KU̧U̧NAŊMƆ 13
13
Abram in Lot ee ŋmaa duk
1Abram yaka nú Egiptɛ si sɛn nú Nɛgɛb in kóò kɔ̧-a̧ gu nɛ o mɔ kɔ̧-a̧ lɛŋ, ɓɛɛ Lot nɛ́ in a̧. 2Abram a̧a̧ so nɛ̀ o mɔ-dai, bu-mbɔi in lɔr nyɛmna. 3Abram ɔɔ nɛ̀ yuwar nɛnɛ, ku̧u̧naŋ-a nɛ Nɛgɛb hɔ Bɛtɛl, fara n'aa dee so gbagari kɔ̧-a̧ sɛnɛ mgbara Bɛtɛl in Ai. 4Abram kɔfa Sɔ̧ sa nɛ nin-a'e GASA WAN fara n'aa dee so fara-ɗafi-sɔ̧ sɛnɛ nɛti.
5Lot nɛ̀ nɛ̀ɛ́ so in Abram a̧a̧ so nɛ̀ o sami, o ndai in o tua-laa mbɛt. 6Nù nyɛm so wa lɛŋ na, wen wa a̧a̧ nɛ mbɔi nyɛmna, ɓɛɛ wa nyɛm mɛ ya kpɔk fara in ŋmaa na. 7Hegɔ ɓɛɛ kpɛri ye mgbara o wi-dai-mɔ-dai ko Abram in ko Lot. (O be Kanaŋ in o be Periz ɔɔ so tɛ nù‘i mbɛt.)
8Abram tɔ̧ɔ̧ ha̧ Lot: «Bó nɛ́ ɔ dee ha̧ kpɛri mɛ ye mgbara yɛ in mɛɛ na, mgbara o wi-dai-mɔ kɔ‘m in kɔ-mɛ na, wen ɛɛ nɛ nya-wi. 9Mɛ zɔk, bó nɛ́ nù nɛ̀ oi-aa a̧ duk ti mɛ'ɛ na nde? Ɛ̀ɛ̀ kɛ̧́ tɛ yɛ nɛ ŋmaa; kà mɛ á̧ nɛ̀ɛ́ kɔ-mɛ si gale, ɓɛɛ mi nɛɛ kɔ‘m si wiiko; kà mɛ á̧ nɛ̀ɛ́ kɔ-mɛ si wiiko ɓɛɛ mi nɛ̀ɛ́ kɔ‘m si gale.»
10Lot baa yí nɛ ŋgɔn, ɓɛɛ a̧ zɔk zika-nú Jurdɛn; duka nɛ́ de fara nɛ yì a̧a̧ sɛnɛ. Nɛti ha̧ GASA WAN mɛ ɗaŋ Sɔdɔm in Gɔmɔr, fara'i duka so hɔ Sɔar hee kpɛɛfɔ ko GASA WAN ga; de fara'i hɔɔ ŋmaa in nú Egiptɛ.#Ku̧u̧ 2.10 11Lot hoka kɔ‘i nɛ bɔkɔ-nú Jurdɛn, ɓɛɛ a̧ kur yak si war daŋa-wese; nɛ́ hi̧i̧ a̧ wa ee nɛ ŋmaa duk. 12Abram dee kɔ‘i ye sɛn nú Kanaŋ, ɓɛɛ Lot ɔ kɔ‘i tɛ o ye ká̧ zika-nu'i. A̧ ɔɔ ye sɛn Sɔdɔm. 13O be Sɔdɔm yaa so nɛ́ o wi-ɗaŋ in o wi-de-ɗaŋmɔ ti GASA WAN.
Abram yaka si Hebrɔŋ
14GASA WAN tɔ̧ɔ̧ ha̧ Abram ɗoŋ nɛ wa kɛ̧ɛ̧ tɛ nɛ ŋmaa in Lot kaɗi: «Mɛ̀ bá yí-mɛ nɛ ŋgɔn tɛ fara nɛ mɛ duk sɛnɛ‘i a̧ mɛ̀ zɔ́k mɔ si ká̧-zan-mɛ́-ŋgɔn in ká̧-zan-mɛ́-ɗɔɔ, si daŋa-wese in yee-wese. 15Nù'ɛ lɛŋ nɛ mɛ zɔk’ɛ, mi tɛ ha̧ ha̧ mɛ in o bezaŋ-mɛ hegɔ ɓɔnsɛnɛ.#Tom 7.5 16Mi tɛ de ha̧ bezaŋ-mɛ mɛ́ dɔk hee fuunu ga. Kà‘i nɛ́ nyɛma mɛ tɔr fuunu, ɓɛɛ wi nyɛma mɛ́ tɔr o bezaŋ-mɛ. 17Mɛ̀ kur! Mɛ̀ yár zɔk nɛ zi̧a̧ nù in pɛsa-a wen mi tɛ ha̧ nù‘i ha̧ mɛ.» 18Abram mɔi̧a tua-laa kɔ‘i kur si sɛn ti o gasa te sɛn Mambre ká̧ Hebrɔŋ, ɓɛɛ a̧ mbo fara-ɗafi-sɔ̧ ha̧ GASA WAN sɛn hi̧i̧.
දැනට තෝරාගෙන ඇත:
KU̧U̧NAŊMƆ 13: GB11
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.