Luk 17
17
Saurka ra kauhaia trabilka ba
(Mt 18.6-7,21-22; Mk 9.42)
1Jisas ai disaipilka nani ra win: “Piua bani upla nani ra munka saura daukaia dukia nani ba bâra kaia sa, ¡sakuna saura pali kabia upla mina bataki uplika ba mapara! 2Kau pain kabia, baha uplika nana ra walpa tara kum wilki kabu ra lulkan kabia, naha sirpika lupia nani kum ra yarka saura daukaia ba wal. 3¡Man nani aman kaiki bas!
“Muihkam saura daukbia kaka, lawi dauks; witin ai saurka wina ai kupia lakbia kaka, saurka swih tiks.#Mt 18.15. 4Yu aiska bilara aima 7 mampara saura daukbia kaka, bara aima 7 bal, ‘Yang kli mampara saura daukamna apia’ mai wibia kaka, man wilin kaia sma saurka swih tikaia.”
Kasak lukan lâka karnika ba
5Apastil nani Dawan ra makaban:
—Kau kasak lukan lâka ba yang nani ra aik.
6Bara Dawan pana win:
—Kasak lukan lâka ba sim mostard mâ lupia ba baku pan brisma kaka, naha kwah damni dusa tara ra sip sma wiaia: “Naha wina daiwi, kabu ra wih dimi was”, bara dusa ba baha kat daukbia.
Dukia dadaukra nani daukaia ba
7“Man nani alba kum brisma kaka, bara baha albika insla ra tasba tukbi si, apia kaka daiwan nani main kaiki si balbia kaka, ¿ban sip sma ki wiaia: ‘Man nahara bal iwi, plun pis’? 8Apia, sakuna kau ni wima: ‘Tutni pata ba mahka ridi dauks, bara maisam wilki, duki dauki bas, yang plun pimna kat. Baha ningkara, man sip kama plun piaia bara diara sin diaia.’ 9¿Bamna baha albika ra dîa dîa win sut daukan ba dukiara witin tingki wisa ki? Man pain kaikisma, apia. 10Baku sin man nani, Gâd mita dîa daukaia maikan ba sut dauki, naku wima: ‘Yang nani alba bahki sna, kan diara daukaia katna ba baha baman daukisna.’
Jisas bui waitna matawalsip lipar sikniska bri kan ba wina rakisa
11Jisas ba ban Jerusalem ra impaki kan, witin Sameria bara Galili wal tasbaya bâk luan. 12Tawan sirpi kum ra balan ba ra, waitna matawalsip lipar sikniska bri kan ba taki wan witin wal prawaia, sakuna sut laihura man bûi takaskan, 13witin nani ai pura wini:
—¡Jisas, Smasmalkra, yang nani ra kupiam yamni ai kaiks!
14Jisas baha nani ra kaikan ba ra, naku win:
—Man nani prîs nani ra was bara wînam ba mariks.#Lib 14.1-32.
Witin nani auya kan yabal ra, ai sikniska wina sut rawan kata. 15Sakuna baha nani wina kumi ba kaikan ai sikniska wina rawan kan, bamna witin kli tawi, ai bîla baikra tara ni Gâd ra mayuni balan. 16Bara Jisas mawan kat bal ai lula kriki, tasba kat aimakupan, tingki wiaia dukiara. Naha waitnika na lika Sameria wina kata. 17Bamna Jisas bila:
—¿Upla matawalsip ba sut rakan kata apia? ¿Bara wala nani 9 ba anira sa ki? 18¿Naha tringsar waitna na baman Gâd ra tingki wiaia balan ki?
19Bara waitnika ra wisata:
—Man mahka was; mai rakan sa kasak lukram bamna.
Gâd king aimaki lâka nahki balbia ba
(Mt 24.23-28,36-41)
20Parisi nani mita Jisas ra makabi walan ahkia Gâd king aimaki lâka ba balbia sapa, bara witin pana naku win:
—Gâd king aimaki lâka ba lika wan nakra ni kaiki dukia sâtka apia sa. 21Sip wibia apia: ‘Kaiks, nahara sa’, apia kaka ‘Bahara sa’; kan Gâd king aimaki lâka ba pat man nani tilamra sa.
22Bamna ai disaipilka nani ra win:
—Yua nani balbia ba ra, man nani want pali kama, Upla Luhpia Waitna piua kum, apia kaka wiria pan kaikaia, sakuna sip kaikma apia. 23Bara upla nani mai wibia: ‘Kaiks, nahara sa’, apia kaka ‘Kaiks, bahara sa’; kuna bahara wapara, nina sin blîkpara. 24Bamna imyula lipan ingnika kasbrika tâ kumi wina tâ wala kat kaikisma ba baku, sim sât kabia Upla Luhpia Waitna aula ba ra. 25Sakuna tâura witin kasak pât wahwaia sa, naha piua uplika nani mita sin lulki swin kabia. 26Noa piua ra nani ra takan ba baku kabia,#Bla St 6.5-8. Upla Luhpia Waitna balaia piua nani ra. 27Witin nani plun pi kan, diara di kan, marit taki kan, ai luhpia mairin nani sin marit saki kan, Noa ark watla ra aimakan piua ba kat; bamna lisamra balan ba ra, baha nani sut pruan.#Bla St 7.6-24. 28Lot piua nani ra sin baku takan:#Bla St 18.20—19.25. witin nani plun pi kan, diara di kan, diara pana pana atki kan, insla mangki kan, ai watla nani sin mâki kan; 29sakuna Lot Sodoma tawanka wina takan ba ra, pauta sulpa wal kasbrika pura wina auhan, bara sut kat iki tikan. 30Baku kabia Upla Luhpia Waitna balbia piua ra.
31“Baha piua ra, upla kum utla bahna ra ba, ai dukia utla bilara bri ba bal iwi sâkbia apia; ya insla ra kabia ba, kli ai watla ra tawi balbia apia.#Mt 24.17-18; Mk 13.15-16. 32Lot maya mairin ra dîa takan ba luki bas.#Bla St 19.26. 33Ya ai rayaka swaki sakaia pliki ba, witin lika baha tikbia; sakuna ya ai rayaka tikbia kaka, witin lika baha ba swaki sâkbia.#Mt 10.39; 16.25; Mk 8.35; Lk 9.24; Jn 12.25.
34“Yang mai wisna, baha tihmika upla wâl krikri ra kabia: kumi ba brih wan kabia, bara wala ba lika swin kabia. 35Mairin wâl akbaia walpaya ra akbi kabia: kumi ba brih wan kabia, bara wala ba lika swin kabia. 36[Waitna wâl insla ra kabia; kumi ba brih sakan kabia, bara wala ba swin kabia.]
37Naha walan ba ra, makabi wali banhwan:
—Dawan, ¿naha diara na ani pali ra baku kabia ki?
Bara witin pana win:
—Anira wîna tara pruan bâra kaka, bahara sika yakal tara nani asla tutukwi kabia.
Currently Selected:
Luk 17: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua