Luk 20
20
Rɛsɨn ndi rɛbaŋa nsɨm Jisɔs
(Mt 21:23-27; Mk 11:27-33)
1Reyi dinɛ ndi Jisɔs ɔra na ɛtɔ-Ɛbrɔkpabi ɔkpɛbɛ bani Brika Ramu, bakɨm bajɔmɔ-kɔya na bakpɛbɛ Ibina Mosis na banintɨma bawu kɨmanɛ mɔ. 2Basɨna mɔ ya, “Kanɛ yu, baga nsɨm ŋɔ awu afɔnɔ kosi birɛ mbi? Yɛnɛ mɔ ɔjɛ wu ɛdɔ nsɨm ŋɔ?”
3Jisɔs ɔfɛlɛ bɛ ramu ya, “Nkɔsɨn nu mɨnɛ rɛsɨn. Kanɛ mi nu: 4Yɛnɛ mɔ ɔjɛ Jɔn nsɨm koru-raku? Nsɨm ɔmɔ osi na ibɔ Ɛbrɔkpabi nji ɛra na kaju din na ibɔ bani?”
5Babɨnɛ kɔfɔn ifiri na bɔkpaju bɔbɛ, “Rɛkanɛ bu? Ara rɛkanɛ ya nsɨm ɔmɔ osi na ibɔ Ɛbrɔkpabi, ɔkɔkanɛ ya, ‘Bu na mimbɔ minkinyiɛ na amɔ?’ 6Mɨnɛ ara rɛkanɛ ya, nsɨm Jɔn osi na ibɔ bani, bani mbɛ babɨbi nya kubatuba yu rata, ndi bagbɨri ya Jɔn ɔkanɛ-rotuma Ɛbrɔkpabi.”
7Bakpɛɛ mɔ ya, “Rekigbɨra kwa nsɨm ɔmɔ osi oŋuɛ.”
8Jisɔs ɔkanɛ bɛ ya, “Ami mɨnɛ, nkanɛ nu oni ŋɔ ɔjɛ mi nsɨm ŋɔ nsiŋɛ birɛ mbi.”
Rɛkana bani mbɛ barɛ kɛkana oni
(Mt 21:33-46; Mk 12:1-12)
9Jisɔs oruŋɛ rɔsɔ otuba rɛkana ndi ɔjɛ bɛ: “Oni oyirɛ kɛkana raŋuga beti, mɨnɛ ɔjɛ bani mbɛ bakɔbɨnɛ kɔkpɛɛ mɔ bagbuga na aci. Mɨnɛ osugɛ rɔrɛ na kɛgbanta kegbu. 10Ndi kegbu kebigɛ nci bakɔfa raŋuga beti, otigɛ ori ya orua ɔkatam reyibanɛ rɛmɔ na ibɔ bani mbɛ batama kɛkana kɛmɔ. Badu ori ŋɔ mɨnɛ batigɛ mɔ ɔŋbɨnɛnɛ ibibɔ. 11Otigɛ ori ojuju, nsu bani mbɛ badu mɔ mɨnɛ, basɛgɛlɛ mɔ, baŋbɨnɛnɛ batigɛ mɔ mɨnɛ ibibɔ. 12Ɔŋbɨnɛnɛ otigɛ ɔnyakanɛ ori bataa, bajɛ mɔ bɔrɛmɛ mɨnɛ bakpu.
13Ɔkɔ-kɛkana ya, ‘Nkosi nyan? Nkotigɛ wɔ omia, ŋɔ nfɔnɔ rɔraganɛ na amɔ; esi ɛkara kubajɛ mɔ rejubi!’
14Nsu ndi bani mbɛ batama kɛkana bafɛ mɔ, bakanɛ bacɛmɛ ya, ‘Nfa na wɔ ɔkɔ-kɛkana. Yɔgɛ reŋua mɔ, na esikafa birɛ bɛmɔ mbi betumɛ beyua!’ 15Bajamkanɛ mɔ bajaga na kɛkana mɨnɛ baŋua mɔ. Jisɔs ɔsɨna, “Ɔkɔ-kɛkana okosi yɛ nyan na bani mbɛ batama kɛkana kɛmɔ?” 16“Ɔkɔ-kɛkana kuoruŋɛ ɔkaŋu bani kambɛ, ɔbɛ kɛkana kɛmɔ ɔjɛ bani bajuju.” Ndi bani bafugɛ rɛkana ndi, bakanɛ ya, “Ɛbrɔkpabi ɛkanyiɛ!”
17Jisɔs ɔrɔ bɛ sii mɨnɛ ɔsɨna bɛ ya, “Minjɔɛ ramu ndɛ barɛ na kɛkpa manrɛ Ɛbrɔkpabi na kwa rakanɛ ya, ‘Rɛta ndi bani mbɛ bariŋɛ ɛtɔ bakpara bayɔgɛ na kɔba, ya rekiyiba, adi di rewura rɛta ndi reyiba recia.’ 18Oni naŋɔnɛ ŋɔ ɔtɔ na rɛta kandi kuoduguru; mɨnɛ oni ŋɔ rɛta kandi rɛtɔ mɔ na ɛkpaju kurɛkɔgɔ mɔ.”
Rɛsɨn rɛbaŋa kɔkpɛɛ bagbuga-retu
(Mt 22:15-22; Mk 12:13-17)
19Bani retu bajɔmɔ-kɔya na bakpɛbɛ Ibina Mosis baduga ɛyɔ kɔbɨm Jisɔs kafa ɔmɛ, ndi bagbɨri ya Jisɔs otuba rɛkana ndi ɔbaŋa bɛ. Nsu bawɔ bani mbɛ barakafa.
20Babɨnɛ kɔbabɛrɛ mɔ na jɛnɛ na jɛnɛ, batigɛ bacɛŋɛ ikari ifa, mbɛ barasiŋɛ aya bara brika bani. Batimanɛ kɔbɨm Jisɔs na mbu ɔkɔtanɛ, na esikafa basɛ mɔ ibɔ bajɛ ɔkɨm-ɛmaŋ Rom. 21Bacɛ ikari-ifa mbɛ basɨna mɔ, “Ɔkpɛbɛ, rɛgbɨri mɔ atanɛ mɨnɛ akpɛbɛ mbu bɔra kpikpɛ, mɨnɛ akɔgɛ ya afɔnɔ rɔraganɛ na ŋɔ acia ŋɔka, tum bara nyan, nsu akpɛbɛ na kpikpɛ nansɛrɛ Ɛbrɔkpabi eduga ya bani batumɛ. 22Kanɛ yu, erira cɛrɛrɛ ya rɛkpɛɛ bagbuga-retu rɛjɛ Sisa din rɛkakpɛɛ-ɛ?”
23Jisɔs ɔgbɨri ya bakɨmɛ mɔ ɔkɨmɛ, mɨnɛ ɔkanɛ bɛ ya, 24“Kɔgɛ mi nu ogbuga dinarɔs. Rɔsɔ na rirɨna yɛnɛ di rira na ogbuga kaŋɔ?”
25Bafɛlɛ mɔ ramu ya, “Sisa.” Jisɔs ɔkanɛ bɛ ya, “Jɛ nu yɛ Sisa mbu bɔra bɔmɔ, mɨnɛ minjɛ Ɛbrɔkpabi mbu bɔra mbu Ɛbrɔkpabi.”
26Bakiyɛ babɨma mɔ kafa na mbu ɔtanɛ na rɛkaba. Ɛkpaju ɛyɛ bɛ na rɛfɛlɛ ramu ramɔ, mɨnɛ basu mɔb.
Rɛsɨn ndi rɛbaŋa kofiɛ na rɔbɔ
(Mt 22:23-33; Mk 12:18-27)
27Basadusi bakinyiɛ ya bani kubaŋbɨnɛnɛ bafiɛ na rɔbɔ ara baba. Abɛ bajuju bawu kɨmanɛ Jisɔs na rasɨn. 28“Ɔkpɛbɛ,” bakanɛ ya, “Mosis ɔrɛ Ibina nji ɔjɛ yu, ya ara ɔma oni ɔba, osugɛ ɔwanɛ, ŋɔ ɔbɔ okima bɔ na amɔ, ɔma obureburɛ, ɔkɔkɔsa ɔwanɛ ekud kaŋɔ, na esikafa bama bɔ na rirɨna obureburɛ. 29Ɛfɔnɔ bama barumanɛ iti inabitaa. Onintɨma ɔbɛ fɛb ɔsa ɔwanɛ, ɔba bɔ okima na ɔwanɛ kaŋɔ. 30Ɔma ŋɔ ɔnyakanɛ mɔ ɔsa ɔwanɛ kaŋɔ, amɔ mɨnɛ ɔba wɔ okima na ɔwa ɔma ɔmɔ. 31Ɔnyakanɛ mɔ owu sa mɔ. Kɛma kanci cinɛ abɛ iti inabitaa baba fɛb, wɔ bakima na ɔwanɛ kaŋɔ. 32Na kekurɛ kɛtɨbi, ɔwanɛ kaŋɔ ɔba. 33Reyi ndi babureburɛ bakofiɛ na rɔbɔ, ɔwanɛ ŋɔ okotumɛ ɔwa yɛnɛ? Ndi abɛ iti inabitaa fɛb basa mɔ.”
34Jisɔs ɔfɛlɛ bɛ ramu ya, “Bani rokuku ndu basaŋɛ raba.” 35Ɛbrɔkpabi ɛra bani mbɛ bakotumɛ na aji. Kuefiɛ bɛ na rɔbɔ ara baba. Bani kambɛ raba basaŋɛ. Bafɔnɔ babanɛ mɨnɛ bafɔnɔ baruma. 36Babɔba rɔbɔ; bakotumɛ aya banyiɛ-rotuma Ɛbrɔkpabi. Bara bɔ Ɛbrɔkpabi, ndi bafiɛ na rɔbɔ. 37Mɨnɛ Mosis osi bɛ bagbɨra ya babureburɛ bafiɛ na rɔbɔ. Ndi ɔrɛ mbu Ɛbrɔkpabi ɛkanɛ mɔ na kɛtɨma nci kewumanɛ roku ndi ojia Ɔkɨm-kaju ya, ‘Ɛbrɔkpabi Abraham, Ɛbrɔkpabi Aisik, na Ɛbrɔkpabi Jekɔb.’ 38Aji ɛra Ɛbrɔkpabi bani babin nji babureburɛ nɛ. Na ɛjaga ya, na aji, oni naŋɔnɛ ɔra obin.”
39Bakpɛbɛ Ibina Mosis bajuju ya, “Ɔkpɛbɛ, afɛlɛ ramu oyiyi!” 40Bɨnɛ kafa bakikoyumɛ kɔsɨn mɔ rasɨn.
Rɛsɨn ndi rɛbaŋa Ɔnyaŋɛ-rokuku
(Mt 22:41-46; Mk 12:35-37)
41Jisɔs ɔsɨna bɛ ya, “Bu na bakanɛ ya Ɔnyaŋɛ-rokuku kuosi na kɛtɨbi ɔkɨm Debid? 42Ndi Debid okikɔ na kɛkpa manrɛ Sams ya,
“Ɔnyaŋɛ-rokuku Ɛbrɔkpabi ɔkanɛ ɔnyaŋɛ-rokuku omia ya:
Tumɛ nfa na koruma komia
43ta nsi bani ɛban bayɛ ifɨm ikari iyɛ.”
#
Sams 110:1
44Debid ojia mɔ ya, ‘Ɔnyaŋɛ-Rokuku.’ Esi nyan, yɛ, na Ɔkɔ-rokuku okosi na kɛtɨbi ɔkɨm Debid?”
Jisɔs ɔjama bɛ kotu ɔbaŋa bakpɛbɛ Ibina
(Mt 23:1-36; Mk 12:38-40; Lk 11:37-54)
45Aya oni naŋɔnɛ oyumɛ ratu, Jisɔs ɔkanɛ banyɛgɛ mɔ ya, 46Babɛrɛ nu bɔkpaju bonua mimbaŋa bakpɛbɛ Ibina Mosis! Mbɛ bayuɛnɛ na bɔgbanta eyuɛ bacɛŋɛ batubɛrɛ bafɛrɛ baduga ya bani bayɛ bɛ na rejubi na kwa rɛfɨn mɨnɛ batumɛ na beti rejubi na basam-rɔrɛ mɨnɛ na kwa rejubi na bɔtɔmɔ. 47Bamuɛ babanɛ ekud na bɔtɔ bɔbɛ, mɨnɛ barɔbɔ bɔgbanta manjɔm kɔkɔgɛnɛ bɔkpaju. Bani mbɛ kubafɛ brika rasinkanɛ.”
Currently Selected:
Luk 20: Olulumo-Ikom
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation