Jesu koty rewarà kõ 27
27
Pauru Romã taa kyty oo remẽwarà
(27.1–28.31)
Pauru Romã taa kyty ootà remẽwarà
1A'evo paire kovenatu Pesitu e'i Pauru pewarà mõ:
– Hoõ! Too nẽ Romã taa kyty Itaria yvy pè, jõvijã wasu Sesa rovake! e'i ky'y.
Ajawyi orootà ky'y. Ije ve aatà Pauru rupi. Ãmẽ Pesitu ome'ẽoka rã'ĩ Pauru sota rõvijã mõ po pè toãrõ jẽ upa. Juriu eu a'e rerà pè. Sota atyry kõ rõvijã tè Juriu. A'e sota atyry kõ pè jõvijã wasu pyriwarà kõ eu. Ãmõ temimopã'ãgwerà kõ ve ome'ẽoka kovenatu Pesitu Juriu po pè, toãrõ jẽ eraa kõ oo kupa remẽ jõvijã wasu koty. [Nawiu rupi orootà. Yvytu rè tè wata mã'ẽ a'e nawiu. A'evo mã'ẽ pè oiko kamisa pevu, yvytu mokasia rõmõ.#27.1 Veleiro A'e rè yvytu ikasiay nawiu reroata.]
2Ãmẽ ajaire nawiu ovãe, Ataramiti taa kyty wyi uu mã'ẽ. A'e Asia yvy kyty ootà. Asia taa taa rupi ootà opyta pyta iko, pãranã reme rupi. A'e rupi orootà. Ãmõ, Jesu koty rewarà mõ ve oo orerupi, Aritaku eu erà pè mã'ẽ. Tesaronika taa wãnerà tè Aritaku, Masetonia yvy pewarà. 3Ãmẽ oroo ky'y. Kõ'ẽme orovãe Sitõ taa pè. A'e pè orovãe remẽ, Pauru e'i sota rõvijã pè:
– Taa rã'ĩ ejimorypa kõ resa, aã taa pè tui upa mãe kõ resa, e'i.
– Hoõ! Ekwa rã'ĩ ãmẽ neremimotarà kõ ve terepyy iwyi kõ, e'i.
Oporijauesa rewarà mõ aepo e'i. Oroo rã'ĩ esa kõ ãmẽ.
4Ajaire oroo mijẽ a'e taa pe wyi, nawiu rupi. Pãranã wasu oroasa oroo. Ãmẽ ijyvytu ai. Ajawyi ypõ'õ wasu ovae rupi tè oroo, yvytu ai e'ãma rupi. Sipiri eu a'e ypõ'õ wasu pè. 5Ajaire Sirisi yvy pyryvo orokwa. Pãpiria yvy pyryvo teve orokwa. Ajaire Mira eu taa pè mã'ẽ pè oropyta rã'ĩ. A'e Risia yvy pè. 6[A'e nawiu noo'ãi Romã taa kyty. Ajawyi oroo rã'ĩ oroẽ a'e taa pè.] Ajamã'ẽ ãmõ nawiu ovãema Aresãtiria taa pe wyi. A'e ootà Itaria yvy kyty, Romã taa kyty.
Ajawyi sota rõvijã orereroike mijẽ orereraa nawiu rupi. 7Mewe tè oroo ky'y, ikasiay yvytu nawiu sĩ rè rewarà mõ. Ijatyray tesõ ge tekou nawiu pupe oroke oroiko. Ãpẽijay oroo orovãe Kinitu taa pè. Yvytu ikasi mã'ẽ nomojãnokari nawiu (kwaray ẽma kyty). Ajawyi wãi ovae rè tè orokwa oroiko rã'ĩ. Ypõ'õgwerà rovae rupi orokwa oroiko. Kereta eu a'e ypõ'õ wasu pè. Ajawyi Saumoni taa rupi ve orokwa, ypõ'õ wasu ovae rupi oroo remẽ. Nijyvytu ywe'ei a'e rupi. 8Ãmẽ oroo jẽ Kereta ypõ'õ wasu myterà rupi, ypõ'õgwerà reme rupi. Ãmẽ waypete jẽ oroo remẽ. Ajawyi taa mõ pè oropyta rã'ĩ. Jãemijarà ikatu mã'ẽ eu a'e taa pè. A'e Raseja taa pyri'ĩje'ẽ sa'u tè. 9Ipojy ai pãranã wasu a'evo remẽ. Nawiu kõ noo'ãi a'evo remẽ ipi. Orokuwa pãranã ipojy remẽ ipi. “Ãmãnà kyrypy remẽ a'evo ipi”, oro'e teãmã. Ajawyi oropyta rã'ĩ kuwa a'e pè mijã. [Ajamã'ẽ sota rõvijã sikaepo ojikõtevẽ jẽ iko, opota oo amãtejẽ ovãe Romã taa pè rewarà mõ.
– Nikatui ijaty ge rõmõ tesõ jaiko nawiu rupi remẽ. Ja'e jẽ! e'i ywe'e tite.]
Ajamã'ẽ Pauru okuwa ipojy ai oroasa jẽtà sõ oroo remẽ. Ajawyi kee e'i epe tõvijã kõ pè:
10– Ipojy aità siasa jẽ sõ jaa remẽ, ejimorypa kõ, e'i. Moma'e kõ pirujẽ opatà nawiu reve, e'i epe. Maevo jane ve japatà, e'i. Ikatu kuwa ike japyta rã'ĩ remẽ, e'i epe.
11Ajamã'ẽ kee e'i jẽ nawiu jarà rõvijã:
– Ãnĩ! Nimanyvo'ãi jaa jẽ remẽ! e'i ywe'e tite.
Nawiu jarà teve aepo e'i. A'e kõ ayvu ywesõ sota rõvijã werovija ywe'e tite Pauru ayvu wyi.
12– Jaa jẽ kuwa Penisi taa pè japyta, e'i pirujẽ jane kõ. Aã taa pè nikatu ywe'ei japyta jẽ ãmãnà kyrypy remẽ, yvytu ikasiay ike rewarà mõ. Ãmõ, ãmãnà oky wete teve, e'i kupa.
A'evo oroo tarepe orovãe Penisi taa pè. A'e teve Kereta ypõ'õ wasu pè tui. Yvytu nikasi ywe'ei Penisi taa pè ipi. Ajawyi aepo e'i kupa.
Yvytu ai opokou Pauru kõ remẽwarà
13Ãmẽ oroo jẽ oroiko remẽ, nijyvytu ywe'eive mijã. Ajawyi oryvay ywe'e tite iko kupa.
– Javãetà ipõ, e'i tite kupa.
Ãmẽ nawiu momãatãa ipowyijay mã'ẽ#27.13 Âncora wekyi mijẽ inõ nawiu pupe kupa, yvytu nawiu toeroata jẽ. Ypõ'õgwerà reme pyri'ĩje'ẽ rupi orokwa. 14Ajamã'ẽ py'awarà mõ yvytu ai wasu werojivy jivy tesõ! Kwaray yke kyty wyi a'e uu, ypõ'õgwerà 'arà rupi. Ajawyi opeju nawiu eraa wayvo. 15Ãmẽ nawiu jarà manyvo noereko'ãi imomãatã. Ajawyi omoane'e kõrijõ tè yvytu toeraa. Noterẽ gatui nawiu oo ky'y. Yvytu ai rupi kõrijõ tè oo. 16Ajawyi orojipota rã'ĩ yvytu ai wyi, Kauta ypõ'õgwerà pyri'ĩje'ẽ. Oiko yarà ra'yry mõ nawiu rè ojiãpasĩ mã'ẽ, mãrãnai mẽwarà rã. A'e ojora imokatu nawiu kwarà pè kupa. Ãpẽi weroike imokatu kupa, yvytu ai ywete rewarà mõ. 17Nawiu jarà remĩgwai kõ tè weroike. Aja paire nawiu ookwa okwa kupa, yvytu tooka oka e'ã. Okyje ai tè kupa ky'y. Kee e'i kupa:
– Ovajarà kyty ysĩ rena oiko, Siti eu erà pè mã'ẽ. Natypyi a'e pè, e'i. Maevo opã'ãtà nawiu a'e rè ojika jika, e'i kupa.
Ajawyi kamisa yvytu weroata mã'ẽ omowyjy imokatu kupa.#27.17 Karai kõ vela e'i. Aja paire oo jẽ nawiu ky'y. 18Ijyvytu ai ywete jẽ. Ikõ'ẽma tesõ yvytu ai. Ajawyi moma'e kõ wekyi epe imopopo pãranã pupe kupa.
– Tivevui a'u ekojẽ, e'i tite kupa.
19Kõ'ẽme ijyvytu ai jẽ upa. [Ãmẽ ywesõ okyje ai kupa ky'y.] Ajawyi kõ'ẽme moma'e kõ mõ wekyi mijẽ imopopo pãranã pupe kupa, ipowyi mãe kõ. 20Ajamã'ẽ ijyvytu ai jẽ upa. Ãmãnusu jẽ upa. Okyru ywete jẽ ãmãnà upa. Kõ'ẽ kõ'ẽve oky ãmãnà. Ajawyi 'arà pãtõ kõ'ẽ kõ'ẽ tesõ upa! Jaytata kõ nojisai teve pya. Mapejõ ke rõmõ tesõ a'evo oroiko ky'y. Ajawyi norokuwai maty põ orootà mã'ẽ ky'y. Manyvo noroiko'ãi ãmẽ ky'y. Ajawyi:
– Japatà tè ky'y! oro'e kõrijõ.
21Nojimi'ui rã'ĩ tesõ iko kupa ky'y, okyje iko kupa rewarà mõ. Ãmẽ Pauru opõ'ã jane kõ mytery pè kee javo ijupe kõ:
– Ejimorypa kõ, pejapyaka eayvu rè aporegeta peupe remẽ. Ãwĩ pè itõkõ a'e ipe pejẽ! Napeenui ywe'e tite eayvu! “Tijajisyry e'ã rã'ĩ”, a'e ipe itõkõ pejẽ, Kereta ypõ'õ wasu pè jaiko jẽ remẽ, e'i. Ãmẽ “hoõ” pejẽ sõ remẽ, nãwĩ vo'ãi kuwa age'e mijã! 22Ajamã'ẽ tapekyje e'ã. Nijamãnõ pe'ĩ'ãi ajamã'ẽ, e'i. Nawiu kõrijõ tè opatà, e'i. 23Kwee apouvai remẽ, Janejare'e wemĩgwai yvapewarà mõ omuroka ekoty. A'e remĩgwai tè ije. A'e amoe'e ipi, e'i. A'e remĩgwai yvapewarà uu ekoty remẽ, oporegeta ije. 24“Terekyje e'ã, Pauru!” e'i. “Napemãnõ'ãi. Neo jẽtà nevãe jõvijã wasu Sesa pyri. A'evoa rõmõ Janejare'e penejatà, nerupi oo mãe kõ ve”, e'i Janejare'e remĩgwai yvapewarà ekery pè. 25Ajawyi tapejimokasi, a'e pejẽ. Akuwa aje ywete Janejare'e e'i ipi, e'i. Ajawyi akuwa nijanemomaoka'ãi, e'i. 26Ajamã'ẽ ypõ'õgwerà mõ rè tisiraa nawiu imoja, e'i Pauru ijupe kõ.
[– Haa! A'evotà si! e'i ãmẽ kupa.]
27A'evo jẽ. Nawiu rè ikasi ywete jẽ yvytu ai upa. Weraa jẽ pãranã wasu rupi, Atiria eu pãranã pè mã'ẽ rupi. 14 kerà rõmõ tesõ werokwapa yvytu ai ky'y. Ãmẽ pyaikatu remẽ, nawiu jarà remĩgwai mõ e'i:
– Yvy pyri'ĩje'ẽ jaiko ky'y! e'i. Japatà maevo ky'y! e'i.
28Ajawyi yy typya mosã'ãga omomo yy pupe esa kupa. Wekyi remẽ, typya okuwa kupa. 40 meturu rõmõ typy a'e pè. Ajaire sa'u omomo mijẽ esa. 30 meturu rõmõ kõrijõ tè ky'y. Natypy ywe'ei ky'y. 29Ajawyi ãmẽ ywesõ okyje jẽ kupa, takuru kõ rewarà mõ. Nojisai 'eteay, pyaikatu rewarà mõ. Nawiu momãatãa ipowyi mãe kõ omomo opyta pe wyi, irõte rõmõ. A'evo paire oporegeta ojarà rã'ãga kõ pè kupa.
– Kuise'ẽ emokõ'ẽoka toromã'ẽ gatu nawiu rape rè! e'i epe kupa.
30Ãmẽ nawiu jarà remĩgwai kõ omowyjy yarà ra'yry yy pè.
– Nawiu momãatãa ipowyi mãe kõ oromowyjytà nawiu sĩ pe wyi! e'i rã'ãga owari rõmõ kupa.
[Na'evo'ãi kupa ajamã'ẽ. Ojava vijatà oo kupa rewarà mõ tè aepo e'i kupa. “Nawiu opa e'ãve”, e'i tite kupa.]
31Ajamã'ẽ Pauru a'evoa okuwapa. Ajawyi omome'u sota rõvijã pè. Ãmõ, sota kõ pè.
– Ãwĩ kõ ojavatà oo! e'i. Janereity sõ oo kupa remẽ, japatà ãmẽ, e'i Pauru.
32Ajawyi, sota kõ yarà ra'yry ã weta ity imono yy pupe, nawiu jarà remĩgwai kõ tojava e'ã upi.
33Kõ'ẽma mẽ Pauru oporegeta jane kõ pè, tojimi'u rã'ĩ kupa ky'y. E'i ijupe kõ:
– Pemã'ẽ! Tapejimi'u rã'ĩ! e'i. Kweevewarerà ve napejimi'ui. Mõrijõ semana rõmõ tesõ a'evo, e'i. 34Ajawyi age'e tapejimi'u rã'ĩ ky'y. Tapekasi katu nẽ. Tapejimo'ãgatu teve ikõ nẽ. Napepa'ãi, e'i ijupe kõ.
35Ãmẽ Pauru aepo e'i paire, meju wekyi imosãi ijupe kõ. Oporegeta rã'ĩ Janejare'e pè eminu kõ rõmõ. Ajaire openo peno meju iwa ãmẽ ky'y. 36Orekasi katuay ky'y, orojimi'upa katuay ãmẽ rewarà mõ. 37Oreaty tesõ nawiu pupe. 276 rõmõ tesõ ore, pirujẽ remẽ. 38Ajaire, orojimi'u paire, temitã rã'ãigwerà#27.38 Trigo kurerà oromopopo imono yy pupe. [“Tivevui jẽ nawiu”, oro'e rewarà mõ.]
Pirujẽ orovãe yy reme pè ky'y remẽwarà
39Ãmẽ kõ'ẽma mẽ nawiu jarà omã'ẽ wemĩgwai kõ reve yvy rè. “Mã yvy pãwĩ?” e'i tite kupa. Ajamã'ẽ omã'ẽ yy jirojivya rè kupa. A'e pè uve ysĩ jipykuikwerà. Ajawyi,
– Wãi ysĩ rè siraa nawiu imoja! e'i kupa.
40Ãmẽ weta nawiu tõpasã ity imono kupa. Imomãatãa kõ oyvypa oo ãmẽ. Ypykuita ã kõ ojora teve kupa. Ãmẽ kamisa ipevu mã'ẽ omovevu mijẽ ipe ijãpasĩ imõ'ã kupa, ysĩ rupi katu yvytu toeraa. 41Ajamã'ẽ oiko sikaepo ysĩ natypyi mã'ẽ a'e pè, pãranã pupe. Ajawyi a'e rè nawiu opã'ã isĩ gytyre upa. Nawiu ropyta rè opipo pipo ywete yy. Ajawyi ooka oka tesõ nawiu ropyta ky'y. 42A'evo remẽ sota kõ e'i ojiupe:
– Temimopã'ãgwerà kõ siapisità rã'ĩ to'yta e'ã ojava janewyi oo kupa! e'i tite kupa.
43Ajamã'ẽ sota rõvijã nopotai Pauru ojuka kupa. Ajawyi noapisioka kõi. Kee e'i kõrijõ:
– E'i katu o'yta o'yasa mãe kõ ypy joãkã mõ too yy reme kyty, e'i. 44Ajaire ne'i katui o'yta mãe kõ takypy rupi to'yasa oo kupa. Yvyra jimo'ikwerà 'arà rupi too kupa. Nawiu pẽgwerà rupi teve, e'i.
A'evo oroereko ãmẽ, ajaate pirujẽ orovãe yy reme pè ky'y. Nomãnõ pe'ĩ jane mõ yy pupe.
Aktuálne označené:
Jesu koty rewarà kõ 27: oymNT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2013, Wycliffe Bible Translators, Inc. All rights reserved.