مَتّیٰ 5
5
حاقیقی خوشواقتلیق
لوقا ۶:۲۰-۲۳
1عیسی اویشِن جِماغاتی گُروپ، داغا چیقیپ اُتوردی. شَگیرتلِری اُنونگ یانینا گِلدیلِر، 2عیسی هِم اُلارا اُورِتمَگه باشلادی:
3«روحی قاریپلار خوشواقتدیر،
چونکی آسمانینگ پادیشاهلیغی اُلارینگقیدیر.
4یاس توتیانلار خوشواقتدیر،
چونکی اُلارا تِسِلّی بِریلِر.
5فُروتَن آداملار خوشواقتدیر،
چونکی اُلار یِر یوزونی میراث آلارلار.
6عادالاتلیغا آجیغیپ-سوسانلار خوشواقتدیر،
چونکی اُلار دُیارلار.
7رِحم اِدیَنلِر خوشواقتدیر،
چونکی اُلارا-دا رِحم اِدیلِر.
8قالبی پَکلِر خوشواقتدیر،
چونکی اُلار خودایی گُرِرلِر.
9پاراحاتلیق دُرِدیَنلِر خوشواقتدیر،
چونکی اُلارا خودایینگ اُغول‍لاری دییلِر.
10تاقوالیق اوچین آزارلانانلار خوشواقتدیر،
چونکی آسمانینگ پادیشاهلیغی اُلارینگقیدیر.
11«مِن سِبَپلی سِوولِن، آزارلانان و ناحاق یِره هِر هیلی غیباتینگیز اِدیلِن ماحالی سیز خوشواقتسینگیز! 12شاتلانینگ، بِگِنینگ، سِبَبی آسماندا آلجاق سیلاغینگیز اولودیر. سیزدِن اُنگ پیغامبارلار-دا شِیدیپ آزارلاندیلار.
دوز و ایشیق
مَرقُس ۹:۵۰؛ لوقا ۱۴:۳۴-۳۵
13«سیز دونیَه‌نینگ دوزوسینگیز، اِمّا دوز طاغامینی ییتیرسه، اُندا اُل نَمه بیلِن دوزلانار؟ داشاری زینگلیپ، آیاق آشاغیندا دِپِلِنمِکدِن باشغا هیچ زادا یاراماز.
14«سیز دونیَه‌نینگ نوریسینگیز. دِپه‌ده قورلان شَهری گوزگَپ بُلماز. 15چیراغی یاقیپ، قابینگ آشاغیندا قُییان دَلدیرلِر. اُنی چیراغدانینگ اوستونده قُییاندیرلار، شُندا اُل اُیدَکیلِرینگ هِمّه‌سینه نور بِریَندیر. 16دِگمه، سیزینگ نورینگیز آداملارینگ اُوونده پارلاسین، شُندا اُلار قاوی ایشلِرینگیزی گُروپ، آسمانداقی آتانگیزی اُوسینلِر.
عیسی تُورات بارادا سُز آچیار
17«مانگا تُورات بیلِن پیغامبارلارینگ یازغیلارینی باطیل اِتمَگَه گِلِندیر دییّپ گومَن اِتمَنگ. مِن باطیل اِتمَگَه دَل-ده، اُلاری یِرینه یِتیرمَگَه گِلدیم. 18سیزه دُغروسینی آیدیارین، آسمان بیلِن یِر گِچیپ گیدیَنچَه، هِمّه زات یِرینه یِتیَنچَه، تُورات‌دان یِکِجه حارپ-دا، بیر نقطه-دا ییتمِز. 19شُنونگ اوچین هِم کیم بو دِستورلارینگ اینگ کیچیسیندِن بیرینی پُزسا و شِیله اِتمِگی باشغالارا اُورِتسه، اُل آسمانینگ پادیشاهلیغیندا اینگ کیچی حاساپلانار. اِمّا کیم بولاری بِرجای اِدیپ، باشغالارا-دا اُورِتسه، اُل آسمانینگ پادیشاهلیغیندا اولی حاساپلانار. 20مِن سیزه شونی آیدیارین: دُغرولیغینگیز دین عُلَمالارینگقی بیلِن فَریسی‌لِرینگکیدِن اولی بُلماسا، آسمانینگ پادیشاهلیغینا آصلا گیرمِرسینگیز.
قاهار و حُکوم
21«سیز آتا-بابالاریمیزا: ”آدام اُلدورمه، کیم آدام اُلدورسه، حُکومه سِزاوار بُلار“ آیدانلارینی اِشیدِنسینگیز.#چیقیش ۲۰:۱۳ 22اِمّا مِن سیزه شونی آیدایین: اُز دُغانینا قاهارلانان آدام هِم حُکومه سِزاوار بُلار. کیم اُز دُغانینا ”سامسیق“ دییسه، اولی حُکومینه سِزاوار بُلار. حتّیٰ هیچ کیم ”آحماق“ هِم دییمِسین، یُغسام دُوزاخینگ اُدونا سِزاوار بُلار.
23«شُنونگ اوچین قربانلیق جاییندا صاداقا بِرمَگه باریارقانگ، دُغانینگ سِندِن اُیکه-کینه‌سینینگ باردیغی یادینگا دوشسه، 24صاداقانگی قربانلیق جایینگ اُوونده قُی-دا، گیدیپ اُوونچَک دُغانینگ بیلِن یاراش. سُنگرا گِلیپ، صاداقانگی هُدورله.
25«سِن داعواچینگ بیلِن هِنیز یُلدا باریارقانگ یاراش، یُغسام اُل سِنی قاضییا، قاضی هِم زیندان ساقچیسینا تابشیرایماسین. شِیدیپ، سِن زیندانا دوشمِگینگ آخمال. 26سانگا دُغروسینی آیدیارین، اینگ آخیرقیجا سِکّه‌نگی تُلِیَنچَنگ، اُل یِردِن آصلا چیقمارسینگ.
زیناکَرلیک
27«سیز: ”زینا اِتمه“ آیدانلارینی اِشیدِنسینگیز.#چیقیش ۲۰:۱۴ 28اِمّا مِن سیزه، بیر آیالا هُوِس بیلِن باقان آدام اُز یورِگینده اِییَم اُنونگ بیلِن زینا اِدِندیر دییَّرین. 29ساغ گُزونگ سِنینگ گونَه اِتمِگینگه سِبَپ بُلسا، اُنی سُغروپ چیقار. بیر بُلِک بِدِنینگ یُق بُلماغی هِمّه بِدِنینگ دُوزاخا زینگیلماغیندان قاوودیر. 30ساغ اِلینگ سِنینگ گونَه اِتمِگینگه سِبَپ بُلسا، اُنی چاپیپ زینگ. بیر بُلِک بِدِنینگ یُق بُلماغی هِمّه بِدِنینگ دُوزاخا زینگیلماغیندان قاوودیر.
طالاق
مَرقُس ۱۰:۱۱-۱۲؛ لوقا ۱۶:۱۸
31«شِیله هِم: ”کیم آیالینی کُووپ گُیبِرسه، اُنگا طالاق نامه‌سینی بِرسین“ آیدیلاندیر.#قایتادان ۲۴:۱ 32اِمّا مِن سیزه دییَّرین، هِر کیم زینادان باشغا سِبَپ بیلِن آیالینی طالاق بِرِن آدام اُنونگ زینا اِتمِگینه سِبَپ بُلیاندیر. طالاق آلان آیال بیلِن اُیلِنِن آدام هِم زینا اِدیَندیر.
قاسام ایچمِک بارادا
33«سیز یِنه قادیمقیلارا: ”یالاندان قاسام ایچمه، اِمّا خودایینگ اُوونده ایچِن قاساملارینگی بِرجای اِت“ آیدانلارینی هِم اِشیدِنسینگیز.#لاویلار ۱۹:۱۲؛ سانامالار ۳۰:۳؛ قایتادان ۲۳:۲۲ 34اِمّا مِن سیزه آصلا قاسام ایچمَنگ دییَّرین: نه آسمانا، چونکی آسمان خودایینگ تاختیدیر، 35نه یِره، چونکی یِر اُنونگ آیاقلارینینگ دوشِکدیر، نه-ده اورشلیمه، چونکی اُل بِییک پادیشاهینگ شَهریدیر. 36اُز باشینگیزا هِم قاسام ایچمَنگ، سِبَبی سیز اُنونگ یِکه قیلینی-دا آق یا قارا اِدیپ بیلیَن دَلسینگیز. 37سیزینگ ”هاووانگیز“ هاووا، ”یُغونگیز“ یُق بُلسون. موندان آرتیغی شِیطانداندیر.
گُزه – گُز، دیشه – دیش
لوقا ۶:۲۹-۳۰
38«سیز: ”گُزه – گُز، دیشه – دیش“ آیدانلارینی اِشیدِنسینگیز.#چیقیش ۲۱:۲۴؛ قایتادان ۱۹:۲۱ 39اِمّا مِن سیزه شونی آیدایین: یامان آداما قارشی دورما. سِنینگ ساغ یانگاغینگا اورانا، بِیلِکی یانگاغینگی-دا توت. 40سِنینگ بیلِن داعوالاشیپ، کُینِگینگی آلجاق بُلیانا دُنونگی-دا بِر. 41کیم سِنی اُزی بیلِن بیر کیلومِتر یُل یُریمَگه مِجبور اِتسه، سِن اُنونگ بیلِن ایکی کیلومِتر یُل یُری. 42دیلَنه – بِر، قارض دیلِیَندِن یوزونگی اُوورمه.
دوشمانلارینگیزی سُیونگ
لوقا ۶:۲۷-۲۸، ۳۲-۳۶
43«سیز: ”هِمسایانگی سُی، دوشمانینگی ییگرِن“ آیدانلارینی هِم اِشیدِنسینگیز.#لاویلار ۱۹:۱۸ 44اِمّا مِن سیزه شونی آیدایین: دوشمانلارینگیزی سُیونگ، اُزونگیزی اِذیِت بِریَنلِر اوچین دُغا اِدینگ. 45شُندا سیز آسمانداقی آتانگیزینگ اُغول‍لاریدیغینگیزی بِلّی اِدِرسینگیز. آسمانداقی آتانگیز اُز گونِشینی یامانلارینگ و یاخشیلارینگ هِم اوستونه دُغدوریار، یاغمیرینی دُغریلارینگ و اِگریلِرینگ هِم اوستونه یاغدیریار. 46سیز اُزونگیزی سُییَنلِری سُییَن بُلسانگیز، اُندا نَمه سیلاق آلارسینگیز؟ مالییات آلیانچیلار-دا#۵:۴۶ اُل زاماندا مالییات آلیانچیلارینگ آدی تِلِکه تانیلیپدی، چونکی باج آلییاردیلار. شِیله اِتمِیَرمی نَمه؟ 47دینگه اُز دُستلارینگیزا سالام بِریَن بُلسانگیز، اُندا نَمه آرتیقماچ ایش اِدیَرسینگیز؟ بُت‌پَرَستلِر-ده شِیله اِتمِیَرمی؟ 48شِیلِلیکده، آسمانداقی آتانگیزینگ کَمیل بُلشی یالی، سیز هِم کَمیل بُلونگ.»
Aktuálne označené:
مَتّیٰ 5: TUKIR
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Turkmen Truth
