SAN MATEO 26
26
Cuaana ti ngüiñi cha' ji'i̱ ngu' lo'o tya'a ngu' cha' xñi ngu' ji'i̱ Jesús
1Lo'o cua ndye nchcui' Jesús lcaa cha' bi', li' nchcui' xi lo'o nu ngu' nu ndyaca tsa'a̱ ji'i̱ bi':
2―Jlo ti' ma̱ cha' tucua ti tsa̱ lyiji cha' caca ta'a si̱i̱ ji'i̱ ta'a pascua, lo'o li' tejeya' ngu' xña'a̱ jna' nu cua nda Ni 'na lijya̱a̱ cha' caca na' ñati̱. Tyaa lo'o ngu' 'na cha' cujuii ngu' 'na lo crusi li'.
3La cui' tyempo nu nchcui' Jesús, li' ndyu'u ti'i̱ tyu̱u̱ tya'a sti jo'ó nu laca loo lo'o mstru cha' jo'ó lo'o ngu' cusu' ji'i̱ ngu' judío; ndyu'u ti'i̱ ngu' slo Caifás nu laca xu'na lcaa sti jo'ó jua. 4Li' ngua'ni stu'ba ngu' cha' ji'i̱ ngu' lo'o tya'a ngu' ñi'ya̱ nu cua'ni ngu' cha' tejeya' ngu' ji'i̱ Jesús cuaana ti, cha' cujuii ngu' ji'i̱.
5―Pana ná tso'o tejeya' na ji'i̱ yu tsa̱ ta'a ―nacui̱ ngu' bi'―. Ca ñasi̱' tsa lcaa ñati̱ nu ndi'i̱ ta'a, lo'o tlyu tsa cha' cusu̱u̱ caca bi' li' ―nacui̱ ngu' bi'.
Nda'a̱ sca nu cuna'a̱ setye hique Jesús
6Ngua sca tsa̱ nga'a̱ Jesús nde quichi̱ Betania, to' tyi Simón nu ngusñi quicha ndyatsu' cuaña' yu. 7Li' ndyalaa sca nu cuna'a̱ slo Jesús nu ndya'a̱ lo'o ji'i̱ sca caatya̱ quee alabastro nu tso'o tsa ña'a̱; ngutsa'á̱ caatya̱ bi' ntsu'u setye tyixi xtyi'i nu quiña'a̱ tsa nga'a̱. Li' ngusalú nu cuna'a̱ bi' setye lo xlya hique Jesús su ntucua yu to' mesa. 8Lo'o na'a̱ ngu' nu ndyaca tsa'a̱ ji'i̱ yu ñi'ya̱ nu ngua'ni nu cuna'a̱ bi', ngua ñasi̱' ngu' ji'i̱ nu cuna'a̱ bi' li'.
―¿Ni cha' ngusalú ñu'u̱ ti nu cuna'a̱ cua setye bi'? ―nacui̱ ngu' bi'―. 9Quiña'a̱ tsa nga'a̱ setye bi'. ¿Ni cha' ná ndyujui' ngu' ji'i̱ cha' caja cñi ta ji'i̱ ngu' ti'i? ―nacui̱ ngu' nu ndyaca tsa'a̱ ji'i̱ bi'.
10Lo'o ngua tii Jesús cha' nu ngua'ya hique ngu' bi', nchcui' lo'o ngu' li':
―¿Ni cha' ñasi̱' ma̱ ji'i̱ nu cuna'a̱ re? ―nacui̱ Jesús ji'i̱ ngu' bi' li'―. Sca cha' tso'o tsa ngua'ni nu cuna'a̱ re lo'o na'. 11Lcaa tsa̱ ndi'i̱ ngu' ti'i lo'o ma̱ nde chalyuu cha' xtyucua ma̱ ji'i̱ ngu', pana cua tye ti tsa̱ nu tyi'i̱ na' lo'o ma̱. 12Cua ngusalú nu cuna'a̱ re setye lo na', masi tya lyiji cajaa na', cha' cua'ni cho'o tyucui ña'a̱ na' cha' tyatsi' na'. 13Cha' liñi chcui' na' lo'o ma̱ juani, cha' lcaa su cañi cha' jna' tyucui ña'a̱ chalyuu, ca bi' cuna ngu' lcaa cha' nu ngua'ni nu cuna'a̱ re juani, cha' tyi'u ti' ngu' cha' tso'o tsa cña nu ngua'ni nu cuna'a̱ re.
Ndyujui' Judas cresiya ji'i̱ Jesús ji'i̱ ngu' nu laca loo
14Lo'o Judas Iscariote ni, tya'a ndya'a̱ yu lo'o nu chaca tii chaca tya'a ngu' nu ndyaca tsa'a̱ ji'i̱ Jesús, ndu'u yu ndyaa yu slo sti jo'ó nu laca loo li'.
15―¿Ni tsa lo cñi ta ma̱ caya' 'na si culu'u na' tyucui̱i̱ ji'i̱ ma̱, cha' tsaa ma̱ tejeya' ma̱ ji'i̱ nu Jesús bi'? ―nacui̱ Judas ji'i̱ sti jo'ó bi'.
Li' nda ngu' calaa tyii tya'a cñi plata ji'i̱ Judas bi'. 16Lo'o li' nclyana yu ñi'ya̱ caca xtyucua yu ji'i̱ ngu' bi', ni jacua' caca ji'i̱ yu cha' cuaana ti culu'u yu tyucui̱i̱ ji'i̱ ngu', cha' tsaa ngu' su nga'a̱ Jesús.
Chaca tya quiya' ndyacu Jesús si̱i̱ lo'o nu ngu' nu ndyaca tsa'a̱ ji'i̱ bi'
17Lo'o ngua tsa̱ clyo ji'i̱ ta'a nu lo'o ndacu ngu' xlyá nu ná lo'o scua̱ tiye' ndya', li' ñaa nu ngu' nu ndyaca tsa'a̱ ji'i̱ slo Jesús. Ndi'ya̱ nchcuane ngu' ji'i̱ li':
―¿Macala nti' nu'u̱ cha' cua'ni cho'o ya cha' cacu na si̱i̱ nu cuentya ji'i̱ ta'a pascua? ―nacui̱ ngu'.
18―Tsaa ma̱ lquichi̱ ca su ndi'i̱ tya'a tso'o na' bi'. Ndi'ya̱ chcui' ma̱ lo'o: “Nacui̱ mstru ji'na cha' cua ngulala ti hora ji'i̱. Lo'o juani nti' ycui' nu cusu' bi' cacu si̱i̱ cuentya ji'i̱ ta'a pascua ca toni'i̱ jinu'u̱ lo'o nu ngu' nu ndyaca tsa'a̱ ji'i̱.”
19Li' ndu'u ngu' nu ndyaca tsa'a̱ bi' ndyaa ngu' lquichi̱, ngua'ni ngu' lcaa cña nu cua ngulo Jesús ji'i̱ ngu'; ngua'ni cho'o ngu' lcaa na nu cua'nijo'o ji'i̱ ngu' cha' cacu ngu' si̱i̱ cuentya ji'i̱ ta'a pascua.
20Lo'o cua ngusi̱i̱, li' ndyalaa Jesús ni'i̱ bi'. Li' ndyaca'a̱ ycui' lo'o ca ta'a ngu' nu ndyaca tsa'a̱ ji'i̱ to' mesa, ndyu'ni ngu' si̱i̱. 21Laja li' nguxana nchcui' Jesús lo'o ngu' bi':
―Chañi cha' nchcui' na' lo'o ma̱ juani, cha' ntsu'u tsaca cu'ma̱ nde nu cujui' cresiya 'na ji'i̱ ngu' xña'a̱.
22Xñi'i̱ tsa ti' ngu' ngua lo'o ndyuna ngu' cha' bi'. Li' nguxana ngu' nchcuane ngu' ji'i̱ Jesús:
―¿Ha na' nu ta̱ jinu'u̱ ya' ngu' xña'a̱, Xu'na? ―nacui̱ tsaca yu ji'i̱ Jesús.
―¿Ha na'? ―nacui̱ chaca yu li'.
Lo'o jua'a̱ nacui̱ xi xa' la ngu'. 23Nguxacui̱ Jesús cha' ji'i̱ ngu' li':
―Ntsu'u tsaca yu tya'a ndyacu na si̱i̱ juani, nu sca ti ca'ña ndyacu yu lo'o na', bi' laca nu cujui' cresiya 'na ji'i̱ nu ngu' xña'a̱ bi'. 24Ñi'ya̱ nu nscua lo quityi ji'i̱ ycui' Ni, jua'a̱ nga'a̱ cha' caca 'na, na' nu cua nda Ni 'na lijya̱a̱ cha' caca na' ñati̱. Pana tya'na tsa ñati̱ nu ta 'na ya' ngu' xña'a̱, tso'o la ngua ji'i̱ yu masi ná ngula yu chalyuu tsiya' ti.
25Lo'o Judas nu ngua'ni cha' cuxi bi', lo'o yu bi' nchcuane yu ji'i̱ Jesús li':
―Mstru ―nacui̱ Judas bi' ji'i̱ Jesús―, ¿ha na' laca̱ nu ta̱ jinu'u̱ ya' ngu' xña'a̱?
―La cui' nu'u̱ ―nacui̱ Jesús ji'i̱ Judas li'.
26Laja lo'o ndyacu ngu', li' ngusñi Jesús sca xlyá, ndya xlya'be ji'i̱ ycui' Ndyosi, ngusa'be ji'i̱ xlyá bi'. Li' nda Jesús yu'be xlyá bi' ji'i̱ ngu' nu ndyaca tsa'a̱ ji'i̱.
―Cacu ma̱ xlyá re, cha' ñi'ya̱ nti' cuaña' na', jua'a̱ nti' nu nde ―nacui̱ Jesús ji'i̱ ngu' bi'.
27Lo'o li' ngusñi Jesús sca vaso vino, ndya xlya'be ji'i̱ ycui' Ndyosi. Li' nda vaso vino bi' ji'i̱ ngu' nu ndyaca tsa'a̱ ji'i̱.
―Lcaa cu'ma̱ co'o ma̱ vino re ―nacui̱ Jesús―, 28cha' ñi'ya̱ nti' tañi na', jua'a̱ nti' nu nde. Laca bi' sca cha' nu culu'u liñi ji'i̱ ma̱ cha' chaca quiya' quiñi cha' ji'i̱ ycui' Ndyosi lo'o ñati̱ chalyuu, nu lo'o tyalú tañi na' lo crusi. Jua'a̱ cua'ni lyaá Ni ji'i̱ quiña'a̱ tsa tya'a ma̱, nu lo'o cua'ni clyu ti' Ni ji'i̱ qui'ya nu ntsu'u ji'i̱ ma̱. 29Liñi tsa cha' nu chcui' na' lo'o ma̱ juani, cha' nga'aa co'o na' vino juani, ña'a̱ cuayá' nu tyalaa tsa̱ bi' lo'o co'o na' ji'i̱ stu'ba ti lo'o cu'ma̱ slo ycui' Ndyosi Sti na', ca su ntucua ycui' Ni nu laca loo.
Chcui' Pedro lo'o ngu' cha' ná nslo yu ji'i̱ Jesús tsiya' ti
30Lo'o ndyula tu'ba ngu' sca ji̱i̱ ji'i̱ ycui' Ndyosi, li' ndu'u ngu' ndyaa ngu' nde ca'ya Olivos. 31Lo'o li' nchcui' Jesús lo'o ngu' bi':
―Caca tyuju'u ti' lcaa cu'ma̱ ña'a̱ ma̱ 'na talya ndyi. Caca bi' ñi'ya̱ nu nscua lo quityi ji'i̱ ycui' Ndyosi cua sa'ni la. Ndi'ya̱ nchcui' cha' bi': “Lo'o cujuii na' ji'i̱ nu ña'a̱si̱i̱ ji'i̱ xlya', li' xna lcaa xlya' bi', tyaa ni'”, nacui̱ quityi bi'. 32Pana ca tiya' la lo'o tyu'ú na' chaca quiya', li' nde loo la tsa'a na' nde Galilea cuentya ji'i̱ cu'ma̱.
33Li' nchcui' Pedro lo'o:
―Ná xtyanu na' jinu'u̱ tsiya' ti ―nacui̱ Pedro li'―. Masi ca ta'a ngu' xna ngu' jinu'u̱, pana na' ni, ná xna na' jinu'u̱.
34Li' nguxacui̱ Jesús cha' ji'i̱ Pedro bi':
―Cha' liñi cacha' na' jinu'u̱ juani ―nacui̱―, cha' nu lo'o bilya xi'ya ndye'e talya ndyi, sna quiya' chcui' nu'u̱ cha' ná nslo nu'u̱ 'na; jua'a̱ ñacui̱ nu'u̱ ji'i̱ ngu'.
35Li' xa' nchcui' Pedro:
―Masi ntsu'u cha' cajaa na' stu'ba ti lo'o nu'u̱, ná chcui' na' lo'o ñati̱ cha' ná nslo na' jinu'u̱ ―nacui̱ Pedro li'.
Lo'o la cui' jua'a̱ cha' nguxacui̱ xa' la ngu' nu ndyaca tsa'a̱ ji'i̱ Jesús li'.
Nchcui' Jesús lo'o ycui' Ndyosi Sti yu ca Getsemaní
36Lo'o li' ndyalaa Jesús lo'o nu ngu' nu ndyaca tsa'a̱ ji'i̱, ndyatí̱ ngu' ne' sca lo'o su naa Getsemaní nu nga'a̱ ca to' quichi̱.
―Cua'a̱ ma̱ xi ndacua ti ―nacui̱ Jesús ji'i̱ ngu' bi'―, laja lo'o tsa'a̱ ca nde la xi cha' chcui' na' lo'o ycui' Ndyosi Sti na'.
37Li' tya ndyaa la xi Jesús lo'o Pedro lo'o tyucuaa sñi' Zebedeo. Ngua'ya sca cha' nu xñi'i̱ tsa ti' Jesús xqui'ya cña tlyu nu cua tyacua ti ji'i̱. 38Li' nchcui' Jesús lo'o nu sna tya'a ngu' bi':
―Ne' cresiya 'na ntsu'u sca cha' nu xñi'i̱ ti' na'. Nga'aa talo na' cha' xñi'i̱ tsa ti' na'. Tyanu cu'ma̱ nde ti, pana tii ti ti' ma̱ tyi'i̱ ma̱ lo'o na'.
39Li' tya ndyaa la xi yu ca nde bi' la. Nde loo ti yu ndyaa stii yu lo yuu cha' xñi'i̱ tsa ti' yu. Li' nchcui' yu lo'o ycui' Ndyosi, ndi'ya̱ nu nacui̱ yu:
―Sti na', ¿ha ná ntsu'u xi xa' la ña'a̱ nu cua'ni na' cña re, cha' nga'aa chcube' la na' lo'o cña tlyu re jinu'u̱? ―nacui̱ Jesús ji'i̱ ycui' Ndyosi Sti yu―. Pana nti' na' cua'ni na' cña nu nti' nu'u̱ cha' cua'ni na'.
40Lo'o li' nxtyu̱u̱ yu ñaa yu su ndi'i̱ nu ca ta'a sna ngu' bi'. Laja' tsa ngu' li'. Lo'o li' nchcui' yu lo'o nu Pedro bi':
―¿Ha ná nchca talo nu'u̱ ni sca hora ti nu tii ti ti' nu'u̱ tyi'i̱ nu'u̱ lo'o na'? ―nacui̱ Jesús ji'i̱―. 41Tii ti ti' ma̱ tyi'i̱ ma̱ juani lacua, cha' chcui' ma̱ lo'o ycui' Ndyosi cha' ná tyiji̱loo nu cuiñaja ji'i̱ ma̱. Jlo ti' na' cha' tyucui tyiquee ma̱ ntaja'a̱ ma̱ cua'ni ma̱ cña re 'na, pana ná tyu'u scua juersa ji'i̱ ma̱, yala tsa ndyaja' ma̱.
42Li' xa' ndyaa Jesús, nchcui' lo'o ycui' Ndyosi chaca quiya':
―Sti na' ―nacui̱ yu ji'i̱ Ni―, si ná ntsu'u xa' ña'a̱ nu cua'ni na' cña jinu'u̱, tso'o la si chcube' na' lacua, cha' nti' na' cua'ni na' lcaa cña nu nti' nu'u̱ cha' cua'ni na'.
43Li' xa' nxtyu̱u̱ yu ñaa yu slo ngu' bi'; lo'o li' na'a̱ yu ji'i̱ ngu' cha' laja' ngu' chaca quiya', cha' lye tsa ndyu'u xcalá ngu'. 44Lo'o li' nguxtyanu yu ji'i̱ ngu' bi', ndyaa yu nchcui' yu lo'o ycui' Ndyosi chaca quiya'; la cui' ti cha' nu nchcui' yu tya tsa̱ la nchcui' yu chaca quiya'. Nu nchca sna quiya' nchcui' yu lo'o ycui' Ndyosi Sti yu. 45Lo'o li' nguxtyu̱u̱ yu ñaa yu slo ngu' nu ndyaca tsa'a̱ ji'i̱.
―¿Ha tya laja' ma̱? ―nacui̱ Jesús ji'i̱ nu ngu' bi' li'―. ¿Ha bilya tyaala' xcalá ma̱? Que ti' ma̱ juani, cha' cua ndyalaa hora nu xñi ngu' cuxi 'na, na' nu cua nda Ni 'na lijya̱a̱ cha' caca na' ñati̱; 46tyatu̱ ma̱ cha' tyaa na, cha' cua ndyalaa yu nu ta 'na ya' ngu' cuxi bi'.
Ndyaa lo'o ngu' ji'i̱ Jesús preso
47Laja lo'o nchcui' Jesús jua'a̱, li' ndyalaa Judas slo. La cui' tya'a ngu' nu ndyaca tsa'a̱ ji'i̱ Jesús laca nu Judas bi'. Lo'o jua'a̱ quiña'a̱ tsa xa' la ñati̱ lijya̱ lo'o yu, nu ntsu'u maxtyi cusu̱u̱ ya', nu ntsu'u yaca ya'; lijya̱ ngu' tyaala bi' cña nu ngulo sti jo'ó nu laca loo, la cui' jua'a̱ cña nu ngulo lcaa ngu' cusu' nu laca loo lijya̱ ngu'. 48Lo'o Judas ni, bi' laca nu cua ta ti ji'i̱ Jesús ya' ngu' tyaala bi'. Cua ndacha' yu ji'i̱ ngu' cua tsa̱ la: “Sca ti yu nu cacu na' saca' lo'o chcuicha' na' ji'i̱ yu, ji'i̱ bi' xñi ma̱”. Jua'a̱ nacui̱ yu ji'i̱ ngu', 49bi' cha' ndyaa Judas bi' ca su ndu̱ Jesús cha' chcuicha' ji'i̱ yu.
―Nde ti ndu̱ nu'u̱, mstru ―nacui̱ Judas bi' ji'i̱ Jesús.
Li' ndyacu Judas saca' Jesús. 50Li' nacui̱ Jesús ji'i̱ Judas bi':
―Tya'a tso'o na' ngua nu'u̱ nquicha' ―nacui̱―. ¿Ni cña lijya̱ nu'u̱ ca nde juani?
Li' ntejeya' ngu' tyaala bi' ji'i̱ Jesús, cha' tyaa lo'o ngu' ji'i̱.
51Lo'o tsaca ñati̱ nu ndya'a̱ lo'o Jesús, hora ti ngulo yu maxtyi cusu̱u̱ ji'i̱ yu, ngujui'i̱ yu maxtyi ji'i̱ msu ji'i̱ xu'na sti jo'ó; ngusi'yu cu' jyaca̱ msu bi' li'. 52Lo'o li' ngulo Jesús cña ji'i̱ yu bi':
―Xco'o nu'u̱ maxtyi cusu̱u̱ cua hi̱ ―nacui̱ ji'i̱ yu bi'―. Lcaa ngu' nu nxu̱u̱ tya'a lo'o maxtyi, jua'a̱ cajaa ngu' bi' xqui'ya maxtyi. 53¿Ha ná jlo ti' nu'u̱ cha' si jña na' ji'i̱ Sti na', hora ti culo ycui' Ni cña cha' ca̱a̱ tii tyucuaa tya'a taju xca̱ ji'i̱ Ni, cha' xtyucua xca̱ bi' 'na? 54Pana ná nti' ya jua'a̱. Nga'a̱ cha' caca ñi'ya̱ nu nscua cha' lo quityi cusu' ji'i̱ ycui' Ndyosi Sti na'.
55Li' nchcui' Jesús lo'o nu taju ñati̱ tyaala nu ñaa cha' xñi ngu' ji'i̱:
―¿Ni cha' lijya̱ ma̱ lo'o maxtyi cusu̱u̱ lo'o yaca ntsu'u ya' ma̱, cha' xñi ma̱ 'na? ―nacui̱ Jesús ji'i̱ ngu'―. ¿Ha sca nu cuaana laca na' lacua? Tyu̱u̱ tsa tsa̱ ngua'a̱ na' ne' laa tonu ji'i̱ ma̱, ngulu'u na' cha' ji'i̱ ycui' Ndyosi ji'i̱ ñati̱, lo'o ná ngusñi ma̱ 'na li'. 56Pana ñi'ya̱ nu nguscua ngu' nu ngua tu'ba ji'i̱ ycui' Ndyosi nu ngua sa'ni, la cui' jua'a̱ ndyu'ni ma̱ lo'o na' juani.
Li' ndu'u lcaa ngu' nu ndyaca tsa'a̱ ji'i̱, ngusna ngu'.
Nu ngu' nu laca loo ji'i̱ ngu' judío ngua'ni cuayá' ji'i̱ Jesús
57Li' ndyaa lo'o ngu' tyaala bi' ji'i̱ Jesús slo Caifás, xu'na sti jo'ó. Ni'i̱ bi' cua ndyu'u ti'i̱ lcaa mstru cha' jo'ó lo'o lcaa ngu' cusu' nu laca loo. 58Lo'o nu Pedro bi' ni, tyijyu' ti ndu'u lca'a̱ yu chu̱' ngu' bi', hasta ña'a̱ cuayá' nu ndyalaa ngu' ca to' lo'o ji'i̱ xu'na sti jo'ó bi'. Li' ndyatí̱ Pedro ne' lo'o, stu'ba ti ngua'a̱ yu lo'o ngu' policia, cha' nti' yu ña'a̱ yu ñi'ya̱ caca lo'o cua'ni tye ngu' cha' ji'i̱ Jesús.
59Lo'o li' lcaa ngu' tisiya, lo'o lcaa sti jo'ó nu laca loo, lo'o lcaa ngu' cusu' bi', nclyana ngu' ñi'ya̱ ca sta ngu' qui'ya ji'i̱ Jesús, cha' nti' tsa ngu' cujuii ngu' ji'i̱. Pana ná ndu'u tucua ñati̱ nu cujuii cuañi' ji'i̱ yu cuentya ji'i̱ ngu' nu laca loo bi'. 60Ná ngujui ñi'ya̱ nu cua'ni ngu', masi quiña'a̱ tsa ngu' cuiñi ndyalaa ngu' slo ngu' nu laca loo bi', cha' sta ngu' qui'ya ji'i̱ Jesús; ná stu'ba cha' nu nchcui' nu ngu' cuiñi bi'. Su cua ndye, li' ndyalaa tucua tya'a ngu' cuiñi nu ndi'ya̱ nchcui':
61―Nacui̱ nu qui'yu re: “Taca jna' cuityi̱ na' laa tonu re ji'i̱ ycui' Ndyosi, lo'o li' xa' cuiñá na' ji'i̱ chaca quiya'; chu̱' sna tsa̱ ti tye tya' laa 'na”, nacui̱ Jesús jua ―nacui̱ ngu' cuiñi bi'.
62Li' ndyatu̱ xu'na sti jo'ó, nchcui' yu lo'o Jesús:
―¿Ni cha' ngusta ngu' qui'ya re jinu'u̱? ―nacui̱ sti jo'ó bi'―. ¿Ni cha' ná nxacui̱ nu'u̱ ni sca cha' ji'i̱ ya?
63Ni sca cha' nu nchcui' sti jo'ó, ná nguxacui̱ Jesús ji'i̱ tsiya' ti. Li' ngulo sti jo'ó bi' cña ji'i̱ yu:
―Chacuayá' ji'i̱ ycui' Ndyosi nu lu'ú ca nclyo na' cña re jinu'u̱ juani: Cacha' clya nu'u̱ ji'i̱ cua si chañi cha' laca nu'u̱ Cristo, nu sca ti Sñi' ycui' Ndyosi.
64―La cui' laca na' ―nacui̱ Jesús li'―, ñi'ya̱ nu nacui̱ nu'u̱ laca na'. Lo'o chaca cha' cacha' na' ji'i̱ ma̱ juani, cha' nde loo la ña'a̱ ma̱ 'na nu cua nda Ni 'na lijya̱a̱ cha' caca na' ñati̱, nu lo'o tyucua na' la'a tsu' cui̱ ca su ntucua ycui' Ndyosi Sti na', nu lcaa tsiya' ti cña nchca ji'i̱ Ni. Li' ca̱a̱ na' chaca quiya' laja coo nde cua̱.
65Lo'o li' nu xu'na sti jo'ó bi' ni, ycui' ca yu ngusaa' ste' yu cha' ñasi̱' tsa yu.
―Cuiñi tsa yu re, cha' suba' nchcui' yu re ji'i̱ ycui' Ndyosi ―nacui̱ sti jo'ó bi' ji'i̱ lcaa tya'a ngu' nu laca loo li'―. Nga'aa nti' na cha' sta xa' la ñati̱ qui'ya ji'i̱ yu re. Cua ndyuna na cha' suba' tonu tsa nu nchcui' yu re, nu lo'o nacui̱ yu cha' Sñi' ycui' Ndyosi laca yu. 66¿Ñi'ya̱ nu ntsu'u tyiquee cu'ma̱ juani?
Hora ti nguxacui̱ ngu' cha' ji'i̱ xu'na sti jo'ó bi':
―Ntsu'u cha' cajaa yu ―nacui̱ ngu' bi'.
67Li' ngutu'u hitya sañi' ngu' loo Jesús, ngujui'i̱ ngu' ndacu̱' ji'i̱; jua'a̱ ntsu'u xa' la ngu' nu ngujui'i̱ ya' saca' Jesús. 68Li' nacui̱ ngu' bi':
―Nacui̱ nu'u̱ cha' Cristo laca nu'u̱ nu nda Ni ji'i̱ lijya̱ chalyuu. Tso'o lacua. Cacha' liñi nu'u̱ ji'i̱ ya, ¿ni naa yu nu ngujui'i̱ jinu'u̱, si chañi cha' tii nu'u̱? ―nacui̱ ngu' bi' ji'i̱ Jesús.
Nacui̱ Pedro cha' ná nslo ji'i̱ Jesús tsiya' ti
69Lo'o nu Pedro bi' ni, nde liya' ti nga'a̱ yu bi'. Li' ñaa sca nu cuna'a̱ cua' slo yu.
―Lo'o nu'u̱ ndya'a̱ stu'ba ti lo'o Jesús nu ngu' Galilea jua ―nacui̱ nu cuna'a̱ bi' ji'i̱ Pedro.
70Li' cui̱i̱ nguxacui̱ Pedro cha' ji'i̱ nu cuna'a̱ ña'a̱ cuayá' nu cuna lcaa ngu':
―Ná nchca cuayá' ti' na' cha' nu nchcui' nu'u̱ ―nacui̱ Pedro ji'i̱.
71Li' ndatsu' Pedro, ndyaa ndyatu̱ cacua ti to' lo'o bi'. Lo'o li' na'a̱ chaca nu cuna'a̱ cua' ji'i̱ yu, nchcui' nu cuna'a̱ bi' lo'o ngu' nu ndu̱ cacua ti:
―Stu'ba ti ndya'a̱ nu qui'yu re lo'o Jesús Nazaret jua ―nacui̱ nu cuna'a̱ bi' li'.
72Chaca quiya' lye tsa nchcui' Pedro, ngua'ni yu jura li':
―Ná nslo na' ji'i̱ nu qui'yu jua tsiya' ti ―nacui̱ Pedro ji'i̱ ngu' bi' li'.
73Ca tiya' la xi ñaa xi xa' la ñati̱ nu nga'a̱ ndacua ti, nchcui' ngu' lo'o Pedro li':
―Chañi cha' tya'a ndya'a̱ nu'u̱ lo'o nu qui'yu jua ―nacui̱ ngu' ji'i̱―, cha' stu'ba ti ndañi cha' nu nchcui' nu'u̱ lo'o cha' nu nchcui' tya'a quichi̱ tyi yu jua.
74Li' chaca quiya' lye tsa nchcui' Pedro cha' xcube' ycui' Ni ji'i̱ yu si cha' cuiñi laca nu nda yu.
―Ná nslo na' ji'i̱ nu qui'yu jua tsiya' ti ―nacui̱ Pedro ji'i̱ ngu'.
Hora ti ngusi'ya ndye'e li'. 75Lo'o li' ndyi'u ti' Pedro cha' nu nchcui' Jesús lo'o yu tya tsa̱ la, nu lo'o ndi'ya̱ nacui̱ Jesús ji'i̱ yu: “Nu lo'o bilya xi'ya ndye'e talya juani, sna quiya' chcui' nu'u̱ lo'o ñati̱ cha' ná nslo nu'u̱ 'na”. Jua'a̱ nacui̱ Jesús tsa̱ la, bi' cha' ndu'u Pedro ndyaa yu li'; nxi'ya tsa yu ndyaa yu cha' xñi'i̱ tsa ti' yu li'.
දැනට තෝරාගෙන ඇත:
SAN MATEO 26: cta
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 1981, Wycliffe Bible Translators, Inc. All rights reserved.