SAN MARCOS 4
4
Cui̱i̱ ji'i̱ ñati̱ nu ndyataa si'yu
1Chaca quiya' nguxana Jesús ngulu'u yu ji'i̱ ñati̱ to' tayu' bi'. Cua ndyu'u ti'i̱ quiña'a̱ tsa ñati̱ ca slo yu li'; hasta nga'aa ndyu'u scua yuu su tyu̱ quiya' yu, bi' cha' ndyatí̱ yu ca ne' sca yaca ni'i̱ sube nu ndacui to' hitya ti. Ne' yaca ni'i̱ bi' ndyaca'a̱ Jesús, ndyanu nu xa' la ñati̱ quiña'a̱ lo yuu btyi to' tayu' bi'. 2Li' quiña'a̱ tsa cui̱i̱ nda Jesús lo'o ngu', cha' ca tsa'a̱ ngu' lcaa cha' nu ngua ti' yu culu'u yu ji'i̱ ngu'. Ndi'ya̱ ngua sca cui̱i̱ bi':
3―Cua'a̱ jyaca̱ ma̱ ―nacui̱ Jesús ji'i̱ ngu'―. Ngua sca tsa̱ ndyaa sca ñati̱ cataa si'yu trigo. 4Nguscui̱ yu si'yu ji'i̱, lo'o ndyú xi si'yu bi' lo yuu tacalya to' tyucui̱i̱. Hora ti ñaa quiñi, ndye si'yu bi' ndyacu ni' ji'i̱. 5Lo'o li' ndyalú xi si'yu su xti tsa yuu nscua chu̱' quee. Yala ti ntyucua si'yu bi'; pana cha' xca ti yuu ndyacu̱' chu̱' si'yu, 6bi' cha' ná ngua xñi su̱u̱ chu̱' quee bi', ná ngua caluu tso'o. Ndye calya bi' ndyanaa, cha' tyique' tsa cua̱. 7Lo'o chaca se'i̱ ndyalú xi si'yu lo yuu su ndu̱ yaca quiche'. Yala la nguluu yaca quiche' bi'; ná nda chacuayá' caluu tso'o calya trigo tsiya' ti, bi' cha' nga'aa ngutu'u si'yu lo bi' li'. 8Lo'o jua'a̱ ndyalú xi si'yu lo yuu tso'o. Ntyucua tso'o si'yu bi'; tso'o tsa nguluu calya, lo'o li' tso'o tsa ngutu'u si'yu lo ju̱u̱ bi'. Ntsu'u ju̱u̱ nu nda calaa tyii tya'a si'yu lo, lo'o jua'a̱ ntsu'u ju̱u̱ nu nda snayala tya'a si'yu, lo'o jua'a̱ ntsu'u ju̱u̱ nu nda sca siyento tya'a si'yu sca ti ju̱u̱.
9’Cua'a̱ jyaca̱ ma̱ ji'i̱ cha' nu nchcui' na' lo'o ma̱ juani, si chañi cha' ntaja'a̱ ma̱ cuna ma̱ cha' tso'o bi' ―nacui̱ Jesús ji'i̱ nu ngu' quiña'a̱ bi'.
Ni cha' nda Jesús cui̱i̱ lo'o ngu'
10Ca tiya' la lo'o cua ndu'u ñati̱ bi' ndyaa tsa tlyu ti, li' lijya̱ nu tii tyucuaa tya'a ngu' nu ndyaca tsa'a̱ ji'i̱ Jesús slo yu, lo'o jua'a̱ ñaa xa' la tya'a tso'o ngu' slo Jesús. Li' nchcuane ngu' ji'i̱ Jesús:
―¿Ñi'ya̱ ntsu'u cha' nu nda nu'u̱ nu ngua tsa̱ ti? ―nacui̱ ngu' bi' ji'i̱ Jesús.
11―Cua nda ycui' Ndyosi chacuayá' cha' ca cuayá' ti' ma̱ sca cha' nu ntsu'u yacu̱' ti, ñi'ya̱ nu caca lo'o laca ycui' Ni loo ne' cresiya ji'i̱ ñati̱ ―nacui̱ Jesús ji'i̱ ngu' bi'―. Xa' ñati̱ nu ná ngusñi cha' ji'i̱ ycui' Ndyosi ni, ná ta ngu' cuentya lo'o cuna ngu' sca cui̱i̱; tucui tsa cha' bi' nti' ngu'. 12Bi' cha' nda na' cui̱i̱ bi' lo'o ngu', cha' masi ña'a̱ ngu', ná ta ngu' cuentya ñi'ya̱ nu tyu'u cha' bi'; masi cuna ngu', ná ca cuayá' ti' ngu' ñi'ya̱ nu tyu'u cha' bi'. Jlo ta̱' cha' ná ntaja'a̱ ngu' culochu̱' ngu' ji'i̱ cha' cuxi nu ntsu'u ji'i̱ ngu', bi' cha' ná nchca jna' cui'ya na' cha' clyu ti' ji'i̱ ngu' ji'i̱ qui'ya nu ntsu'u ji'i̱ ngu'.
Ñi'ya̱ nu ndyu'u cha' ji'i̱ cui̱i̱ ji'i̱ ñati̱ nu ndyataa si'yu
13’¿Ha ná ngua cuayá' ti' ma̱ ñi'ya̱ nti' ñacui̱ cui̱i̱ bi'? ―nacui̱ Jesús ji'i̱ ngu' bi' li'―. ¿Ñi'ya̱ caca ta ma̱ cuentya ji'i̱ xi xa' la cui̱i̱ lacua, si ná nduna ma̱ cha' nu nchcui' na' bi'? ―nacui̱―. 14Ñi'ya̱ laca ñati̱ nu ndyataa si'yu bi', jua'a̱ laca ñati̱ nu nchcui' cha' tso'o ji'i̱ ycui' Ndyosi lo'o xa' la ñati̱. 15Ñi'ya̱ laca si'yu nu ndyalú lo yuu tacalya to' tyucui̱i̱ lo'o li' ndye si'yu ndyacu quiñi, jua'a̱ laca ñati̱ nu lo'o ndyuna ngu' cha' tso'o ji'i̱ ycui' Ndyosi, ná nduna tso'o ngu' li'. Ñi'ya̱ laca yuu tacalya bi', jua'a̱ laca cresiya ji'i̱ ñati̱ bi'. Ñi'ya̱ laca lo'o ndye ndyacu quiñi si'yu to' tyucui̱i̱, jua'a̱ ca̱a̱ Satanás cha' cuityi̱ cha' tso'o bi', cha' nga'aa tyi'u ti' ngu' cha' tso'o bi' li'. 16Lo'o si'yu nu ndyalú lo yuu lati tu'ba chu̱' quee ni, bi' laca ñi'ya̱ laca ñati̱ nu tso'o tsa ntsu'u tyiquee ngu' lo'o clyo ndyuna ngu' cha' tso'o bi' ji'i̱ ycui' Ndyosi. 17Pana si lya' ti' xa' ñati̱ ji'i̱ ngu' bi' xqui'ya cha' tso'o nu ndyuna ngu' bi', si xtyí lo'o ñati̱ ji'i̱ ngu', ná talo ngu' li'; laca ngu' bi' ñi'ya̱ laca si ná ngusñi tso'o su̱u̱ si'yu nu ntyucua lo yuu lati tu'ba chu̱' quee bi', lo'o li' ná ndalo calya bi' ndyanaa li'. 18Si'yu nu ndyalú lo yuu laja yaca quiche' ni, bi' laca ñi'ya̱ laca ñati̱ nu ndyuna cha' tso'o bi', 19lo'o li' ndya'a̱ tsa cha' tyiquee ngu' ñi'ya̱ cua'ni ngu' cha' caca culiya' ngu'; nclyana ngu' ñi'ya̱ ca caja quiña'a̱ tsa cha' tso'o nu ntsu'u chalyuu re ji'i̱ ngu', cha' caca stu'ba ngu' lo'o ñati̱ tlyu la. Bi' cha' ná nchca tyanu cha' tso'o ne' cresiya ji'i̱ ngu' bi'. 20Ndi'ya̱ ndyu'u cha' ji'i̱ yuu tso'o su ndyalú si'yu: lo'o ntyucua si'yu, li' tso'o tsa nguluu calya, ngutu'u tsa si'yu lo li'; jua'a̱ laca ñati̱ nu ndyuna cha' tso'o bi', lo'o li' tso'o tsa ndaquiya' ngu' ji'i̱ cha' bi'. Ntsu'u yuu su nda sca ti ju̱u̱ trigo hasta calaa tyii tya'a si'yu, lo'o jua'a̱ ntsu'u yuu su ndyu'u snayala tya'a si'yu lo sca ti ju̱u̱, lo'o jua'a̱ ntsu'u yuu su ndyu'u hasta sca siyento tya'a si'yu lo sca ti ju̱u̱.
Cui̱i̱ ji'i̱ xee nu tyu'u ne' ni'i̱
21Chaca quiya' nda Jesús sca cui̱i̱ lo'o ngu' bi':
―Lo'o ngua'a̱ na xee ni'i̱ ca talya, ¿ha tacu̱' na lo xee bi'? ¿Ha sta na xee bi' ne' qui'ña? ―nacui̱ Jesús ji'i̱ ngu'―. Ná ndu'ni na jua'a̱ ―nacui̱―. Cua̱ xi sta na xee cha' tyaca̱' xee tyucui ña'a̱ nde ni'i̱. 22Ndu'ni cha' tyu'u lo xee lcaa na nu ndyu'u cuatsi' ji'i̱ ñati̱ juani; ná sca cha' ntsu'u cuaana ti juani nu ná quijeloo ji'i̱ ñati̱ ca tiya' la. 23Cua'a̱ jyaca̱ ma̱ xi ji'i̱ cha' nu nchcui' na' lo'o ma̱ juani, si chañi cha' ntaja'a̱ ma̱ cuna̱ ma̱ cha' tso'o bi'.
24Tya ngulu'u la xi Jesús ji'i̱ ngu' li':
―Taquiya' tso'o ma̱ ji'i̱ cha' nu nchcui' na' lo'o ma̱ juani ―nacui̱ Jesús―. Ñi'ya̱ nu ndu'ni ma̱ lo'o xa' ñati̱, la cui' jua'a̱ cua'ni ycui' Ndyosi lo'o ma̱ li'. Lo'o jua'a̱ lo'o cuna tso'o ma̱ cha' jna', quiña'a̱ la cha' tso'o tyu'u ne' cresiya ji'i̱ ma̱ li'. 25Lo'o ñati̱ nu jlya ti' cha' jna', nu ndyaca tsa'a̱ cha' bi' ni, tya ta la ycui' Ni cha' lo'o ngu' bi'; pana ñati̱ nu ná jlya ti', nu ná nti' ca tsa'a̱ ngu', cua'ni ycui' Ni cha' ná caca ji'i̱ ngu' bi' ca tsa'a̱ ngu' tsiya' ti cha' ji'i̱ ycui' Ni li'.
Cui̱i̱ ji'i̱ su ntyucua si'yu
26Lo'o li' nda Jesús chaca cui̱i̱ lo'o ngu':
―Ta na' sca cui̱i̱ lo'o ma̱ cha' caca cuayá' ti' ma̱ ñi'ya̱ nu caca lo'o laca ycui' Ndyosi loo ne' cresiya ji'i̱ ñati̱ ―nacui̱ Jesús ji'i̱ ngu'―. Ngua sca tsa̱ ndyataa sca ñati̱ nscua', 27li' ngujua' yu talya; lo'o cua quixee ti chaca tsa̱ ngue ti' yu. Jua'a̱ nteje tacui tyu̱u̱ tsa̱ lo'o tyu̱u̱ talya. Laja li' ntyucua si'yu bi', cua ndyaluu bi' li'. Ná jlo ti' yu ñi'ya̱ caca caluu si'yu bi'. 28Jua'a̱ nchca ji'i̱ sca si'yu nu lo'o cataa na ji'i̱. La cui' yuu su ndyataa si'yu bi' laca nu ta juersa ji'i̱ si'yu cha' caluu. Tyucua calya cuañi' clyo, li' tyu'u tucua nchu̱', lo'o li' caja ltya ji'na. 29Lo'o cua btyi ltya, li' caca clacua, cha' tyu'u ti'i̱ ltya.
Cui̱i̱ ji'i̱ si'yu cuxee
30Lo'o li' nda Jesús chaca cui̱i̱ lo'o ngu' bi':
―Chaca cha' chcui' na' lo'o ma̱ juani. Ta na' sca cui̱i̱ lo'o ma̱ ñi'ya̱ nu caca lo'o ycui' Ndyosi laca loo ne' cresiya ji'i̱ ñati̱ ―nacui̱ Jesús―. 31Caca bi' ñi'ya̱ laca sca ti si'yu cuxee nu ndyataa ngu'. Si'yu bi' laca nu si'yu sube la tyucui ña'a̱ chalyuu, cha' ná ntsu'u xa' si'yu nu sube la. 32Pana lo'o cataa ngu' si'yu bi', yala ti tyucua, caluu yaca li' cha' caca sca yaca tlyu. Lo'o li' ca'ya quiñi laja sta̱' yaca bi', chca'a̱ cña' ni' su tyacala' laja laca' bi'.
Ni cha' nda Jesús cui̱i̱ lo'o ngu'
33Jua'a̱ ti ngulu'u Jesús cha' ji'i̱ ngu'; nda yu xi cui̱i̱ lo'o ngu', cha' culu'u cha' ji'i̱ ycui' Ndyosi ji'i̱ ngu', ña'a̱ cuayá' nu ta tso'o ngu' cuentya ñi'ya̱ ntsu'u cha' ji'i̱ ycui' Ni. 34Xcui' lo'o cui̱i̱ ti ngulu'u Jesús ji'i̱ ñati̱ quiña'a̱, masi ná nda tso'o ngu' cuentya ñi'ya̱ cha' nda cui̱i̱ bi'; pana tiya' la ngulu'u tso'o yu cha' bi' ji'i̱ nu ngu' nu ndyaca tsa'a̱ ji'i̱ yu.
Ngulo Jesús cña ji'i̱ cui'i̱ lo'o ji'i̱ clyoo' lo tayu'
35Lo'o cua ngusi̱i̱ tsa, cua ndyaa cuichaa, li' nchcui' Jesús xi lo'o nu ngu' nu ndyaca tsa'a̱ ji'i̱:
―Tyeje tacui na ca chaca tsu' tayu' re ―nacui̱ Jesús ji'i̱ ngu' bi'.
36Lo'o li' nguxtyanu ngu' ji'i̱ nu quiña'a̱ tsa ñati̱ nu ndi'i̱ cajua, ndyatí̱ Jesús lo'o tya'a ndya'a̱ yu ne' yaca ni'i̱ su ngua'a̱ yu cha' ngulu'u yu ji'i̱ nu ngu' quiña'a̱ bi' tsa̱ la. Ndu'u ngu' ndyaa ngu', lo'o xa' yaca ni'i̱ ndyaa lo'o. 37Lo'o li' lye tsa ndyaca cui'i̱, lye tsa ndyatu̱ clyoo' lo tayu', ña'a̱ cuayá' nu ndyatí̱ tsa hitya clyoo' nde ne' yaca ni'i̱; cua cha'á̱ ti yaca ni'i̱ bi' ntsu'u hitya. 38Pana laja' ti Jesús ntsu'u nde siyu' yaca ni'i̱, ngustii yu lo sca late' lcuti. Nguxtyu'u ngu' ji'i̱ yu li':
―Cusu' ―nacui̱ ngu' ji'i̱ Jesús―. Que ti' nu'u̱. ¿Ha ná ndube ti' nu'u̱ cha' cua cajaa ti na? ―nacui̱ ngu'―. Cua quilyu'u ti yaca ni'i̱ re.
39Li' ndyatu̱ Jesús, ngulo yu cña ji'i̱ cui'i̱, ngua'a ji'i̱ clyoo' lo tayu'.
―Caca ti̱ ti lo hitya re ―nacui̱ yu.
Hora ti ngua ti̱ cui'i̱, ngua ti̱ clyoo'; ti̱ ti ndyanu tayu' li'. 40Lo'o li' nchcui' Jesús lo'o ngu' nu ndyaca tsa'a̱ ji'i̱:
―¿Ni cha' ntsi̱i̱ tsa ma̱? ―nacui̱ Jesús ji'i̱ ngu'―. ¿Ni cha' laca ná jlya ti' ma̱ ji'i̱ ycui' Ndyosi cha' caca ji'i̱ Ni cua'ni Ni jua'a̱? ―nacui̱.
41Ndube tsa ti' ngu' ña'a̱ ngu' ji'i̱ Jesús li':
―¿Tilaca laca nu qui'yu re? ―nacui̱ ngu' ji'i̱ tya'a ngu'―, cha' lo'o cui'i̱ ndaquiya' ji'i̱ yu, lo'o jua'a̱ nduna clyoo' lo tayu' cha' nu nda yu ―nacui̱ ngu' ji'i̱ tya'a ndyaca tsa'a̱ ngu'.
දැනට තෝරාගෙන ඇත:
SAN MARCOS 4: cta
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 1981, Wycliffe Bible Translators, Inc. All rights reserved.