Mataio 13
13
O le Tala Fa‘atusa i le Faifa‘ato‘aga
(Mare 4.1-9; Luka 8.4-8)
1O lea lava aso na maliu atu ai Iesu i tafatafa o le vai, 2‘ona potopoto ane ai lea ‘iā te ia o tagata e to‘atele, ‘ona o le to‘atele na‘uā o tagata, o lea na maliu a‘e ai o ia i le va‘a ma nofo ai, a o lo‘o laulaututū mai tagata i le matāfaga. 3‘Ona a‘oa‘o atu lea o ia ‘iā te i latou i tala fa‘atusa e tele.
‘Ua fetalai atu o ia, “Sa i ai le tagata faifa‘ato‘aga na lūlū solo ana fatu la‘au ‘ina ‘ia ola i lona fanua. 4O nisi o nei fatu na pa‘u‘ū i tafatafa o le auala, ‘ona ō ane ai lea o manu felelei ma ‘a‘ai ai. 5O isi fatu na pa‘u‘ū i le gaoā, ‘ua fa‘alē tele ai se ‘ele‘ele. Sa vave ‘ona tutupu ia fatu ‘ona o le itiiti o le ‘ele‘ele. 6‘Ua oso a‘e le la, ‘ona velasia ai lea o la‘au ma ‘ua mamate, auā ‘ua lē mau aa. 7O isi fo‘i fatu na pa‘u‘ū i totonu o vao tuitui; ‘ua fētina‘iina ai i vao tuitui ma ‘ua mamate. 8A o isi fatu na pa‘u‘ū i le ‘ele‘ele lelei. O fatu la ia na ola lelei, ma fua mai e ta‘iselau, ta‘ionosefulu ma ta‘itolusefulu.
9“O lē ‘ua i ai taliga e fa‘alogo ai, fa‘alogo lelei mai ia.”
O le Mafua‘aga na Fa‘aaogāina ai e Iesu Tala Fa‘atusa
(Mare 4.10-12; Luka 8.9-10)
10‘Ua ō ane fo‘i so‘o ‘iā Iesu ma fesili i ai, “ ‘Ua e fa‘aaogāina aiseā tala fa‘atusa?”
11‘Ua tali atu Iesu, “ ‘Ua foa‘iina atu ‘iā te ‘outou le malamalama i mea lilo o le Mālō o le lagi. A o isi, e le‘i foa‘iina atu i ai lea malamalama. 12Auā fo‘i o le tagata ‘ua i ai mea, e toe fa‘aopoopo atili i ai mea, ‘ona atili tele ai lava lea o ana mea; a‘o le tagata e leai ni ana mea, e o‘o lava i sina mea o ‘iā te ia, e ‘ave‘esea. 13O le mea lea ‘ua ‘ou tautala atu ai ‘iā te i latou i tala fa‘atusa: auā ‘ua va‘ai i latou ‘ae lē iloa, ‘ua fa‘alogo fo‘i i latou ‘ae lē lagona ma malamalama. 14O i latou nei ‘ua taunu‘u ai ‘upu a le perofeta o Isaia, fai mai:
‘Tou te fa‘alogo lava, ‘ae tou te lē malamalama;
tou te vā‘ai fo‘i ‘ae tou te lē iloa.#Isai 6.9,10; Ioane 12.40; Galu 28.26,27
15Auā ‘ua ma‘a‘a loto o nei tagata,
ma tutuli o latou taliga,
‘ua moei‘ini fo‘i o latou mata,
‘ina ne‘i va‘ai o latou mata,
ma fa‘alogo o latou taliga,
ma talia i o latou loto,
ma liliu mai,
‘ona ‘ou fa‘amālōlōina lea o i latou.’
16“ ‘Amu‘ia o ‘outou mata ‘ua va‘ai ma o ‘outou taliga ‘ua fa‘alogo. 17Auā o le ‘upu moni ‘ou te ta‘u atu ‘iā te ‘outou, e to‘atele perofeta ma tagata amiotonu ‘ua mavae atu sa fia va‘ai i mea ‘ua ‘outou va‘ai i ai, ‘ae le‘i va‘aia e i latou, sa fia fa‘alogo fo‘i i mea ‘ua ‘outou fa‘alogo ai, ‘ae le‘i fa‘alogo ai lava i latou.
‘Ua Fa‘amatalaina e Iesu le Tala Fa‘atusa i le Faifa‘ato‘aga
(Mare 4.13-20; Luka 8.11-15)
18“Fa‘alogo mai la ‘outou i le fa‘atatau o le tala i le tagata faifa‘ato‘aga. 19A fa‘alogo se isi i le ‘upu o le Mālō, ‘ae lē malamalama, ‘ona sau ai lea o le fili ma lia‘i ‘ese le ‘upu na totōina i lona loto. O le fatu lea na pa‘ū i tafatafa o le auala. 20O le fatu na pa‘ū i le gaoā, o le tagata lea ‘ua fa‘alogo i le ‘upu, ‘ua na talia fo‘i ma le fiafia; 21a ‘ua lē mautū lona loto, ma ‘ua na talia le ‘upu mo sina taimi pu‘upu‘u. A o‘o loa ‘ina tutupu mai ni fa‘alavelave po o ni sauāga ‘ona o le ‘upu, ‘ona lafoa‘i lea e ia. 22O le fatu na pa‘ū i totonu o la‘au tuitui, o ia lea ‘ua fa‘alogo i le ‘upu, a o le popole vale i mea o lenei lalolagi, ma le fiafia i ‘oloa o lenei olaga, ‘ua fētina‘iina ai le ‘upu, ‘ona lē fua mai ai lea. 23O le fatu na pa‘ū i le ‘ele‘ele lelei, o ia lea ‘ua fa‘alogo ma malamalama i le ‘upu. O ia lea e tupu ma fua mai e ta‘iselau, ma ta‘ionosefulu, ma ta‘itolusefulu.”
O le Tala Fa‘atusa i Vao Leaga
24‘Ua toe fetalai atu Iesu ‘iā te i latou i le isi tala fa‘atusa, “ ‘Ua fa‘atusaina le Mālō o le lagi i le tagata na totōina ni fatu la‘au lelei i lona fanua. 25‘Ua momoe tagata, ‘ona alu ane lea o lona fili ma totō ai vao leaga. 26‘Ina ‘ua tutupu a‘e fatu ma fua mai, ‘ona fa‘ato‘ā aliali ai lea o vao leaga. 27‘Ua ō ane fo‘i tagata faigaluega ma fesili ane i le tagata e ona le fanua, ‘E lē ni fatu la‘au lelei ‘ea na e totōina i lou fanua? ‘Āfai o lea, o fea e ō mai ai nei vao leaga?’ 28‘Ua tali atu o ia ‘iā te i latou, ‘O le mea lea na faia e lē ‘ua ita mai.’ ‘Ua toe fesili atu fo‘i le ‘au faigaluega, po o le ā o e vele ‘ese le vao leaga; 29a ‘ua tali atu le pule, ‘E leai, tu‘u pea ia ‘ina ne‘i ‘outou vele‘esea le vao leaga fa‘atasi ma la‘au lelei. 30Tu‘u pea e tutupu fa‘atasi se‘ia o‘o i le aso ‘ua matua ai le fuata. A o‘o i lea aso, ‘ona ‘ou fa‘atonuina lea o le ‘au faigaluega latou te fa‘aputuina muamua le vao leaga, sāisāi ma lafo i le afi, ‘ae fa‘aputu mai la‘au lelei i lo‘u fale.’ ”
O le Tala Fa‘atusa i le Fatu o le Sinapi
(Mare 4.30-32; Luka 13.18-19)
31‘Ua toe fetalai atu Iesu i le isi tala fa‘atusa, ‘ua fa‘apea atu, “ ‘Ua fa‘atusaina le Mālō o le lagi i le fatu o le sinapi, na totōina e le isi tagata i lona fanua. 32E ui lava ‘ina aupito itiiti ia i fatu la‘au uma, a ‘ua tupu a‘e ma ‘avea ma la‘au tele, ‘ua fai ai ofaga o manu felelei i ona lālā.”
O le Tala Fa‘atusa i le Mea Fa‘afefete
(Luka 13.20-21)
33‘Ua toe fetalai atu fo‘i Iesu i le isi tala fa‘atusa, ‘ua fa‘apea atu, “ ‘Ua fa‘atusaina le Mālō o le lagi i le mea fa‘afefete ‘ua tu‘uina e se fafine i totonu o le paluga falaoa, pe tusa ma le onosefulu pauna, ‘ua o‘o ‘ina fa‘afefeteina uma ai.”
O le Fa‘aaogāina e Iesu o Tala Fa‘atusa
(Mare 4.33-34)
34O a‘oa‘oga uma nei a Iesu na tu‘uina atu i tala fa‘atusa. E leai fo‘i se mea na fetalai atu ai o ia na te le‘i fa‘aaogāina ai se tala fa‘atusa. 35‘Ua faia lea mea ‘ina ‘ia taunu‘u ai le valo‘aga a le perofeta o Isaia, fai mai,#Sala 78.2
“O le ā ‘ou tautala atu i tala fa‘atusa.
O le a ‘ou fa‘aalia fo‘i mea sa lilo talu mai le amataga o le lalolagi.”
‘Ua Fa‘amatalaina e Iesu le Tala Fa‘atusa i Vao Leaga
36‘Ua ‘auina atu e ia tagata e o, ‘ona maliu a‘e lea o ia i le fale. ‘Ua ō mai fo‘i ona so‘o ‘iā te ia ma fai mai, “Fa‘amatala mai ‘iā te i matou le tala fa‘atusa e uiga i vao o le fanua.”
37‘Ua tali atu Iesu, “O le tagata na totōina la‘au lelei, o le Atali‘i lea o le Tagata; 38o le fanua, o le lalolagi lea; o la‘au lelei, o fānau ia o le Mālō; o vao leaga, o fānau ia a le fili; 39o le fili, o le tiapolo lea; o le fuata, o aso mulimuli ia o le lalolagi; o le ‘au faigaluega, o agelu ia. 40E pei la ‘ona fa‘aputuina le vao leaga ma susunuina, e fa‘apea fo‘i le mea o le a tupu i aso mulimuli o le lalolagi. 41O le ā ‘auina atu e le Atali‘i o le Tagata ana agelu, e vavae‘eseina e i latou mai lona Mālō mea fa‘atupu leaga, fa‘apea ma i latou sa solitulafono. 42‘Ona lafoina lea o ia tagata i le afi e taufaitagiauē ma lilivau ai o latou nifo. 43‘Ona pupula ai lea o tagata amiotonu e pei o le la i le Mālō o lo latou Tamā. O lē ‘ua i ai taliga e fa‘alogo ai, fa‘alogo lelei mai ia.
O le Tala Fa‘atusa i le ‘Oloa Tāua sa Natia i le Fanua
44“ ‘Ua fa‘atusaina le Mālō o le lagi i le ‘oloa tāua sa natia i le fanua. ‘Ua maua lea ‘oloa tāua e le isi tagata ‘ona toe nanā ai lea, a ‘ua alu atu ma le fiafia, ‘ua fa‘atau atu ana mea uma, ma fa‘atau mai ai lea fanua.
O le Tala Fa‘atusa i le Ma‘a Tāua
45“ ‘Ua fa‘atusaina fo‘i le Mālō o le lagi i le tagata fa‘atau mea, sa na sā‘ilia ni ma‘a tāua. 46Na o‘o ‘ina maua e ia se mea tāua taugatā, ‘ona alu ai lea ‘ua fa‘atau atu ana mea uma, ‘ae fa‘atau mai lea ma‘a tāua.
O le Tala Fa‘atusa i le ‘Upega Fagota
47“ ‘Ua fa‘atusaina fo‘i le Mālō o le lagi i le ‘upega fagota ‘ua maua mai ai ni itū‘āiga i‘a ‘ese‘ese. 48A tumu loa le ‘upega i i‘a, ‘ona toso a‘e lea i uta. E ō atu fo‘i tagata ma ilo ‘ese i‘a lelei ‘iā latou ola, ‘ae tia‘i ‘ese i‘a leaga. 49O le a fa‘apea fo‘i le faiga i aso mulimuli o le lalolagi. E ō mai agelu ma vavae‘ese tagata leaga mai tagata amiotonu. 50E lafoina fo‘i e i latou tagata leaga i le afi, e taufaitagiauē ai ma lilivau o latou nifo.
O Matā‘upu Tuai ma Matā‘upu Fou
51“Tou te malamalama ‘ea i mea uma ‘ua ‘ou fai atu ai nei?”
‘Ua tali ane i latou ‘iā te ia, “O lea lava.”
52‘Ua fetalai atu Iesu ‘iā te i latou, “ ‘Ia ‘outou iloa fo‘i la, o a‘oa‘o tulafono uma ‘ua a‘oa‘oina i mea tau i le Mālō o le lagi, ‘ua pei o le tagata ‘ua na ‘aumaia mo lona ‘āiga mai lona fale‘oloa mea tuai ma mea fou.”
‘Ua Te‘ena Iesu i Nasareta
(Mare 6.1-6; Luka 4.16-30)
53‘Ua uma atu ia a‘oa‘oga a Iesu, ‘ona maliu ‘ese lea o ia. 54‘Ua maliu atu fo‘i o ia i lona lava nu‘u, ma a‘oa‘o atu i o latou sunako. Sa matuā ofo tagata uma i ana a‘oa‘oga ma fai ane, “O fea na maua mai ai e lenei tagata lea atamai, ‘ua faia ai e ia nei mea ofoofogia? 55E lē o le atali‘i ‘ea o ia o le tufuga? E lē o lona tinā ‘ea Maria? E lē o ona uso ‘ea Iakopo ma Iose, ma Simona ma Iuta? 56E lē o ona tuafafine ‘ea o lo‘o fa‘atasi nei ma i tatou? O fea la na maua ai e lenei tagata ia mea?” 57‘Ua lē fia fa‘alogo fo‘i i latou ‘iā te ia.
A ‘ua fetalai atu Iesu ‘iā te i latou, “E leai se perofeta e lē fa‘aaloaloina, vaganā ai totonu o lona lava nu‘u ma lona lava ‘āiga.”#Ioane 4.44 58E le‘i tele fo‘i ni vāvega na faia e ia ‘i‘inā ‘ona o lo latou lē fa‘atuatua.
Aktuálne označené:
Mataio 13: SCNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Samoan Contemporary New Testament © Bible Society of the South Pacific, 2009.
