SAN JUAN 4
4
Tej tyole Jesús tuya jun xuuj aj Samaria
1E pontzen tpocbal cyuya fariseo ncheꞌx lpe xjal mas tiꞌj t-xnakꞌtzbil Jesús twitzj t-xnakꞌtzbil Juan Bautista, bix mas e cuꞌx ke xjal tuj a tuꞌn Jesús twitzj tuꞌn Juan, 2amale yaaꞌnt tuꞌn Jesús e cuꞌx ke xjal tuj aꞌ. Nuk cyuꞌn t-xnakꞌatzxin. 3Tejtzen tbinte Jesús otk cybi fariseo jlu, etzxin tuj Judea, bix e xiꞌxin juntl maj tuj Galilea.
4Tuꞌntzen tponxin Galilea, il tiꞌj tuꞌn tiyꞌxin tuj departamento te Samaria. 5Bix e ponxin tuj jun tnom te Samaria, Sicar tbi. Tcub Sicar nka taꞌ jtxꞌotxꞌ otk txiꞌ tkꞌoꞌn Jacob te José, tcwalxin, jatxe ootxa. 6Tiꞌjxetzen tnom taꞌ jpozo otk cyaj tbinchaꞌn Jacob. Bix tuꞌnj otk sict Jesús tuj be, e cub kexin ttziiꞌ pozo. Otk pon chil kꞌij.
7Bix ultzen junxuj xuuj aj Samaria tiꞌ pozo te kꞌiljatz aꞌ. Bix e xiꞌ tkbaꞌn Jesús texuj:
—Kꞌontz chꞌin aꞌ weya―tz̈ixin. 8Otk cyajxin tjunalxin, cuma otk cheꞌx t-xnakꞌatzxin tuj Sicar te lokꞌol waabj.
9Bixsen e jaw kleeꞌ tzunj xuuj aj Samaria tiꞌj tkanbil Jesús, bix e xiꞌ tkanenxuj texin:
—¿Titzen tten ntzaj tkanena tuꞌn wajbena tey tuya jun tcꞌay? Jay jun xjal judío, bix jun xuuj aj Samaria kena―tz̈i tzunxuj, cuma el tniyꞌxuj tiꞌj kej xjal te Samaria mintiiꞌ ajbenke tuj cywitz judío.
10Bix aj ttzakꞌbeꞌn Jesús texuj:
—Ma txiꞌ nkanena chꞌin ncꞌaya tey, pero nuket s-el tniꞌya tiꞌj taj Dios tzaj tkꞌoꞌn xtalbil tey, bix nuket s-el tniꞌya wiꞌja alcye kena, matle tzaj tkanena aꞌ weya, bix matle txiꞌ nkꞌoꞌna j-aꞌ tzin tkꞌoꞌn tchunkꞌlala―tz̈i Jesús texuj.
11E xiꞌ tkbaꞌnxuj texin:
—Taat, mintiiꞌ kꞌiljawtzte aꞌ tuꞌna, bix nakch tcuꞌxa te aꞌ tuj jul. ¿Ti tten tuꞌn ttzaj tkꞌoꞌna aꞌ weya ctkꞌaꞌ nchunkꞌlala? ¿Japatzen tey mas jawnex twitzj kiyꞌjila Jacob? 12J-aꞌ tuj ja pozo lu ajben te Jacob cyuya tcwalxin, bix nimte te cycꞌaꞌ cywacẍ. Bix o cyaj tkꞌoꞌnxin ja pozowe te keya. ¿Japa tey mas jawnex twitzxin, tuꞌn ttzaj tkꞌoꞌna jun aꞌ mas baꞌn weya?―tz̈ixuj.
13Bix aj ttzakꞌbeꞌn Jesús texuj:
—Ka nuk jax j-aꞌ lu nchi cꞌan xjal tiꞌj, n-ocx takꞌ aꞌ cye. 14Pero alcyej xjal cxeꞌl cꞌante j-aꞌ cxeꞌl nkꞌoꞌna te, mlay tzaj takꞌ aꞌ te juntl maj. J-aꞌ cxeꞌl nkꞌoꞌna te, cꞌoqueltzen te jun twiꞌ aꞌ tuj tanem mintiiꞌ tbajlel twiꞌ. Iꞌtz, bix ja tzunja tuꞌn tkꞌonte tchunkꞌlal xjal te junx maj―tz̈i Jesús te xuuj.
15Bix e xiꞌ tkbaꞌnxuj te Jesús:
—Taat, kꞌontz j-aꞌ lu weya, tuꞌntzen mintiiꞌtl takꞌ aꞌ wiꞌja, bix tuꞌn mintiiꞌtl il tiꞌj tuꞌn wula maa tzalu te kꞌilte aꞌ―tz̈ixuj.
16E xiꞌ tkbaꞌnxin texuj:
—Cutxey tjay, kbanx te tchmila tuꞌn ttzaj tzalu, bix ctzaal meltzꞌaja tuyaxin―tz̈ixin.
17—Mintiiꞌ nchmila―tz̈ixuj.
Bix e xiꞌ tkbaꞌn Jesús texuj:
—Jax tuꞌna mintiiꞌ tchmila, 18cuma o tzꞌel tpaꞌn tiiba tiꞌ jweꞌ tchmila, bix jxinak at tuyey jaꞌlewe yaaꞌn tchmila. Juꞌ tzunj, baꞌn ma tkbay mintiiꞌ tchmila―tz̈ixin.
19E xiꞌ tkbaꞌnxuj texin:
—Taat, ¿ti tten at tumel tuyey wiꞌja? Tuj nwitza jay jun tyolel Dios. 20At jun nkanbila tey. Ke kiyꞌjila e naꞌnke Dios tzalu twiꞌ ja witz lu. Pero ejeeꞌy judío tzin cykbaꞌna il tiꞌj tuꞌn tjaw knimsaꞌna ejooꞌya aj Samaria tbi Dios nuk tuj Jerusalén. ¿Ti toc tuꞌna tiꞌj ti taj Dios?―tz̈ixuj.
21E xiꞌ tkbaꞌn Jesús texuj:
—Naa, kꞌoꞌnc tcꞌuꞌja tiꞌj cxeꞌl nkbaꞌna tey. Tzul jun kꞌij tuꞌn miꞌn jaw cynimsaꞌntl xjal tbi Kman Dios mi nuk twiꞌj witz jatzewe bix mi nuk tuj Jerusalén. 22Ejeeꞌy aj Samaria njaw cynimsaꞌna jmin tzꞌel cyniꞌya tiꞌj, bix juꞌ tzunj mlay tzꞌitzꞌj colbil cye xjal cyxola. Pero ejooꞌya judío n-el kniꞌya tiꞌj jnjaw knimsaꞌna, cuma te keya o tzꞌitzꞌja jcolbil cye xjal. 23Pero yaaꞌn il tiꞌj jaaꞌ tuꞌn tjaw cynimsaꞌna Dios. Tzul jun kꞌij, bix ya ma tzyet tuꞌn tul, kej xjal cyaj chi naꞌn Kman Dios tuya jun jaxxix cyanem, cbinel cyuꞌn yaaꞌn nuk tuj jun lugar, sino tuj cyanem tuya cykil cycꞌuꞌj. Taj Kman Dios tuꞌn tjaw cynimsaꞌn tbixin juꞌwa. 24Yaaꞌn jun xumlalbaj Dios. Juꞌ tzunj, ka cyaj xjal chi naꞌn Dios, il tiꞌj tuꞌn cynaꞌn jaxin yaaꞌn nuk tuya cyxumlal, sino tuya cyanem, bix tuya jun cyanem jaxxix―tz̈i Jesús te xuuj.
25Bix e xiꞌ tkbaꞌnxuj texin:
—Ntzkiꞌna tzul Cristo, jaj xjal Scyꞌoꞌn tuꞌn Dios. Oj tulxin, ctzaal ttxꞌolbaꞌnxin cykilca keya―tz̈ixuj.
26E xiꞌ tkbaꞌn Jesús texuj:
—Inayena, jxjal nyolen tuyey, inayenja Scyꞌoꞌn tuꞌn Dios kena―tz̈ixin.
27Te tzunj hora, e pon meltzꞌaj ke t-xnakꞌatz Jesús. Tej t-xiꞌ cycyeꞌyenxin nyolen Jesús tuya jun xuuj, e jaw kleeꞌkexin. Pero min-al e xiꞌ kanente texin ti tajxin bix tuꞌn tiken e yolenxin tuyaj xuuj.
28Yal te xuuj, e xiꞌxuj tuj tnom. Tuꞌn nim e jaw kleeꞌxuj, el tuj tcꞌuꞌjxuj tuꞌn t-xiꞌ tiiꞌnxuj twicyꞌilxuj. Bix e xiꞌ tkbaꞌnxuj cye xinak tuj tnom:
29—¡Koꞌtzen! Tiꞌjxe tnom at jun xjal ma tzaj tkbaꞌn weya cykilcaj o nbinchaya witzꞌjlena. ¿Ti toc cyuꞌna? ¿Yaaꞌmpale xjalja lu Jscyꞌoꞌn tuꞌn Dios?―tz̈ixuj.
30Juꞌ tzunj etz nim xjal tuj tnom tuꞌntzen cypon tuya Jesús. 31Maatktzen nchi ul aj Sicar, bix e yolen ke t-xnakꞌatz Jesús tuyaxin. Bix e xiꞌ cykbaꞌnxin texin:
—Waaꞌna, Taat.
32Pero e xiꞌ tkbaꞌnxin cyexin:
—Ya ma txiꞌ nwaaꞌna jun nwaya min tzꞌel cyniꞌya tiꞌj―tz̈ixin.
33Juꞌ tzunj akꞌ ke t-xnakꞌatzxin kanlte cyxolx:
—¿Atpale jun xjal ma tzul kꞌolte twa?―tz̈ikexin.
34E xiꞌ tkbaꞌn Jesús cyexin:
—Min. Yaaꞌn jwaabj tuꞌn t-xiꞌ nwaaꞌna nchin yolena tiꞌj. Weya nwa, jaj akꞌuntl kꞌoꞌn weya tuꞌn Dios e tzaj tsmaꞌn inayena, bix tuꞌn tbint jtajbilxin wuꞌna. 35At juntl cxeꞌl nkbaꞌna cyey. Cyxola at jun yol tzin tkbaꞌn: “At-x cyajatl xjaw tuꞌn tchmet twitz awal.” Pero cxeꞌl nkbaꞌna cyey, cꞌoquel cycꞌuꞌja tiꞌj twitz awal lu ata. Ma knax awal, bix matzen pon tumel tuꞌn tchmet. 36Yaaꞌn yaj, sino jaꞌlewe. Yaltzen ke cyey n-oc cyipena tiꞌj tuꞌn tjaw cychmoꞌna ja awal lu, cjaweltzen cychmoꞌna jun awal yaaꞌn nuk te jun rato, sino jun awal miꞌn pon baj twiꞌ. Bix tujx kꞌij jaꞌlewe chi tzalajela ejeeꞌy chmol awal junx wuyena, inayenja awaal. 37Kxol ejooꞌ judío at jun yol tzin tkbaꞌn: “Ncub tawaꞌn jun xjal, pero junxitl cjawel chmonte.” Qꞌuelel jax ja yol lu jaꞌlewe, 38cuma ma txiꞌ nsmaꞌna cyey tuꞌn tjaw cychmoꞌna jun awal min ma chi akꞌanana tiꞌj. Junxitl xjal xcub awante, pero ejeeꞌy te chmolte―tz̈i Jesús cye t-xnakꞌatz.
39Bix juꞌ e baj. Nim xjal aj Samaria te tnom te Sicar ocslan tiꞌ Jesús. Ocslanke tuꞌn tyol jxuuj oc kbante cye: “Ma tzaj tkꞌumenxin weya cykilcaj o nbinchaya witzꞌjlena.”
40Tejtzen cypon xjal te Sicar cyuya Jesús, e cubsanke cywitzxin texin tuꞌn tcyaj tenxin cyuyaxin. Bix e tcuyaxin, bix e tenxin tuj Sicar caꞌba kꞌij. 41Bix nimcꞌatl xjal ocslan tiꞌjxin tuꞌnx tyolxin. 42Bix e xiꞌ cykbaꞌnxin te xuuj:
—Yaaꞌn nuk tuꞌnj tey tyol nko ocslana, cuma ejooꞌxa ma ko ebinte tyol jxjal e yolen tuyey, bix ktzkiꞌna jaxin jjaxxix Clol cye cykil xjal―tz̈ikexin texuj.
Tej tul tnaabl junxin t-akꞌanal cawel tuꞌn Jesús
43Tbajlenxitltzen caꞌba kꞌij, etztzen Jesús tuj Samaria bix e xiꞌxin tuj Galilea. 44Tuj Judea otk tzꞌel cyiiqꞌuen fariseo jaxin. Juꞌ tzunj, e xiꞌxin tuj Galilea, cuma e tkbaxin jun kbalte tyol Dios te tex tnom yaaꞌn nimxix n-oc cybiꞌn xjal. 45Tejtzen tponxin tuj Galilea, e jaw tzalaj ke xjal tiꞌjxin, cuma otk cyil cykilcaj otk bint tuꞌnxin tuj ninkꞌij tej cyten tuj Jerusalén, cuma ejeeꞌx otk cheꞌx tuj ninkꞌij. 46Bixsen e xiꞌxin juntl maj tuj tnom te Caná tuj Galilea, jtnom jaaꞌ otk cub tchꞌixpuꞌnxin aꞌ te vino.
Tujtzen tnom te Capernaum, otktzen yaabt tcwal junxin cawel. 47Tej tbinte tzunj xjal ka otk tzꞌetz Jesús tuj Judea bix otk tzul tuj Galilea, e xiꞌxin tuya Jesús tuj Caná, bix e cubsanxin twitzxin te tuꞌn t-xiꞌ tuj ttanemxin tuꞌn tcoꞌpante Jesús tcwalxin tuj tyabel, cuma chꞌitk tcyim tcwalxin. 48Juꞌ tzunj, e xiꞌ tkbaꞌn Jesús texin:
—Jeyꞌ, ¿chi ocslalpa key judío wiꞌja ma nuk oꞌcx ka ma txiꞌ nyeecꞌana nim wipemala cyey?―tz̈i Jesús.
49E xiꞌ tkbaꞌn cawel te Jesús:
—Taat, najsama, pero waja txiꞌ naja, cuma ya chꞌix tcyim ncwala―tz̈ixin.
50E xiꞌ tkbaꞌn Jesús texin:
—Baꞌn taja. Ma kꞌanj tcwala―tz̈i.
Oc ke tcꞌuꞌj cawel tiꞌ tyol Jesús, bix e tzyet tbexin. 51Bix e tzaj cꞌulbajxin cyuꞌn t-akꞌanalxin tuj be, bix e xiꞌ cykbaꞌnxin texin:
—Taat, ma kꞌanj tcwala.
52Bix e xiꞌ tkanenxin cyexin:
—¿Niꞌ hora tkꞌanj ncwala?―tz̈ixin.
—E kꞌanj ewe jun hora tibaj chil kꞌij―tz̈ikexin.
53Ultzen tuj tcꞌuꞌjxin jatzen horaj tej tkbante Jesús texin: “Ma kꞌanj tcwala.” Juꞌ tzunj, e tocslaxin Jesús ka Scyꞌoꞌnxin tuꞌn Dios, cyuyax ke te tjaxin.
54Ja tzunja e bint tuꞌnxin, te tcab maj e xiꞌ tyeecꞌan Jesús tipemal tuj Galilea tej tetz tuj Judea.
Currently Selected:
SAN JUAN 4: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.