Ranehlö 11
11
Tömarò-òlkui Pati I Pepilön
1Höng hēngö ëlô ngam tumlat nö ṙòkhöre höng hēngö ṙô inrē. 2Chalôḵ tö e, hē cha nö kiröönngöre nö lā chuhöt tö cha nö kôḵtökūö tök kun panam Sinār tö ṙa-akūö; ngaich chā-a nö iyöng in e. 3Ngaich ngöṙô cha-a töhöö, Pöh, tā-a töi vī īt, ngaich kô-òtī föngö u. Ngaich chā-a nö ihong tö īt, inpantö pitumin tī chā-a. 4Ngaich ngöṙô chā-a, Pöh, tā-a töi vī elpanam hī hĕng, tömarô-òlkui patī inrē, öp tösöllökui nö el halīöngö, tā-a inrē töi vī minë-enyre; hòṅ hī öt pirāti marôvat ikui ngam tumlat nö ṙòkhöre. 5Ngaich ngam Mā Tēv nö yônti nö ngëichkö ngam elpanam tömarô-òlkui patī inrē, ngam vahīlö yik kūön tarik. 6Ngaich ngöṙô ngam Mā Tēv, Yĕhmeuk, hĕng yin nö tarik, ane yin inrē hēngö ëlô nö ṙòkhöre; ngaich angū-ö ngih la-en cha nö rultenre: ngaich töngamuh min nö öt hĕng tö tanahen nö in cha, nup lōn cha vahī cha. 7Pöh, tā-a töi yônti, ngaich umuh kalūöichngö ëlô cha, hòṅ cha nö kö öt akaha el nang tö ṙô höö. 8Ngaich ngam Mā Tēv nö pirātngen cha nö marôvat nö ṙā-ang muh ikuö ngam tumlat nö ṙòkhöre: ngaich chā-a nö ṙāngenre nö vīlö ök el panam. 9Lökten ök minë-eny e nö kaheūkö nö Pēpöl, pò ngam Mā Tēv nö kô-òtī nö kalūöich ëlô ngam tumlat nö ṙòkhöre: ṙā-ang umuh tī ngam Mā Tēv nö pirātngen Cha nö marôvat ikui ngam tumlat nö ṙòkhöre.
Mikūönö Sëm
(1 Kinṙöt 1.24-27)
10Vē yin tumköl chap Sem. Hēngòng samyeūheu ṙēti ngaich ang Sem nö köiny, ngaich hakūönten Arpaksāt, nët samyeūheu unôichrit ök ṙanöingö: 11Taneūyòng samyeūheu Sem nö aṅ unôichrit ò nö hakūönten Arpaksāt, ngaich hakūöntö nyīö kikōnyö, nyīö kikānö inrē.
12Lūöi anāi taneui samyeūheu Arpaksāt nö aṅ, ngaich hakūönten Sēllā. 13Fënòng lūöi samyeūheu Arpaksāt nö aṅ unôichrit ò nö hakūönten Sēlla, ngaich hakūöntö nyīö kikōnyö, nyīö kikānö inrē.
14Lūöi anāi samyeūheu Sēllā nö aṅ ngaich hakūönten Ēpa: 15Fënòng lūöi samyeūheu Sēllā nö aṅ unôichrit ò nö hakūönten Ēpar, ngaich hakūöntö nyīö kikōnyö nyīö kikānö inrē.
16Lūöi anai fën samyeūheu Ēpar nö aṅ, ngaich hakūönten Pēlek: 17Fënòng lūöi anāi samyeūheu Ēpar nö aṅ unôichrit ò nö hakūönten Pēlek, ngaich hakūöntö nyīö kikōnyö nyīö kikānö inrē.
18Lūöi anāi samyeūheu Pēlek nö aṅ, ngaich hakūönten Rū: 19Nëtòng machūötör samyeūheu Pēlek nö aṅ unôichrit ò nö hakūönten Rū, ngaich hakūöntö nyīö kikōnyö, nyīö kikānö inrē.
20Lūöi anāi nët samyeūheu Rū nö aṅ, ngaich hakūönten Sēruk: 21Nëtòng sat samyeūheu Rū nö aṅ unôichrit ò nö hakūönten Sēruk, ngaich hakūöntö nyīö kikōnyö, nyīö kikānö inrē.
22Lūöi anāi sat samyeūheu Sēruk nö aṅ, ngaich hakūönten Nāhōr: 23Nëtòng samyeūheu Sēruk nö aṅ unôichrit ò nö hakūönten Nāhōr, ngaich hakūöntö nyīö kikōnyö, nyīö kikānö inrē.
24Nët anāi machūötöre samyeūheu Nāhōr nö aṅ, ngaich hakūönten Tīöra: 25Hēngòng machūötör samyeūheu Nāhōr nö aṅ unôichrit ò nö hakūönten Tīöra, ngaich hakūöntö nyīö kikōnyö, nyīö kikānö inrē.
26Sat anāi samyeūheu Tīöra nö aṅ, ngaich hakūönten Aprām Nāhōr, Haran inrē, Mikūönö Tīöra.
27Vē yin tumkölchap Tīöra. Hakūönten Aprām Tīöra; Nāhōr, Haran inrē; ngaich hakūönten Lòt ang Haran. 28Kapah ngaich Haran nö ikūö Tīöra ök kikōnyö yöng ò nö ip panam chūök finötnyö ò, i Ör panam aṅ Kāltī. 29Kēḵ pīhöre ngaich Aprām, Nāhōr inrē: Sarai minënyi ök pīhö Aprām; Milka, minënyi ök pīhö Nāhōr, kikānö kūön Haran ök kikōnyö yöng Milka, ane inrē kikōnyö yöng Iska. 30Tötmikūönlö ök Sarai; öt kūönu anga-aṅ.
31Ngaich Tīöra nö kēḵ ök kūönre kikōnyö Aprām, Lòt inrē kikōnyö kūön Haran, kikōnyö kūön ök kikōnyö kūön ò, Sarai inrē ök kan kūön ò, Aprām; ngaich kiröönngöre chā-a nö holten cha nö ṙā-ang Ör, panam aṅ Kāltī, nö chuh ip panam Kanā-an, yih chā-a ngaich nö i Haran, ngaich iyöng umuh. 32Ngaich nuk sakāmö Tīöra nö nëtòng samyeūheu: kapah Tīöra nö i Haran.
Aktuálne označené:
Ranehlö 11: CANIBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.