創世記 6
6
邪惡的人類
1人類佇地上人額愈加添，嘛有生查某子。 2上帝的子#6.2 「上帝的子」嘛通譯做「神明的子」抑是「超自然的人」。看著人的查某子媠，就揀家己意愛的來做某。 3上主講：「人既然屬會死的肉體，我的神就無欲永遠住佇𪜶內面，𪜶的歲壽會當到一百二十歲。」 4上帝的子及人的查某子同房生子；對彼時起，世間就有大漢人，𪜶是古早出名的英雄。
5上主看見人佇世間犯罪真重，逐日的心思意念攏是邪惡， 6就因為伊造人佇世間，感覺遺憾，心艱苦。 7上主講：「我欲對世間剿滅我所創造的人，嘛欲消滅走獸、啲爬的動物，及飛鳥，因為我造𪜶了後感覺遺憾。」 8只有挪亞得著上主的恩典。
挪亞造大船
9下面是有關 挪亞的記事。挪亞是義人，佇彼世代的人中間是純全正直的人；挪亞及上帝同行。 10挪亞有三個子：閃、含，及雅弗。 11世界佇上帝的面前敗壞，充滿強暴。 12上帝看世界攏敗壞，因為人佇世間的行做邪惡。
13上帝對挪亞講：「我決定欲消滅所有的活物，因為𪜶的強暴充滿世間，我欲將𪜶及大地做一下毀滅。 14你著用松柏柴做大船，船內隔房間，內外糊打馬膠。 15你著按呢造大船：長一百三十三公尺，闊二十二公尺，高十三公尺。 16著做天窗，高四十四公分；門作佇船邊；船著做三層，分上、中、下。 17我欲互大地大水氾濫，毀滅天下所有的活物；地上所有的生物攏會死。 18毋拘我欲及你立約。你及你的子、你的某、你的新婦攏著入去大船內面。 19所有的活物，逐種一對，一隻公的，一隻母的，你著帶𪜶入大船，互𪜶及恁做夥保全性命。 20飛鳥、牲生，及啲爬的動物，各照𪜶的種類，一對一對導入船，保全𪜶的性命。 21你著為著恁及許個動物積聚逐款的食物。」 22挪亞就攏照上帝的命令去做。
දැනට තෝරාගෙන ඇත:
創世記 6: TTVH
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
The Bible Society in Taiwan, 2021