LUK 13
13
Lizaŋ ko te-mbɔra nɛ̀ wai na
1Kale ŋgimbi'i, o ŋma bíí tɛɛ ɓɛɛ we ɗoŋ mɔ nɛ̀ hɔɔ zu o be Galilee ha̧ Jesu, wen Pilat gbɛɛ so wa ŋgimbi nɛ̀ wa ɗafi nɛ̀ Sɔ̧. 2Jesu kifa nú ha̧ wa: «Ɛnɛ ta k’ɛ́nɛ́‘e, wa dee mɔ hegɔ in o be Galilee nɔ‘i wen nɛ̀ wa nɛ́ o gasa wi-de-ɗaŋmɔ gan o dɔka be Galilee nde? 3Weyaa, mi'e ndé, k’ɛ̀nɛ̀ kpáí duka-a k’ɛ́nɛ́ na, ɛnɛ lɛŋ tɛ fe kànà hegɔ mbɛt. 4Ɓɛɛ nɛ̀ o wi nɔ'ɔ ɓu-zua-mɔɔrɔ-ɗoŋ-taar, nɛ̀ kusa tua sɛn Siloe gbina a zu wa, gbɛ wa’ɛ, ɛnɛ ta k’ɛ́nɛ́‘e wa dee ɗaŋmɔ gan o ŋma bíí Jerusalɛm nde? 5Weyaa, mi'e ndé, k’ɛ̀nɛ̀ kpáí duka-a k’ɛ́nɛ́ na, ɛnɛ lɛŋ tɛ fe kànà hegɔ mbɛt.»
6Ɓɛɛ a̧ tɔ̧ lizaŋ'ɛ: «Ŋma bíí a̧a̧ so nɛ̀ te-mbɔra kpɛɛfɔ kɔ‘i. Nɛ́ mɔ'ɔ n'aa nɛ̀ɛ̀ mɛ ɓi waya-a, ɓɛɛ a̧ kpa ŋma mɔ na. 7Ɓɛɛ a̧ tɔ̧ ha̧ wi-zɔk-fɔ kɔ̧-a̧: ‹Kinii, dee nɛ́ pɛ taar n'am tɛ mɛ ɓi nɛ́ waya mbɔra’ɛ ɓɛɛ mi kpa ŋma mɔ na. Mɛ̀ gɔ́m a̧ yinɛ, wen a̧ kpe nɛ́ bɛɛ-nù sɔɔ géè.› 8Ɓɛɛ wi-zɔk-fɔ tɔ̧ ha̧ a̧: ‹Nyaa, ɛ̀nɛ̀ é ha̧ a̧ dúk mɛ pɛ'ɛ kaŋ, ha̧‘m za̧ gun-aa, a̧‘m a ɗɔr-ndai sɛnɛ sɛ́. 9Ŋmafara a̧ tɛ wai nɛ̀ ɗoŋ; a̧ kà a̧ nɛ́ waia na, ɓɛɛ ɛnɛ gɔma a̧ yinɛ.› »
Jesu kpasa ŋma okoo wese-ɔm-tɛ
10Jesu duka so usi nɛ́ mɔ kɔ̧́ tua-mɔi̧a-a ŋma wese-ɔm-tɛ. 11Ŋma okoo duka so hi̧i̧ nɛ̀ ɗaŋ-sɔ̧ a̧a̧ tɛ a̧; mɛ̀ nɛ́ tɛ pɛ ɓu-zua-mɔɔrɔ-ɗoŋ-taar a̧ ɗaŋ-sɔ̧‘i de nɛnɛ ha̧ kum mɛ duk tɛ a̧, ɓɛɛ ɗoŋ-aa bira, a̧ nyɛm mɛ nyafi ɓɔna. 12Jesu zɔka a̧ ɓɛɛ tɔ̧ ha̧ a̧: «Okoo’ɛ, kum yuu tɛ-mɛ kaɗi.» 13Jesu ee er zu-a, ɓɛɛ a̧ kur yor ŋgɔn kale ŋgimbi'i; ɗoŋ-aa nyafa, ɓɛɛ a̧ ku̧ naŋ gasa Sɔ̧. 14Ɓɛɛ see wi-duk-zu tua-mɔi̧a-a ɗaŋ wen Jesu kpasa bíí wese-ɔm-tɛ, ɓɛɛ a̧ tɔ̧ ha̧ giiwi: «Zɛ tom mɔɔrɔ-ɗoŋ-kpɔk. Nɛ́ tɛ̀ zɛ́ nɔ‘i ɛ̀nɛ̀ tɛ́ tɛ̀ nɛnɛ ha̧ wa mɛ kpasi'nɛ́, nɛ̀ bó nɛ́ tɛ́ wese-ɔm-tɛ na!»#Gboa-a 20.9-10; Wee-ɗoŋ-he 5.13-14 15Ɓɛɛ Gasa Wan kifi nú ha̧ wi’ɛi: «Ɛnɛ o wi nɛ a̧a̧ nɛ̀ see yiitoo, bó nɛ́ ɛnɛ lɛŋ bur nɛ́ ndai k’ɛ́nɛ́, kóó nɛ́ tuifuu k’ɛ́nɛ́ fara-nyɔŋ-mɔ mɛ mgbɔ wa nɛnɛ mɛ nɔ yì wese-ɔm-tɛ na nde? 16Kóò'ɛ nɛ́ boko-bem ko Abraham nɛ̀ Satan hɛra dee pɛ ɓu-zua-mɔɔrɔ-ɗoŋ-taar, bó nɛ́ gana so ha'i mɛ bur nyak yinɛ tɛ a̧ wese-ɔm-tɛ na nde?» 17Tɛ́ wen'i, foe dee o wi-kur-zu a̧ lɛŋ, ɓɛɛ giiwi nɛ̀ oi-aa de nɛ́ tortɛ wen zu o dɔka mɔɔ-gɔn-ɗɛɗɛ-wi nɛ̀ Jesu duka so de'i.
Lizaŋ ko be kpar-mɔ tikiɗi#13.17 kpár-mɔ̀ tíkíɗí: kpar-mɔ'ɔ nɛ́ gba̧a̧ sénévé.
(Zɔk Mt 13.31-32; Mk 4.30-33)
18Ɓɛɛ Jesu tɔ̧: «Wan ko Sɔ̧ hɔɔ ŋmaa in ge? Mi nyɛma mɛ we nɛ̀ ge? 19Wan ko Sɔ̧ hɔɔ ŋmaa in ŋma be kpar-mɔ tikiɗi nɛ̀ ŋma bíí baa gun kpɛɛfɔ kɔ‘i; nɛ́ mɔ'ɔ nɛ̀ hɔɔ ɓɛɛ gasi hee te ga, ɓɛɛ o nɔ̧́í̧ tɛ́ɛ̀ de yáá kɔ‘i kɔ̧̀ gbaa-er-a.» 20Ɓɛɛ a̧ tɔ̧ woyo: «Mi nyɛma mɛ we Wan ko Sɔ̧ nɛ̀ ge? 21Wan ko Sɔ̧ hɔɔ ŋmaa in hao nɛ̀ ŋma okoo aa záŋ nɛ̀ ŋmaa in ao-fuu taar vati nɛnɛ e hɔ ŋgimbi nɛ̀ mbɔɗa-a lɛŋ kura.»
Geɗek nú-garo
(Zɔk Mt 7.13-14,21-23)
22Jesu ɓira nɛ̀ o gasa ye in o geɗek ye usi nɛ̀ mɔ ba nɛ̀ war si Jerusalɛm. 23Ŋma bíí aka a̧: «Gasa Wan, nɛ́ o bíí tikiɗi ɓɛɛ a̧ tɛ kpasi nde?» Jesu kifa nú ha̧ wa: 24«Ɛ̀nɛ̀ kíí mɛ ye nɛ̀ geɗek nú garo, wen mi'e, o bíí nɛ̀ dɔka-a tɛ kii mɛ ye nɛ̀ geɗek nú garo, ɓɛɛ wa nyɛm mɛ ye na.»
25«Ŋgimbi nɛ̀ wan-tua bé tɛ̀ɛ́ kur mɛ kpe nú tua kɔ‘i kaɗi, ɛnɛ n’ɛnɛ ɓɔna so zan tɛ ku̧ naŋ kɔna nú tua sa nɛ̀ mɔ‘e: ‹Gasa Wan! Ɛ̀nɛ̀ hú̧í̧ nú tua h’ɛ́ɛ́!› Ɓɛɛ a̧ tɛ kifi nú h’ɛ́nɛ́‘e: ‹Mi iŋ fara n’ɛnɛ tɛ nɛnɛ na.› 26Ɓɛɛ ɛnɛ tɛ tɔ̧: ‹Ɛɛ yaa so nyɔŋ nɛ̀ mɔ, nɔ nɛ̀ mɔ nɛ̀ gbaayí‘nɛ́ ɓɛɛ ɛnɛ duka so bee-gara k’ɛɛ usi nɛ̀ mɔ.› 27Ɓɛɛ a̧ tɛ kifi nú h’ɛ́nɛ́: ‹Mi iŋ fara n’ɛnɛ tɛ nɛnɛ na, ɛ̀nɛ̀ yú síɓí katɛ‘m, ɛnɛ o bíí lɛŋ nɛ̀ de ɗaŋmɔ.›#Gima 6.9 28Ɛnɛ tɛ hi̧i̧ kɔ̧a̧ gɔfi nɛ̀ mɔ ŋgimbi n’ɛnɛ tɛ zɔk Abraham in Izak ká bá nɛ̀ Jakob in o wi-tɔ̧-wen oi nú Sɔ̧ lɛŋ tɛ Wan ko Sɔ̧, ɓɛɛ ɛnɛ yaa k’ɛ́nɛ́ zan.#Mt 22.13; 25.30#Mt 8.11-12 29O bíí tɛ́ tɛ̀ nɛ̀ daŋa-wese in yee-wese, nɛ̀ ká̧-zan-mɛ́-ŋgɔn in ká̧-zan-mɛ́-ɗɔɔ, ɓɛɛ wa tɛ ya ká̧ nyɔŋmɔ tɛ Wan ko Sɔ̧. 30Hegɔ, o ŋma sɔŋkur-wi tɛ ya nɛ́ o kuti-wi, ɓɛɛ o ŋma kuti-wi tɛ ya nɛ́ o sɔŋkur-wi.»#Mt 19.30; 20.16; Mk 10.31
Aia-nú zu Jerusalɛm
(Zɔk Mt 23.37-39)
31Kale ŋgimbi'i, o ŋma Fariziɛn tɛɛ tɔ̧ ha̧ a̧: «Mɛ̀ yák hɛ̧ɛ̧ si ŋma fara wen Herod kɔ̧ɔ̧ mɛ gbɛ mɛ.» 32A̧ kifa nú ha̧ wa: «Ɛ̀nɛ̀ nɛ́ɛ̀ tɔ̧ ha̧ gba-toyo'i'e ndé, mi ndak nɛ́ o ɗaŋ-sɔ̧ in mi kpasi nɛ́ o bíí sɔsɔɔ in mɛ sa̧a̧mɔ, ɓɛɛ ɗoŋ zɛ taar mɔ kɔ‘m kaɗa! 33Ɓɛɛ sɔsɔɔ, sa̧a̧mɔ in sa̧a̧mɔ oi-aa, mi tɛ nɛ̀ kànà nɛ́ nɔ̀ kɔ‘m siti, wen wi-tɔ̧-wen oi nú Sɔ̧ beka fe ŋma fara nɛ̀ zan na, kànà nɛ́ Jerusalɛm ɓɛɛ.
34«Jerusalɛm, Jerusalɛm, ho! Mɛ́ nɛ̀ gbɛ o wi-tɔ̧-wen oi nú Sɔ̧ gbɛ̀ɛ́, ɓɛɛ mɛ́ yoo o betom nɛ̀ Sɔ̧ toma tɛnɛ ha̧ mɛ́ gbɛ nɛ̀ ta’ɛ, war ɔ dɔka mi kɔ̧ɔ̧ só nyɛmna ha̧‘m mɛ mɔi̧ o bem kɔ-mɛ hee mɔ'ɔ nɛ̀ nana-kɔra mɔi̧ nɛ o bem kɔ‘i a̧ ɗɔɔ ɓaa’ɛ ga wó, ɓɛɛ ɛ́nɛ́ kɔ̧ na. 35Mi tɛ́ bɛ̧ tua k’ɛ́nɛ́ h’ɛ́nɛ́; mi'e ndé, ɛ́nɛ́ beka zɔk am ɓɔna hɔ ŋgimbi n’ɛnɛ tɛ tɔ̧‘e: ‹Tok- d- yoŋgo a̧ dúk zu wi nɛ̀ tɛ‘i nɛ̀ nin Gasa Wan!› »#Gima 118.26; Jer 22.5
දැනට තෝරාගෙන ඇත:
LUK 13: GB11
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.