लुका 18
18
नीयाव करन्यु ने रांडायली बायरीन दाखलु
1दाहड़ीन अळी-अळीन दुवा करनु चाहजे, ने हिम्मत नी छुड़नु चाहजे, ज सीकाड़ने करीन, ईसु हेरा चेलाक एक दाखलु सामळायु। 2“काहनाक सहर मां एक नीयाव करन्यु हतलु, चु, नी ते भगवान सी बीहतेलु, ने नी ते कुय माणसेन परवाय करतेलु। 3तीनात सहर मां एक रांडायली बायर बी हतली। ची तीना नीयाव करने वाळान चां आवीन असी कह्या करतेली, ‘नीयाव करीन मेसेक गुनु लागाड़न्या सी बचाड़ ने मेसेक नीयाव आपाड़!’ 4चु बेसका दाहड़ा लग नीकारु करतु रयु, अळतेन चु आपसा मनेम कह्यु, मे नी ते भगवानेक बीहयो ने नी काहनाकेन परवाय करो, 5बाकुन जी रांडायली बायर अळी-अळीन आवे, ने मेसेक परेसान करे, हेरेसी मे हेरु नीयाव करीस, तत्यार हयी, पछी अळी-अळीन नी आवे!”
6मालीक ईसु अळी असु कह्यु, “सामळ्या की जु नी-धरमी नीयाव करन्यु काय कह्यु? 7तेरेमां भगवान आपसा नेवाड़ला माणसे धड़े नीयाव करने मां वार लागाड़से काय? जे रात दाहड़ु आयड़ी-आयड़ीन तेरे धड़े दुवा कर्या करे? 8मे तुहुंक कह्वो; चु उतवाळुस तींद्रे वाटे नीयाव करसे। तेबी जत्यार माणसेन पुर्यु आवसे, ती चु धरती पर माणसे मां भुरसु कर रवलु देखसे काय?”
फरीसी माणसे ने फाळु उकाळन्या माणसेन दाखलु
9ने ईसु तीनुक बी कह्यु, जे माणसे आपसा पर भुरसु करतेला की हामु बेसका धरमी छे, ने हय हामरेन तसा कुय धरमी माणसे नी हय। करीन चे दीसराक काय नी समजतेला। तीनु माणसेक ईसु जु दाखलु सामळायु। 10दुय माणसे वीन्ती करने करीन यरुसलेम मंदीर मां गुया। तींद्रे मायन एक जणु फरीसी माणुस हतलु, ने दीसरु फाळु उकाळन्यु हतलु। 11जु फरीसी माणुस एक धड़े उबु हय्न आपसा मन मां असी दुवा करने बाजी गुयु, ए भगवान, मे तुसेक बेसकु वारु कह्वो, काहाकी मे दीसरान तसु दीसरा धड़े हापकीन खाण्यु, ने लुच्चु ने दीसरान बायर साते छीनाळो करन्यु नी हय। दीसरा माणसे असा छे; बाकुन मे नी हय। ने ईना फाळु लेणे वाळान तसु बी नी हय। 12मे हाप्ता मां दुय कावा उपास करो, ने ज काय बी मे कमायो, तेरु दसवु वाटु तुसेक आपु। 13बाकुन फाळु लेणे वाळु छेटेत उबु हय रयु, ने सरगे भीणी देख्यु लग नी, बाकुन चु दुख मां आपसी छाती ठुकी-ठुकीन कह्यु, “ए भगवान, मे पापी छे। तु मार पर दया कर।”#भजन सहीता 51:1 14ईसु असु कय्न दाखलु सार देदु, “मे तुहुंक जो कह्वो, की भगवान फरीसी माणसेन दुवा सामळी लेदु, ने तेरे पर गीण-दया करीन धरमी बणायु। ने चु हीनी रीते आपसान घर पछु गुयु जु कुय खुद काजे मटु समजे, भगवान तीनाक नानु कर देसे। बाकुन जु कुय खुद काजे नानु समजे तीनाक मटु कर देसे।”
ईसु पुर्या-पारी काजे बरकत आपे
(मत्ती 19:13-15; मरकुस 10:13-16)
15एक दाहड़ु माणसे नानला पुर्या पर ईसुन हात मेकाड़ने करीन ईसुन्चां लाया। चेला ज आखो देखीन माणसेक झीचकार्या। 16बाकुन ईसु पुर्या काजे आपसे धड़े बुलायु ने चेला काजे कह्यु, “ईनु नानला पुर्या काजे मारेन्चां आवणे देवु, हीनुक मां रुकु; काहाकी भगवानेन राज हीनु पुर्यान तसलु छे। 17मे तुहुंक छाचलीन कव की जु कुय ईनु नानला-पुर्यान तसा भगवानेन राज नी हुकारे, चु भगवानेन राज मां कदी नी भराय सके।”
लकपती माणुस ईसुन्चां आय्न अमर जीवाय्न वात पुछे
(मत्ती 19:16-30; मरकुस 10:17-34)
18ने यहुदी माणसेन एक मुख्यु ईसु काजे ज पुछ्यु, “ए वारला मास्तर! अमर जीवन हात करने करीन मेसेक काय करनु पड़से?”
19ईसु तीना मुख्या काजे कह्यु, “तु मेसेक वारलु काहा कवे?” कुय वारलु नी हय। बाकुन भगवान अतरुत वारलु छे। 20तु कायदान हुकुम काजे ते जाणतु हसे, की छीनाळु नी करनु, खुन नी करनु, चुरी नी करनु, झुटी गवाय नी देणु, आपणा माय-बासेन ईज्जत करनु।
21चु यहुदी मुख्यु जपाप आप्यु, “ईनु आखा नेमेन पाळण ते मे बी पुर्या बुदीम सीत करतु आय रयु।”
22जो सामळीन ईसु तीनाक कह्यु की, “हय तारेम एक वातेन कसर छे। आपणो जो काय छे च आखो वेचीन गरीब माणसे काजे वाट दे, ने तुसेक सरगे मां धन जड़से। ने तु आवीन मारे पुठ्ये चाल पड़।” 23चु मुख्यु ज सामळीन बेसकु नराज हय गुयु, काहाकी चु बेसकु लकपती हतलु।
24ईसु ज देखीन मुख्या काजे कह्यु, लकपती माणसे काजे भगवानेन राज मां भरायणु बेसको काठो छे। 25सुईन नाचका मायन उटड़ाक नीकाळनु सरल छे, बाकुन लकपती माणसेक भगवानेन राज मां भरायणु बेसको काठो छे।
26बाकुन अतरा मां सामळने वाळा दीसरा माणसे कह्या, “असी वात छे, ती कुणीन छुटकारु हवसे?” 27ती ईसु कह्यु, “हय माणसे सी नी हय सके च भगवान सी हय सके।”
28ती पतरस ईसु काजे कह्यु, “देख, हामु हामरा आखा घर बार काजे बी छुड़ीन तार पछळ चालने बाजी गुयला छे।”
29ईसु तीनुक कह्यु, “मे तुहुंक छाचलीन कव की असु कुय बी नी हय, चु भगवानेन राज वाटे घर-बार ने आपसी घरवाळी, भाय-बहणस्या, आयस-बास ने पुर्या काजे छुड़ देदु हय।” 30ने तीनाक जां ईनी टेम मां काय नी जड़यो हय; तीनाक जां बी बेसको जड़से ने सरगे मां बी तीनाक अमर जीवाय जड़से।
ईसु तीसरी कावा हेरो मरनेन बारामां कवे
(मत्ती 20:17-19; मरकुस 10:32-34)
31एक दाहड़ु ईसु बाहरा काजे दीसरा सी छेटेस ली गुयु ने तीनुक कह्यु, “सामळु, आपणु यरुसलेम जाणे बाजी रया। यरुसलेम एक असी जागा छे। आखा मारा बारामां, हय माणसेन पुर्यान बारामां भगवानेन अघी सी आवणे वाळी वात बताड़ने वाळा माणसेन साहरे लिखली आखी वात पुरी हवसे। 32मे यहुदी जातीन माणुस बणीन आयु, बाकुन मे तीनु माणसेन हातेम आपाय जायस, जे यहुदी नी हय। चे मारी हासी उड़ावसे, मेसेक वेला पाड़ीन मारी नाव-बद्दी करसे, ने तेरे पर थुप्से। 33ने चे तीनुक सपाटा दीन ठुकसे, ने तीनुक घायल करीन मार नाख्से। बाकुन चु तीसरे दाहड़े पछु जीवतु हय जासे।”
34बाकुन ईसुन चेला ईनी वात काजे काय बी नी समज्या। ईनु बुलेन मतलब तींद्रे वाटे ढाकायलो रयो। तीनुक नी समज मां आयो की ईसु तीनुक काय कवणे बाजी रवलु।
ईसु आंदळा माणुस काजे वारु करे
(मत्ती 20:29-34; मरकुस 10:46-52)
35जत्यार ईसु यरीहो सहर धड़े आवणे बाजी रवलु, ती एक आंधळु सयड़क धड़े बसीन चां मायन आवणे-जाणे वाळा धड़े भीक मांगणे बाजी रवलु। 36माणसेन टुळा काजे जातला ने पायेन चाल सामळीन चु आंधळु माणसेक पुछणे बाजी गुयु, च आखो काय हवणे बाजी रयो।
37माणसे तीना आंदळा काजे बताड़ देदा की, “ईसु नासरी जां मायन जाणे बाजी रयु।”
38तत्यार आंधळु जु कवतु जाय्न जुर सी आयड़्यु, “ए ईसु! दावुदेन अवल्यात! मारे पर दया कर।”
39चे तीना आंदळा अगळ-अगळ जाणे बाजी रवला, चे तीना आंदळा काजे हुगु रय जां करीन झीचकारतेला, बाकुन चु आंधळु अळी बी जुर सी असु आयड़तेलु, “ए दावुदेन अवल्यात मारे पर दया कर।”
40तत्यार ईसु उबु रय्न माणसेक हुकुम आप्यु की हीनाक मारे धड़े ली आवु ने जत्यार चु धड़े आयु ती ईसु तीनाक पुछ्यु। 41“तुसेक काय चाहजे? की मे तारे वाटे करो?”
चु आंधळु कह्यु, “ए मालीक मे अळी देखणे हींडो।”
42ईसु तीनाक कह्यु, “ती तु देखणे लाग, ने जां, तारु भुरसु वारु कर देदलु छे।”
43तत्यारुत चु देखणे लाग गुय। ने चु भगवानेन गुण गावतु जाय्न ईसु पछळ चाल देदु। ने ज देखीन आखा माणसे भगवानेन गुण गाया।
දැනට තෝරාගෙන ඇත:
लुका 18: NTBSP23
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.