Jenesis 11
11
Tour Babel
1Hag yth esa dhe oll an bys unn taves, ha'n keth geryow. 2Hag y hwarva hag i ow mos yn-rag dhiworth an howldrevel, i a gavas stras yn pow Shinar ha triga ena. 3Hag i a leveris, an eyl dh'y gila, ‘Dewgh, gwren ni gul brykkys ha'ga fobas yn tan.’ Hag yth esa brykkys dhedha yn le meyn ha pyg yn le pri. 4Hag yn-medhons i, ‘Dewgh, gwren ni drehevel sita ha tour, ha'y benn y'n nevow; ha gwren gul hanow ragon, rag own ni dhe vos skattrys a-les war enep oll an nor.’ 5Ha'n Arloedh a dhiyskynnas dhe weles an sita ha'n tour esa mebyon den orth aga drehevel. 6Hag yn-medh an Arloedh, ‘Awotta, unn bobel yns i, hag yma unn taves dhedha i oll; ha hemm yw an dalleth a'ga ober; lemmyn ny vydh travyth na allons i y wul mar mynnons. 7Dewgh, gwren ni diyskynna ha kemmyska aga yeth ma na wodhvons konvedhes an eyl yeth y gila.’ 8Ytho an Arloedh a's skattras a-les alena war enep oll an nor, hag i a astelas drehevel an sita. 9Ytho, yth yw hy hanow gelwys Babel, rag an Arloedh dhe gemmyska ena yeth oll an bys, ha'n Arloedh a's skattras alena war enep oll an nor.
Henedhow Shem
10An re ma yw henedhow Shem. Shem o kans bloedh hag ev a dhineythis Arfaksad diw vlydhen wosa an liv. 11Ha Shem a vewas pymp kans blydhen wosa dineythi Arfaksad, hag ev a dhineythis mebyon ha myrghes.
12Arfaksad a vewas pymthek blydhen warn ugens, ha dineythi Shelagh. 13Hag Arfaksad a vewas peswar kans blydhen ha teyr wosa dineythi Shelagh, hag ev a dhineythis mebyon ha myrghes.
14Shelagh a vewas deg blydhen warn ugens ha dineythi Eber. 15Ha Shelagh a vewas peswar kans blydhen ha teyr wosa dineythi Eber, hag ev a dhineythis mebyon ha myrghes.
16Eber a vewas peswardhek blydhen warn ugens ha dineythi Peleg. 17Hag Eber a vewas peswar kans blydhen ha deg warn ugens wosa dineythi Peleg, hag ev a dhineythis mebyon ha myrghes.
18Ha Peleg a vewas deg blydhen warn ugens ha dineythi Reu. 19Ha Peleg a vewas dew kans blydhen ha naw wosa dineythi Reu, hag ev a dhineythis mebyon ha myrghes.
20Reu a vewas dewdhek blydhen warn ugens ha dineythi Serug. 21Ha Reu a vewas dew kans blydhen ha seyth wosa dineythi Serug, ha dineythi mebyon ha myrghes.
22Serug a vewas deg blydhen warn ugens ha dineythi Nahor. 23Ha Serug a vewas dew kans blydhen wosa ev dhe dhineythi Nahor ha dineythi mebyon ha myrghes.
24Ha Nahor a vewas naw blydhen warn ugens, ha dineythi Teragh. 25Ha Nahor a vewas kans blydhen ha nownsek wosa ev dhe dhineythi Teragh, hag ev a dhineythis mebyon ha myrghes.
26Ha Teragh a vewas deg blydhen ha tri-ugens ha dineythi Abram, Nahor ha Haran.
An Ugheldas Abram
27An re ma yw henedhow Teragh. Teragh a dhineythis Abram, Nahor ha Haran, ha Haran a dhineythis Lot. 28Haran a verwis pan veu y das hwath yn few#11:28 pan veu y das hwath yn few: Ebrow a-rag y das po yn golok y das. yn pow y enesigeth,#11:28 y enesigeth: Po y neshevin. Ur an Kaldeanys. 29Hag Abram ha Nahor a gemmeras gwragedh dhedha aga honan. Hanow gwreg Abram o Saray, ha hanow gwreg Nahor o Milka, myrgh Haran, tas Milka ha tas Yska. 30Mes Saray o gownagh; nyns esa flogh dhedhi.
31Teragh a gemmeras Abram y vab ha Lot mab Haran, mab y vab ev, ha Saray y wohydh, gwreg y vab Abram, hag i eth yn-mes gansa dhiworth Ur an Kaldeanys mayth ellens dhe bow Kanan, hag i a dheuth dhe Haran ha triga ena. 32Ha dydhyow Teragh a veu dew kans blydhen ha pymp, ha Teragh a verwis yn Haran.
Aktuálne označené:
Jenesis 11: ABK
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© Kesva an Taves Kernewek 2004, 2024
© Cornish Language Board 2004, 2024