LU:KKC 19
19
Jisubv:lang Jakkaeubv
1Bv Jeriko:pc gva:to odokkc gvbadla gvdungai. 2Odo Jakkaeu cmnam tani: ako dungai; bv migom murkong urkumsunc kvdv:dok bottarya:nai, odokkc mircmdagai. 3Odokkc Jisubv sc:koji bv ka:pc cmna mato, cmpige:la ka:la:tomang, yadkumsunc tani:kvdv:dokki, kapila:nc bv etedu:dagai. 4Cdcmpila bv kcra:pc dugpongka odokkc tajvg vsvngkolo Bvm ka:pc cmna barsangkang, kapila:nc Bv odo lambcdok gvbatla gvpcnammai. 5Odokkc cdvlo Jisubv odo dungkodo:pc pv:toji, Bv nge:sa:la ka:to odokkc bvm luto, “Jakkaeua, mcna:pc gvitok odokkc; kapila:nc silo ngo nok okumolo du:ycrung.”
6Cdcmpila bv lomdanna gvitoku odokkc, odo Bvm mc:po:pc torvgsuto. 7Odokkc bulu cdcm kangge:la bvnbvnaitakkang, “Bv pa:p kanc tani:kolokki mibopc ikapc gvkang” cmna.
8Odokkc Jakkaeu:bv dagrobge:la Ru:tummc luto, “ka:tok, Ru:tuma, ngok attarkvdv:dok orpongko opankvdv:dcm biyc; odokkc sc:kaiycm yadgo-mogo:la atvko langkamvlo, ngo odokyam lcppi:ko bojcya:pc bilatycku.” 9Odokkc Jisubv bvm luto, “Silo turnamc sc okumso:pc pvnga:dung, bv:sin Abrahamkc awopc ila:yam. 10Kapila:nc Tani:kc Awodc yogncdcm makakupc odokkc moturkakupc gvdung.”
Avn Anvr Murkongdok Kvkanna Kvbinam Do:ying
(Met 25.14-30)
11Bulu cdc agomkvdv:dcm tadla du:dodcm, Bv kvkanbila kvnam do:yngko kvbipc kvrobbomkang, kapila:nc Bv Jerusalem aninpc dungai, odokkc lcga:dc bulu mc:dungai Ru:ncpvnckc migom donam mo:pvdc oddung lendungaboi. 12Bv cdcmpila luto, “Bottcnc tani: akonc migom doko mo:pvko torvgsukapc mo:tcpc gvge:la gvlattoku. 13Bvk ager gerya:nc tani: vyvngdcm gogangge:la, bv bulum vyvngkolang pi:nyiko anvr murkongcm bito, odokkc bulum luto, ‘Sokki rcnam-konamko ilang ngo gvlatkuma:sisscm.’ 14Cmpige:la Bvk avkc mo:di: tani:kvdv:dc bvm tayumto odokkc bvk lcdudo lutad luncko scmpc lula mclvgto, ‘Ngolu sc tani:scm ngoluk migompc idopc imolv:mang.’
15“Cdvlo bv gvlattokuji, migom dokodcm torvgsuge:la, bv cdc ager gerya:nc kvdv:dcm lulvgto, sc:kobulum bv murkongcm bikaji, bulu cddvkopc rcnam konamdokki pa:toji kinna:dopc, bvkkolo:pc goga:moto. 16Gogpongarnamdc bvk kera:do:pc, scmpc lula gva:to, ‘Ru:tuma, nok vyvngkolang kvnvd anvr murko:dc vyvngkopcda bojcyangkopc murkongcm imoto.’ 17Odo bv bvm luto, ‘Aincko ito, ainc ager gerya:nc! Kapila:nc no aipc adjioloksin mc:dap-darapncko, no nogor vyvngkolok migom doncpc iycpc.’ 18Odokkc akondc gva:la, scmpc luto, ‘Ru:tuma, nok vyvngkolang kvnvd amcrdcm anggokoda bojcya:moto.’ 19Odo bv bvm luto, ‘Odokkc no nogor anggolok migom doncpc iycpc.’
20“Odokkc akonkoda, scmpc lula gva:to, ‘Ru:tuma, sc nok anvr murko:dc, okodcm ngo dumcrkolo ycngnula lc:tungaji; 21kapila:nc ngo nom pcsodungai, kapila:nc no aipakpc sangitnc amiko; no okodcm lc:mangaji no cdcm la:sa:dag, odokkc okodcm pidmangaji cdcm gaddag.’ 22Bv bvm luto, ‘Ngo nok nappa:dok agomdokkiyci nom aimang cmna kcbangcm ba:yc, ci aima:nc ager gerya:na! Ngo tornc tani:yc cmna kindagnci, ngo okodcm lc:yi:mangaji cdcm la:sa:mvlo odokkc okkom pidmangaji cdcm gaddagku cmna? 23Kapila:nc cmpcmvlo no ngok anvr amcrdcm be:ngkolo lc:toma:n odokkc ngok gvlatdokudo odok lc:rcdcmsin la:tc:la langkupai?’
24“Odokkc bv kcra:dok du:nckvdv:dcm luto, ‘Bvkkolokkcm anvr murko:dcm la:tokuk, odokkc sckkc vyvngkolang kvnvt anvr murkong pirnyiko du:nc bvm cdcm bitok.’ 25Odokkc bulu bvm luto, ‘Ru:tuma, bvkkc vyvngkolang kvnvd anvr murkong pirnyiko dung!’ 26‘Ngo nom lubidung, jc sckkc sckkci du:nc bulumci biyc; cmpige:la sckkc kama:nc, okodc du:nc cdcmsinci la:pakycku. 27Cmpige:la sc ngok mirukvdv:dok lcga:pc, sc:kobulu buluk migompc ngom itoka cmna mc:ma:ycji, bulum so:pc gva:boge:la ngok ka:de:pc papagamtoka.’ ”
Jerusalempc Vrroi Cmna Gva:nam
(Met 21.1-11; Mark 11.1-11; Jo:n 12.12-19)
28Odokkc cdvlo Bv cdcm lutoji, bv gvgcla, Jerusalempc gvka:la gvbomkang. 29Betpagi:yclang Betani: aninpc pvnga:nammc, Olib cmnam adi:do, Bvk agom tadjvgla gvmvnnc tani: anyiko Bv mclvgto, scmpc lula, 30“Clc kcrangkc do:lungolo:pc gvkang, nolu gva:dodcm gado: gure:ko rvnna lc:namko pa:ycpc, okolo sc:kosin sangkvma:daji; cdcm sarge:la so:pc sobomlangkuk. 31Sc:kaiyc nolum, kapila cdcm rvnnamdcm sardu:n cmna tawuycmvlo nolu scmpc lulang, ‘Ru:tumbv cdcm madag.’ ”
32Cdcmpc sc:kobulum mclvgtagaji gvla cdcm pa:to Bvk lulvgkamdcmv:pc. 33Bulu gadong gure:dcm sardodcm, odok ru:tumdc bulum tawuto, “Kapila gadong gure:dcm sardu:n?”
34“Odo bulu lubito, Ru:tumbv scm madag.” 35Odokkc bulum cdcm Jisukolo:pc sobomtoku, odokkc buluk gasorkvdv:dcm gadong gure:tayc:do pulvgamge:la bulu Jisumc odok tayc:do sa:moto. 36Odokkc Bv sa:la gvdodcm, bulu buluk gasorkvdv:dcm ali:lambcdo pulvgamto.
37Bv cdcmpc idodcm aninpc pvnga:nammc, Olib Adi: re:yiko mo:di:dok ru:yido, yadkumsunc tani: appv:dc Ru:ncpvncmc rc:batlvgla jc:la aipai birobbomkang bottcnc ager gernam appv:dcm bulu kangge:la, scmpc lula, “Ru:tumkc aminno gvnc Migomdc gernc-pu:nc! 38Taycng amo:to mc:pomcnganc odokkc taycngaryangkoto aipc aipaiyc ika:langka!”
39Odokkc yadkumsunc tani: kcrcdok Parisi:ckkc Bvm luto, “Luyirna, nok agom tadjvgla gvmvnc tani:kvdv:dcm ge:rvdtokai.”
40Bv bulum lubito, “Ngo nolum lubidung, sc:bulu aso:pc dungapmvlo, vlvngkvdv:ru:dci jc:ya:pc.”
Jisubv Jerusalemdok Lcgangc Kabnam
41Odokkc Bv cdvlo aninpc pvnga:la nogordcm ka:begtoji nogordok lcganc Bv scmpc lula kapkang, 42“Silokc longcso no mc:pomcnganc okkonc cdcm kinya:mvlo! Cmpige:la nok kangkolokkcm su:pak cdcm lc:sutag. 43Kapila:nc longckvdv:dc nokkolo pvnga:yc cdvlo oko mirukvdv:dc nok dunggo:ycgo: appv:lok yellubla amongcm gcyetyc; odokkc appv:lok nom yadribomyc, 44odokkc nom amo:lo gctabyc, nomna: nok ommangkvdv:dcm, odokkc bulu vlvngcm akon tayc:do akoncm lc:ma:yc; kapila:nc no palvg lvgnamdok ayirdcm kintomang.”
Jisubv Kumko Okumdo:p Gvnam
(Met 21.12-17; Mark 11.15-19; Jo:n 2.13-22)
45Odokkc kumko okum ara:do gvangge:la sc:kobulu attar kola dunggaji, scmpc lula mcnnenam bomkang, 46“Scmpc attak, ‘Ngok okumdcm kumko okumpc iyc;’ cmpige:la nolu cdcm rotkudnc kvdv:dok dungko koru:pc ito.”
47Odokkc Bv lo:dvscm kumko okumdo luyirra dungai. Dormo ager gernclok bottarya:nc kvdv:dc odokkc tani: kvdv:dok ru:tum tani: kvdv:dc Bvm mokepc cmna mago:to; 48cmpige:la bulu atvkosin ila:tomang buluk ilv:namdcm ipc, kapila:nc tani:appv:dc Bvk agomkvdv:dcm airu:pc mcnga:namkokki.
Aktuálne označené:
LU:KKC 19: MISIBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
