YOHANES 12
12
Yesus cenu'ei minyok um neak Betania
(Mat. 26:6-13; Mrk. 14:3-9)
1Num Bilai Rayok Paskah, Yesus teko moi Betania, penan tinggea Lazarus de nidup igai ngen Yesus kunei antaro tun matei. 2Neak di Yesus jenamau Marta melayan. Lazarus ngen tamu-tamu temot mukmei serpok ngen Yesus. 3#Luk. 7:37-38 Lajau Maria mok tengeak liter minyok Narwastu asli de la'ang nien. Lajau si me'eng minyok moi kekea Yesus. Lajau Maria menut ngen bukne. Kute umeak o mbonne um kerno minyok um o. 4Tapi Yudas Iskariot, suang kunei penotoa Yesus, de bakea semreak Si, madeak, 5“Getai minyok narwastu yo coa jenuo telau otos pirok ngen cacine nelei ngen tun-tun peset?” 6Hal o de nadeak iso kerno si dulai tun-tun peset, tapi kerno si suang tukang maling; si galok mok caci de naik lem kas de negongne.
7Lajau nadeak Yesus, “Kunyauba si menea hal yo utuk minget bilai ngubua-Ku. 8#Ul. 15:11 Kerno tun-tun peset bogoa ade pado udi, tapi Uku coa bakea bogoa sesamo udi.”
Sepakat utuk munuak Lazarus
9Dau tun Yahudi temi'uk bahwo Yesus ade neak Betania di ngen tobo'o teko iso kerno Yesus. Tapi kulo utuk kemliak Lazarus, de sudo nidupne igai kunei antaro tun matei. 10Lajau imem-imem kepalo rencano utuk munuak Lazarus kulo; 11kerno dau tun Yahudi teminggea tobo'o ngen pecayo ngen Yesus sesudo namen cerito Lazarus.
Yesus senambut ngen riang neak Yerusalem
(Mat. 21:1-11; Mrk. 11:1-10; Luk. 19:28-40)
12Menne tun dau de sudo teko utuk merayo Pesta Paskah temi'uk bahwo Yesus dong neak tengeak dalen lalau moi Yerusalem. 13#Mzm. 118:26 Tobo'o mok dawen-dawen palem, lajau lalau semambut Si samo menggang, “Hosana! Tepujaiba Si de teko lem gen Tuhan, Rajo Israel!”
14Yesus temau dikup keledai uai lajau Si kenek moi dasne. Awei ade tetulis,
15 #
Za. 9:9
“Jibeak saben, hoi putri Sion!
Keliakba, Rajonu teko,
temot neak das dikup anok keledai!”
16Memulo penotoa-penotoa Yesus coa ngertai ngen hal o. Tapi sesudo Yesus de mulio sesudo idup igai, tingget ba tobo'o bahwo ayat o tetang Si, bahwo tobo'o bi meneane kulo utuk Si.
17Tun-tun de ade pado waktau Yesus menok Lazarus keluea kunei kubua ngen midupne igai kunei matei, melei saksai tetang hal o. 18Do'o sebabne tun dau o lalau ngen Yesus sebab tobo'o temi'uk bahwo Siba de sudo menea mujizat o. 19Lajau madeak tun-tun Farisi suang ngen de luyenne, “Ko kemliak suang bahwo udi samo sekilai coa berasea, keliakba, kute dunio teko temotoa Si.”
Kekedau tun Yunani mesoa Yesus
20Neak antaro tobo'o de lalau utuk semyang pado Bilai Rayo Paskah o, ade kekedau tun Yunani. 21Tun-tun o lalau ngen Filipus, de berasal kunei Betsaida neak Galilea, lajau madeak ngen si, “Tuan, keme lok temau ngen Yesus.”
22Filipus lalau melei namen ngen Andreas; lajau Andreas ngen Filipus semapei ngen Yesus. 23Nadeak Yesus ngen tobo'o, “Bi sapei waktaune Anok Manusio de mulio. 24Sesungguakne Uku madeak ngen ko: Amen soa gendum coa cucia moi lem taneak ngen matei, si bakea tep sebagoi soa gendum. Tapi amen soa gendum matei, baru si bakea masea dau gendum. 25#Mat. 10:39, 16:25; Mrk. 8:35; Luk. 9:24, 17:33 Api bae de cito nyabaine, si bakea nyep nyabaine. Tapi api bae de jengik ngen nyabaine neak dunio yo, si bakea miarone utuk idup de kekal. 26Api bae de mlayan Uku, si arus temotoa Uku, neak ipe Uku ade, neak di kulo pelayan-Ku ade. Api bae de mlayan Uku, si bakeane harmot Bak-Ku.
Yesus miling tetang kemateine
27Atei-Ku temes, “Jano de arus Uku madeak uyo? Jano arus Uku madeak, ‘Bak, senlamat ba Uku kunei saat yo’? Tapi waktau meding saro dioba Uku teko. 28Bak, de mulio ba gen-Nu!” Lajau temi'uk sa'ei kunei surgo, “Uku bi mulione ngen Uku bakea mulione igai!”
29Tun dau de je neak di ngen temi'ukne madeak, bahwo do'o sa'ei gutua. Ade kulo de madeak, “Suang malaikat bi miling ngen Si!”
30Jawab Yesus, “Saei o bi teni'uk iso kerno Uku, tapi kerno udi. 31Uyo bi sapei waktaune dunio yo nakim, uyo kulo penguaso dunio yo bakea neluk moi luea. 32Tapi Uku yo, amen Uku bi nelekat das bumai, Uku bakea majok kute tun teko ngen Uku.” 33Si madeak awei o utuk melei namen awei ipe ca'one Si bakea matei.
34 #
Mzm. 110:4; Yes. 9:6; Yeh. 37:25; Dan. 7:14 Lajau jawab tun dau o, “Keme bi temi'uk kunei ukum agamo Yahudi bahwo Rajo Penyelamat tep idup seke'anne. Awei ipe mukin Ko madeak bahwo Anok Manusio arus nelkat? Api Anok Manusio o?”
35Nadeak Yesus ngen tobo'o, “Cuma didik igai waktaune te'ang ade neak antaro udi. Jijai paneu ba seke'an te'ang o masiak ade, ngen udi kunyau udi jibeak teninggang kelem. Tun de paneu neak lem kelem coa namen moi ipe si lalau. 36aPecayoba ngen te'ang o, seke'an te'ang o ade ngen udi, kunyau udi jijai anok-anok te'ang.”
Tun-tun Yahudi coa pecayo
36bSesudo madeak awei yo, Yesus lalau sebunyin kunei antaro tobo'o. 37Kunyau Yesus menea kembiak dau mujizat neak adep matai tobo'o, tapi tobo'o coa pecayo ngen-Si. 38#Yes. 53:1 Supayo genepba firman de senapei Nebai Yesaya:
“Tuhan, api de pecayo ngen bito keme?
Ngen api kuaso Tuhan kemten?”
39Kerno do'oba tobo'o coa dapet pecayo, sebab Yesaya bi madeak kulo.
40 #
Yes. 6:10
“Si bi semutai matai
ngen temlo atei tobo'o,
supayo tobo'o coa kemliak ngen matai,
ngen coa ngertai.
Supayo tobo'o coa belek ngen Uku,
sehinggo Uku kema'en tobo'o.”
41Yesaya madeak awei'o, kerno si bi kemliak kemulioan-Ne ngen bi madeak tetang Si.
42Tapi dau kulo neak antaro pemipin Yahudi de pecayo ngen Si. Tapi kerno tun-tun Farisi tobo'o coa makau te'us te'ang, supayo tobo'o jibeak senikir. 43Tobo'o lebiak galok dapet pujai manusio kunei hormat Allah.
Firman Yesus de mukum
44Lajau Yesus menggang, “Api bae de pecayo ngen Uku, si iso pecayo ngen Uku, tapi ngen Si de sudo mutus Uku. 45Api bae de kemliak Uku, si kemliak Si, de bi sudo mutus Uku. 46Uku bi teko moi lem dunio awei te'ang, supayo tiep tun de pecayo ngen Uku jibeak tinggea neak lem kelem. 47Amen suang tun temi'uk kecek-Ku, tapi coa kemerjone, Uku coa mukumne. Sebab Uku teko iso utuk mukum dunio, tapi utuk semlamat si. 48Api bae de coa temimo Uku, ngen coa temimo kecek-Ku, bi ade de mukumne. Adeba firman de bakea mukumne pado Bilai Kiamat. 49Sebab Uku madeak iso kunei dirai-Ku suang, tapi Bak, de mutus Uku, Siba de meriteak Uku utuk madeak jano de arus Uku madeak ngen Ko. 50Uku namen bahwo periteak-Ne o adeba idup de kekal. Kerno o jano de arus Uku madeak, Uku semapei awei ipe de najea Bak ngen-Ku.”
Currently Selected:
YOHANES 12: REJ
Highlight
Share
Copy
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)