लुका 16
16
ईसु पयस्यान हीसाब राखण्यान दाखलान साहरे सीकाड़े
1ईसु हेरा चेला सी बी कह्यु, “काहनाक अमीर अदमीन एक पयस्यान हीसाब राखण्यु पावर्यु हतलु। माणसे तीना अमीर माणसेन्चां जाय्न तीना पयस्यान हीसाब राखण्या पावर्या पर जु गुनु लागाड़्या की जु पावर तारो धन उजाड़ने बाजी र्यु।” 2अतराम चु अमीर माणुस तीना पयस्यान हीसाब राखण्या पावर्या काजे बुलायन कह्यु, ज मे तारा बारामां काय सामळने बाजी रयु। तारा पयस्यान हीसाब-किताप देखाड़, काहाकी तु हय सी पयस्यान हीसाब करनेन पावराय सी छेटे हय जां। 3ती चु पयस्यान हीसाब-किताप करन्यु मने-मन ज वीच्यारतु जाय्न कह्यु, मे हय काय करो? मारु मालीक मेसेक ईनी पावराय सी छेटु करने बाजी रयु। ती हय काय करो, काहाकी धुळु खुदणेन ताकत ते मारेम नी हय; ने माणसे धड़े पयस्या ने दाणा मांगणे मां मेसेक सरम आवे। 4जत्यार मे पयस्यान हीसाबेन पावराय सी छेटे हय जायस, ती माणसे मेसेक आपसे घर मारु आव-भाव करीन आसरु देणु चाहजे। करीन मेसेक काय करनु चाहजे, हव हय, मेसेक समज मां आयो की मेसेक काय करनु चाहजे, 5असु वीच्यार करीन चु आपसा मालीकेन करजा वाळा माणसेक एक-एक करीन बुलायु। ने पेहला माणसे काजे पुछ्यु, तारे पर मारा मालीकेन कतरु करजु छे। 6चु करजा वाळु माणुस कह्यु, सोव मण तेल। तत्यार पयस्यान हीसाब करन्यु पावर्यु कह्यु, तारा खातान चापड़ु हातेम ले, ने बसीन उतवाळुस पचास मण लिख दे। 7अळी चु दीसराक पुछ्यु, तारे पर मारा मालीकेन कतरु करजु छे? चु करजा वाळु माणुस कह्यु, सोव कुंटल गहुं। तत्यार पयस्यान हीसाब करन्यु पावर्यु कह्यु, तारा खातान चापड़ु हातेम लीन, ने बसीन उतवाळुस आस्सी कुंटल लिख दे। 8मालीक तीना पापी पयस्यान हीसाब करन्या पावर्या काजे बेसकु वारु कह्यु काहाकी चु बेसकु चतराये काम कर्यु; काहाकी ईनी कळीन माणसेन अवल्यात आपसा लेण-देण मां वीजाळान अवल्यात सी वदु हुस्यार छे।
9तेरेमां मे तुहुंक कह्वो ईनी कळीन धन साहरे आपसा वाटे दुस्तीदार्या बणाय लेवु, तेरेसी पापेन धन सर जासे, ती चे आवणेवाळी जलमेन रहणेन जागे तुंद्रो आव-भाव करसे। 10“जु नानली सी बी नानली वातेम ईमान राखे, चु मट्ली वातेम बी ईमानदार छे, ने जु नानली सी बी नानली वातेम लुच्चु छे, चु मट्ली वातेम बी लुच्चु छे। 11कदी तुहुं ईनी कळीन धन मां बी भुरसा लायक नी बण्या, ती तुंद्रे पर भुरसु करीन, तुहुंक छाचलो धन कुण आपसे? 12ने कदी तुहुं पराया धन-दोवलत मां ईमान नी राख्या, ती तुहुंक, तुंद्रोत धन दोवलत कुण आपसे?
13“कुय बी पावर्या दुय मालीकेन चाकरी नी कराये; काहाकी चु एक मालीक सी कुहराय ने दीसरा मालीक सी परम सी रवे। नीते एक मालीक साते हेळी-मेळीन रवसे ने दीसरा मालीक काजे भुंडोत जाणसे। तुहुंक भगवानेन ने धन-दोवलतेन दुयुन चाकरी नी कराये।”
फरीसी माणसेन हाय
(मत्ती 11:12,13; 5:31,32; मरकुस 10:11,12)
14फरीसी माणसे, पयस्यान हायाळ्ळा हतला, अळी चे जी वात सामळीन माणसे अगळ ईसुन हासी उडाड़तेला। 15ईसु तीनु फरीसी माणसे काजे कह्यु, “तुहुं माणसे अगळ ते धरमी हवणेन ढंग करु बाकुन भगवान ते तुंद्रा हीया मन काजे जाणे।” काहाकी जी वात माणसेन नींगा मां बेसकी वारु छे, ची वात भगवानेन नींगा मां भुंडीत आवे असी छे।
16“भगवानेन कायदान सास्तुर ने भगवानेन अघली वात बताड़ने वाळा युहन्नान टेम लग हतला, पेहले सीत भगवानेन राज मां भरायणे करीन खुस-खबरेन नेवतो आखाक बेसको जड़ रह्यो। ने माणसे ईना राजेन बेसका उतवाळास भरायणे बाजी रया।” 17“सरग ने धरती टळनु ते नक्खी छे, बाकुन नेम कायदान एक बी आकड़ान नानोस टीपको पुरो हये पाखुर नी टळे।”
18ईसु अगु कवतु गुयु, “जु कुय आपसी घरवाळीक छुड़ीन, काहनीक दीसरी बायरी साते ईयाव करे, चु छीनाळो करे; ने जु कुय तीनी छुल्ली बायरी साते ईयाव करे, चु बी छीनाळो करे।”
अमीर माणसेन ने गरीब लाजरेन दाखलु
19ईसु एक दाखलु अळी कह्यु “एक बेसकु लकपती माणुस हतलु, चु बेसका महंगा जामण्या पुथल्या ने चमकण्या पुथल्या पेहरतेलु, ने दाहड़ीन वारु सुक मां रवीन मजा करतेलु। 20तीना लकपतीन बारना पर लाजर नावेन एक गरीब माणुस पड़ रवलु, तेरे आखे डील मां फुड़ा नीकळी रवला। तीनाक चे काहनाक चां नाख दीन जात रह्लो 21ने चु गरीब माणुस, आपसो पेट भरने करीन, लकपती माणसेन इस्टाळो खाणेन हेर करतेलु; बाकुन च बी तीनाक नी जड़तेलो, ने कुतरा लग आवीन तेरा डील पर फुड़ा काजे चाटतेला। 22ने अळी एक दाहड़ु चु गरीब लाजर मर गुयु, ने सरग वाळा काहवाळ्या तीना लाजरेन जीव काजे सरगेम लीजाय्न अब्राहमेन खुळाम बठाड़ देदा। ने अळी एक दाहड़ु चु अमीर माणुस बी मर गुयु, ने तीनाक गाड़ी देदा। 23ने चु नरक मां बेसकु वेला करतु जाय्न उपर देख्यु, बेसके लांबे रय्न अब्राहमेन खुळा मां लाजर काजे देख्यु 24चु अमीर माणुस आयड़ीन कह्यु, ‘बास अब्राहम! मारे पर दया कर, ने लाजर काजे मारेन्चां मकली दे, हेरेन करीन चु आपसी आंगळीन छेंडु पाणी मां भीजवीन मारी जीप काजे सेळवी देय, काहाकी मे ईनी आंच मां बेसकु वेला कर र्यु!’ 25अब्राहम तीना लकपती माणुस काजे कह्यु, बेटा, तु धरती पर वारु जीवन काजे हेर कर की तुसेक धरती पर वारु जीवाय मां सुकुन-सुक जड़लु, ने लाजर काजे दुखुत-दुख जड़लो; हय हीनाक जां सुक ने सांती जड़ रय, ने तीनेत हीसाबे तुसेक वेला करनु पड़ रयो। 26ने ईनी वातेक छुड़ीन जी वात बी छे की हामरे ने तारे ईचमां एक बेसकी मटी खुय छे; अतराम कदी कुय तारेन चां जाणे बी हींडे, तेबी चु नी जाय सके; ने कदी कुय हया सी ईनी धड़े आवणे बी हींडे, तेबी हया सी तीनाक ईनी धड़े नी आवाये। 27चु लकपती माणुस अब्राहम काजे कह्यु, ए अब्राहम बास! मे तारे धड़े वीन्ती करो की तु लाजर काजे मारा बासेन घर मकली दे। 28काहाकी मारा पांच भायस छे, ने लाजर मार घर जाय्न जां आखो जो हयो तीनी वातेन गवा देसे, ने तीनुक जी वाते कहीन चेताय देसे। नी ते कांखुर मायन तींद्रे धड़े बी असोत असो ने चे बी ईना वेळान जागा मां आवती रवे। 29अब्राहम तीना लकपती माणुस काजे कह्यु, मुसान ने भगवानेन अघी सी आवणे वाळी वात बताड़ने वाळान किताप तींद्रे धड़े छे, तीनुक तींद्री सामळनु चाहजे। 30चु लकपती माणुस अब्राहम काजे कह्यु, ‘ए बास अब्राहम; चे तींद्री वात काजे सामळे; बाकुन कदी मरला माणसे मायन कुय तींद्रेन्चां जाय, ती चे पापे भीणी सी मन फेरवीन भगवान भीणी आवसे।’ 31बाकुन अब्राहम तीना लकपती माणसेक कह्यु, जत्यार चे मुसान ने भगवानेन अघी सी आवणे वाळी वात बताड़ने वाळान लिखली वात नी सामळता, ती कदी मरला मायन कुय बी जीवतु हय्न तींद्रेन चां जाय्न कवसे तेबी चे तेरी नी माने।”
දැනට තෝරාගෙන ඇත:
लुका 16: NTBSP23
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.