創世記 8
8
大水消退
1上帝無𣍐記得挪亞，以及及挪亞佇大船內面的牲生及野獸；上帝互風吹大地，水就漸漸消退。 2深淵的水源及天頂的水門攏關密；天無閣落雨。 3水對地上漸漸退去；一百五十日後，水直直消退。 4七月十七，船牢佇亞拉臘山。 5水閣漸漸退，一直到十月。十月初一，山頭才出現。
6過四十日，挪亞開伊所做大船的窗仔， 7放一隻烏鴉出去；烏鴉飛來閣飛去，一直到大地的水消退。 8伊閣放一隻粉鳥出去，欲看水對地面消退抑未。 9毋拘粉鳥尋無歇睏的所在，就飛轉來大船挪亞遐，因為全地猶有水。挪亞伸手接伊，帶入大船。 10七日後，挪亞閣放粉鳥出去。 11到下昏，粉鳥倒來伊遐，嘴咬一葉新的橄欖樹葉；挪亞才知，水已經消退。 12伊閣聽候七日，放粉鳥出去；粉鳥就無閣倒來。 13到挪亞六百空一歲，正月初一，地面的水攏焦；挪亞拍開大船的蓋，看著地面已經焦。 14二月二七，土地攏焦啦。
15上帝對挪亞講： 16「你及你的某、你的子、你的新婦攏著出大船。 17你嘛著互許個有肉體的活物，包括飛鳥、牲生，及啲爬的動物攏出來，互𪜶佇地上生湠，加添真多。」 18挪亞就及伊的子、伊的某、伊的新婦攏出來； 19所有的走獸、飛鳥、啲爬的動物，及地上一切的活物，各照𪜶的種類嘛攏出大船。
挪亞獻祭
20 挪亞為著上主起一座祭壇；對禮儀上清氣的牲生及飛鳥中間，帶一部份來佇祭壇頂獻做燒化祭。 21上主鼻著祭物的芳味，心內就講：「我無欲閣因為人的緣故咒詛土地，雖然人對細漢心所想的攏是歹；我無欲閣照我以前所做的毀滅所有的活物。
22大地若猶存在，
栽種收成，
寒熱，
冬天夏天，
日時暝時，
攏會繼續。」
දැනට තෝරාගෙන ඇත:
創世記 8: TTVH
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
The Bible Society in Taiwan, 2021