Jesu koty rewarà kõ 28
28
Mauta ypõ'õ wasu pè oroiko remẽwarà
1Orovãema yvy 'aryvo ky'y. Pirujẽ noropai. A'e tè orokuwa Mauta eu sikaepo ypõ'õ wasu pè. 2A'e wãnà kõ, mire'eay jome kupa. Ajawyi orepopypy katu kupa orovãe remẽ. Ãmẽ jakatu ãmãnà oky wete jẽ. Irõwã ywete. Ajawyi tata omonururu kupa torojipe'e ee. 3Ãmẽ Pauru jape'a kure kurerà kõ omovyvy eru remẽ, moe revejẽ sikaepo omovy eru. Ajawyi jape'a omono mono tata pupe upa remẽ, a'e oẽ tata raku wyi iposu'u. 4Ãmẽ a'e wãnà kõ omã'ẽ ee remẽ, kee'i kupa:
– Haa! Manyvo pãwĩ! Maevo mirà ojuka maekwerà tè ãwĩ! Emã'ẽ! Pãranã pupe ojipypy ipe remẽ, nomãnõi. Ajamã'ẽ age'e si omãnõtà ky'y, waiwererà repy rõmõ! e'i tite kupa.
5Ajamã'ẽ Pauru nomãnõi. Ojipomoviva viva moe reity tata pupe. Nimanyvoi a'evo remẽ. 6Ãmẽ a'e wãnà kõ e'i tite:
– Iporurutà ajaire maevo! Py'awarà mõ omãnõtà! e'i tite kupa.
Ajawyi wãrõ puku sa'u ipe esa kupa. Ajamã'ẽ Pauru nimãrãi 'eteay. Ajawyi e'i kupa ky'y:
– Haa! Manyvo pãwĩ? Nomoay'ãi moe osu'u remẽ. Janejarà tè maevo ãwĩ! e'i tite kupa.
7Ãmẽ ajaire oroo a'e wãnà kõ rõvijã retã gyty. Pupiriu eu a'e jõvijã pè. A'e orepopypy katu teve. Moapy 'arà rõmõ oremomyta opyri. 8A'e ruu sikaepo ikaray wete. Evikay teve. Ajawyi Pauru oike etã wyry pè esa. Janejare'e pè oporegeta ijupewarà mõ. Ajaire wãkãmyy imokatu. 9Ajaire a'evoa ojenu pirujẽ jane kõ pè. Ajawyi itekorã mãe kõ weru eru Pauru pè tomokatu kupa, pirujẽ a'e pewarà ypõ'õgwerà pewarà itekorã mãe kõ.
10-11Ãmẽ oroiko puku rã'ĩ a'e pè nawiu rãrõ. Moapy jay tesõ oroãrõ a'e pè. Muruwapa tesõ ãmẽ ky'y. Ãmẽ tè nawiu mõ uu ky'y, a'e ypõ'õ wasu pè tè ãmãnà werokwapa mã'ẽ. Aresãtiria taa kyty wyi a'e nawiu uu. A'e nawiu sĩ rè oiko teminõgwerà, “Janejarà monosĩgwerà” eu ijupe mã'ẽ. A'e nawiu rupi oroo ky'y. Ãmẽ pirujẽ Mauta wãnà kõ ome'ẽ tepe'yte moma'e kõ oreupe toroeraa ore mojikuwapa rõmõ.
12A'e pe wyi Sirakusa taa kyty oroo ky'y. A'e pè orovãe remẽ, moapy 'arà rõmõ oroiko rã'ĩ. 13Ajaire oroo mijẽ ãmõ taa kyty. Rejiu eu a'e taa pè. A'e pè pe'ĩte oroke. Kõ'ẽme orojeapy oroo. Oroo oroiko remẽ, yvytu orerakypyrerà kyty wyi opeju nawiu eraa. Mõrijõ 'arà rõmõ oroerokwapa orovãe Peteori taa pè. 14A'e pè Jesu koty rewarà kõ mõ oroesa. A'e kõ:
– Pepyta rã'ĩ ike, e'i oreupe. Pe'ĩ semana rõmõ pepyta rã'ĩ, e'i kupa.
Oropyta rã'ĩ ãmẽ. Pe'ĩ semana rõmõ a'e rupi oroiko ipyri kõ. Ajaire oroo a'e pe wyi pee rupi tè ky'y, ajaate Romã taa kyty oroo orovãe. 15Ãmẽ Jesu koty rewarà kõ Romã wãnà kõ okuwapa sikaepo orovãetà mã'ẽ. Ajawyi taa miti kõ pè orerãrõ kupa. Apiu eu a'e taa miti pè. Ãmõ pè “Moma'e pyya” eu a'e pè. Ãmẽ Pauru omã'ẽ orerõvaisĩarà kõ rè remẽ, oryvay ee kõ. Omoe'e Janejare'e a'e kõ rè.
Romã taa pè orovãe remẽwarà
16Ãmẽ orovãema Romã taa pè ky'y remẽ, sota rõvijã omono rã'ĩ Pauru ovote toiko a'e rupi. Ajamã'ẽ omono jẽ sota mõ toãrõ jẽ iko.
17Ajaire moapy oke paire, Pauru omuroka Juteu rõvijã kõ mõ totuu okoty, a'e wãnà kõ mõ.
– Pejo ikõ eresa nẽ, tijajimogeta, e'i imono ijupe kõ.
Ãmẽ uu ojimoaty ipyri kupa. Ãmẽ e'i Pauru ijupe kõ:
– Eretãrãgwerà kõ. Erewarà maevo ojenupa pejẽ, kee e'i Jerusarẽ taa wãnà kõ mã'ẽ: “Pauru oiko teitete tè iko”, e'i mã'ẽ. Ãmõ, “Tãmõ Moisesi remikusiwarerà noerovijai iko ipi”, e'i mã'ẽ. Aepo e'i kupa rewarà mõ emopã'ã Jerusarẽ taa pè kupa, ãwisõ nimanyvoi epe aiko remẽ. Romã wãnà kõ rõvijã kõ po pè eme'ẽ temojaiwe kupa, e'i Pauru. 18Ajawyi a'e kõ erã'ã esa. Ajaire e'i kupa: “Manyvo rewarà mõ põ ãwĩ ojukatà kupa, ãwisõ nimanyvoi epe ekoi remẽ?” e'i eupewarà mõ kupa. Ajawyi opota ipe emoẽoka kupa. 19Ajamã'ẽ janerõvijã kõ opota katu jẽ emopã'ã, e'i. Ajawyi si ije yveve ka'e: “Ije ywete taa tajime'ẽoka amãtejẽ jõvijã wasu Sesa pè ajawyi, topi amãtejẽ ewyi kupa”, a'e. Ajawyi tè erã'ãtà eresa kupa. A'evo tesõ ipe erereko kupa remẽ, naporegeta ai eretãrãgwerà kõ rè. Ajireko katu kõrijõ tè ijayvu ai kõ wyi.#J.K.R. 25.11 20Ajawyi poromuroka tapejo eresa, tijajimogeta. Isaeu kõ remiãrõ pè “aje” a'e rewarà mõ tè epokwa kupa. Janejare'e Remimuurerà pè “aje” a'e rewarà mõ, e'i Pauru.
21Aepo e'i paire Juteu rõvijã kõ e'i:
– Ore ajamã'ẽ norokuwai ayvu ai nerewarà, e'i. Kareta mõ ve novãei nerewarà, Juteja yvy kyty wyi. Nonuri teve jane mõ nerewarà mojenu, e'i kupa.
22E'i jẽ kupa:
– Ajamã'ẽ kee oro'e ene. Pirujẽ taa taa rupi jane kõ oporegeta ai pene. “Nivoi Jesu koty rewarà kõ”, e'i kupa toroenu. Ajawyi ene ywete oropota neremikuwa nemome'u ore, e'i kupa.
“Hoõ” e'i Pauru.
23– Ajaire awi jajimoatytà japoregeta, e'i kupa.
A'evo ekoi ãmẽ kupa. Ãmõ 'ary pè ijatyray Juteu kõ ojimoaty Pauru pyri. Janejare'e ayvu rè Pauru omotekokuwa kõ, Janejare'e jane kõ Rõvijã wasu rõmõ poroereko mã'ẽ rè. Jesu rekoa rè teve omotekokuwa kõ. Tãmõ Moisesi remikusiwarerà rupi katu Jesu rekoa rè omotekokuwa kõ. Ãmõ, Janejare'e ayvu mojenuarà kõ remikusiwarerà rupi katu omotekokuwa kõ. Opota jane kõ tokuwa, “Aje ywete Janejare'e Remimuurerà tè Jesu”, te'i kupa. Omotekokuwa puku kõ. Ji'ive oporegeta ypy. Karupa remẽ tẽ tesõ opi imo'ea kõ wyi.
24Ãmẽ Juteu kõ mõ “aje ywete” e'i Pauru ayvu pè. Ajamã'ẽ ãmõgwerà “aje” ne'i. 25Ajawyi ojivy oo wetã kõ gyty kupa remẽ, ojimogeta oo iko kupa. Ajamã'ẽ pirujẽ ojivytà remẽ, e'i Pauru imono kõ:
– Karamoe remẽ Janejare'e 'Ãg janerãmõi kõ pè aje ywete kee e'i, a'e wayvu mojenuarà Isajasi rupi. 26Kee e'i maekwerà:
“Ekwa kee tere ijupe kõ:
‘Peenu remẽ, peenu tarepe.
Ajamã'ẽ napekuwa'ãi manyvo jaa tè e'i.
Ãmõ, pemã'ẽ gatu tarepe ee.
Ajamã'ẽ napemã'ẽ'ãi ee. Naperovija'ãi teve eayvu’, ere ijupe kõ.
27Ta'evo jẽsi kupa. Totekokuwa e'ã jẽsi kupa.
Tojiapyakwapyy jẽsi eayvu renu tare'ã kupa.
Tojiovapyy jẽsi teve kupa.
Opota sõ kupa remẽ, wenu katu kuwa eayvu kupa mijã.
Ojivy mijẽ kuwa ekoty kupa mijã.
Wenu katu kuwa kupa ãmẽ.
Otekokuwavay teve kuwa kupa.
A'evo remẽ tè kuwa, ije poromomoioka kuwa ijaiwererà kõ kasia wyi poromokatu”, e'i Janejare'e maekwerà.#Isa. 6.9-10
28Peupe tè aepo e'i amãtejẽ! e'i Pauru. Ajawyi kee tapekuwa. Juteu rõwã mãe kõ pè tè Janejare'e emono tamojenu Jesu janerereko katua rewarà ky'y, e'i. A'e kõ wenutà amojenu ijupe kõ remẽ, pevo rõwã. Aepo a'e tapekuwa, e'i Pauru ijupe kõ.
29Aepo e'i paire, ojisyry oo kupa ky'y. Oo kupa remẽ, ay rupi tesõ ojiayvuvaja vaja oo iko ojiupe kupa.#28.29 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 29 uve. Ãmõgwerà kõ pè nuvei.
30Ãmẽ Pauru mõrijõ kwaray rõmõ tesõ a'e pè ekoi. Tetã mõ opyy rã'ĩ ojimoena iwyry pè. A'e pè jane kõ oo oo esa remẽ, opota katu ipi. 31Oo esa mãe kõ pè Janejare'e ayvu omovyvy ipi, Janejare'e Janerõvijã ywete rõmõ poroereko katua rewarà. Ãmõ, Janerõvijã Jesu Kiristu rewarà. Nojipiraui tesõ Pauru oporegeta joupe remẽ ipi, okuwa ava pè nojiapyrasaoka'ãi rewarà mõ. Ava jẽ rõwã Pauru omomità Janejare'e ayvu e'eay momewa wyi.
[Ãmẽ awyjepa rã'ĩ akusiwa Jesu remimonokwerà kõ rewarà ky'y.]
Aktuálne označené:
Jesu koty rewarà kõ 28: oymNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2013, Wycliffe Bible Translators, Inc. All rights reserved.