला आर मेंजर का येसुस आ डहरे ती कट्टालदस, ख़ने आर चिच्चियारनुम ब'आ हेलरर, “अना येसु! दाऊदसी ख़द्दायो! एम्है मइय्याँ सोग्गे ऎरा।” 31लिकिन आलर आरिन केप्पर, “कलेकसे र'आ।” लिकिन आर अउरिम चिच्चियार'आ हेलरर, “अना दाऊदसी ख़द्दायो! एम्है मइय्याँ सोग्गे ऎरा।” 32येसुस इदिन मेंजस ती इज्जस अरा आरिन मीख़ियस ती बाचस, “नीम एन्देर बेद्ददर का ऎन निमा गे ननोन?” 33अन्धहर आसिन बाचर, “अना उर्बायो! ऎम ऎरा बेद्ददम।” 34येसुस सोग्गे ईरियस ती आर ही ख़न्नन एंसड़स। ख़ने आर आ बारिम ऎरा हेलरर, अरा आसी ख़ॊख़ा गुड़ियारर।
Aktuálne označené:
मत्तायोस 20: KURUXBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
