SAN MARCOS 5
5
Ngusñi cui'i̱ xña'a̱ ji'i̱ sca ngu' Gadara
1Lo'o li' ndyalaa ngu' chaca tsu' tayu bi', nde loyuu su cuentya Gadara. 2Cua tyu'u ti Jesús ne' yaca ni'i̱ lo'o ndyu'u tucua sca nu quicha, sca ngu' nu ngusñi cui'i̱ xña'a̱ ji'i̱. Ndi'i̱ nu quicha bi' ne' lo'o jyo'o. 3Su nguatsi' jyo'o ti ndi'i̱ nu quicha bi', cha' ná ngua ji'i̱ ngu' sca̱' ji'i̱; ni lo'o chcua̱ ná ngua ji'i̱ ngu'. 4Cua tyu̱u̱ quiya' ngusca̱' ngu' ji'i̱ lo'o carena nquicha', ndyaaca̱' quiya', ndyaaca̱' ya'; pana hora ti ngusi'yu cu' chcua̱ bi', ndyati̱' carena, ndyanu yu'be ti chcua̱ nu ndyaaca̱' nu quicha bi'. Ni sca ngu' ná ngué ngu' cha' tyiji̱loo ji'i̱ yu quicha bi'. 5Lo'o nde tsa̱ lo'o nde talya ndya'a̱ nxi'ya ne' lo'o jyo'o, ndya'a̱ yu'u ti sii' cuati̱. Lo'o jua'a̱ ngusi'yu ji'i̱ ycui' ca lo'o quee. 6Juani tyijyu' ti ndu̱ nu quicha bi' na'a̱ ji'i̱ Jesús. Li' ngusna lijya̱ ndatu̱ sti̱' slo Jesús, cha' cua'ni tlyu ji'i̱. 7Cui̱i̱ ngusi'ya nu quicha bi' ji'i̱ Jesús li':
―¿Ñi'ya̱ cña nti' nu'u̱ jna'? ―nchcuane yu quicha ji'i̱ Jesús li'―. Nu'u̱ laca Jesús nu sca ti Sñi' ycui' Ndyosi, ycui' Ni nu laca loo la ―nacui̱―. Chacuayá' ji'i̱ ycui' Ndyosi, ná xcube' nu'u̱ jna'.
8Tsa̱ ti cua ngulo Jesús cña ji'i̱ cui'i̱ xña'a̱ bi', cha' tyatsu' ji'i̱ yu quicha bi', bi' cha' tya'na nchcui' lo'o Jesús juani cha' ná xcube' yu ji'i̱.
―Tyu'u nu'u̱, tyaa nu'u̱ tsiya' ti ―nacui̱ Jesús ji'i̱ cui'i̱ xña'a̱ tsa̱ la.
9Li' nchcuane Jesús ji'i̱ yu quicha bi':
―¿Ni naa nu'u̱? ―nacui̱ Jesús ji'i̱.
―Quiña'a̱ tsa lo naa na' ―nacui̱ nu quicha―, cha' quiña'a̱ tsa tya'a cui'i̱ xña'a̱ ngusñi 'na ―nacui̱.
10Lo'o li' ndijña tsa nu quicha bi' cha' ná cua'ni Jesús jo'o ji'i̱, cha' ná culo Jesús ji'i̱ nu cui'i̱ xña'a̱ bi' cha' tyaa; ná nti' cui'i̱ xña'a̱ bi' cha' tsaa xa' chalyuu tyijyu' la. 11La cui' tsa̱ bi' ndi'i̱ tsa cube' ndyacu ni' quixi̱' sii' ca'ya jua. 12Li' xa' ndijña yu quicha bi' ji'i̱ Jesús cuentya ji'i̱ cui'i̱ xña'a̱ nu ngusñi ji'i̱:
―Ta nu'u̱ chacuayá' tsaa cui'i̱ cha' xñi ji'i̱ cube' jua ―nacui̱.
13Lo'o li' nda Jesús chacuayá' bi' ji'i̱ lcaa cui'i̱ xña'a̱ bi'. Li' ndu'u cui'i̱ ndyaa, ngusñi ji'i̱ cube'. Ndi'i̱ tucua mil tya'a cube', lo'o jua'a̱ ngusñi cui'i̱ bi' ji'i̱ lcaa ni'. Ngusna ni' sii' cua'a̱ li', ndyú ca ta'a ni' ne' hitya tayu'; ndyi'o ni' hitya, ngujuii lcaa cube' bi' li'.
14Lo'o li' ndube tsa ti' ngu' nu ña'a̱si̱i̱ ji'i̱ cube' bi', ngusna ngu' ca quichi̱ cha' cacha' ngu' ji'i̱ lcaa ngu' cacua ti ñi'ya̱ cha' ngua bi'. Hora ti ndu'u ngu' lijya̱ ngu' cha' ña'a̱ ngu' ji'i̱ cha' bi'. 15Nu lo'o ngulaa ngu' slo Jesús, li' na'a̱ ngu' ji'i̱ nu qui'yu nu ngua quicha bi'; na'a̱ ngu' cha' ti̱ ti nga'a̱ nu qui'yu bi', lacu' ste', cha' cua ndyaca tso'o. Nga'aa nxalú cui'i̱ xña'a̱ bi' ji'i̱. Ndyutsi̱i̱ tsa ngu' li'. 16Nchcui' tsa ngu' nu ña'a̱si̱i̱ ji'i̱ cube' bi' ñi'ya̱ ngua cha' ji'i̱ nu quicha, cha' tsa tlyu ti nguxtyanu cui'i̱ xña'a̱ ji'i̱. Li' ndu'u cui'i̱ bi' ndyaa, ngusñi ji'i̱ lcaa cube' nu ndi'i̱ bi'; ndye cha' ji'i̱ cube' bi' li'. 17Nu lo'o ndyuna ngu' quichi̱ cha' bi', li' nchcui' tsa ngu' lo'o Jesús cha' tyatsu' yu tyaa yu xa' se'i̱ su tyijyu' la.
18Lo'o cua tyatí̱ ti Jesús ne' yaca ni'i̱ sube cha' tyaa, li' nchcui' nu ngua quicha bi' lo'o Jesús; ngüijña chacuayá' ji'i̱ Jesús cha' tsaa lo'o. 19Pana ná nda Jesús chacuayá' ji'i̱.
―Xa' xtyu̱u̱ nu'u̱ tyaa nu'u̱ to' tyi ―nacui̱ Jesús ji'i̱―. Ta nu'u̱ cha' lo'o lcaa ngu' tya'a nu'u̱ ñi'ya̱ ngua cha' tlyu nu ngua'ni ycui' Ndyosi nu Xu'na na cha' ngua'ni Ni cha' ndyaca tso'o nu'u̱, cha' ngua'ni tya'na tsa ti' ycui' Ni jinu'u̱.
20Lo'o li' ndu'u ndyaa nu qui'yu bi' lcaa quichi̱ nde Decápolis, nda cha' lo'o ngu', lcaa lo cha' ñi'ya̱ nu ngua'ni Jesús lo'o. Ndube tsa ti' lcaa ngu' bi' li'.
Sñi' Jairo, lo'o nu cuna'a̱ nu ndyala' ste' Jesús
21Lo'o li' ñaa Jesús ne' yaca ni'i̱ ca nde tsu' tayu' chaca quiya'. Xa' ndyu'u ti'i̱ quiña'a̱ tsa ñati̱ slo Jesús nde to' tayu' bi'. 22Li' ndyalaa sca nu qui'yu nu laca loo ne' laa jua. Jairo naa nu cusu' bi'. Ndatu̱ sti̱' nu cusu' bi' slo Jesús, ndacui nclyú hique yu hasta lyuu. 23Tya'na tsa nchcui' yu lo'o Jesús li':
―Cua cajaa ti sñi' na' ―nacui̱ yu ji'i̱―. Cua'ni nu'u̱ cha' tso'o tsaa nu'u̱ ca su ntsiya nu cuna'a̱ piti bi' 'na, cha' cua'ni nu'u̱ jo'o ji'i̱ cho'; sta ya' nu'u̱ chu̱' nu piti cha' cu'ú cho'.
24Lo'o li' ndyaa Jesús lo'o yu bi', jua'a̱ ndyaa quiña'a̱ ñati̱ lo'o ngu', hasta tachaa tsa ndi'i̱ ngu' lo'o ndya'a̱ ngu'. 25Lo'o sca nu cuna'a̱ quicha ndya'a̱ laja ñati̱ quiña'a̱ bi'. Cua tii tyucuaa yija̱ ntsu'u quicha ji'i̱ nu cuna'a̱ bi', cha' ndyalú tsa tañi ma'. 26Cua ndye lcaa lo jo'o ngua'ni ngu' ji'i̱ ma' quicha bi', lo'o ná ngua ji'i̱ ngu' cua'ni ngu' jo'o ji'i̱. Ndye cñi ji'i̱ ma', ndye lcaa lo cha' tso'o nu ntsu'u ji'i̱ ma' xqui'ya taná, lo'o lye la ngua quicha ma' li'. 27Cua ndyuna ma' quicha bi' xi cha' ji'i̱ Jesús, bi' cha' ñaa ma' laja ñati̱ nde chu̱' su ndu̱ Jesús. Ndyala' ma' quicha bi' ste' Jesús li'. 28“Lo'o cala' ti na' ste' Jesús re, tyaca tso'o na' li'”, ngua ti' ma' quicha bi'. 29Hora ti ndyacu̱' cha' ndyalú tañi ma', tsa tsiya' ca ngua tii ycui' ca ma' cha' cua ndyaca tso'o li'. 30Pana hora ti ngua tii Jesús cha' cua ngua'ni yu jo'o ji'i̱ sca ñati̱, masi ná na'a̱ yu ji'i̱ nu quicha bi'. Li' nguxña'a̱ yu ji'i̱ nu ñati̱ quiña'a̱ nu lijya̱ nde chu̱' yu.
―¿Tilaca ndyala' ste' na'? ―nacui̱ yu ji'i̱ ngu'.
31Li' ndube tsa ti' nu ngu' nu ndyaca tsa'a̱ ji'i̱.
―Tachaa tsa ndi'i̱ ngu' re slo na ―nacui̱ ngu' bi' ji'i̱ Jesús―. ¿Ni cha' laca nchcuane nu'u̱ ji'i̱ ngu', “Tilaca ndyala' 'na”?
32Lo'o li' ña'a̱ tsa Jesús ji'i̱ lcaa ngu' cha' ca cuayá' ti' tilaca laca nu ndyala' ji'i̱. 33Li' ñaa nu cuna'a̱ bi', ndatu̱ sti̱' slo yu. Nchcua̱a̱ ma' bi', cha' ndyutsi̱i̱ tsa ma', masi jlo ti' cha' cua ndyaca tso'o. Li' ndacha' liñi ma' ji'i̱ Jesús ñi'ya̱ ngua ji'i̱ ma'.
34―Tso'o tsa jlya ti' nu'u̱ jna', sñi' ―nacui̱ Jesús ji'i̱―, bi' cha' ndyaca tso'o nu'u̱. Ti̱ ti tyi'i̱ tyiquee nu'u̱ juani. Tso'o ti tyaa nu'u̱, nga'aa xñi quicha bi' jinu'u̱ chaca quiya'.
35Lo'o tya nchcui' Jesús lo'o nu cuna'a̱ bi', li' ndyalaa sca msu ji'i̱ Jairo nu laca loo ne' laa bi', ndyacua tya'a lo'o ngu'. Nchcui' msu bi' lo'o xu'na cuentya ji'i̱ nu piti quicha:
―Cua ngujuii sñi' nu'u̱, cusu' ―nacui̱ msu ji'i̱ nu cusu' bi'―. Nga'aa ntsu'u la cha' chcui' nu'u̱ lo'o mstru re.
36Lo'o Jesús ndyuna cha' nu nchcui' msu bi', pana ná ndaquiya' Jesús ji'i̱ cha' bi'.
―Ná cutsi̱i̱ nu'u̱ ―nacui̱ Jesús ji'i̱ nu laca loo ne' laa bi'―. Tsa bi' ti cha' cua'ni nu'u̱ cha' jlya ti' nu'u̱ 'na.
37Lo'o li' ná nda Jesús chacuayá' ji'i̱ ñati̱ cha' tsaa ngu' lo'o yu; sca ti ji'i̱ Pedro, lo'o Jacobo, lo'o Juan tya'a Jacobo, nda yu chacuayá' tsaa ngu' lo'o yu. 38Li' ndyalaa ngu' to' ni'i̱ ji'i̱ nu laca loo ne' laa bi'. Cua quiña'a̱ ñati̱ ndyu'u ti'i̱ cajua, nxi'ya tsa ngu' ndi'i̱ ngu'. Lye tsa ngua cha' cua ngujuii nu piti bi'. 39Ndyatí̱ Jesús ni'i̱ li'.
―¿Ni cha' laca nxi'ya tsa ma̱ ndi'i̱ ma̱? ―nacui̱ Jesús ji'i̱ ngu'―. ¿Ni cha' laca cha' quiña'a̱ tsa nclyacua ti' ma̱? Si'i na ngujuii nu piti quicha re, na laja' ti ntsiya ―nacui̱ Jesús.
40Li' nxtyí lo'o ngu' ji'i̱. Bi' cha' ngulo'o Jesús ji'i̱ lcaa ngu' nu nxi'ya ndi'i̱ ngu'; ndyanu sti xtya'a̱ nu piti quicha lo'o ca ta'a sna ngu' tya'a ndya'a̱ lo'o Jesús, ndyaa ngu' bi' slo nu piti. 41Li' ngusñi Jesús ya' nu piti bi':
―Talita, cumi ―nacui̱ Jesús ji'i̱, cha'cña ji'i̱ ngu' bi'. (Ndi'ya̱ ndyu'u cha' bi': Mbixu̱', nde cha' chcui' na' lo'o nu'u̱ juani: Tyatu̱ nu'u̱.)
42Hora ti ndyatu̱ nu cuna'a̱ piti quicha bi', nguxana ndya'a̱ li'. Tii tyucuaa ti yija̱ ntsu'u cho'. Ndube tsa ti' ngu' bi' li'. 43Lye nchcui' Jesús lo'o ngu' bi', cha' ná chcui' ngu' lo'o xa' ñati̱ ñi'ya̱ ngua cha' ndyaca tso'o nu piti bi'. Li' ngulo yu cña ji'i̱ ngu' cha' ta xi na cacu nu piti bi'.
දැනට තෝරාගෙන ඇත:
SAN MARCOS 5: cta
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 1981, Wycliffe Bible Translators, Inc. All rights reserved.