JO:N 7
7
Jisubv:lang Bvk Bvrrangkvdv:dc
1Odok lcdudok Jisubv Galildo gvgo:to; Bv Judia:do:bulu gvgo:tomang, kapila:nc Jiwukvdv:dc Bvm mokepc cmna mago:to. 2Cdcmpidodcm Jiwukvdv:dok gasorki monam kumko okumdok dopundojarc pvnga:dagaboi. 3Cdcmpila Bvk bvrokvdv:dc bvm luto, “Scm mctok odokkc Judia:pc gvkang, nok agom tadjvgla gvmvnnc tani:kvdv:dc nok inam agomkvdv:dcm ka:dopc. 4Kapila:nc oko tani:ycsin lc:sula agercm germang bv ka:de:pc kinkosulv:mvlo. No agerkvdv:scm imvlo, mo:pvscm avyc lcngkansutok.” 5Kapila:nc bvk bvrrang kvdv:dc:sinci Bvm mc:jvgmangai.
6Jisubv bulum luto, “Ngok ayirc pvnga:ma:da, cmpige:la noluk ayirc lo:dvscm sowvng dung. 7Mo:pvsc nolum tayumla:mang, cmpige:la sidc ngom tayumdag kapila:nc ngo sok agomcm lukanbidung jc sok agerkvdv:dc aimang. 8Nolu av avyc dokotvngkodo:pc gvkang, ngo cdc dopundojardo:pc gvma:yc, kapila:nc ngok ayirdc aiyo:pc, pvnga:ma:da,” 9Cdcmpc luge:la, Bv Galildo du:pakkang.
Jisubv Du:rasukodok kvnggv:pc Mc:ponam Longcdo
10Cmpige:la Bvk bvrrang kvdv:dc doko tvngkodo:pc gvdag lcdudo, odokkc Bv:sin gvmvnkang, appvngkc gvkolo:mang cmpige:la angupc. 11Jiwukvdv:dc Bvm dopun-dojardo kanggo:la dungai, odokkc “Bv okola:n cmna lugo:la dungai.”
12Odokkc tani:kvdv:dok ara:lo Bvk agomc kvnggv:pc ngombu:la ngomkang. Akke luto, “Bv ainc tani:ko,” akke luto, “Ma, Bv tani:kvdv:dcm yadngula gvbokang.” 13Ckvdaggom Jiwukvdv:dcm pcsola:yam sc:kosin ka:de:pc Bvk agomcm lutomang.
14Dopun dojardok ara:do Jisubv kumko okumdo:pc gvto odokkc luyircm lubito. 15Jiwukvdv:dc cdcm mcngapla:ma:pc ikang, scmpc lula, “Kapc scmpc iycn sc amisc cdvlosin poma:pc kapc mcngkin agomcm kinla:ton?”
16Cmpila Jisubv bulum lubito, “Ngok luyirnamdc ngokkcmang, cmpige:la sc:ko ngom mclvgtagji Bvkkc; 17tani: akolokkc bvk mcngkamcm ipc cmna mc:mvlo bv kinyc luyirdc Ru:ncpvnckolokkcyc: ma: ngo avkc lulang-gvlangkokki ludu:yc. 18Sc:kobv avkc lulang-gvlangkokki luycnc avkc amin gvnamcm masudag; cmpige:la sc:kobv Bvm mclvgncdok amin gvnamcm maycji bv arro, odokkc bvkkolo lume: lunamc kamang. 19Mose:bv nolum lujvglurrom bimangalang? Ckvdaggom nolukkolok sc:kosin lujvglurodcm lukamdcmpc imang-gvmang. Kapila nolu ngom mokepc cmna mc:dang?”
20Tani:kvdv:dc luto, “Nokkc uiko dung! Sc:ko nom mokepc cmna madu:n?”
21Jisubv bulum lubito, “Ngo ager abangko gerto, odokkc nolu appvngc cdcm bvn-bvnaito. 22Mose:bv nolum gatpuknammcm bito (cdc Mose:kolokkcmangai, lekekc abukvdv:dokkai,) odokkc tani:akoncm ager germa:pc yodla du:do longgcmsin nolu gadpugcm gaddag. 23Yodla ager germa:pc du:dom tani:ycm gadpukkoi gaddomvlo, Mose:kc lujvg lurodok lukamdcmpc ima:pc ipckc cmna, nolu ngom aglv:dagnci ngo tani:pakko yodla ager-germa:pc du:do longcdcm csa:motokuncm? 24Ka:pa:namkokki kcbangcm ba:yoka, cmpige:la aro kcbangki kcbangcm ba:langka.”
Bv Messaia:dci?
25Jiwukvdv:dok tani:ckkc cmpila luto, “Sc tani:sc:mangalang bulu mokepc cmna sc:kom magongkanc? 26Odokkc sc:yam, ka:de:pc agom lula du:nc, bulu odokkc okkomna:sin luma:nc! Aropakpc Bv:rung Kristobv cmna migom donc kvdv:dc kinla:ycn? 27Ckvdaggom sc amisc okolokkc gvdu:ji ngolu kindag; odokkc Kristobv cdvlo lenycji, sc:kosin Bv okolokkc gvnncji kinma:yc.”
28Cdcmpila Jisubv bottapc, kumko okumdo luyirkamdcmpc lugo:bito, “Nolu ngom kindag, odokkc ngo okolokkc gvnncji nolu kindag? Cmpige:la ngo avkc mcngkamkokki gvmang; sc:kobv ngom mclvgtagnc Bv arro, odokkc Bvm nolu kinmang. 29Ngo Bvm kindag, kapila:nc ngo Bvkkolokkc gvdung, odokkc Bv ngom mclvgtag.”
30Cdcmpila bulu Bvm ycnggabpc cmna mago:to; ckvdaggom sc:kosin Bvm alagki gakkvtomang, kapila:nc Bvk ayirdc pvnga:mangada. 31Ckvdaggom tani:kvdv:dok bojcrungc Bvm mc:jvgto; bulu luto, “Kristobv cdvlo gvycnc, Bv sc tani:sok lcngkannam kvdv:scmyam bojcyangko kanggodcm lcngkan la:yclang?”
Sipai Kvdv:dcm Jisumc Ycnggabdopc Mclvgnam
32Parisi:kvdv:dc yadkumsunc tani:kvdv:dok bvn-bvnaila Bvm lunamkvdv:dcm tatto, odokkc dormo ager gernckvdv:dok bottarya:nckvdv:dc migom ager gernckvdv:dcm Bvm ycnggabdopc mclvgto. 33Jisubv odo luto, “Ngo noluk lcdulo adjiokoda du:yc odokkc ngom sc:ko mclvgtagnc bvkkolo:pc gvycku; 34nolu ngom maycpc odokkc nolu ngom mabegma:yc; okolo ngo du:ycnc nolu gvmvnma:yc.”
35Jiwukvdv:dc akoncm akonc luka:mvnsuto “sc tani:sc okolopc gvpcmna mc:du:ncm ngolujc Bvm mabegla:ma:ycnc? Girik kvdv:dok asum asumpc yadkumsula du:nc kvdv:do:pc gvla luyirycnci odokkc Girikkvdv:dcm luyirycnci? 36Scmpc lunamdcm Bv okkomna ludangncm, ‘Nolu ngom mayc odokkc nolu ngom mabegma:yc’, odokkc, ‘Ngo okolo du:ycnc nolu gvmvnna:ma:yc’?”
Turnam Binc Jili:abung Asi
37Dopun dojardcm dongapdo longcdo, bottaru:nc longcdo, Jisubv dagrobto odokkc bottcpc lugo:bito, “Sc:koiyc tv:lv:dagmvlo, bvm ngokkolo:pc mca:lvgtoka odokkc tv:motoka. 38Sc:kobv ngom mc:jvgdagnc, ru:nckc agom jvggabnamdc lukamdcmpc, Bvk asindokkc turnc asidc bittvla du:yc.” 39Cdcmpc Bv cdcm Yalodok agomcm luto, sc:kobulu Bvm mc:jvgdagnc torvgsupcnammai; kapila:nc Yalodcm odosin bimangada, lcga:dc Jisumc odosin amin gvmomangada.
Tani:kvdv:dc Angu Angunam
40Cdvlo bulu cdc agom kvdv:dcm tattoji, tani:kvdv:dok akke luto, “Sc aropakpc cdc lungor luncdc.” Akedc luto, “Sc Kristobv.”
41“Ckvdaggom akke luto, Kristobv Galildokkci lenpcncn? 42Ru:nckc agom adgabnamdc luma:lang Kristobv:jc Dawidkolokkc lenyc cmna, odokkc Betelehemdokkc lenyc cmna, oko do:lu:do Dawidmc otoji?” 43Cdcmpila tani:kvdv:dok ara:lo Bvk lcgangc angu-anggamkang. 44Buluk akke Bvm ycnggablvngkang, cmpige:la sc:kosin Bvm alagki gaga:tomang.
Jiwudi Migom Tani:kvdv:dok Mc:jvgma:nam
45Migom ager gernckvdv:dc odokkc dormo ager gernckvdv:do:pc odokkc Parisi:kvdv:do:pc gvladamkangku, sc:kobulu bulum “Kapila nolu Bvm gvbotokuma:n, cmna lutoji?” 46Migom ager gernckvdv:dc lubito, “Oko tani:ycsin cdvlosin cdc tani:dcmpc agomcm lukvmang!”
47Parisi:kvdv:dc bulum luto, “Nolum gvyodbomka:nci, nolusinnci? 48Atv ager ilang-gvla:nckvdv:dok akonc manggom Parisi:kvdv:dc Bvm mc:tinsutonci? 49Cmpige:la cdc yadkumsunc tani:kvdv:dc sc:kobulu lujvgluro agomdcm kinmanganc pelvgnammc.”
50Nikodimbv, sc:kobv Bvkkolo:pc po:pcbong gvkaji, odokkc sc:kobv bulukkolok akka:ji, bulum lubito, 51“Ngoluk lujvg lurodc tani: akoncm bv okkom idagji kinma:pa:ma:pc kcba: ba:donci?” 52Bulu luto, “No:sinnci Galildokkcn? Makvtopcn odokkc no ka:begycpc oko lungor lunncsin Galildokkc lenpcnc kamang.” 53Bulu appv:dc av avkc okumpc gvkangku, cmpige:la Jisubv Olib Adi:do:pc gvkang.
Aktuálne označené:
JO:N 7: MISIBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
