Matius Uram 4
4
Isa sienyi Iblis biryi Er Yesus biti, “Niryi ebkwan uram kunubtiryok, malyi kun dinyi kubte,” tenen yandoka ukubdenmou uram
4:1-11
1Yohanes biryi Er Yesus bisi me sirya dongobmou ura, Er Imtamnyi Kanya Roh Kudus aryi Yesus bisi ninyi kun kum mutuk bobinmou. Ara, “Er Yesus bisi isa sienyi Iblis biryi ukubdenkwande,” tenen bikmouci, Er Imtamnyi Kanya Roh Kudus aryi Ersi bobinmou. 2Ara, Er Yesus bira ninyi kun kum mutuk bindoka kuramuryok, Erci kwaning si teboka kuramwe. Ara, uki empat puluh baryi maramuryok, kitingtam babyi lukunda ababyi yina kum yiramwe uca, Ersi kwaning atanmou. 3Ura, isa sienyi bira, “Yesus bisi sakeibtinyi uca, malyi dinyi kubte,” tenen Er Yesus bisi yanmouci, Ersi ato ebmou. “Kanci Kandamnyi ati, ‘Nira Er Imtamnyi Mi diboka kunun,’ tenebdaminyi ura, Kanci Kan mikib lak kibminci, anda keil yuk-yuk asi, ‘Roti dandarur,’ eboka arukdum!” ebmou.
4Ebmou bok, Er Yesus biryi ersi ato eboka uram dekeibmou, “Er Imtamnyi biryi minob erdeiriramwe uram umbura aryi ato kerek sekeibwe,
‘Ninyi kam kunung ara kwaning yina deib aryok kam kum kunung. Eda, ninyi kam kunung ara Er Imtamnyi biryi arungdeirisurur uram kunubde bana deib aryi kam kunung.’ (Ulangan 8:3)
Ati, Niryi kan ebmarim to kum kunubkwaman,” ebmou.
5Ato ebmou ura, isa sienyi Iblis biryi Er Yesus bisi bobindoka Yerusalem sien atei ara Er Imtamnyi biryi minob wiamwe atei bobinmou. Ara, Yerusalem atei aryi kuboka Bait Allah ai dub deici aryi tingbinmarei. 6Ura, Iblis biryi Er Yesus bisi ato ebmou, “Kanci Kandamnyi ati, ‘Nira Er Imtamnyi Mi kunun,’ tenebminyi ura, Kanci Kan mikib lak kibmin cok, akiryi kuboka tukwe ai sangkurukokdum! Kanda Er Imtamnyi Mi diboka kurantum ura, Kanci tukwe ai sangkurukoktum ababyi dilaka kum sakute. Er Imtamnyi Uram umbura aryi a deyok ati ato kerek sekdeiamnyi,
‘Er Imtamnyi biryi Er uram eryuryangan nang asi arukci ba, a nang aryi kan dam yandoka sun taruk yangabdeiboka bobkwanking.
A nang aryi kanti, “Er yan dum keil sakcei,” tenen, “Dilaka tentok ababyi sakcei,” tenen kalikwanking ba, sun taruk aryi yangabdeiboka kansi bobkwanking.’ (Mazmur 91:11-12)
Ato eboka kerek sekdeibwe deyok aryi, Kanci ur sangkurukokdum!” ebmou.
7Ebmou bok, Er Yesus biryi isa sienyi bisi ato eboka uram ebdeibmou, “Er Imtamnyi biryi minob erdeiriramwe uram umbura aryi ato eboka kerek sekdeibwe.
‘Sunci, “Er Imtamnyi biryi ilil tenen dinyi kibnibsute,” tenen ukubdendoka Er Imtamnyi malyi tenerur dinyi ukuna mem,’ ebwe. (Ulangan 6:16)
Ati, Niryi kanda isa biryi ebmanirim to kum kunubkwaman,” ebmou.
8Ato kuboka sirya ukubdenmou ura, isa sienyi Iblis biryi Er Yesus bisi bobindoka iya ereboka bukamwe mutuk kon asi bowelebinmou. Ura, im dangna tukwe dangna mutuk aryi kuboka weik sien nang taleramnyi mikib ab sun bona bon dinyi nirya ab asi Iblis biryi Er Yesus urasin dam lak kibdeibmou. 9A dinyi nirya sirya lak kibdeibmou ura, Iblis biryi Yesus bisi ato ebmou, “A dinyi nirya ara niryi Kanti karebkitinyi. Ati, Kanci niti, ‘Ni nai Iya Erebdobnyi,’ tenen kan kutam ikdongobmin ba, niryi im dangna tukwe dangna dinyi nirya asi kansi karebkwinkin,” ebmou.
10Ato ebmou bok, Er Yesus biryi isa sienyi Iblis bisi ato eboka uram dekeibmou, “Iblis kanda bindobdum! Er Imtamnyi Uram minob erdeiriramwe uram umbura aryi ato kerek sekdeibwe,
‘Sunci sun Nai Imtamnyi biti, “Nun Nai Iya Erebdobnyi,” tenen sun kutam ikdongobdarur. Sunci yuk nang si weik ena mem. Eda, sun Nai Imtamnyi si atikwe weik ebdarur,’ ebdeibwe. (Ulangan 6:13)
Ati, Niryi kan ebmarim to kum kunubkwan. Niryi kanda isa si weik kum erebdeibkwamakin,” ebmou.
11Yesus biryi ato ebmou uca, isa sienyi Iblis biryi Er Yesus takloboka bindobmou. Sirya bindobmou ura, Er Imtamnyi Uram eryuryangan nang yuryandoka Er Yesus bisi dibnilibmai.
Er Yesus biryi Galilea mutuk tamurbinmou ura, “Er Imtamnyi bira Weik Sienyi kurur,” en deyok eterebkalibmou uram
4:12-17
12Kuramnyi ani, Yudea mutuk weik sienyi biryi arukdeibmou uca, er miliramnyi nang aryi yandoka Yohanes ninyi me dongoramunyi bisi taleboka ninyi wenen ai dongobmai. Ura, Er Yesus biryi a dinyi ati kekebmou ura, Erci anaboka Yudea mutuk aryi kuboka Galilea bindoka kisibdobmou. 13Ura, Yesus biryi Er minob kuamwe atei Nazaret asi tiya binmou ura, Erci akatei asi takloboka yuk atei ara Kapernaum atei bindoka kuroramwe. Akatei Kapernaum ara Galilea me kwan katum dam atei doamnyi. Akatei buramwe mutuk ara Zebulon yala nang aryi taleramnyi mutuk ab Naftali yala nang taleramnyi mutuk ab buramwe. 14Ara, nabi Yesaya minob ura kerek sekdeiamwe to Er Yesus biryi kunubdeiboka a mutuk bina kuroramwe. Ara, Yesaya biryi minob ura ato ebmou,
15“Sun Zebulon mutuk kuramingnyi nang ab, sun Naftali mutuk kuramingnyi nang ab ara berengdeirin dinyi asing eibkwaming. Sun ilila me kwan dam ban bisik kuramingnyi nang ab, Yordan me katum dam kuramingnyi nang ababyi ara ninyi lemdeirin dinyi asing eibkwaming. Sun Galilea mutuk nang ara Er Imtamnyi Uram walwal nang yandoka sun atei doramnyi mutuk nang ababyi berengdeirin dinyi asing eibkwaming.
16Sun kunuk dam kuramingnyi nang ara iya milil arabkwande dinyi asi eibkwaming. Ba, sun dibmanto nang asi Er Imtamnyi biryi lebdeiboka milil urukeibkwande,” (Yesaya 9:2-3)
ebmou. Ura, Yesaya biryi ato eboka minob kerek sekdeiamwe to, Yesus biryi kunubmouci, Kapernaum atei bina kuroramwe.
17Ura, a talak aryi kuboka Er Yesus biryi deyok kouboka ato eboka lak eterebkalibmou, “Er Imtamnyi bira iya Weik Sienyi kururci, Erci ninyi lebdeiboka arukdeibkwansir talak dam kubmar. A deyok aryi, sunci sun malyi tenendarur dinyi taklobdarur,” eboka etereramwe.
Er Yesus biryi Er milinkwamnyi nang yuma kobdob nabmou nang asi nabmou uram
4:18-22
18Ura, uki tentok tum aryi Er Yesus bira Galilea me kwan katum dam yibanmouci, diramwe uca, Erci sun nang susuk si Simon er uruma si ara Petrus ab er weit si Andreas ab asi eibmou. A nang susuk ara mekinaia don nang kurandei deyok aryi, sunci mekinaia donmareici, mekinaia don aling asi me kwan deici donokloboka kunmarei. 19Ura, Er Yesus biryi sunsi asing eibmouci, ato ebmou, “Ni kwit yabwe, sunci yandoka Nisi milibnururum. Niryi sunda mekinaia don nang asi yuk wa asi karebkwansin uca, sunci Teleb Uram eterebdumuncok, ninyi ilinto asi Er Imtamnyi amwetam boyankwandurum!” ebmou. 20Ato ebmou uca, sunci ukurlona kum uca sun mekinaia don aling asi taklobmareici, Yesus bisi miliryanmarei.
21Ura, Er Yesus adikum aryi anaboka yuk ai bindoka diramwe uca, yuk nang susuk ton eibmou. A nang susuk ara Zebedeus mi Yakobus ab er weit Yohanes ab kurandei. A nang susuk ara sun nai Zebedeus ab kunmaici, co ngun-ngun umbura bukoka sun kwisib lilinmai asi asing eibmou. Ura, Er Yesus biryi sunsi naboka, “Nisi milibnururum,” ebmou. 22Ebmou ba, sunci ukurlona kum uca sun co ngun-ngun ab sun nai ab takloboka Er Yesus bisi miliryanmarei.
Er Yesus biryi Er Imtamnyi Uram etereboka u yiramwe nang kweteboka kimnamwe uram
4:23-25
23Ura, Er Yesus biryi Galilea mutuk atei nirya yibarkiringnamwe. Ara, Erci Musa Uram eteren ai yuk-yuk wengbindoka Er Imtamnyi Uram etereramwe. Ati, Erci, “Er Imtamnyi bira Weik Sienyi kururci, ninyi lebdeiboka arukdeibkwansir,” eboka Teleb Uram eterebde yibarkiringnamwe. Ato kuramuryi, sun ninyi kankan aryi kuboka u yuk-yuk yiramwe nang ab, mambul yuk-yuk doramnyi nang ab nirya asi Erci kweterkiringnamwe. 24Ura, Erci ilil tenen dinyi kikniramwe deyok ati, ninyi aryi nukdanin yibaramnyi. Ara, a mutuk aryi kuboka me utam Siria mutuk nirya nukdanin yibaramnyi. Uca, yuk u-yuk u yiramwe nang ab, mambul yuk-yuk doramnyi nang ab Er dam asi boyanmai. Tonda isa kanya aryi wekoka orminingnamwe nang ab, maka muldamnyi amangyangaramwe nang ab, yan deneramwe nang ab boyangaramnyi. A nang nirya asi boyangaramnyi asi Er Yesus biryi kweteramwe. 25Ba, a talak aryi ninyi ilinto Er Yesus bisi milirkiringnamnyi. A milirkiringnamnyi nang ara Galilea mutuk aryi yangaramnyi, tonda mutuk si Dekapolis aryi yangaramnyi. Tonda, Yerusalem sien atei aryi yangaramnyi, tonda Yudea mutuk aryi yangaramnyi. Tonda, Yordan me kouboka Yaletam kuboka doramnyi atei nang yangaramnyi.
Aktuálne označené:
Matius Uram 4: MTG
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
@LAI 2007 (New Testament), @LAI2022 (Old and New Testament)
