Yohaana 17
17
Yeesu ghamwaash ghawooda appadayda ginealangaaschi
1Iiduw nea niihiit Yeesu rukunoodeaba ng'asheesu, gong'weersa humng'eeda ak gwayi, “Bwaabwa, nugul damanda; aghambiida Balleandaang'u, ak abeeda eara Balleanda ghoaghambiinnyi ang'iing'i, 2aba gideaba ghayi giidawi niny uurda appadahuukka buneassean ak abeeda ghoadaw eaweega manda mudeanooda fukka sean ghayi idawiin. 3Nea eaweega manda mudeanooda ea nii gil, gideaba ghwanalnyi ang'iing'eeda was Aseetta huumwa ea Yeesu Gristoyda ghayi ijeagu. 4Aniini naghambichcheay appadayda ng'eanyiida, ak anahiichchi gadiyeeda ghayi igonnyean dasin; 5asi ghamneawa, aghambiidaan Bwaabwa, aba madeadaang'u aba gheambalmeeda ghayi eandeawi sea ang'iing'i nea miyeesin ng'eanyiida.
6“Naanung' ghwanalnyi fukghayi igonnyean aba jeeda ngeanyiida; ghayi fugaagu gil amaduw gugonnyean aniini ghoaw fugeasu, ak ghamneawa saawa ea ning'ng'waay ng'ashandaang'u. 7Ak ghamneawa saawa aninal gideaba haleanjeessean igonnyean gwaleabu headaang'u; 8aniini naadawji ng'asheega ghayi igonnyean, ak saawa aning'ng'waay ak ghwanal humeanda gideaba aniini gealeabu headaang'u; ak anumwas gideaba ang'iing'i gijeaknean. 9Ghamwaashchi Aseetta aba saawa; mwamwaashi Aseetta aba ng'eanyiida ghamwaashchi appadahuukka fuga igonnyean, aba gideaba gaagu; 10geasu sean gaagu gil, nea gaagu ea geasu, ak geakghambiidan aba jeannyaawa. 11Ak ghamneawa aniini ea muttanda jeeda ng'eanyiida, amaduukku saawa gwanda jeeda ng'eanyiida nea ghaawunnyi headaang'u. Bwaabeeda Ghaydit, ahaaghwana saawa aba gheawungaagu ghayi igonnyean, ahaaghwana ea ghoaw agi nea gawuurji gissuwosti aseasa gilagi. 12Ghayi nea guttandeawa saawa iissa ghahaaghwi aba gheawungaagu ghayi igooni; aniini nahaaghwi saawa ak ghanyeamanda nii nuroat eara akkalealla geaghus balleanda ghayi was roodaneeda, gwasa ng'asheega rugu ng'oruutka. 13Asi ghamneawa ghawunnyi headaang'u; ak ea nearukuti ng'asheesu aba jeeda ng'eanyiida, ak abeeda ghwanyas hooseaneegeasu muuchchi aba jeesinga nyaawa. 14Aniini naadawuji ng'ashandaang'u; amahit ghwasit ng'eanyiida aba gideaba saawa maba ng'eanyiida, gawuurji gidameabeaheattani aniini ng'eanyiida. 15Aniini mwamwaashi gideaba geandeawana jeeda ng'eanyiida, geagasayi gideaba gayfura aba gitta muyiin. 16Saawa maba ng'eanyiida gawuurji gidameabeaheattani aniini ng'eanyiida. 17Ammiinni, saawa aba huumeanda aba gideaba ng'asheandaang'u huumwa gil. 18Gawuurji gidaghayi ijeakteaydanean jeeda ng'eanyiida, gwasnu earaniini neajeakti saawa gaweay jeeda ng'eanyiida. 19Amaduw anammiidu geaw aniini appadahuukka nyaawa, ak abeeda eara saawa geammiidu aba humeanda.
20“Mwamwaashi Aseetta aba suu akghwahit, ghamwaashi earaba giikka jea ghamwasan aba ng'asheanda nyaawaan; 21ak abeeda ghwoaw fiisu gilagi; gawuurji gidindeatti jeedeanyu ang'iing'i Bwaabwa, nea geandi aniini jeadaang'u, eara saawa gobiida jeedeanya, ak abeeda ghamwas ng'eanyiida gideaba guwosi siida ghayi ajeaknean. 22Aniini naadawji saawa gigheambiitta ghayi igoonnyeaniin ak abeeda ghoaw gilagi gawuurji gisuwostti aseasa gilagi, 23aniini gaydeabiida jeannyaawa nea gibiidi ang'iing'i jeedeanyu; gideaballi gemmajeek ak ghoaw gilagi ak abeeda ghwanal ng'eanyiida gideaba ghayi giijeaknean ea gideaba gibwariinyi saawa gawuurji gidubwariiydanaan aniini. 24Bwaabwa, suu ghayi igonnyeaniin geagasayi dandeawa galeagasean aba hiji eandi sean, ak abeeda ghwadaa gigheambiitteanyu ghayi igonnyean, aba bwariinyeegaagu nea miyeabwat sindeetta ng'eanyiida. 25Ea Bwaabeeda doabiiwaat, ng'eanyiida mwanalnyi, duukku aniini ghanalleay; eara suu ghwanal gideaba ghayi gijeaknean ang'iing'i. 26Ak ea naanung' ghwanal ghawungaagu, ak gaydanung' ghwanal, abeeda bariinyeekka ghayi ibwariinyaan aniiniin goobiida jeesinga nyaawa, ak geabiidi aniini jeannyaawa.”
Aktuálne označené:
Yohaana 17: DTGANT09
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Datooga New Testament © Bible Society of Tanzania, 2009.
