Kutangisa 7
7
Nkubila
1Ipapo Yahwe bakadwa Nuwa bakati, “Ngina mu araka, iwe ne nsha uwo ngoti iwe ndawana wakalulwama mu bathu be tjibaka itjetji. 2Ungine ne phuka ndume dzili kutendeka, imwe ne imwe ina nkwinya wayo hadzi dze ludzi gumwe ne gumwe gwe phuka mbuyanana. Mu phuka dzisi mbuyanana utole mbili mu ludzi gumwe ne gumwe ili ndume ne hadzi, 3ne nyuni utole ndume dzili kutendeka ne hadzi dzadzo dzili kutendeka dze njudzi dzose kuti njudzi dzose dzitjile mu shango. 4Ngoti shule kwe mazhuba ali kutendeka ndowonisa vula mu shango mazhuba ali makumi manna ne masiku ali makumi manna, ngono ndowokuba tjimwe ne tjimwe tjinotjila tjandakabumba mu shango.” 5Nuwa kathama kose kwaakadwiwa ndi Yahwe.
6Nuwa wakabe ana makole ali mazana ali matathatu (600) ha nkubila we vula uzha mu shango. 7#Matewu 24:38, 39; Luke 17:27Nuwa ne nkadzi uwe ne bakololo babo ne bakadzi babo bakangina mu araka kutizha vula dze nkubila. 8Phuka dzose mbuyanana ne phuka dzose dzisi mbuyanana ne nyuni ne zwitjili zose zwinokambayila mu shango, 9bubili ne bubili ili ndume ne hadzi, zwikangina mu araka kuna Nuwa, Ndzimu sekwa wakadwa Nuwa. 10Ngono shule kwe mazhuba ali kutendeka vula dze nkubila dzikazha mu shango.
11 #
2 Pita 3:6
Nuwa wakati ana makole ali mazana ali matathatu (600), mu mwedzi we bubili ushwa zhuba le bugumi lina mazhuba ali kutendeka (17), muna ilelo zhuba koga, misenya i pasi ikaphutuka ikazhulika ne kudzimu kukazhulika, 12ngono vula ikana siku ne sikati mu shango mazhuba ali makumi manna ne masiku ali makumi manna (40). 13Muna ilelo zhuba Nuwa ne bakololo babe Shemu na Hamu na Jafeti, kang'ompela ne nkadzi uwe ne bakadzi be bakololo babe bakangina mu araka. 14Imomo bakabe bana phuka imwe ne imwe ye shango kuyenda nge ludzi gwayo ne zwithuwo zose nge njudzi dzazo ne tjimwe ne tjimwe tjinokambayila mu shango nge ludzi gwatjo ne nyuni imwe ne imwe nge ludzi gwayo, tjimwe ne tjimwe tjina mapapilo. 15Bubili nge bubili gwe zwitjili zose zwina meya ye butjilo muzwili zwakazha kuna Nuwa zwikangina mu araka. 16Phuka dzose dzakabe dzingina mukati yakabe ili ndume ne hadzi, Ndzimu sekwa wakabudza Nuwa. Ipapo Yahwe bakanzhalilila mukati.
17Nkubila ukadwilila mu shango mazhuba ali makumi manna (40), ngono vula ikati ipaphidzika ikamilidza araka ikayenda pezhugwi. 18Vula ikapaphidzika kwazo mu shango, araka ikaangama pezhugwi kwe vula. 19Vula ikamilidzika kwazo mu shango ikakwididza matombo wose malefu. 20Vula ikamilidzika ikakwitidza matombo, bulefu gungabe thambo dzili kutendeka pezhugwi kwe matombo. 21Zwibumbiwa zose zwimu shango zwikafa: Nyuni ne zwithuwo ne phuka dze shango ne zwikonyana zwinonyewula mu shango nenge bathu bose. 22Zose zwina meya ye bupenyu mu zwimilo zwazo mu shango zwikafa. 23Ndizo Yahwe bakakuba tjimwe ne tjimwe tjinotjila mu shango, bathu ne phuka ne zwitjili zwinokambayila mu shango ne nyuni, zose zwakakubiwa mu shango. Nuwa koga ndiye wakasala ne bakabe banaye mu araka. 24Vula ikasala yakakwididza shango mazhuba ali zana lina mazhuba ali makumi ali mashanu (150).
Currently Selected:
Kutangisa 7: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.