Mark 13
13
Jisas mita tempel ba sauhki tikan kabia wisa
(Mt 24.1-2; Lk 21.5-6)
1Jisas tempel wina takan ba ra, ai disaipilka kum bui witin ra win:
—¡Smasmalkra, kaiks walpa nani na, bara watla paskanka nani na sin!
2Sakuna Jisas witin ra win:
—¿Man nani naha watla paskanka tara nani na kaikisma? Nahara walpa kumi sin, walpa wala purara ban kabia apia. Sut kat sauhki tikan kabia.
Kau tnata aimakras sainka nani
(Mt 24.3-28; Lk 21.7-24; 17.22-24)
3Ningkara witin nani Olivet ilka ra wan, tempel mawan tani ra. Jisas bahara iwi kan ba ra, Pita, Jems, Jan, Andru kat tnaya ra tawi makabi walan:
4—Naha dukia na ahkia takbia sapa, yang nani kaikaia want sna. ¿Mahka naha diara nani tnata alkaia sainka ba, dîa kabia?
5Jisas witin nani ra win:
—¡Aman kaiks upla kunin mai munbiara! 6Upla ailal yang nini mâki, naku aisi balbia: ‘Yang sika Misaya’, bara upla ailal ra kunin munbia.
7“Sakuna man nani war sturka bara trabil nani ba sin walma ba ra, sirang iwpara, baha ba baku kaia sa bamna; sakuna tnata piua ba kau kabia. 8Bamna nisan kum mita nisan wala mapara aiklabia, kuntri kum kuntri wala mapara war daukbia. Bara plis ailal ra tasba nikban nani kabia, plun wahwan, bin tara nani sin. Naha diara nani na, pât wahwaia tâ kriki ba kabia.
9“Sakuna man nani aman kaiks. Witin nani wihta nani mihta ra mai mangkbia, bara Ju nani priaska watla nani ra mai wipan kabia. Man nani lika yang tâiwan wihta nani, king nani mawanra sin mai brih wabia, bara yang witniski baha nani mawanra sin aisama. 10Bara sturi yamni ba piua tnata aimakras kainara, tasba aiska ra aisi smalkan kaia sa. 11Bara man nani wihta nani mihta ra mai brih wabia ba ra, dîa aisaia sma ba dukiara lika lukpara. Man nani lika Gâd mita baha piua ra dîa aisaia maikbia ba kat aisas, kan Spirit Holikira sika aisabia, man nani lika apia.#Mt 10.17-20; Lk 12.11-12. 12Upla nani sin ai muihni mapara kunin aisabia bara ikbia; aisa nani mita ai luhpia nani mapara kunin aisabia; luhpia nani ai aisika ai yaptika wal mapara bubia, bara witin nani ra ikbia. 13Upla sut yang tâiwan misbara mai kaikbia; sakuna yua tnata kat ya bapi bubia ba, baha lika swaki sakan kabia.#Mt 10.22.
14“Man nani saura tâski lâka ra#Dn 9.27; 11.31; 12.11. kaikma naha pliska baku kaia apia kan ba —ya aisi kaiki ba, tânka bribia—, baku bamna Judia ra nani ba il nani ra plapbia; 15bara ya ai watla bahara nani ba, baha pura wina iwbiara bara sin dimbiara diara sakaia; 16bara ya ai nasla ra ba, kli tawi bal ai kwalka sin bribia apia.#Lk 17.31. 17¡Mairin kwihra nani bara ai luhpia tiala dakaki nani ba mapara lika saura pali kabia! 18Man nani bui Gâd ra makas, lî piua ra naha dukia takbiara; 19kan baha yua nani ra lika pât wahwanka tara kabia, bahmuna kau patitara piua ra âpu kan,#Dn 12.1; Par M 7.14. Gâd mita tasba paskan wina, naika piua ra sin bahmuna yua âpu kabia. 20Bara Dawan mita baha piua ba kunhku daukras kaka, upla kumi sin swaki sakan kabia apia; sakuna ai uplika nani pliki sakan ba latwanka ra kunhku daukan sa.
21“Bamna baha piua ra upla kum mita man nani ra naku mai wibia kaka: ‘Kaiks, Misaya ba nâra sa’, apia kaka ‘Kaiks, bâra sa’, bahara kasak lukpara. 22Bamna kuninkira nani ba Misaya baku balbia, prapit baku sin, bara sain tara nani, diara aihka nani sin upla nani ra kunin munaia wisi, daukbia; bara sip kabia kaka, Gâd pali pliki sakan nani ra ban kunin munbia. 23¡Bamna man nani aman kaiki bas! ¡Yang kau kan wina, sut mai wîri sa!
Upla Luhpia Waitna kli balbia ba
(Mt 24.29-35,42,44; Lk 21.25-36)
24“Sakuna baha yua nani ra, pât wahwanka piua ningkara, yu lapta ba tihmia takbia,#Ais 13.10; Jl 2.10,31; 3.15; Par M 6.12. kati sin ai ingnika yabia apia,#Ais 13.10; Isi 32.7; Jl 2.10; 3.15. 25slilma nani kasbrika wina kauhbia,#Ais 34.14; Par M 6.13. bara kasbrika ra karnika nani ba sin nikban kabia.#Jl 2.10. 26Bâra mika Upla Luhpia Waitna ba, kasbrika ra#Dn 7.13; Par M 1.7. ai karnika tara wal, ai pranakira aula ba, upla nani kaikbia. 27Witin ai insalka nani blîkbia, bara pâsa mapa walhwal ba wina, ai uplika pliki sakan nani ba asla daukbia, tasba tnata lâs ba wina, kasbrika pura lâs tnata ba kat sin.
28“Man nani kwah damni dusa maprika lilka ba wina lan taks: ai tnawa nani kura, bara ai wahia nani pat saki piua ra, man nani kaikisma mani piua ba pat aula. 29Sim baku, naha dukia nani takbia kaikma piua ra, kaiki bas tnata yua ba pat baila sa, dur pali lamara sa. 30Kasak mai wisni man nani ra: Naha piua uplika nani kau pruras kaka, naha dukia nani sut takbia. 31Kasbrika purara ba bara tasba wal lui wabia, sakuna yang bîli nani lika sut kat aimakbia.
32“Sakuna baha yua ba, awarka ba lika upla kumi sin kaikras sa, kasbrika purara insal nani ba, Upla Luhpia Waitna pali sin apia. Aisa ba baman baha kaikisa.#Mt 24.36.
33“Baha mita, man nani aihwaki, bîla kaiki bas, kan man nani kaikras sma ahkia piua ba aimakbia sapa. 34Sim waitna kum laihura impaki ba baku sa, bamna ai watla kau swiras ba ra, ai albika nani ra warkka yabisa, bara dur aihwakbia wisa.#Lk 12.36-38. 35Bara man nani aihwaki bas, watla dawanka ahkia balbia sapa kaikras sma bamna: saiwan ra, wâl bakriki ra, kalila aiwanbia ra, ingbia sapa; 36damra walras balbia kra, bara yapi kama mai sâkbiara. 37Man nani ra mai wisna na, yang bui upla sut ra wisna: ¡Man nani aihwaki bas!”
දැනට තෝරාගෙන ඇත:
Mark 13: MSKTU
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
© 2010 Bible Society in Nicaragua