लुका 23
23
पीलातुस अगळ पेहले ईसु
(मत्ती 27:1,2,11-14; मरकुस 15:1-5; युहन्ना 18:28-38)
1तत्यार आखी बसकेन माणसे उठीन उबा हय गुया; ने चे ईसु काजे राजा पीलातुस भीणी ली गुया। 2चे पीलातुस राजा अगळ ईसुन वात पर गुनु लागाड़ीन कवणे बाजी गुया: “चु हामरा माणसेक सरकारेन वीरुद मां भड़कावतेलु, ने तुहुं रोमी राजाक फाळु मां आपु कवतेलु सामळ्ळा छे, ने आपसा काजे मे मसी राजु छे, कवतेलु सामेळला छे।”
3पीलातुस ईसुक पुछ्यु, “तु यहुदी माणसेन राजा छे काय?” ईसु जपाप आप्यु, “हव, जसु तु कय र्यु मे तसुत छे।”
4तत्यार पीलातुस भगवानेन डाहला पुजाराक ने भेळा हवला माणसेक कह्यु, “मारी नींगा मां, जु माणुस रोमी सरकारेन कायदान वीरुद मां काय बी गुनु नी कर्यु।”
5बाकुन चे जुर दीन अळी-अळीन कह्या की, “जु माणुस यहुदा जीला मां आखे दुर ‘सरकारेन वीरुद मां लड़ाय करजु’ करीन माणसेक सीकाड़तु आय र्यु। असो करनु ज्य गलील जीला मां सुरु कर देदलु। ने हय चु यहुदा जीला मां ईनात काम वाटे आवलु छे।” 6ज सामळीन पीलातुस पुछ्यु, “जु माणुस गलील जीला मां रवण्यु छे काय?” 7जत्यार तीनाक मालुम पड़्यो की ईसु गलील वाळु छे, ती पीलातुस ईसुक हेरोदेस भीणी मकली देदु, जु तीनी टेमे मां यरुसलेम मां हतलु,
हेरोदेस अगळ ईसु
8हेरोदेस ईसुक देखीन बेसकु खुस हय गुयु। चु ईसुन बारामां बेसकी वात सामळी रवलु, ने बेसका कावा तीनाक देखणे बी हींडतेलु। चु ईसुन बारामां वारु-कामेन सहलाणी देखणेन हेर करतेलु। 9अतराम हेरोदेस ईसु काजे बेसका सवाल पुछतु रयु, बाकुन ईसु तीनाक काय जपाप नी आप्यु। 10भगवानेन डाहला पुजारा ने यहुदी-सास्तुर सीकाड़ने वाळा हतला। ने चे पुरो मन ने जुर लागाड़ीन ईसु पर गुनु लागाड़्या। 11तत्यार हेरोदेस ने तेरा सीपायड़ा ईसुन हासी उड़ाया ने तेरी नाव-बद्दी कर्या, ने ईसुक चमकण्या ने जामण्या पुथल्या पेहराया ने पछा पीलातुस धड़े मकली देदा। 12तीनी टेमे सी हेरोदेस ने पीलातुस साथी बण गुया। ने हेरे सी पेहेल चे दुय एक दीसरान वेरी हतला।
पीलातुस अगळ ईसुन मरनेन डंड
(मत्ती 27:15-26; मरकुस 15:6-15; युहन्ना 18:39; 19:16)
13हय पीलातुसेन चां भगवानेन मंदीरेन डाहला पुजाराक ने हक करन्याक ने दीसरा माणसेक बुलायु; ने तीनुक कह्यु, 14तुहुं ईना माणुस काजे माणसेन वीरुद मां माणसे काजे भड़कावणे वाळु समजीन मारे भीणी लावला छे, ने देखु, हय मे तुंद्रे अगळ ईनाक पारखी लेदु, ने मे जाण लेदु की, तुंद्रु हेरे पर गुनु लागाड़नु सय नी हय। 15ने राजा हेरोदेस काजे बी मालुम पड़ गुयो की ईसु गुनाळा नी हय। अतरा मां चु पछु मकली देदु। जु माणुस काय बी गलत काम नी कर्यु ने मरनेन डंड आपे असु नी हय। 16तेरेमां मे हीनाक मार खावाड़ीन छुड़ाय दीस। 17जी वात पीलातुस राजा एरेन करीन कह्यु, काहाकी पीलातुस सालो डीट पासका तीहवारेन दाहड़े, यहुदी माणसेक खुस करने करीन एक केदीक जेल मां सी छुड़ देदलु।
18पीलातुस राजा ईसुक मरनेन डंड नी आप रयु ज देखीन गड़दी मायन आखा माणसे आयड़ी देदा ने कह्या, “ईनाक मार नाखु ने बरअब्बा काजे छुड़ देवु।” 19ईना बरअब्बा काजे जेल मां कुंड देदला, काहाकी जु यरुसलेम मां सरकारेन वीरुद मां दीसरा माणसे साते आपसा साती भेळ लड़ाय करलु। चु थुड़ाक माणसेक मारी बी नाखलु।
20पीलातुस राजा ईसु काजे छुड़ने हींडतेलु, अतरा मां एक कावा अळी तीनी गड़दी मायन माणसे काजे समजाड़्यु। 21बाकुन गड़दी मायन माणसे पछा आयड़ीन कह्या, “ईनाक कुरुस पर चड़ावु! ईनाक कुरुस पर चड़ावु!”
22पीलातुस तीसरी कावा तीनु गड़दी मायन माणसेक कह्यु, “काहा? जु माणुस काय गुनु करलु छे? मेसेक हेरे मां मरनेन डंड आपे असु काय बी गुनु नी देखायतु। मे ईनाक सपाटा देवाड़ीन छुड़ाय दीस।”
23बाकुन चे आयड़ी-आयड़ीन ईसु पछळ पड़ गुया की ईसुक कुरुस पर चड़ावु। ने तींद्रो आयड़नेन काम पुरो हयो। 24अळतेन पीलातुस राजा, बरअब्बा काजे छुड़नेन ने ईसुक मरनेन डंड आपणे करीन तीयार हय गुयु। 25पीलातुस राजा तीना माणुस काजे, जु दीसरा माणसे पुठ्ये लड़ाय करतेलु, ने माणसेन खुन करतेलु। करीन जेल मां कुंडाड़ देदलु। चु तीनाक छुड़ देदु ने तीनाक कह्यु, “तुहुंक जसा करने लागे तसा करु, ज कय्न ईसुक गड़दीन ने सीपायड़ान हातेम आप देदु।”
ईसुक कुरुस पर चड़ावणे ली जाय
(मत्ती 27:32-44; मरकुस 15:21-32; युहन्ना 19:17-27)
26जत्यार चे सीपायड़ा ईसुक कुरुस पर मारने करीन गांव सी ठुक्ता लाया। तत्यार तीनुक वाटे कुरेन देस मां रवण्यु सीमोन नावेन एक माणुस भेळु हयु। चु तीने टेमे गांव मां सी सहरेम आवणे बाजी रवलु। चे सीपायड़ा तीनाक जबरान धर पाड़्या ने तीनाक कुरुस हाकलाड़ीन ईसु पछळ-पछळ चालाड़्या।
27चां माणसेन बेसकु मटु टुळु ईसु पछळ चालने बाजी रवलु। तेरे मां थुड़ाक बायरा बी हतला जे छाती ठुकी-ठुकीन ईसु वाटे कलपी रवली। 28ईसु तींद्रे भीणी देख्यु ने तीनुक कह्यु, “यरुसलेम मां रवण्या पुर्या मारे वाटे मां रड़ु। बाकुन आपणे वाटे ने आपणा पुर्या-पारी वाटे रड़ु।” 29काहाकी चे दाहड़ा आवणे बाजी र्या जत्यार माणसे कवसे वारु छे चे बायरा, जे आंझ्या छे; ने तींद्रा पुर्या नी हया, ने जे रातेड़ला पुर्याक पाळ्या पुस्या नी। 30तीनी टेमे माणसे बयड़ाक कवसे, हामरे पर हीट पड़। ने बयड़ायाक कवसे हामुक ढाक लेवु। 31काहाकी जु काय बी गुनु नी कर्यु, तेरे साते माणसे असु एहवार कर रया, ती छाचली तींद्रे साते आवणे वाळा दाहड़ाम, तेरे सी बी जादा भुंडु एहवार हवसे, जे छाचलीन गुनु करला छे।
32चे सीपायड़ा ईसु भेळा दीसरा दुय गुनेगार्याक बी कुरुस पर मार नाखणे करीन पठ्ये-पठ्ये ली गुया। 33तीना जागाक मुणकान टुबरो कवे, तीनी जागाम चे आया, चे ईसु काजे चां कुरुस पर चड़ावीन हाते पायेम खीळा ठुक्या। चे दुय गुनेगार्याक बी कुरुस पर चड़ावीन हाते पायेम खीळा सी ठुक्या। एक काजे ईसुन डाखर्ये आंग्ये ने दीसराक जेवड़्ये आंग्ये। 34तत्यार ईसु बास भगवान सी लीलघाय्न कह्यु, “ए बास ईनुक माफी आप दे! काहाकी जे नी जाणता, की जे काय कर र्या।”
ने अळतेन चे सीपायड़ा चिट्ठी नाखीन ईसुन पुथल्या वाट लेदा।#1 पतरस 3:9; यसाया 53:12; भजन सहीता 22:18 35चां बेसका माणसे उबा रय्न देखणे बाजी रवला, ती यहुदी मुख्या ईसुन हासी उडाड़ता जाय्न कह्या, “हयु दीसराक बेसकु बचाड़्यु। कदी जु छाचलीन भगवानेन साहरे नेवाड़लु मसी हय ती आपसा काजे बचाड़ लेणु चाहजे।”#भजन सहीता 22:7
36सीपायड़ा बी तेरी हासी उड़ाया। चे ईसु भीणी आया ने तीनाक अंगुरेन कड़वलु रस आप्या, 37“ने कह्या कदी तु छाचलीन यहुदीन राजु हय, ती आपसा काजे बचाड़ ले।”
38ईसुन मुणका सी उपर कुरुस पर गुनान एक लाकड़ान पट्टी ठुकीन टांगली हतली, “तेरेमां असो लिखलो हतलो जु ते यहुदी माणसेन राजु छे।”
ईसु साते कुरुस पर चहड़ावलु डाकु भगवान भीणी मन फेरवे
39ईसु साते कुरुस पर टांगायला गुनेगार्या मायन एक ईसुन नाव-बद्दी करतु जाय्न पुछ्यु “तु भगवानेन नेवाड़लु छुड़ावणे वाळु नी हय काय? हय ती आपसाक ने हामुक बचाड़ ले।”
40बाकुन दीसरु गुनेगार्यु झीचकारीन कह्यु, तुसेक भगवान सी ईतरोक बी बीहाणो नी लागतो काय? तु बी ते हयुत नीयावेन डंड भुकतणे बाजी रयु। 41तु ने मे ते डंड आपे असात छे, जो आपणु कर्या तेरो फळ आपणुक जड़ रयो; बाकुन जु माणुस काय बी गुनु नी कर्यु, “ने गुना पाखुर नीयावेन डंड झेल र्यु।” 42अळी चु ईसुक कह्यु, ए मालीक ईसु! जत्यार तु राजु बणीन राज करे, “ती मारी हेर राख्जी।”
43ईसु तीनाक पछु कह्यु, “मे तुसेक छाचलीन कवो की, तु आजुत मारे पुठ्ये सरगे मां रवसी।”
ईसुन कुरुस पर मरनु
(मत्ती 27:45-56; मरकुस 15:33-41; युहन्ना 19:28-30)
44तीनी टेमे दाहड़ान बारे बज रवली हसे, ने तत्यारुत तीन बजे लग आखी ईलाका मां आंदारो खुय हय रह्लो। 45ने दाहड़ान वीजाळो बी जाती रवलो, तत्यार भगवानेन मंदीर मां चु पड़दु फाटीन दुय टुकड़ा हय गुयु।#आमोस 8:9; ईब्रानी 10:19 46तत्यार ईसु जुर सी आयड़ीन कह्यु, “ए बास! हय मे मारु जीव तारा हातेम आप दम।” ज कय्न ईसुन जीव नीकळ्यु गुयु।
47रोमी सरकारेन सीपायड़ान एक डाहलु ज हयो च आखो देखीन भगवानेन बड़ाय करतु जाय्न कह्यु, “खरान, जु ते एक धरमी हतलु।”
48जत्यार चां उबा हय रवला माणसे ज हयो च देख्या, ती चे फीकुर मां पड़ीन लाजवाय गुया, ने आपसी छाती ठुक्ता-ठुक्ता पछा सहरेम जाती र्या। 49गलील जीलाम रवण्या ईसुन बेसका दुस्तीदार्या, तींद्रा बायरा बी हतला, ईसु पछळ-पछळ गलील सी आवला, चे बी छेटे उबा रय्न ज हयो च आखो देख रवला।#भजन सहीता 38:11; 88:8
ईसु काजे वगे करने जाणु
(मत्ती 27:57-61; मरकुस 15:42-47; युहन्ना 19:38-42)
50ने देखु युसुफ नावेन एक माणुस हतलु। चु एक वारलु माणुस हतलु, ने यहुदी धरमेन कायदाक पाळने मां ईमानदार हतलु, चु यहुदी धरमेन खास पंचुन मेहमर हतलु। 51ने तेबी चु ईसुक डंड आप्या करीन राजी नी हतलु, चु यहुदा जीलान अरीमतीया सहर वाळु हतलु, चु बी तीना दाहड़ान वाट देख रवलु, चु तीनु दाहड़ाम भगवान राजु बणीन राज करसे। 52चु राजा पीलातुस धड़े गुयु ने ईसुन लास मांग्यु। 53ती अळी चु कुरुस पर सी ईसुन लास उतार्यु, ने तीनी लासेक एक चमकण्या चादरा सी एळटी देदु, ने एक मसाण मां मेल देदु। चु मसाण वारलु चापर्या मां खुदीन बणावलो हतलो। तेरे पेहल तीनी मसाण मां कुय काजे बी नी गाड़्या। 54चु तीयारीन दाहड़ु हतलु, ने यहुदीन आरामेन दाहड़ु सुरु हवणे वाळु हतलु।
55ईसु पुठ्ये गलील सहर मां सी आवला बायरा युसुफ पुठ्ये-पुठ्ये मसाण भीणी गुया ने देख्या। ने चे ज देख्या की ईसुन धड़ कसो करीन मसाण मां मेक रया। 56अळी चे घर गुया ने लास पर लागाड़ने करीन मसालु ने वारु ईत्तर तीयार कर्या।
बाकुन आरामेन दाहड़े, जसों धरमेन कायदान अनसारे तीनुक आराम करनु हतलो, करीन चे आराम कर्या।#नीरगमन 20:10; वेवस्थावीवरन 5:14
දැනට තෝරාගෙන ඇත:
लुका 23: NTBSP23
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.