लुका 10
10
सत्तर ने दुय चेला काजे बणायन मकलनु
1हेरे पछळ मालीक सत्तर चेला काजे नेवाड़्यु, जीनु-जीनु सहरेम ने गांव मां चु आपसु जाणे वाळु हतलु, चां दुय-दुय जणा काजे आपसा अगळ मकली देदु। 2ने चु तीनुक कह्यु, “मेर ते बेसकी छे, बाकुन दाहड़क्या थुड़ाक छे; अळी खेतेन मालीक भगवान धड़े असी वीन्ती कर्यु, तु आपसी मेर काटणे करीन दाहड़क्या काजे मकली दे।” 3मे तुहुंक लेंड्यान ईचमां गाडरान तसु मकलो। 4अळी तुंद्रे मायन कुय बी बटवु, ने थयलि, ने खासड़ा घुण ली जावु ने वाटे मां कुयबी वारु छे की करीन घुण कह्वु।#2 राजा 4:29 5तीना बी घर मां भरायसु, ती आखान पेहले ज कह्जु, ईना घर मां सुक-सांती आवणु चाहजे। 6कदी चां कुय काजे सुक-सांती चाहती हय, ती तीना पर तुंद्री सुक सांती रवसे, नी ते ची सुक-सांती तुंद्रे धड़े पछी आवती रवसे। 7तीनात घर मां बठी रवजु ने तेरे धड़े जो हय, चो खाजु-पीजु; काहाकी दाहड़क्या काजे दाहड़कीन हक छे। ईने घर ने पले घर घुण जावु। 8तीना सहरेम जासु ने जे माणसे तुंद्रो आव-भाव करसे ने जो काय तुहुंक खाणे आपसे, चो खाय लेजु। 9चां वाळा मांदला माणसेक वारु करजु, ने तीनुक कवजु, भगवानेन राज तुंद्रे धड़े आय लागलो छे। 10बाकुन कदी तुहुं काहना सहरेम जावु ने माणसे तुंद्रो आव-भाव नी करे, ती तींद्रा हाटेम जाय्न असा कह्जु, 11हामरा पायेम लागलु तुंद्रा सहरेन धुळु लग हामु तुंद्रे अगळ झाटकी देजे। तेबी तुहुं ज जाण लेजु की भगवानेन राज तुंद्रे धड़े आय लागलो छे। 12मे तुहुंक ज कहो, नीयावेन दाहड़े सदोम सहरेन माणसे सी तीना सहरेन माणसेक जादा डंड जड़से।#उबजाणनी किताप 19:24,25
नी भुरसु करे च सहर नास हवसे
(मत्ती 11:20-24)
13ए खुराजीन सहरेन माणसे! तुंद्रे पर सराप पड़े! ए बेतसेदा सहरेन माणसे! तुंद्रे पर सराप पड़े! जे चकराये असा बेसका वारु काम तुंद्रेम हवलो छे, कदी च काम सुर सहरेम ने सेदा सहरेम रवण्या माणसेन ईचमां हवतो, ती चे काय कत्यारुन गंटाट्या पांगरीन ने आपसा डीले पर रखड़ु चुपड़ीन आपसा पाप भीणी सी मन फेरवीन भगवान भीणी हय जाता। 14बाकुन नीयावेन दाहड़े सुर सहरेन ने सेदा सहरेन कुहर्या माणसे सी तुहुंक अदुस डंड जड़से।#योएल 3:4-8; जकर्याह 9:2-4 15ने ए कफरनहुम सहरेन माणसे! सरगे लग उचा हाकलाय जासु काय? नी, बाकुन तुहुं पाताळेम लग नेचा धकलाय जासु?#यसाया 14:13-15 16“जे तुंद्री सामळीन माने, चे मारी सामळीन माने, ने जे तुंद्रु नीकारु करीन तुहुंक नेचा समजे, चे मारु नीकारु करीन मेसेक नेचा समजे। ने जे मारु नीकारु करीन मेसेक नेचा समजे, चे तीना सरग वाळा बास भगवानेन नीकारु करीन तीनाक नेचु समजे, जु मेसेक मकेलु छे।”
सत्तर ने दुय चेला ईसु भीणी पछा आवे
17सत्तर ने दुय चेला खुस हय्न पछा आया ने असा कह्या, “ए मालीक! तार नाव सी भुतड़ान आत्मा लग हामरा हुकुम काजे मानीन हामरा हक मां हय जाय।”
18ईसु तीनुक असु कह्यु, मे, भुतड़ा काजे वीजळीन तसु सरगे सी नेचु पड़तेलु देख रवलु। 19सामळु! मे तुहुंक घड़सा काजे ने ईछा काजे पाये तळे कुचरनेन हक आपलु छे, ने मे तुहुंक वेरी भुतड़ान आखा जुर पर बी हक आपलु छे। ने काहने बी भात्ये तुंद्रो नुकसाण नी हवे।#भजन सहीता 91:13 20बाकुन तेबी भुतड़ान आत्मा तुंद्रु हुकुम मानीन तुंद्रा हक मां छे, करीन तुहुं खुस घुण हवजु, बाकुन भगवान तुंद्रु नाव सरगेम लिख र्यु, करीन खुस हवजु।
ईसु खुस हवे
(मत्ती 11:25-27; 13:16,17)
21तीनेत टेमे चुखली-आत्मान साहरे ईसु बेसकु खुस हय गुयु, ने कह्यु, “ए बास! सरग ने धरतीन मालीक! मे तारा नावेन गुण गावो, काहाकी तु ईनी आखी वात काजे अक्कल वाळान ने हुनर वाळा सी सातीन मेल रयु, ने डेड़-अकल्या पुर्या अगळ उजेंती कर्यु। हव, ए बास! तुसेक ज वारु लागे।
22“मारु भगवान बास मेसे आखो काय आप देदलु छे। बाकुन भगवान बासेक छुड़ीन ज कुय बी नी जाणे की पुर्यु कुण छे, ने पुर्या काजे छुड़ीन कुय बी नी जाणे की भगवान बास कुण छे। बाकुन चे माणसे अतरात जाणसे तीनुक पुर्यु जी वात उजेंतु कर देसे।”
23तत्यार ईसु चेला भीणी पछु फीरीन कळ्येन तीनुक कह्यु, की तुंद्रेन तसा ईनी वात काजे देखणेवाळा बरकतवाळा छे। 24काहाकी मे तुहुं काजे कहो की, जी वात तुहुं देख्या ने सामळ्या चे बेसका खरा भगवानेन अघी सी आवणे वाळी वात बताड़ने वाळा ने राजा देखणे ने सामळने हींडतेला बाकुन चे नी देख्या ने नी सामळ्या।
वारलु सामरीन दाखलु
25ने एक दाहड़ु यहुदी सास्तुर सीकाड़न्यु ईसु धड़े आयु, ने ईसुक पारखणे करीन चु ज पुछ्यु, “ए मास्तर! अमर जीवाय हात करने करीन मे काय करो?” 26ईसु तीनाक जपाप आप्यु, मुसान चुखला सास्तुर मां काय लिखलो छे, तु काय भन्यु ने समजु।
27यहुदी-सास्तुर सीकाड़न्यु जपाप आप्यु, “की तु आपणा मालीक भगवान काजे आपणो आखो लागाड़ीन, ने आपणो आखो जीव, लागाड़ीन, ने आपसु आखु जुर लागाड़ीन, ने आपसी आखी अक्कल लागाड़ीन परम कर। ने तार साते वाळा सी आपणेन तसु परम कर।”#वेवस्थावीवरन 6:5; 10:12; यहोसु 22:5
28ईसु तीनाक असु कह्यु, “तु वारु जपाप आप्यु, चत कर, ती तुसेक अमर जीवाय जड़से।”#लेवयवेवस्था 18:5
29बाकुन चु यहुदी-सास्तुर सीकाड़ने वाळु आपसाक धरमी कह्वाड़नेन हेर करीन ईसुक दीसरु सवाल पुछ्यु, “मार धड़े वाळु कुण छे?” 30ईसु तेरा सवालेन जपाप मां तीनाक जी काहनी सामळायु, “एक दाहड़ु एक माणुस यरुसलेम सी यरीहो सहर भीणी जाणे बाजी रवलु। वाट्ये डाकु तेरे धड़े सी पेहरला पुथल्या हापकी लेदा ने तीनाक बेसका ठुक्या, ने अदमरतु नाखदीन जात र्या।” 31ने अळी एक पुजारु तीने वाट्ये नीकळ्यु ने चु तीना माणुस काजे देख्यु ती चु टळीन अगु जात र्यु। 32अळतेन एक लेवी बी तीने वाट्ये मायन नीकळ्यु। जत्यार चु तीना माणुस काजे देख्यु, ती धड़े आयु, ने तेरे भीणी मामार देख्यु। ने चु बी आडु देखीन अगुत जात र्यु। 33हय एक तीसरु माणुस चां आयु, चु आपणा माणसे मायन बी नी हतलु। बाकुन चु सामरी जीलान एक अंजाण्यु माणुस हतलु। जत्यार चु लुटायला माणसेक देख्यु तत्यार चु तेरे पर दया कर्यु। 34चु तेरे धड़े आयु, तेरा घाव पर अंगुरेन रस लागाड़्यु ने तेल चुपड़ीन पट्टी बांद्यु। ने अळी चु तीना माणुस काजे आपसा गदड़ा पर बठाड़ीन एक धरम साळा मां ली गुयु, चां चु अळी तेरी सेवा-चाकरी कर्यु। 35दीसरे दाहड़े चु धरम-साळान मालीक काजे दुय रुप्या#10:35 चांदीन कळदार रुप्या आपीन कह्यु, “ईना माणसेन वारु चाकरी करजी ने कदी जादा रुप्या लागे ती मे पछु आवणेन टेमे तुसेक आप दीस।”
36ईसु जी काहनी पुरी कय्न तीना यहुदी-सास्तुर सीकाड़ने वाळा काजे पुछ्यु, तीनु तीन माणसे मायन कुण तीना डाकुन साहरे ठुकायला माणसेक खरलु परम देखाड़ीन धड़े वाळु बण्यु, “तीनाक चुट्टा लुट लेदला?” 37यहुदी सास्तुर सीकाड़न्यु, जपाप आप्यु, “जु तेरे पर दया कर्यु, चु तीना डाकुन साहरे ठुकायला माणसेक खरलु परम देखाड़्यु।”
ईसु तीनाक कह्यु, “जां ने तु बी तेरेन तसुत कर।”
ईसु मारथा ने मरीयम काजे भेळु हवणे जाय
38ईसु वाट्ये चालतु-चालतु एक गांव मां गुयु, ने मारथा नावेन एक बायर ईसु काजे आपसे घर ली जाय्न आव-भाव करी। 39ने मारथान एक बहणीस हतली तेरो नाव मरीयम हतलो, ची मालीक ईसुन पाय मां बसीन तेरी वात सामळतेली। 40बाकुन मारथा काम करी-करीन घाबराय रवली। ती ची ईसु धड़े आवीन असी कही, “ए मालीक! तुसे मारी ईतरीक बी फीकुर नी हय काय, मार बहणीस आखो काम करने वाटे मेसे एखलीत छुड़ देदी। तीनीक कय दे की, मारी मदत करे।”
41मालीक ईसु तीनीक जपाप आप्यु, “ए मारथा! ए मारथा! तु बेसकी वातेन बारामां फीकुर ने हरबड़ करने बाजी रय। 42बाकुन तारेम एक वातेन कसर छे, ने मरीयम तीनी एक वारलु वातेक नेवाड़ लेदली छे, जी वात तेरे धड़े सी कुय नी हापके।”
දැනට තෝරාගෙන ඇත:
लुका 10: NTBSP23
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.