Jenesesi 7
7
Mulugu ohomuwandela mulombwana Nowe ira avolowe mmwadeyani
1Nowe agamanle sakanyeda jatene, Yehova ohomuwandela, liye ira: <<Uvolowe mmwadeyani weyo na atu atene a vande vawo. Tchoira dihiona ira muwari mwa atu atene a tempu yenna, weyo uli wapama. 2Eto waavolotchihe anavinyama. Muwari moavolotchiha mule, anavinyama apama, utukule vinyama da alombwana tanu na mbinli na vinyama da ahiyana tanu na mbinli. Zela anavinyama otakala, utukule mwanainyama wa mulombwana mmohi na wa muhiyana mmohi.#7:2 anavinyama apama: Mazwala kinaniwandela anavinyama anawongiwa eva. Mbwenye muwari mwa malamulo Mozeji awandeliwe liye na Mulugu nnovwa ira anavinyama kogaweya. Anavinyama apama ali anne kali ofwanela djiwa eto amohiwa ali anno kali ofwanela labiwana mukuto. Mbwenye anavinyama otakala ali anne ohofwanela djiwa nne ohofwanela kutiwana mukuto. 3Eto mwa mbalrame datene utukulege tanu na mbinli da alombwana, tanu na mbinli da ahiyana. Uirena eno ira uwande koya vinyama na mbalrame ira musogolro dikale mbewu mwilamboni ya vati. 4Tchoira vavira malambo matanu na menli, miyo nnorumbwiha muzongwe mwilamboni ya vati ntana na mahiyu fiyeda malambo 40 muzongwe arumbwaga. Mwa eno, nnotimiha jengo jatene jene ja ingumi jipandutchile miyo.>>
Za wa mahindje madjindji
5Mulombwana Nowe ohoirana jatene jene nnga mwemo Yehova mwamurumele liye. 6Tempu yaza mahindje madjindji mwilamboni, Nowe anna yaka 600. 7Evale Nowe ohovolowa mmwadeyani na muhiyanaye na ahimaye vamohi na ahimaye ale ahiyaniwa ira kahafwanyiwe mahindje madjindji anne kafuna za. 8Zela wa anavinyama atenene apama na otakala, na mbalrame vamohi na jatene jomburunuwa, 9johovolowa mbinli mbinli, mwanainyama wa mulombwana vamohi na mwanainyama wa muhiyana. Johovolowa vamohi na mulombwana Nowe mmwadeyani mule, nnga mwemo Mulugu mwamurumele liye Nowe. 10Vagamanle malambo matanu na menli, mahindje madjindji kohoroma za mwilamboni ya vati. 11Tempu yenne mulombwana Nowe anna yaka 600. Kagakwakwanne malambo 17 a mwedi wanembinli, mihindje datene da mwilamboni dohoroma pula mahindje okumela vati eto zulu majanela matene a muzongwe kohomala huleya.#7:11 majanela matene a muzongwe kohomala huleya: Ku wonga muzongwe azile ora yenno ali nnga mutu ahulaga mulango zulu, zaga mahindje ohokala a masika. 12Mwa enne mwilamboni ya vati mohokala muzongwe mudjindji fiyeda malambo 40, arumbwaga ntana na mahiyu.
13Siku nenne naromile za mahindje, Nowe ohovolowa mmwadeyani na muhiyanaye, na anaye Semi, Kami na Jafeti vamohi na anaye ale ahiyaniwa araru. 14Aliwa kohovolowa vamohi na vinyama da makalelo ohiyana-hiyana, roma vinyama da mukokolani vinyama da vande, na jomburunuwa, vamohi na mbalrame da makalelo ohiyana-hiyana dovava, dohovolowa mmwadeyani mule. 15Eto jovuma jatene johovolowa mmwadeyani mule mbinli mbinli vamohi na Nowe. 16Mwa ibaribari jatene jovuma johovolowa mbinli mbinli, mulombwana na muhiyana nnga Mulugu mwamurumele liye Nowe. Evale atene kagamanle volowa, Yehova ohafungela.#7:16 Yehova ohafungela: Voira Mulugu gwafungile mulango, ale kali unde tchanna makalelo ovolowa eto ale kavolowile, tchanna makalelo okuma. Tapulela ira Mulugu gunaavaha atu tempu yotwaruwa eto gunaawaka atu tempu yotwaruwa.
17Muzongwe mudjindji ule amanle malambo 40 arumbwagave. Mwa enne mahindje kohozala mwilamboni ya vati fiyeda mwadeya ule venya, roma mbelruwa vazulu va mahindje. 18Mahindjale kohozave eto koindjivagave mwilamboni ya vati. Mbwenye mwadeya ule afwanyeya vazulu va mahindje vale, mbelruwaga jaye. 19Mahindjale kohofiyeda mwezo ogumana ilambo yatene fiyeda kunela mwango dilukulu datene dafwanyeya ilambo yatene ya vati. 20Mahindjale kagakunenle mwango datene, kohogwelave fiyeda aliwa kwaranya mwango dile mameturu matanu na menli.
Tolowa wa atu vamohi na jovuma jatene
21Malambo anne dohokwa vinyama datene da mwilamboni ya vati, mbalrame, anavinyama a vande, na anavinyama a mukokolani vamohi na jatene jowenda ja mwilamboni ya vati. Kohokwa eto atu atene. 22Mwa enne jengo jatene jokana mpunoni muwa mwelra ovumana jafwanyeya mwilamboni ya vati johokwa. 23Vingumi datene da mwilamboni Mulugu ohotimiha roma atu, vinyama, jomburunuwa vamohi na mbalrame dovava zulu. Jatene johotimihiwa mwilamboni ya vati. Nowe ekave gwavuluwile na ale kali na liye mmwadeyani mule. 24Evale vagamanle malambo 150 mahindje kohoroma vunguwa.
Currently Selected:
Jenesesi 7: iLolo
Highlight
Share
Copy
Want to have your highlights saved across all your devices? Sign up or sign in
© 2018 Visão Integral