ମାଥିଉ 11
11
ଯୀଶୁ ଡୁବନ୍ହିନି ଯୋହନ ବିଷୟରେ ୱେଚ୍ନି କାତା
(ଲୁକ. ୭:୧୮-୩୫)
1ଯୀଶୁ ତା ବାରଜାଣ୍ ଚେଲାହିରିଙ୍ଗ୍ ଆଦେସ୍ ହିଜି ୱିସ୍ତି ପାଚେ, ଗାଲିଲୀ ଜିଲ୍ଲାନି ସହର୍ତାକେ ହିକ୍ଷାହିଦେଙ୍ଗ୍ ଆରେ ହାର୍ଦିକାବୁର୍ ଶୁଣାୟ୍ କିଦେଙ୍ଗ୍ ହେ ବାହାତାଙ୍ଗ୍ ହସିହାଚାର୍। 2ହେପାଦ୍ନା ଡୁବନ୍ହିନି ଯୋହନ ଜଇଲ୍ ଇଞ୍ଜ ମାଚାନ୍। ହେୱାନ୍ ଯୀଶୁ ଖ୍ରୀଷ୍ଟ ତା କିତି କାମାୟ୍ ବିଷୟରେ ୱିଜୁ ୱେଚାନ୍। ହେୱାନ୍ ତା କେତ୍ଜାଣ୍ ଚେଲାହିରିଙ୍ଗ୍ ଯୀଶୁ ଲାଗାୟ୍ ପକ୍ତାନ୍। 3ହେୱାର୍ ହାଲ୍ଜି ଯୀଶୁଙ୍ଗ୍ ୱେନ୍ବାତାର୍, “ଈଶ୍ୱର ର ଖ୍ରୀଷ୍ଟଙ୍ଗ୍ ପକ୍ତାନାଙ୍ଗ୍ ଇଞ୍ଜି କାତା ହିଜିମାନ୍ଞ୍ଚାନ୍ ହେୱାନ୍ କି ଏନେଙ୍ଗ୍? କି ଆପେଙ୍ଗ୍ ଆରେ ଜେକନିକାନିଙ୍ଗ୍ କାସି ମାନାପ୍?”
4ଯୀଶୁ ଡୁବନ୍ହିନି ଯୋହନ ଚେଲାହିରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ହାଲ୍ଜି ଇନା ଇନାକା ୱେଚାଦେର୍ନା ଆରେ ହୁଡ଼୍ତାଦେର୍ ହେ ୱିଜୁ ଯୋହନତିଙ୍ଗ୍ ୱେଚାଟ୍। 5କାଣାର୍ ହୁଡ଼୍ଦେଙ୍ଗ୍ ଆଡ଼୍ତାର୍, ଚଟାର୍ ତାଙ୍ଗ୍ଦେଙ୍ଗ୍ ଆଡ଼୍ତାର୍, କୁଷ୍ଟରଗ୍ଦାକାର୍ ହାର୍ଆତାର୍, ବଇରାର୍ ୱେଞ୍ଜେଙ୍ଗ୍ ଆଡ଼୍ତାର୍, ଇମ୍ଣାକାର୍ ହାଃତିତାଙ୍ଗ୍ ଆରେରଗ ଜିବୁନ୍ ଆନାରା, ଆରେ ଗରିବ୍ ମାନାୟାର୍ତାକେ ଈଶ୍ୱର ରାଜିନି ହାର୍ଦିକାବୁର୍ ଶୁଣାୟ୍ କିୟାଆନାତା। 6ଇନେର୍ ପା ନାଙ୍ଗେଙ୍ଗ୍ ପାର୍ତି କିନାକା ପିସ୍ତୁନ୍ ହେୱାନ୍ ଆଶ୍ରିବାଦ୍ନି ମାନାୟ୍ ଆନାର୍।”
7ଇ କାତା ୱେନ୍ଞ୍ଜି ଡୁବନ୍ହିନି ଯୋହନ ଚେଲାହିର୍ ଲେଉଟା ଆଜି ହାଚାର୍। ହେପାଦ୍ନା ଯୀଶୁ ମାନାୟାରିଙ୍ଗ୍ ଡୁବନ୍ହିନି ଯୋହନ ବିଷୟରେ ୱେଚ୍ଚାନ୍, “ର ମାର୍ତି କେନ୍ଦା ଡ଼ୁଇତାକେ ଇନେସ୍ ଇନି ଆନି ଆଜି ଜଲାଆଜି ମାନାତ୍ ହେଲେକେ ଚାନେକ୍ତିଙ୍ଗ୍ ଚାନେକ୍ ଇନି ଆନି ୱେଚ୍ନି ମାନାୟ୍ତିଙ୍ଗ୍ ଟାଙ୍ଗ୍ରାବାହାତ ହୁଡ଼୍ଦେଙ୍ଗ୍ ହାଲ୍ଜି ମାଚାଦେର୍? ହେଲେଗ୍ଦି ମାନାୟ୍ତିଙ୍ଗ୍ ଏପେଙ୍ଗ୍ ହୁଡ଼୍ଦେଙ୍ଗ୍ ହାଲ୍ୱାଦାଙ୍ଗ୍ ମାଚାଦେର୍। 8ହେଦାଙ୍ଗ୍ ଆୱିତିସ୍ ଏପେଙ୍ଗ୍ ଇନାକା ହୁଡ଼୍ଦେଙ୍ଗ୍ ହେବେ ହାଲ୍ଜି ମାଚାଦେର୍? ଇନାକା ଦାମ୍କିୟା ହାର୍ଦି ହେନ୍ଦ୍ରା ଉସ୍ପିତି ମାନାୟ୍ତିଙ୍ଗ୍ ହୁଡ଼୍ଦେଙ୍ଗ୍ ହାଲ୍ଜି ମାଚାଦେର୍? ହେଲେଗ୍ଦି ମାନାୟ୍ତିଙ୍ଗ୍ ଆକାୟ୍। ଇନେସ୍କି ଦାମ୍କିୟା ହାର୍ଦି ହେନ୍ଦ୍ରା ଉସ୍ପିତି ମାନାୟ୍ ରାଜାମାନି ବାହାତାକେ ମାନ୍ଗାନାର୍।
9ଲାଗିଙ୍ଗ୍ ଏପେଙ୍ଗ୍ ଇନାକା ଭବିଷ୍ଯତବକ୍ତାତିଙ୍ଗ୍ ହୁଡ଼୍ଦେଙ୍ଗ୍ ହସିହାଲ୍ଜି ମାଚାଦେର୍? ସତ୍ କାତା ଏପେଙ୍ଗ୍ ର ଭବିଷ୍ଯତବକ୍ତାତିଙ୍ଗ୍ ହୁଡ଼୍ଦେଙ୍ଗ୍ ହାଲ୍ଜି ମାଚାର୍। ମାତର୍ ଡୁବନ୍ହିନି ଯୋହନ ଜେକନି ଭବିଷ୍ଯତବକ୍ତାତାଙ୍ଗ୍ ପା ବେସି ଗାଜାକାନ୍। 10ଈଶ୍ୱର ତା ବିଷୟରେ ଇଦାଙ୍ଗ୍ ଲେକା ମାନାତ୍,
‘ହୁଡ଼ାଟ୍, ଆନେଙ୍ଗ୍ ନା ଡାଣ୍ଡାସିଙ୍ଗ୍ ମି ଆଗେ ପକ୍ତାନାଙ୍ଗା। ହେୱାନ୍ ମି କାଜିଙ୍ଗ୍ ହାଜି ରହ୍ନାନ୍।’ ”
11ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ଡୁବନ୍ହିନି ଯୋହନ ଲେକେ ଇନେର୍ ପା ଗାଜାକାନ୍ ହେୱାନ୍ତାଙ୍ଗ୍ ଜନମ୍ ଆୱାତାର୍ମା। ମାତର୍ ନଙ୍ଗୟ୍ ଇନେର୍ ୱିଜାକାର୍ତାଙ୍ଗ୍ ହିରୁକାନ୍ ମାନାନ୍, ହେୱାନ୍ ଈଶ୍ୱର ସାସନ୍ କିନି ରାଜିତାକେ ଡୁବନ୍ହିନି ଯୋହନତାଙ୍ଗ୍ ପା ଗାଜାକାନ୍ ଆନାନ୍। 12ଡୁବନ୍ହିନି ଯୋହନ ଈଶ୍ୱର କାତା ଶୁଣାୟ୍ କିତିତାଙ୍ଗ୍ ନଙ୍ଗୟ୍ ପାତେକ୍ ଈଶ୍ୱର ସାସନ୍ କିନି ରାଜି ବାଡା ଆନାତା। ମାତର୍ ବାନ୍ୟା ମାନାୟାର୍ ହେଦାଙ୍ଗ୍ତିଙ୍ଗ୍ ନଷ୍ଟ କିଦେଙ୍ଗ୍ ଉପାୟ୍ କିନାରା।
13ଡୁବନ୍ହିନି ଯୋହନ ୱାନି ପାତେକ୍ ମୋଶା ଲେକିକିତି ନିୟମ୍ନି ସାସ୍ତର୍ ଆରେ ଭବିଷ୍ଯତବକ୍ତାର୍ ସାସ୍ତର୍ତାକେ ଈଶ୍ୱର ସାସନ୍ କିନି ରାଜିନି ବିଷୟରେ ଲେକିକିତାର୍ନା। 14ଯଦି ଏପେଙ୍ଗ୍ ନା କାତାତିଙ୍ଗ୍ ପାର୍ତି କିନାଦେର୍, ଈଶ୍ୱର ଇମ୍ଣି ଭବିଷ୍ଯତବକ୍ତା ଏଲିୟଙ୍ଗ୍ ପକ୍ତାନାଙ୍ଗ୍ ଇଞ୍ଜି କାତା ହିଜିମାନ୍ଞ୍ଚାନ୍ ଡୁବନ୍ହିନି ଯୋହନ ଆନାନା ହେ ଭବିଷ୍ଯତବକ୍ତା। 15ଇମ୍ଣାକାର୍ ଇବେଣ୍ ୱେନାଦେର୍ ହେ ବେଣ୍ତିଙ୍ଗ୍ ମାନ୍ଦିୟାନ୍ କିଜି ବୁଜାଆଡ।”
16ଯୀଶୁ ଆରେରଗ ୱେଚ୍ଚାନ୍, “ନଙ୍ଗୟ୍ନି ମାନାୟାରିଙ୍ଗ୍ ଇନେର୍ ହୁଦାଙ୍ଗ୍ ହାମାନ୍ କିନାଙ୍ଗ୍? ଇୱାର୍ ଆଟ୍ବାଜାର୍ତ କୁଚ୍ଚି ମାଚି ହେ ହିମ୍ଣାଙ୍ଗ୍ ଜେକନି ହିମ୍ଣାରିଙ୍ଗ୍ କୁକ୍ଚି ଆଲା ଆନି ହିମ୍ଣାଙ୍ଗ୍ ଲେକେ। 17ଆପେଙ୍ଗ୍ ମି କାଜିଙ୍ଗ୍ ଶୁରୁଡ଼ି ତୁବ୍ଜି ହିତ୍ତାପ୍, ମାତର୍ ଏପେଙ୍ଗ୍ ଏନ୍ଦ୍ୱାତାଦେର୍। ଆପେଙ୍ଗ୍ ହାଃତିହିଙ୍ଗ୍ କେର୍ନି କେର୍କଣ୍ କେର୍ତାପ୍ ମାତର୍ ଏପେଙ୍ଗ୍ ଆଡ଼୍ବାୱାତାଦେର୍।
18ଡୁବନ୍ହିନି ଯୋହନ ୱିଜୁଦିନ୍ ଲେକେ ତିନ୍ୱାଦାଙ୍ଗ୍ କି ଉଣ୍ୱାଦାଙ୍ଗ୍ ଉପାସ୍ କିଜି ମାଚାନ୍। ମାତର୍ ମାନାୟାର୍ ହେୱାନିଙ୍ଗ୍ ୱେଚ୍ଚାର୍, ‘ହେୱାନିଙ୍ଗ୍ ବୁତ୍ଆତ୍ମା ଡୁତାତ୍ନା।’ 19ମାତର୍ ଏଚେପାଦ୍ନା ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଉଟାନ୍ ଚିଚାନ୍, ମାନାୟାର୍ ହେୱାନିଙ୍ଗ୍ ୱେଚ୍ଚାର୍, ‘ହୁଡ଼ାଟ୍, ଇୱାନ୍ ପେଟୁ, ମଦୁୱା। ଆରେ ସିସ୍ତୁଏନ୍ନାକାର୍ ଆରେ ପାପିର୍ ହାଙ୍ଗ୍ଦାକାନ୍।’ ମାତର୍ ରକାନିଙ୍ଗ୍ ତା କାମାୟ୍ତିଙ୍ଗ୍ ହୁଡ଼୍ଜି ତା ବୁଦି ଆରେ ଜ୍ଞାନ୍ତିଙ୍ଗ୍ ପୁନିଆନାତ୍।”
ଈଶ୍ୱର ପାର୍ତି କିୱାକାରିଙ୍ଗ୍ ବିଚାର୍ କିନାନ୍
(ଲୁକ. ୧୦:୧୩-୧୫)
20ହେପାଦ୍ନା ଯୀଶୁ ଇମ୍ଣି-ଇମ୍ଣି ସହର୍ତାକେ ଚାନିଆଆନି କାମାୟ୍ କିତାନ୍। ହେୱାନ୍ ହେ ସହର୍ତାକେ ମାନି ମାନାୟାରିଙ୍ଗ୍ କେତ୍ତେଙ୍ଗ୍ ଲାଗାତାନ୍। ଇନେସ୍କି ହେୱାର୍ ଯୀଶୁ କିତି କାମାୟ୍ ହୁଡ଼୍ଜି ପା ପାପ୍ କାମାୟ୍ ପିସ୍ତି ଈଶ୍ୱର ଲାଗାୟ ୱାୱାଦାଙ୍ଗ୍ ମାଚାର୍। 21ହେଦାଙ୍ଗ୍ କାଜିଙ୍ଗ୍ ଯୀଶୁ ୱେଚ୍ଚାନ୍, “ହାୟ୍, କୋରାଜିନ୍ ହାୟ୍ ବେଥ୍ସାଇଦା ସହର୍ନି ମାନାୟ୍ କାଦେର୍, ମି ବିତ୍ରେ ଆନେଙ୍ଗ୍ ଚାନିଆଆନି କାମାୟ୍ କିତାଙ୍ଗ୍ନା। ମାତର୍ ଏପେଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାୱାତାଦେର୍ନା। ଯଦି ଇଦାଙ୍ଗ୍ ସୋର୍ ଆରେ ସିଦନ୍ ସହର୍ତାକେ ଚାନିଆଆନି କାମାୟ୍ କିଜିମାଚିସ୍ ହେବେନି ମାନାୟାର୍ ପାପ୍ କାମାୟ୍ କିନାକା ପିସ୍ତି ବାସ୍ତାତାଙ୍ଗ୍ ରସ୍ତି ହେନ୍ଦ୍ରା ଉସ୍ପାତାର୍ମା ଆରେ କାପ୍ଡ଼ାତାକେ ନିସ୍ ଇବିସ୍ ଉପାସ୍ କିତାର୍ମା।” 22ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, “ବିଚାର୍ ଦିନ୍ତ ମିଙ୍ଗେଙ୍ଗ୍ ସୋର୍ ସହର୍ ଆରେ ସିଦନ୍ ସହର୍ତାଙ୍ଗ୍ ମିଙ୍ଗେଙ୍ଗ୍ ଈଶ୍ୱର ବେସି ଦଣ୍ଡ୍ ହିଦ୍ନାନ୍।
23ଏ କପୁର୍ନାହୁମ୍ ସହର୍ତାକେ ମାନି ମାନାୟ୍ କାଦେର୍! ଈଶ୍ୱର ମାଙ୍ଗେଙ୍ଗ୍ ସନ୍ମାନ୍ କିଦ୍ନାନ୍ ଇଞ୍ଜି ଏପେଙ୍ଗ୍ ବାବିକିମାଟ୍। ହେୱାନ୍ ମିଙ୍ଗେଙ୍ଗ୍ ନାଣିନି ନରକ୍ତାକେ ତୁସିହିଦ୍ନାନ୍। ଇନେସ୍କି ମି ବିତ୍ରେ ଇମ୍ଣି ଚାନିଆଆନି କାମାୟ୍ କିତାଙ୍ଗ୍ନା, ହେ କାମାୟ୍ ଯଦି ସଦୋମ ସହର୍ତାକେ କିୟାଆତାତ୍ମା, ଲାଗିଙ୍ଗ୍ ହେ ସହର୍ ନଷ୍ଟ ଆୱାତାତ୍ମା।” 24ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, “ବିଚାର୍ ଦିନ୍ତ ମିଙ୍ଗେଙ୍ଗ୍ ସଦୋମ ସହର୍ତାଙ୍ଗ୍ ମିଙ୍ଗେଙ୍ଗ୍ ଈଶ୍ୱର ବେସି ଦଣ୍ଡ୍ ହିଦ୍ନାନ୍।”
ଯୀଶୁତାକେ ଜମ୍ନାକା ମାନାତ୍
(ଲୁକ. ୧୦:୨୧-୨୨)
25ହେପାଦ୍ନା ଯୀଶୁ ପାର୍ତାନା କିଜି ୱେଚ୍ଚାନ୍, “ଏ ଆବା, ସରଗ୍ ଆରେ ପୁର୍ତିନି ମାପୃ, ଏପେଙ୍ଗ୍ ବୁଦିକାଟି ମାନାୟ୍ତିଙ୍ଗ୍ ୱେଚ୍ୱାଦାଙ୍ଗ୍ ଇ ବୁଦି ହିଲ୍ୱାକାରିଙ୍ଗ୍ ୱେଚ୍ଚିଲେ ଆନେଙ୍ଗ୍ ମିଙ୍ଗେଙ୍ଗ୍ ଦନ୍ଯବାଦ୍ କିଦ୍ନାଙ୍ଗା। 26ଆଁ, ଆବା ଏନେଙ୍ଗ୍ ଇଦାଙ୍ଗ୍ ହାର୍ କିତାୟ୍ନା।
27ନା ଆବା ସରଗ୍ ଆରେ ପୁର୍ତିନି ଆଦିକାର୍ ୱିଜୁ ବିଷୟ ନାଙ୍ଗେଙ୍ଗ୍ ହିତ୍ତାନ୍ନା। ହେଦାଙ୍ଗ୍ କାଜିଙ୍ଗ୍ ହିମ୍ଣା ବିଷୟରେ ଆବାଙ୍ଗ୍ ପିସ୍ତି ଇନେର୍ ପା ପୁନୁର୍। ଆରେ ଆବା ବିଷୟରେ ହିମ୍ଣାଙ୍ଗ୍ ପିସ୍ତି ଇନେର୍ ପୁଞ୍ଜେଙ୍ଗ୍ ଆଡୁର୍। ଆରେ ହିମ୍ଣା ଇନେରିଙ୍ଗ୍ ବାଚିକିଜି ୱେଚ୍ଚାଙ୍ଗ୍ନା ହେୱାର୍ ନେ ଆବାଙ୍ଗ୍ ପୁନାନ୍।
28ଏ କଷ୍ଟ କିନାକାଦେର୍ ଆରେ ବଜ୍ ପିଣ୍ତି ମାନାୟ୍ ୱିଜାକାଦେର୍ ନା ଲାଗାୟ୍ ୱାଡ। ଆନେଙ୍ଗ୍ ମିଙ୍ଗେଙ୍ଗ୍ ଜମ୍ନାକା ହିଦ୍ନାଙ୍ଗ୍। 29ଏପେଙ୍ଗ୍ ନା ପାଚେ ୱାଡୁ, ଆନେଙ୍ଗ୍ ମିଙ୍ଗେଙ୍ଗ୍ ହିକାୟ୍ କିଦ୍ନାଙ୍ଗ୍। ଇନେସ୍କି ଆନେଙ୍ଗ୍ ର ସାଦାସିଦା ଆରେ ଦରମ୍ ମାନାୟ୍ତଙ୍ଗ୍। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଜିବୁନ୍ ପାୟାଆନାଦେର୍। 30ଲାଗିଙ୍ଗ୍ ଆନେଙ୍ଗ୍ ଇମ୍ଣି ବିଷୟତିଙ୍ଗ୍ ହିକ୍ଷା ହିଦ୍ନାଙ୍ଗ୍ ହେ ୱିଜୁ ହାର୍ ଆରେ ଆଡ଼୍ୱା ମାନ୍ଗାନାତ୍।”
Currently Selected:
ମାଥିଉ 11: PEGNT
Highlight
Share
Copy
Want to have your highlights saved across all your devices? Sign up or sign in
Pengo Parja Bible by The Love Fellowship is licensed under Creative Commons Attribution-ShareAlike 4.0 License.