پیدأیش ۱
۱
آفرینشٚ نقل
1جٚه اوّل، خودا آسمأنأن و زیمینَ خلق بوکوده. 2 زیمین، شیکل نأشتی و هیچی اونی میأن نٚنأبو و ظولومأت جولفٚ آبأنَ بٚپوشأنه بو و خودا روح آبأنٚ رو دٚوأرٚستی.
3 خودا بٚفرمأسته: «روشنأیی بٚبه» و روشنأیی بوبوسته. 4 روشنأیی جَا خودایَ خوش بأمؤ و اونَ ظولومأتٚ جَا سیوأ بوکوده 5 اون روشنأیی‌یَ «روج» و ظولومأتَ «شب» نأم بٚنأ. شب دٚوأرٚسته و صُب بوبوسته. اَن، اوّلی روج بو.
6 بأزون خودا بٚفرمأسته: «بیجیرٚ آبأن و بوجؤرٚ آبأنٚ سیوأ کودنٚ رِه ایتأ جأجیگأ آبأنٚ میأن بٚمأنه.» 7 پٚس خودا هنٚ وأسی کی بیجیرٚ آبأنَ جٚه بوجؤرٚ آبأن سیوأ بوکونه ایتأ جأجیگأ بٚوجود بأوٚرده. 8 خودا اَ جأجیگأیَ «آسمأن» نأم بٚنأ. شب دٚوأرٚسته و صُب بوبوسته. اَن، دویُمی روج بو.
9 اونی پٚسی خودا بٚفرمأسته: «او آبأن کی آسمأنٚ جیر نٚهأده ایتأ جأ جمَ بٚد کی خوشکی نمأیأنَ بٚه» و هطؤ بوبوسته. 10 خودا خوشکی‌یَ «زیمین» و ایتأ جأ جمَ بوسته آبأنَ «دریأ» نأم بٚنأ و خودا بیدِه کی خوروم ایسٚه. 11 بأزون خودا بٚفرمأسته: «تومأمٚ او جوروأجورٚ گیأیأن و اوشأنی‌یٚم کی دأنه کونٚده و او دأرأن کی مِیوه دأرٚده، زیمین اوشأنَ بیرون بأوٚره و هرتأن ایتأ خو مأنستَنَ چأکونٚد» و هطؤ بوبوسته. 12 زیمین او گیأیأنَ بیرون بأوٚرده کی زیمینٚ جَا بیرون اَمؤیید، او گیأیأن کی خوشأنٚ رقمٚ مأنستَن دأنه چأکودید و او دأرأن کی خوشأنٚ رقمٚ مأنستَن دأنه‌دأرٚ مِیوه اَوٚردید و خودا بیدِه کی خوروم ایسٚه. 13 شب دٚوأرٚسته و صُب بوبوسته. اَن، سیومی روج بو.
14 بأزون خودا بٚفرمأسته: «ایجور چیأن آسمأنٚ میأن بٚمأنٚد کی نور دٚتأوأنٚد کی روج و شبَ کس‌کسٚ جَا سیوأ بوکوند و فصلأن، روجأن و سألأنٚ نیشأن دٚئنٚ وأسی ایجور نیشأنه‌یأن بٚبد. 15 و آسمأنٚ دورون او چیأن کی نور دٚتأوأنٚده، زیمینٚ سٚر دٚتأوٚد» و هطؤ بوبوسته. 16 پٚس خودا دوتأ پیله‌دأنه چی‌یَ چأکوده کی نور دٚتأوأنِیید: اونکی پیله‌تر بو و نور دتأوأنِیی، روجٚ سٚر حوکومت کودنٚ وأسی و اویتأ کی کوجه‌دأنه‌تر بو و نور دٚتأوأنِیی، شبٚ سٚر حوکومت کودنٚ وأسی. اون هطؤیم ستأره‌یأنَ چأکوده. 17 خودا اوشأنَ آسمأنٚ میأن بٚنأ کی زیمینَ روشنَ کونٚد، 18 شب و روجٚ سٚر حوکومت بوکوند و روشنأیی و ظولومأتَ کس‌کسٚ جَا سیوأ بوکونٚد و خودا بیدِه کی خوروم ایسٚه. 19 شب دٚوأرٚسته و صُب بوبوسته. اَن، چأرومی روج بو.
20 بأزون خودا بٚفرمأسته: «آبأن زٚنده جأنورأنٚ جَا پورَ بٚد و پرنده‌یأن آسمأنٚ جؤر پروأز بوکوند.» 21 پٚس خودا دریأیی حیوأنأنَ کی پیله‌دأنه ایسٚد و جوروأجورٚ جأنورأنَ کی تکأن خورٚده و آبأنَ پورَ کونٚده و ایتأ خوشأنٚ مأنستَنَ چأکونده و هطؤیم تومأمٚ پرنده‌یأنَ کی ایتأ خوشأنٚ مأنستَنَ چأکونده، خلق بوکوده و خودا بیدِه کی خوروم ایسٚه. 22 پٚس خودا اوشأنَ برکت بٚدأ، بٚفرمأسته: «زأی بأوٚرید و فرأوأنَ بید. دریأیی حیوأنأن آبأنَ پورَ کونٚد و زیمینٚ سٚرم پرنده‌یأن فرأوأنَ بٚد.» 23 شب دٚوأرٚسته و صُب بوبوسته. اَن، پنجومی روج بو.
24 بأزون خودا بٚفرمأسته: «زیمین چأرپأیأن، کوجه‌دأنه حیوأنأن، او حیوأنأن کی خوشأنَ زیمینٚ سٚر فوسینٚده و وأشی جأنورأن و هرتأ او حیوأنأن کی ایتأ خوشأنٚ مأنستَنَ چأکونده‌یَ، بٚوجود بأوٚره.» و هطؤ بوبوسته. 25 خودا جوروأجورٚ وأشی جأنورأن، چأرپأیأن و تومأمٚ او حیوأنأنَ کی خوشأنَ زیمینٚ سٚر فوسینده، کی هرتأ جٚه اوشأن ایتأ خو مأنستَنَ چأکونه‌یَ، خلق بوکوده و خودا بیدِه کی خوروم ایسٚه.
26 بأزون خودا بٚفرمأسته: «اینسأنَ می مأنستَن و اَمی شمأیل چأکونیم، کی دریأ مأئیأن و آسمأنٚ پرنده‌یأنٚ سٚر و چأرپأیأن و تومأمٚ وأشی جأنورأن و او حیوأنأنٚ سٚر کی خوشأنَ زیمینٚ رو فوسینده حوکومت بوکونٚه.» 27 پٚس خودا اینسأنَ خو مأنستَن خلق بوکود؛ اَشأنَ خودا مأنستَن خلق بوکود؛ اَشأنَ مردأی و زنأی خلق بوکود. 28 بأزون خودا اَشأنَ برکت بٚدأ، بٚفرمأسته: «زأی دأر و فرأوأنَ بید، زیمینَ پورَ کونید، اونی رو بأش بیبید و دریأ مأئیأن و آسمأنٚ پرنده‌یأن و زیمینٚ رو تومأمٚ او حیوأنأن کی حرکت کونٚده سٚر، حوکومت بوکونید.»
29 او وخت خودا بوگفته: «زیمینٚ رو تومأمٚ او گیأیأنَ کی دأنه دأرٚده و تومأمٚ دأرأنٚ مِیوه‌یأنَ، خوردنٚ وأسی شٚمٚره فأدأم 30 و تومأمٚ سبزٚ علفأنَ بٚبخشِم تومأمٚ وأشی جأنورأن، آسمأنٚ پرنده‌یأن و او حیوأنأن کی زیمینٚ رو خوشأنَ فوسینده‌یَ، تومأمٚ او حیوأنأن کی جأن دأرٚده، ینی هر اونچی کی زٚنده ایسٚه» و هطؤ بوبوسته.
31 او وخت خودا اونچی کی خلق بوکوده بویَ فأندرسته و جٚه هر شیکل آفرینشٚ کأرَ عألی بیدِه. شب دٚوأرٚسته و صُب بوبوسته. اَن، شیشومی روج بو.
දැනට තෝරාගෙන ඇත:
پیدأیش ۱: GCB
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
The Gilaki Contemporary Bible is a Product of Transform Iran © 2024. All rights reserved. www.kelisayejame.org