METIU 11
11
Jo:nkolokkc Gvla Agom Lutadnc
(Lu:k 7.18-35)
1Odokkc cdvlo Jisubv vyvngkola:anyi agom tadjvgla gvmvnnc tani:kvdv:dcm luyir lungaptonc, bv odokkc poyirkapc odokkc lutadkapc buluk nogorkvdv:do:pc gvkang.
2Cdcmpc idodcm cdvlo Jo:nbv makana:lokkc Kristokc ager gernamkvdv:dcm tattonc, bv avkc agom tadjvgla gvmvnnc tani:ckkcncm mclvgto odokkc bvm luto,
3“Novi bv:n sc:ko gvpcncdcnc, cdcma:mvlo ngolu akoda ka:la toya:ycnci?”
4Odo Jisubv bulum lubito, “Gvkang odokkc nolu okkom tattonc odokkc ka:tonc lubilang: 5miglunckvdv:dc ka:begdungku odokkc lambcgvla:ma:pc ngedgo:nckvdv:dc gvla:dungku, ngero:-ro:namkvdv:dc narcngkangku odokkc ru:benckvdv:dc tadbegamkangku, sinckvdv:dcm turabmodungku, odokkc opankvdv:dcm tadponc lutaddcm lubidung. 6Odokkc sc:kobv ngok gvkolo gvnyi:ma:ycnc bv akirba:d pa:nc.”
7Bulu odokkc gvkunammc, Jisubv yadkumsunc tani:kvdv:dcm Jo:nkc agomcm lurobbombikang: “Nolu okkom kangkapc yumrangolo:pc gvlenkan? 8Csarc yuku:nam luiyangkvdv:dcmnci? Kapila cmpcmvlo nolu gvlenkan? Rcmakpc attar gcnc tani: akoncm kangkapcnci? Ka:toka, sc:kobulu rcmaknc attarcm gcdonc bulu migomlok okumno du:do. 9Nolu kapila cmpcmvlo gvlenkan? Agom lungorla lunc tani:koi kangkapc? C: ngo nolum lubidung, odokkc agom lungorla lunncmyamsin bottaya:ncko. 10Cdc bv:ai sc:kokc agomcm adla lc:tagnc,
‘Ka:toka, ngo ngok agom lutadncm nok nappangcm lupo:dopc mclvgdo,
sc:kobv nok lambcm nom gvpo:la mopu:bidonc.’
11“Aropakpc, ngo nolum lubidung, nc:ngkvdv:dok onamlok Jo:n Baptismo bincmc bottaya:nc akosin oma:da; ckvdaggom taycng amo:tok adjiyarya:ncdc bvmyam bottarya:nc. 12Jo:n Baptismo binckc longckvdv:dokkc silolo:pc taycng among migom amo:dc ipusire:ycm pa:dung, odokc ipusire:ycm inc tani:kvdv:dc bo:lkokki cdcm la:dag. 13Kapila:nc appvng agom lungorla lunam kvdv:dcm odokkc lujvglurokvdv:dcm Jo:nkc longcdo:pc luto; 14odokkc nolu torvgsulv:dagmvlo cdcm, bv Elia:bv sc:kobv gvpcncdc:nc. 15Sckkc tannanc yerungc du:nc bvm tadmotoka.
16“Ckvdaggom okokokki ngo sc appv:scm luyv:suycn? Sc ko:kangckkc attar koko-rckodo dunge:la buluk gvjonkvdv:dcm gogsuma:namcmpc idag,
17‘Ngolu nolum bangsi:ycm mudbito,
odokkc nolu so:tomang;
ngolu kabancm banto,
odokkc nolu mc:dvrra
angkcngcm pisula kabtomang.’
18“Kapila:nc Jo:nbv gvto dotosinmang tv:tosinmang, odokkc bulu ludag, ‘Bvkkc ui ako dung;’ 19Tani:kc Awodc gvla doto odokkc tv:to, odokkc bulu ludag, ‘ka:tok, dorvncko odokkc kvngv:pc apo:tv:ncko, migom murkong urkumsunckvdv:dok odokkc papi:kvdv:dok ajonc!’ Ckvdaggom ainc agomdc Bvk agerkvdv:dokki aidag cmna ludo.”
Mc:jvma:nc Tawonkvdvng
(Lu:k 10.13-15)
20Odo Bv oko oko nogorkvdv:do botta bottaru:nc agerkvdv:dcm gerkanc cdcmbulum luke-lumarra lurobbomkang, kapila:nc lcga:dc bulu mc:dvrra mc:sula asinc mc:latsutokumang. 21“Nolukkc mc:dvrpcnamc, Korajinkvdvnga! Nolukkc mc:dvrpcnamc, Betsaidanga! Kapila:nc nolukkolo bottaru:pc gernam agerkvdv:dcm Ti:rc odokkc Sidondo gerya:mvlo, bulu bojcrungko po:pcbong asinc mc:dvrra mcngkutsuyyangkupc toilang gaincm gcge:la odokkc mcdbulo dungge:la. 22Ckvdaggom ngo nolum lubidung, bottcru:nc kcba:ba:doku longcdo Ti:rdc:lang Sidondokkcpc du:jcmna du:poya:ycpc nolukkcmyam. 23Odokkc nolu Kapernauma, nolu taycng amo:pc jo:sangkunampc iycn? Nolu sinckvdv:dok amo:bo:pc joletlvgpcnammcyc. Kapila:nc bottaru:nc agercm nolukkolo gernamkvdv:dcm sodumdo gerya:mvlo, silopc cdc du:tvya:pc. 24Ckvdaggom ngo nolum lubidung cdc bottapaknc kcbang longcdo nolukkcmyam Sodum amo:dokkcpc du:jcmla du:la:ya:ycpc!”
Ngokkolo:pc Gva:la Du:rasuta:ka
(Lu:k 10.21-22)
25Odo ayirdo Jisubv lutadla lubito, “Ngo nom aipai bido, Ba:ba, taycng amo:tok odokkc mo:pvsok Ru:tuma, no:na scmbulum kinnc-pa:nc tani:kvdvdokkcm odokkc mcngkinma:nc kvdv:dokkcm lc:sitonc odokkc kowaukvdv:dcm lcngkanto; 26C: Ba:ba, kapila:nc cdcmpci nok ayang-abonc asin mc:namdc.
27“Appvng attcm ngok Ba:bukokki ngokkolo:pc bitag; odokkc sc:kosin Ba:budcm kinmang Awodc:ma:mvlo odokkc akoncm sc:kom Awodc bvm lcngkanpc cmna balenna bama:mvlo.
28“Ngokkolo:pc gva:toka, appvngc sc:kobulu airu:pc mc:dvrra mc:tapsula du:nckvdvnga, odokkc ngo nolum mc:rasukkom biyc. 29Ngok jungoli:ycm nolu tulvgsutok, odokkc ngokkolokkcm luyir-poyirnammcm torvgsutok; kapila:nc ngo ainc odokkc asinc rcmagnc tani:yc, odokkc noluk yalokvdv:dok lcga:pc du:rasukkom pa:ycpc. 30Kapila:nc ngok jungo:li:dc rcmagdag, odokkc, ngok jo:namdc:sin cssa:dag.”
Aktuálne označené:
METIU 11: MISIBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
