Mattayo 10
10
Giijasoodi damaniyyeenya
(Mark 3:13-19; Luk 6:12-16)
1Gaguursa giinealangaaschi attamaniyyeenya, ak ghoadaw gheambalmeeda jea gooruutteawa meangeenda munyas nea ghoahaap geeyoonung'weakka ea sawanaduutka sean. 2Gheawungeaba giijasoodusu attamaniyyeenyean ea suhu, dea madeeda Simoneeda suguura Betrohi ea oorjeeda ghaamwat suguura Andereya, ea Yakkobo balleanda Sebedaayo ea Yohaana oorjeeda ghaamwat. 3Filippo ea Bartolomaayo, Domaso ea Mattayooyda ghayi ang'ng'oonyi gwaadi, ea Yakkobo balleanda Alfaayo, ea Dadaayo. 4Simoneeda Ganaani ea Yudaayda Iskariyootte ghayi laabwadaw Yeesu.
Gijeakteayda fuga attamaniyyeenya
(Mark 6:7-13; Luk 9:1-6)
5Goojeakta Yeesu giijasoodigiga attamaniyyeenyean ak ghoadaw giijasta nea gwayeeshsha, “Adooweeyi jeeda daroorakka Emoojiga, ghana jeeda mujiineeda wassean bea Samariya. 6Ghang'wana ghoang'ng'waanyi naweeda aweayeena heeda gisilga roodeadi bea Israeeli. 7Aba jeeda neayeedeang'wa arukkwiida gideaba, ‘Sugoochcheandumeeda humng'eeda nineekkiit.’ 8Oahaabwa fuga miyeani, ak goottuudu fuga nimeewa, nea ghoammidu fuga bearji udamusuura, nea goorruutti meangeenda. Geegooneegwa mwadaagha, oattayda mwadaagha. 9Adoayadi jeesinga shageenigeawa lappiya ghana lagheanga meeng'meeng'i sisinna lappiya wassean, ghana heelajeega, 10ghana shageeda naweeda, ghana hang'deaba iyyeenya, ghana geekka ghana bileang'ida. Aba gideaba siida gadiyeeda gammiisa nyasitta daghwardaannyi. 11Iyoweayi jeeda mujiineeda wassean ghana gharang'da, googasayi siida deaptaneagwa biissa adoabiiwaat ak gooppiidi gheannyi ea abeawana hoowa. 12Iyooweayi jeeda gheeda gookkeachcheewi fuga bea gheeda. 13Nea gheetta iimiisa hoyyooydeang'wa, abeeda danyasa hooyyooydeang'wa. Ama deappa ea mammisiina abeeda hooyyooydeang'wa gaygabiikseegwa agooga. 14Nea siida iimwadeataneegwa ghana ghaheawa gooleeysiit ng'asheegeagwa, iyooritteawi gheetta ghana mujiineedida, ghoalalakti birjeanda mida geeshangeagwa. 15Aba huumwa geayeeshsheegwa eaweetta girgweaksiinda gajeawussus ng'eanyiida Sodooma ea Gomoora gamilikghteaysa ghorjooda eaweetta girgweaksiinda ea ghang'al mujiineetta.”
Ghabasta jea ghwahidu
(Mark 13:9-13; Luk 21:12-17)
16“Asi Aniini geajeakteaydaneegwa gisilga jeeda suyeekka; asi andeawana weaghumeeda ea awuurjeewana ichchibooda, nea goong'eeniitti ghariibajeanda. 17Ashageada Buuneeda aba gideaba gayghwaadeagwa gheeda siirgweachcha nea ghabwareagwa aba jeesinga gealga nyaawa siinnealshachcheewa. 18Gajeayadeagwa madeeda sugoodiga ea dea fuga ahaaghwa ng'eanyiida appadaydeanyu, ak goomuwiisi Giijasta miy saawa ea fuga Emoojiga. 19Asi isiyaadeagwa adootteemsheesi gichchea arukuta aba gideaba damandida gajeegooneegwa gichchea arukuta. 20Aba gideaba mii agooga gil fuga jea gabalool, gaygabalool Gurorooda Ghweandeang'wa aba jeesingeagwa. 21Siida gayghwalabadaw oorjeeda ghaamwat enuus, ak ghwalabadaw ghweanda jeaptaannyi, nea gwayamsa geat diibiga ghweaniga nyaawa ea gheamadiga nyaawa ak ghabwar gameewa. 22Nea gayghwasteagwa buuneassean aba gheawungeasu. Nea siichchea ghamilikghta ea gammudean abeeda ea siichea eelealu. 23Ighabwaseagwa buuneeda aba mujiineani, goomng'awsi mujiineannuut. Aba huumwa geayeeshshineegwa majaduulni mujiinajeega ng'eanyiida Israeeli nea miighwahidu Balleanda Siida. 24Giinealaneeda mwoammu ghang'al giinealshoochchaandaannyi; nea eara soomjeanda ea mwoammu ghang'al siida haw adaw gadiyeeda. 25Ghwahit iwuurji giinealaneeda sea giinealshoochcheandaannyi, ak gawuurji somjeanda sea siidaannyi haw bea gadiyeeda. Abeeda iisuguura siida bea gheeda Beelsebuuli, heappi abeeda ea maygwasissa ng'asheega munyas muuchchi fuga mida jeedeaba gheannyi.”
Siida miisa gheawalmeeda
(Luk 12:2-7)
26“Asi adoawwalli saawa aba gideaba ng'asheanda funyaat gajeajaat, nea gitta funyaadiin gajeattahaach. 27Ng'asheanda earukuneegwa aba jeeda misaneeda, oorukuta aba eeshpwara; nea ng'asheanda oayiinyi meang'shooda, arukkwiida aba uhuuda gheeda. 28Adoawwalli fuga ammu gwanuus saseeda ak amwoammu gwanuus gurorooda; ghang'wana giiwali siitta ammu gwanuus saseeda ak gwajaksa gurorooda jeeda maloonghajeega. 29Heappi udabwaraadaji iyyeenya meesheahhideawana heelajeanjagi? Eara akkalealla mwoammu goobissa ng'eanyi nea mwamwasa Ghweandeang'wa. 30Nea agooga eara buudeega iheengeagwa ea siyiida sean. 31Adoabealli, agooga; ghoang'alli udabwaraadajeega saang'a.”
Masaweega ea gissiheawaatta Gristo
(Luk 12:8-9)
32Siida mwasan aba madeeda buuneeda, abeeda earanini gaydamwas niny aba madeeda Bwaabwa mida humng'eeda; 33nea siida wassean jea ghaheawanaan aba madeeda buuneeda, eara aniini gaydaheawa niny aba madeeda Bwaabwa mida humng'eeda.
Meanni hoyyoo geadu ng'uchcheeda
(Luk 12:51-53; 14:26-27)
34“Adiiduw ghoaghannyi gili eayeadu hoyyoo jeeda ng'eanyiida; meayeanni hoyyoo geayeadu ng'uchcheeda. 35Aba gideaba ghawunnyi deang'uuchchi siida ea ghwaan, ea huda ea ghaamwat, ea gatmooda ea ghamasiyeeda; 36weajoodiga siida fuga gheannyaawa. 37Siida bwariiy ghwaan ea ghaamwat ea ghwalabwanaan hoowa siisi mammisean; siida bwariiy balleanda ghana huda ea ghwalabwanaana hoowa, siisi mammisean; 38nea dea mwasara behiidannyi ak gweada geeshteanyu ea mammisean. 39Siida agaba aweagaaschi gaygahutteawi, nea siida hutteawi aweagaschi appadaydeanyu gaygwalealu.”
Gimearda
(Mark 9:41)
40“Siida deaptaneegwa ghwadeaptanaan aniini, nea siida deaptanaan, ghwadeapta siida ghayi ajeaknean. 41Siitteapta sibaneeda aba gideaba sibaneeda gil, gayghwanyas giimearda sibaneeda. Dea deapta siida doabiiwaat aba gideaba ea doabiiwaat eara niny gayghwanyas giimearda doobiiwnatta. 42Siida wassean jea ghoadaw siiyagi aba jeedeaba fiisu manang'iin beega garbappi aba gideaba giinealaneeda, aba huumwa geayeeshshineegwa eara niny mayghwaroat giimeardaannyi.”
Aktuálne označené:
Mattayo 10: DTGANT09
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Datooga New Testament © Bible Society of Tanzania, 2009.
