SAN MARCOS 3
3
Sca yu quicha nu nchcu̱' ya' yu
1Ngua chaca quiya' ndyaa ngu' ne' laa ca bi' tsa̱ nu ndi'i̱ cña' ngu', lo'o nga'a̱ sca nu quicha nu nchcu̱' sca tsu' ya'. 2Ña'a̱ tsa xi ngu' tacati, nu ngu' fariseo bi', ña'a̱ tsa ngu' ji'i̱ Jesús si cua'ni yu jo'o ji'i̱ nu quicha bi', cha' tsa̱ ta'a nu ndi'i̱ cña' ngu' judío ngua. Nti' ngu' tlyu bi' quijeloo qui'ya cha' sta ngu' hichu̱' Jesús. 3Lo'o li' nchcui' yu lo'o nu quicha bi':
―Ca̱a̱ nu'u̱, tyu̱ cla'be ne' laa re ―nacui̱ Jesús ji'i̱.
4Li' nchcuane Jesús ji'i̱ lcaa ngu' bi':
―¿Ha ntsu'u chacuayá' ji'na cua'ni na sca cha' tso'o tsa̱ nu ndi'i̱ cña' ngu'? ―nacui̱ yu ji'i̱ ngu' tlyu bi'―. ¿Ha tso'o la si cua'ni na sca cha' cuxi tsa̱ bi'? ―nacui̱―. ¿Ha ná tso'o cua'ni na jo'o ji'i̱ ngu' li', nti' ma̱? ¿Ha tso'o la si ta na chacuayá' cajaa ngu' quicha tsa̱ bi' lacua? ―nacui̱ Jesús.
Nga'aa ngujui la ñi'ya̱ chcui' nu ngu' tlyu bi' lo'o Jesús li'. 5Ñasi̱' xi Jesús ña'a̱ yu ji'i̱ ngu' bi', jua'a̱ xñi'i̱ xi ti' yu cha' ná ntaja'a̱ ngu' cui'ya ngu' cuentya ji'i̱ cha' nu nclyu'u yu ji'i̱ ngu'. Li' nchcui' yu lo'o nu quicha bi':
―Xquiñi nu'u̱ ya' ―nacui̱ Jesús ji'i̱.
Nguxquiñi yu ya' yu li', lo'o hora ti ngua tso'o ya' yu. 6Lo'o ndu'u nu ngu' fariseo ne' laa bi', li' ndyaa ngu' cha' chcui' ngu' lo'o taju ngu' nu cuentya ji'i̱ rey Herodes; chcui' ngu' ñi'ya̱ cua'ni ngu' cha' caca cujuii ngu' ji'i̱ Jesús.
Ndyu'u ti'i̱ quiña'a̱ tsa ñati̱ to' tayu'
7Lo'o li' ndyaa Jesús to' tayu' lo'o nu ngu' nu ndyaca tsa'a̱ ji'i̱. Quiña'a̱ tsa ngu' Galilea ndyaa ngu' ndyaa lca'a̱ ngu' ji'i̱ cha' cuna ngu' cha' nu nclyu'u yu. 8Cua ndañi ñi'ya̱ laca cha' tonu nu ndyu'ni Jesús hasta ca quichi̱ tyijyu', bi' cha' lo'o ngu' tyijyu' ndyalaa ngu' cha' ña'a̱ ngu' ji'i̱ yu; ndyalaa ngu' Judea, lo'o ngu' Jerusalén, lo'o ngu' Idumea, lo'o ngu' chaca tsu' sta'a̱ Jordán, lo'o ngu' Sidón, lo'o ngu' Tiro. 9Na'a̱ Jesús cha' quiña'a̱ tsa ñati̱ ndya'a̱ slo, li' nchcui' yu lo'o nu ngu' nu ndyaca tsa'a̱ ji'i̱ yu cha' culana ngu' sca yaca ni'i̱ sube, cha' ná satá ngu' ji'i̱ yu, cha' quiña'a̱ tsa ngu' ndi'i̱. 10Jlo ti' ngu' cha' cua ngua'ni yu jo'o ji'i̱ quiña'a̱ tsa ngu' quicha, bi' cha' tachaa tsa ndi'i̱ ngu' quicha slo; cua nti' tsa ngu' cala' ngu' ji'i̱ ycui' Jesús. 11Nu ngu' quicha nu ntsu'u cui'i̱ cuxi ji'i̱ ngu' ni, nu lo'o na'a̱ ngu' quicha bi' ji'i̱ Jesús, li' ndyatu̱ sti̱' ngu' nde loo su ndu̱ yu. Cui̱i̱ nxi'ya ngu' xqui'ya cui'i̱ cuxi, cha' nslo cui'i̱ bi' ji'i̱ Jesús:
―Nu'u̱ laca nu sca ti Sñi' ycui' Ndyosi ―ndu'ni ngu' quicha bi'.
12Hora ti ngulo Jesús cña ji'i̱ cui'i̱ cuxi cha' ná cacha' ngu' ji'i̱ xa' ñati̱ tilaca laca ycui' yu.
Ngusubi Jesús ji'i̱ tii tyucuaa tya'a ñati̱ nu ca tsa'a̱ ji'i̱
13Lo'o li' ndu'u Jesús ndyaa ndyacuí̱ yu sii' ca'ya, ngusi'ya yu ji'i̱ tyu̱u̱ tya'a ñati̱ cha' ca̱a̱ ngu' ca su ndu̱. Ndyaa ngu' bi' slo yu li'. Lo'o li' laja ngu' bi' ngusubi Jesús ji'i̱ ñati̱ nu cua'ni cña ji'i̱; 14ngusubi yu ji'i̱ tii tyucuaa tya'a ñati̱ bi', cha' ca tsa'a̱ ngu' ji'i̱ yu. Bi' ngu' nu ta Ni ji'i̱ cha' tsaa ngu' slo ñati̱ xa' quichi̱, cha' culu'u ngu' cha' tso'o ji'i̱ ycui' Ni ji'i̱ lcaa ñati̱. 15Nda Jesús chacuayá' ji'i̱ nu tii tyucuaa tya'a ngu' bi', cha' cua'ni ngu' jo'o ji'i̱ ngu' quicha, lo'o jua'a̱ culo ngu' ji'i̱ cui'i̱ cuxi nu ntsu'u ji'i̱ ngu'. 16Nde nscua xtañi ca ta'a tii tyucuaa tya'a ngu' nu ngusubi Jesús ji'i̱: Simón nu ngusta Jesús chaca xtañi Pedro ji'i̱ yu, bi' laca tsaca; 17lo'o li' ngusubi yu ji'i̱ tyucuaa sñi' Zebedeo, nu Jacobo lo'o Juan, nu nchcui' Jesús cha' sñi' tyi'yu laca ngu', (jua'a̱ ndyu'u cha' Boanerges cha'cña ji'i̱ ngu' bi'); 18lo'o jua'a̱ ngusubi yu ji'i̱ Andrés, lo'o ji'i̱ Felipe, lo'o ji'i̱ Bartolomé, lo'o ji'i̱ Mateo, lo'o ji'i̱ Tomás, lo'o ji'i̱ xa' Jacobo sñi' Alfeo, lo'o ji'i̱ Tadeo, lo'o ji'i̱ xa' Simón nu ntsu'u cha' ji'i̱ lo'o ngu' cananista; 19ngusubi yu ji'i̱ Judas Iscariote nu tiya' la tya ji'i̱ yu ya' ngu' xña'a̱ xqui'ya cñi.
Nsta ngu' qui'ya ji'i̱ Jesús
Ca tiya' la ndyalaa Jesús to' tyi lo'o nu ngu' nu ndyaca tsa'a̱ ji'i̱ yu. 20Xa' ndyu'u ti'i̱ ñati̱ ca slo Jesús li'. Cha' quiña'a̱ tsa ñati̱ ndi'i̱, ná ngujui tyempo cha' cacu yu lo'o tya'a ndya'a̱ yu. 21Lo'o ndyuna tya'a Jesús cha' bi', ngulacua tsa ti' ngu' li'. Hora ti ndu'u ngu' lijya̱ ngu' slo Jesús, xqui'ya cha' ntsu'u ñati̱ nu nacui̱ cha' cua ngua loco yu.
22Lo'o li' lijya̱ mstru nu nclyu'u cha' jo'ó ne' laa tonu ca Jerusalén. Nchcui' mstru bi' lo'o ngu':
―Ngusñi Beelzebú xu'na lcaa lo cui'i̱ cuxi ji'i̱ Jesús cua ―nacui̱ mstru bi'―, bi' cha' lo'o chacuayá' ji'i̱ nu xña'a̱ bi' nchca ji'i̱ yu culo ji'i̱ cui'i̱ cuxi nu ngusñi ji'i̱ ñati̱.
23Lo'o li' ngusi'ya Jesús ji'i̱ mstru bi', cha' ca̱a̱ ngu' slo; nda yu sca cui̱i̱ lo'o ngu' li':
―¿Ha culo Satanás ji'i̱ ñati̱ nu ji'i̱ ycui' ca? ―nacui̱ Jesús ji'i̱ ngu' bi'―. 24Tyee cha' ji'i̱ sca quichi̱ jua'a̱ ti si xcui' na xu̱u̱ tya'a sca latya ngu' tisiya lo'o chaca latya ngu' tisiya. 25La cui' jua'a̱ lo'o ngu' tya'a ndi'i̱ sca ni'i̱ ti; si xcui' na xu̱u̱ tya'a ngu', tya'be tya'a ngu' tyaa ngu' li'. 26Bi' cha' ná talo Satanás si xu̱u̱ tya'a ycui' Satanás lo'o msu ji'i̱ ycui' ca; tye cha' ji'i̱ nu xña'a̱ yala ti li'.
27’Sca ñati̱ nguula ni, ná caja ñi'ya̱ nu tyatí̱ ngu' to' tyi yu cha' cuaana ngu' yu'ba ji'i̱ yu. Sca ti si sca̱' ngu' ji'i̱ xu'na ni'i̱ clyo, taca cuaana ngu' na nu ntsu'u ji'i̱ yu bi' li'.
28’Chañi cha' nu nchcui' na' lo'o cu'ma̱, cha' nchca ji'i̱ ñati̱ jña ngu' cha' clyu ti' ji'i̱ ycui' Ndyosi Sti na' cuentya ji'i̱ lcaa qui'ya nu ntsu'u ji'i̱ ngu', masi cha' cuxi nu ngua'ni ngu', masi cha' cuxi nu nchcui' ngu'; 29sca ti ji'i̱ ñati̱ nu nchcui' cha' cuxi ji'i̱ cña nu ndu'ni Xtyi'i ycui' Ndyosi, ná cua'ni clyu ti' ycui' Ni ji'i̱ ñati̱ bi'. Ná cuityi̱ Ni qui'ya nu ntsu'u ji'i̱ ñati̱ bi'.
30Nda Jesús cui̱i̱ bi' lo'o ngu' xqui'ya cha' nacui̱ ngu' cha' ngusñi cui'i̱ cuxi ji'i̱ yu.
Ndyalaa xtya'a̱ Jesús lo'o tya'a yu
31Lo'o li' ndyalaa xtya'a̱ Jesús lo'o tya'a yu to' ni'i̱ su ndi'i̱ Jesús. Nde liya' ndyanu ngu'. Li' nda ngu' cha' ndyaa ca su ndu̱ Jesús, cha' tyu'u yu nde liya' cha' chcui' ngu' lo'o yu, ngua ti' ngu'. 32Pana tachaa tsa ndi'i̱ ngu' su ndu̱ Jesús.
―Ndu̱ xtya'a̱ nu'u̱ lo'o tya'a nu'u̱ nde liya' ―nacui̱ ngu' ji'i̱ Jesús―. Cua nti' ngu' chcui' ngu' lo'o nu'u̱ ―nacui̱ ngu'.
33―¿Tilaca nu chañi ca cha' laca xtya'a̱ na'? ¿Tilaca nu chañi cha' laca tya'a na'? ―nacui̱ Jesús ji'i̱ ngu' li'.
34Li' nxña'a̱ Jesús ji'i̱ ngu' nu nga'a̱ cacua ti slo yu, xa' nchcui' yu lo'o nu ngu' quiña'a̱ bi':
―Nu ngu' re ni, stu'ba ti ndulo ngu' 'na, ñi'ya̱ nu ndulo xtya'a̱ na' 'na, ñi'ya̱ nu ndulo tya'a na' 'na ―nacui̱ Jesús―. 35Lo'o jua'a̱ lcaa ñati̱ nu taquiya' ji'i̱ ycui' Ndyosi, nu cua'ni ñi'ya̱ nu nti' ycui' Ni cha' cua'ni ngu', ngu' bi' ndu'ni ñi'ya̱ nti' si laca ngu' xtya'a̱ na', ñi'ya̱ nti' si laca ngu' tya'a na', masi nu qui'yu, masi nu cuna'a̱ ―nacui̱ Jesús.
දැනට තෝරාගෙන ඇත:
SAN MARCOS 3: cta
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 1981, Wycliffe Bible Translators, Inc. All rights reserved.