LUK 23
23
Pilate Sheshaome Jesu
(Mt 27.1-2,11-14; Mk 15.1-5; Jn 18.28-38)
1 #
Mt 27.1-2; Mk 15.1; Jn 18.28. Hüyange ükhong üshei yong hüyange Pilate tangte Jesu woi pei; 2#Lk 20.25.ümeken me iman-e Ite ümeng yamne wang. “Ngaoleih iye teman kahtalan woipu tüopa kahta toman-e phoki, Ahngpate kahngin tahpha she iman te i, hüyange I nying nyingke Iya Khrista, hüyange ahngpa she i.” 3#Mt 27.11-12; Mk 15.2-3; Jn 18.29-38; Lk 22.70.Pilate Ite tong, “Nanga Jehudilan ahngpa a?” “Eihja, nange Tao üja she iyangki,” she Jesuwe jan. 4#Lk 23.14,22,41; Mt 27.24; Jn 19.4,6; Lam 13.28.Tüophei me Pilate ütahpa ngengpa hüyange jamme ngohpu ükhong te i, “Tüopa kahta me taowe ümeng hango ye-nge.” 5Hüpoi iman-e ünyei ne teeye hüke i, “Iye kahta lilite konnyüowe powe pongyang küja! Iye Galilee me ükong wang, Judea kahtok üshei te kemme pong hüyange sha-a tüome ngoiye ngohnang.”
Herod Tangte Jesu Shon
6Aope Pilate-e tüopa jai Iye tong, “Hatüo kahta-a Galillee lan a?” 7Jesuwa Herod-e wanglam lampu kahmük mepu she aope Iye shing, Iye Herod tangte Jesu shon, ao tüohipak me Jerusalem me ngoh. 8#Lk 9.9; Lam 4.27-28.Aope Iye Jesu nge Herod yeonge mongmei, hangjingne I jeng Iye jaiye ngoh hüyange hipak yeonge laowe I ngehuwe teih-e ngoh; Iye Jesuwe lingpu yashan toi ütam ngehuwe teih. 9#Mk 15.5.Tüokhei Herod-e Jesute ngao maawe tong, hüpoi Jesuwe ngao pha ja nehoi yejan. 10Ütahpa ngengpa hüyange ngaokeng nyüopalan sheshao yete ngai hüyange Jesu te yeonge yemeipe ngao. 11#Mk 15.17-19; Jn 19.2-3.Herod hüyange I yompalanne Jesute nyiyai-e hüyange Ite ye-i-yeshepu ngaowe tam. Iman-e yeonge meipu inkhek Ite inne tamyange Pilate tangte muh shonne ye. 12Tüonyih me peiye Herod hei Pilate ni shümpa ne meng; tüoshao me imanpa me wepa ne teingoh yangki.
Pilate-e Jesu Lantamhuwe Teih
(Mt 27.15-26; Mk 15.6-15; Jn 18.39—19.16)
13Pilate-e ütahpa ngengpa üjenglan, wanglam lampalan, hüyange kahtalan üshei nyik-e jem, 14#Lk 23.4,22,41.hüyange imante hüke i: “Hatüo kahtawe kahtalan ünyong yete woinangki she iye numan-e ü-tangte pho pei. Sha-a numan-o omme tamyange taowe Ite tokke leipuweih, hüyange numan-e yemeipe Ite kanglak ne taowe I me ümeng hango ye-nge. 15Yejema-a Herodte-o I me ümeng hango ye-nge, tüone menge Iye temante I shonne yeyangki. Hatüo kahtawe lilak shange toi meng hango yeling puyang. 16#Lk 23.22; Jn 19.12-14.Tüokhei Taowe Ite shetning, hüyange tüophei me I lanne teining.” 17Sha-a Yinyepu mo hipak lep iye Pilate-e iman jingne küppe angpalan yo mepu ja lanlak wongpong.
18 #
Mt 27.20-23; Mk 15.11-14; Lam 3.13-14; Jn 18.38-40; 19.14-15. Tüoyangpoi ükhonge ja ne menge üngwünne i, “I toitüoh! Toman jingne Barabbas lan pha!” 19(Iye chingnyu me chingphei weih-e mop ngaipu jingne hüyange kahta toipu jingne Barabbas küpnok me ang.)
20Pilate-e Jesu lanne teihu; tüokhei ükhong te Iye nishe ngao. 21Hüyangpoi iman-e üngwünne ye, “I tangpem me taktüoh! Tangpem me taktüoh!” 22Pilate-e imante lüm she ngaowe i, “Hüpoi Iye hanghe ümeng lingyangpu shi? Lilak ne Iye ümeng lingyangpu taowe ye-nge! Taowe Ite shetne tamlak hüyange I lanlak.” 23#Mt 27.26; Mk 15.15.Hüyangpoi yelakpe Jesu tangpem me eptamtüoh she iman-e yeonge üngwün; hüyange ükümne iman-e üngwünpu ütahte ngai. 24Tüokhei iman-e tongpu linglak jingne Pilate-e Jesu toine phünne pha. 25Iman-e yah-hupu kahta Iye lanne tam, aowe chingphei weih-e mopngai hüyange kahta toi, hüyange iman-e mongpu kih linglak jingne Jesu lanne pha.
Jesu Tangpem Me Toipu
(Mt 27.32-44; Mk 15.21-32; Jn 19.17-27)
26 #
Mt 27.32; Mk 15.21; Jn 19.17. Hüyange aope iman-e I woitei, Sairin mepu Simon üjai me peipu ngeye, iman-e pho, hüyange Jesu pheite tangpem pailak jingne Ite tangpem-a paine tam.
27Hüyange ükhong üngang Iphei te woi, hüyange shekolanne iman jakuhte tüppe I jingne yeonge mangshappe woi. 28#Lk 21.23-24; 19.41-44.Hüpoi Jesuwe iman yete lüppe yeyange i, “Jerusalem hayimlan, ü jingne tahshap, hüpoi numan hüyange numan hayim jingne shapyah. 29Hangjingne leihu, nyih hei hipak peiküki, hanghepa me iman-e ilak, moikolan, hüyange aope-o nao yepuhpalan, hüyange aope-o düamyingne yetampalan mongmeilak. 30Hüwante iman-e kahtanglante ilak, ‘Toman tangme yeitüoh,’ hüyange kahkenglan te ilak, ‘Toman te küppha!’ 31Hangjingne iman-e pee ühüng me ngohwante tüolan lingma-a, pee üli me hanghe linglak?”
32Hüyange ümeng lingpu ülao kahta-o ni I phei li ne tamlak jingne woipei. 33#Mt 27.33-44; Mk 15.22-32; Jn 19.17-24.Hüyange aope iman-e “Shangwaan” she nyikpu nyoite pei, tüome iman-e I tangpem me daktoi; hüyange ümeng lingpu ja I yak jah yeme, hüyange ja I yaknya yeme tangpem me daktoi. 34#Lam 7.60; Tüo 22.18.Hüyange Jesuwe i, “Opa, imante ümeng wintüoh, hangjingne iman-e hanghe lingnang tüopa iman-e yeshing.” Hüyange iman-e I jing inkhek iman yo me tamlak jingne phongyeng. 35#Lk 4.23.Hüyange kahtalanne leiye yong; hüpoi wanglamlampa lanne-o Ite phoiye i, “Iye eiha yin ok; I nying nyingke yinne tamtüoh, I Khrista Kahwange leye ngaipupa ne mengma-a!”
36 #
Mk 15.23; Tüo 69.21. Hüyange kengphet lanne-o Ite phoi, owe wenne Ite ükhah yeng pha; 37hüyange i, “Nang Jehudilan Ahngpane mengma-a, nang nying nyingke yintüoh!” 38I shangtang me-o hüke nyanpu ngoh, “Hatüowa Jehudilan Ahngpa.”
39Hüyange ümeng lingpa tangpem me eppu jawe Ite yaoweleye i, “Nang Khrista ne yeje a? Nang nying nyingke hüyange toman-o yinkei!” 40Hüpoi ülaopawe Ite janne teeye i, “Nange-o shaoshipu jakih-e ngeyange, nang Kahwangte yenyampu a? 41#Lk 23.4,14,22.Hüyange temanpa-a ütingme shupu; hangjingne teman-a teman toishao phei shuwe ümee tüonangki. Hüpoi tüopa kahtawe hang ümengo yeling.” 42Hüyange Iye i, “Jesu, aope nang ahngching te peilakeih, tao teih-e tüoyah!”
43 #
2 Kor 12.3; Ütah 2.7. Hüyange Jesuwe Ite i, “Ütingpa me Taowe nangte inang, tenyih nang ü-phei chingmei nyoi me ngohlak.”
Jesu Lipu
(Mt 27.45-56; Mk 15.33-41; Jn 19.28-30)
44 #
Mt 27.45-56; Mk 15.33-41; Jn 19.25-30. Hüyange sha-a hipak penme ni paji#Ghonda wok she-o ngelak. Wanghe ngai phei me ipu, pen me ni ngoiwante, wok ne meng nang. nanjing ne ngoh, hüyange lüm paji ngoiye kahtoknyu üshei me wanghe ütee yengaipe nyakke mah. 45#Woi 26.31-35; Heb 9.8; 10.19.Aope wanghe ütee yepha ok; hüwante khümjing me tienpu nye ni ne tang. 46#Tüo 31.5.Hüwante Jesuwe ngao üyong ngaiye üngwün phei me, ngaowe i, “Opa nang yak me Taowe Ü yaha phanang!” Hüyange tüopa ngaoyang phei me, I lüo mah.
47Hüyange aope gho ja woipawe hanghe ngai tüopa nge, Iye Kahwang te yihluwe i, “Ütingme tüopa-a khakshupu kahta ne ngohyangki!” 48Hüyange aope tüome jemme ngohpu bangha khongkümpuwe hanghe ling tüopa nge, iman jakuh te tüppe nokte yan. 49#Lk 8.1-3; 23.55-56; 24.10.Hüyangpoi Iphei teishingpu üshei hüyange Galilee mepu I pheite woipu shekolanne üjai me tüolante leiye yong.
Jesu Mupu
(Mt 27.57-61; Mk 15.42-47; Jn 19.38-42)
50 #
Mt 27.57-61; Mk 15.42-47; Jn 19.38-42; Lam 13.29. Sha-a Joseph she minpu Jehudi ching Arimathea mepu kahta ja ngoh. I-a kahta ümei, hüyange khakshupu, hüyange ngao ipalan yo mepu ja ne ngoh: 51aowe iman kon hüyange toi me ye om, hüyange Iye Kahwang ahngching peilak te leiye ngohyangki. 52Tüopa kahtawe Pilate tangte taiye Jesu mang yu. 53Tüophei me Iye tüopa yei-e nye ükhaiye nyeih, hüyange long watte lingyange ngohpu kahta aope-o man mupu mangkoksa me I ang. 54Hüyange tüopa tümtapu nyih ne ngoh, hüyange Sabbath oteiye ngoh. 55Hüyange Galilee mepu I phei peipu shekolan I pheite woi, hüyange I mang hangke ange ngoh mangkoksa te lei; 56#Mk 16.1; Woi 12.16; 20.10.tüophei me iman leihye, hüyange üpe ümei hei pholak tüm.
Sabbath me iman-e ngaokeng kih-e toloi meiye nyoi.
දැනට තෝරාගෙන ඇත:
LUK 23: KONYBSI
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.