Matie Sɛbɛ 8
8
A KƆ̃W PƆLƖ̃FƲ
(Mar 1.40-45, Lu 5.12-16)
1A lɛ a *Jeeju na suure a tãw juu, nɩ-yayaw tuure ʋ na 2a kɔ̃w wa taw ta ʋ ɩ̃ lo gburĩ a dume puor ʋ, ɩ̃ yel:
“Nɩ-kpɛ̃ɛ, a ala ɩ fʋ sɔw na fʋ na tʋɔ na pɔlɩ̃ ma.” 3A Jeeju ir a nuu sɩɩrʼɩ̃ ʋ ɩ̃ yel:
“Ɩ̃ sɔw na. Pɔlɩ̃!” A jie naan a kɔ̃w pɔlɩ̃ na, 4ɩ̃ a Jeeju yel ʋ:
“Tɛrɛ fʋ mɩ̃ɛ kɔ̃ yel kʋ nɩrɛ wa. Cen na miilʼɩ̃ a fʋ mɩ̃ɛ a Naaŋmɩn baar-loro, ɩ̃ tɩɩr a baar-lo-yele ala a Mowisi na dãa ƴɔ̃w, a nɩbɛ na bɔ̃w ka fʋ sɩrɩ̃ na pɔlɩ̃.”
A SƆDAAL-NƖ-KPƐ̃Ɛ TƲTƲ̃NƆ A JEEJU NA KPAAR
(Lu 7.1-10)
5A lɛ a *Jeeju na kpɛ a Kapɛɛnam-tẽw, a sɔdaal-nɩ-kpɛ̃ɛ na ɩ a Orom nɩrɛ wɩ na a ʋ sɛ̃ na sʋɔrɔ ʋ waala nɩ:
6“Nɩ-kpɛ̃ɛ, a ɩ̃ tʋtʋnɔ gã na be a yir a ꞌwɔbɔ ʋ a ꞌwaa tʋɔrɔ dama wa; ʋ nyɛrɛ na hʋʋr yaw.” 7A Jeeju yel ʋ:
“Ɩ̃ na wɩ na kpaar ʋ,” 8ɩ̃-cɛ a sɔdaal-nɩ-kpɛ̃ɛ yel ʋ:
“Nɩ-kpɛ̃ɛ, maa ɩ nɩrɛ na sɛw a fʋ na kpɛ a ɩ̃ yir wa, ɩ̃-cɛ ƴɛr a ƴɛrɩ̃ tɛw, ɩ̃ a ɩ̃ tʋtʋnɔ na kpaarʼã. 9A-na-ɩ a maa mɩ, ɩ̃ tɛrɛ na a ɩ̃ nɩ-bɛrɛ, ɩ̃ mɩ tɛrɛ a sɔdaalsɩ a ba jɔrɔ a ɩ̃ ƴɛrɩ̃sɩ. A maa yel a kãw ú cen, ʋ na cenʼã. Ɩ̃ a maa mɩ yel a ƴen sʋbɔ ú wa, ʋ na wa na. A maa mɩ lɛ yel a ɩ̃ tʋtʋnɔ á ʋ maal a asɩmɛ, ʋ na maalʼã.”
10A lɛ a Jeeju na wõ a ʋna ƴɛrɩ̃, nʋɔr ko ʋ na, ʋ yel a bala na tuure ʋ:
“Yel-mɩ̃ɛ ɩ̃ yele nyɩ, maa dãa nyɛ a *Ɩsɩrayɛl nɩbɛ pʋɔ a nɩrɛ ʋ tɛrɛ a ƴɔ̃w-nyãa a nɔhɔ̃ wa. 11Ɩ̃ yele nyɩ na, a nɩ-yaw nɔɔ yi na a tẽw parɩ̃ nɩ a tẽw ju-sɔ̃w, na ba pɔw a Abʋraham nɩ a Ɩjakɩ nɩ a Jakɔb lãa jɛ nɩ a dɩb pulẽe a saa juu fãw pʋɔ. 12Ɩ̃-cɛ a bala na dãa sɛw ba kpɛ a be, bala ba na lɔb ƴɔ̃w a libe pʋɔ a yene, a jie ba na kono nyɩrɛ nɩ a nyɩmɛ.” 13Ɩ̃ a Jeeju yelʼã a sɔdaal-nɩ-kpɛ̃ɛ:
“Kule. A mɩnɛ a fʋ ƴɔ̃w-nyãa na be, a na maalʼã a lɛ.” Ɩ̃ a daar ʋlɔ pʋɔ a ʋ tʋtʋnɔ kpaarʼã.
A JEEJU NA KPAAR A WƲLƖ̃SƖ DEME
(Mar 1.29-34, Lu 4.38-41)
14A *Jeeju cenʼã a Pɩɛr yir, ɩ̃ a mɩnɛ ʋ na kpɛ a diem, ʋ nyɛ na a Pɩɛr dɩ̃ɛ-mã a ĩgan na tʋlɔ, ʋ gã. 15A Jeeju sɩɩr ʋ a nuu, a jie naan a ĩgan ɓãa ʋ, ʋ ir, ir ʋ a saan. 16A mɩnɛ a jaanʋɔr na ta, ba taw na a kɔ̃tɔn-irbe yaw wɩ nɩ a ʋ sɛ̃, ʋ diw a kɔ̃tɔnsɩ bar nɩ a ʋ ƴɛrɩ̃ ɩ̃ kpaar a wʋlɩ̃sɩ deme ba jaa. 17Ʋ maalʼã a lɛ a na ɩ a mɩnɛ a ƴɛr-hiere Ejayi ƴɛrɩ̃ na dãa yel: “Ʋ de na a sɩ ɩ̃gan saansɩ, ɩ̃ mɩ ir a sɩ wʋlɩ̃sɩ bar.”
A BALA NA TƲƆRƆ TUURE A JEEJU
(Lu 9.57-62)
18A mɩnɛ a *Jeeju na nyɛ a nɩ-yaw na tiw kolĩ ʋ, ʋ yelʼã a ba gãw a gaan kpee pʋɔ. 19Ɩ̃ a *ƴɛr-kpɛn-bɔ̃wnɔ taw na ta ʋ ɩ̃ yel ʋ:
“Jãjaana, ɩ̃ na tuure fʋ na a jie-oo-jie fʋ na cere.” 20A Jeeju yel ʋ:
“A sɛ́nɛ tɛrɛ na a ba bɔɔr, ɩ̃ a wɛ-lili mɩ tɛrɛ a ba cor, ɩ̃-cɛ a *Nɩbɛ Bie ma mɩ tɛrɛ jie ʋlɔ ʋ na gaala a ʋ juu wa.”
21A ʋ *par-tuure kãw mɩ taw ta ʋ ɩ̃ mɩ yel ʋ:
“Nɩ-kpɛ̃ɛ, kʋ ma sɔr ɩ̃ kulʼɩ̃ ũu a ɩ̃ sãa baar.” 22A Jeeju yel ʋ:
“Wa tuure ma, ɩ̃ bar a nɩ-kũusɩ a ba uune a ba kũusɩ.”
A JEEJU NA TAN A SƐSƐB NƖ A KƲ̃Ɔ
(Mar 4.35-41, Lu 8.22-25)
23A ala ɩ̃ baar a *Jeeju *par-tuurbe tu ʋ na kpɛ nɩ a gbor pʋɔ. 24Ɩ̃ a mɩnɛ ba na be a man sɔ̃w, sɛsɛb kpɛ̃ɛ nyɔw na ɩ̃ fure a man pʋɔ, a kʋ̃ɔ duoro pɔwrɔ a gbor, ɩ̃ a Jeeju gur, 25a ba taw ta sɩ̃wnɛ ʋ, yele nɩ:
“Nɩ-kpɛ̃ɛ, sɩ wɛrɛ na! Ir faa sɩ!” 26A Jeeju yel ba:
“Bõ nyɩ kpɛ dãbɩ̃ɛ lɛ? Nyɩ ɩ na ƴɔ̃w-nyãa pabaa deme”, ɩ̃ ir tan a sɛsɛb nɩ a kʋ̃ɔ, a ŋma vʋʋrʋ̃ cici. 27A nʋɔr ko a ʋ par-tuurbe ba jaa, a ba yele taa:
“Bõ nɩ-bʋrɔ nɩ a nyanɩ, a sɛsɛb nɩ a kʋ̃ɔ jaa jɔrɔ ʋ?”
A JEEJU NƖ A KƆ̃TƆN-IRBE AYI
(Mar 5.1-20, Lu 8.26-39)
28A mɩnɛ ba na gãw a man gaan a Gadarɩ-tẽw, kɔ̃tɔn-irbe ayi yi na a yar par ɩ̃ tuor ʋ. Ba nyɩrɩ̃ na bier, a nɩrɛ maa ꞌla de a sɔr ʋlɔ ba na be pʋɔ wa. 29Ba wuure na yele nɩ:
“Bõ a sɩmɩ nɩ a fʋ̃ʋ Naaŋmɩn Bie be taa? Fʋ de na nĩe wa ka a sɩ hʋɔlfʋ jie ɩ̃-cɛ a daar ma ta sɛr wa?” 30Ɩ̃ dor yaw dãa na ꞌwɔbɔ mʋ̃ɔ yʋɔrɔ nɩ be jie kãw, 31a kɔ̃tɔnsɩ sʋɔrɔ a *Jeeju yele nɩ:
“A ala ɩ fʋ diwre sɩ na bara, ƴɔ̃w a sɩ kpɛ a dor basɩmɛ pʋʋr.” 32A Jeeju yel ba:
“Nyɩ́ yi cen!” A ba yi cen na kpɛ a dor pʋɔ, a dor dar taa suu a tãw fʋɔlaa lo a man kʋ̃ɔ pʋɔ ba jaa kpi, 33a dɔ-cɩɩnbɛ jɔ kul na man a ala na ta a dor, nɩ a kɔ̃tɔn-irbe ayi ƴɛrɩ̃. 34A tẽ-deme ba jaa yi na cere a Jeeju nyɛfʋ ɩnɛ, ɩ̃ a lɛ ba na nyɛ ʋ, ba sʋɔr ʋ na, á ʋ yi a ba tẽw pʋɔ.
Currently Selected:
Matie Sɛbɛ 8: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.