Genesisi 12
12
Txizimu txi dhana Abramu
1 # Wona ni ka: Mit. 7:2-3; Vaheb. 11:8. Sekoko Mkoma a to khene ka Abramu:
“Rura ditikoni kwanu u leka maxaka ako ni nyumba ya vaveleki vako, u tsula ka ditiko di ni no kukomba. 2Ni na maha lihunzu la hombe ngu ngawe; ni na kukatekisa, ni kuninga ditina da hombe, uva ditshina da makatekwa. 3#Wona ni ka: Vag. 3:8. Ni na katekisa wule a no kukatekisa, ni ruketela wule a no kueyisa. Ngu mhaka yako, ti nava ti txi katekiswa totshe tixaka ta ha mafuni.”
4Se Abramu a to khukha e tsula, nga ti Mkoma a nga m'gelisa tona, se Loti a to tsula nayo. Mbimo yi Abramu a nga khukha a ti ni tanga ya mtxhanu wa magumi ni magumi mambidi ni mtxhanu wa malembe, mbimo yi a nga khukha ngu Harani. 5Abramu a to teka Sarayi msikati wakwe, ni Loti mwanana wa mwanawe, ni thomba yotshe yi va nga ti ti nayo, ni sithumi si va nga ti si mani ditikoni ka Harani, va txi khukha ve tsula ditikoni ka Kanana, kala va txi ya hoka ditikoni ka Kanana. 6Abramu a to tshawunyeta ditiko kala a txi ya hoka ka mkusu wa More, wu nga ti ka wukhalo wa Sikemi; sekoko Vakanana va ti akile ka dona ditiko diya. 7#Wona ni ka: Mith. 7:5; Vag. 3:16. Se Mkoma a to humelela ka Abramu a txi ta khene:
“Ditiko diya ni na di ningela ka liveleko lako.”
Ngu konaho Abramu a nga akela Mkoma txiluvelo, a nga ti wonekisa kwakwe. 8A di khukhile konaho a to ya ka mmango wu wu ku ngu didhawa da wutxani ka Bheteli, eho a to emisa ditenda dakwe, Bheteli ku txi zumbela mswa-ditambo, se Ayi, ku ti zumbela didhawa da wutxani. Koneho Abramu a to akela Mkoma txiluvelo, atxi khozela kona ditina da Mkoma. 9Msana keto, Abramu a to tsimbila, eza a txi ya hoka Negebhe.
Abramu ditikoni ka Egipta
10Ka ditiko donedo ku to humelela nzala, se Abramu a to relela a txi ya Egipta, kasi kuya zumba kona, ngako nzala i nga ti ya hombe ha mafuni. 11Mbimo yi a nga wona ti to a hafuhi ni kuwulela Egipta, Abramu a to khene ka msikati wakwe Sarayi:
Wa ti wona: Na tiziva ti to awe u woneka u di msikati wo tshura ngutu. 12Ngako Vaegipta va txi kuwona, va na kha vona: “Awuwa i msikati wakwe,” se ngu toneto, va na ni daya, va txi kuleka awe u txi hanya. 13#Wona ni ka: Gen. 20:2; 26:7. Na ku kombela, u ndiyangu kasi ku ni txi mana kuamukelwa ngu nzila ya yinene, ni kumana kambe kulekwa ni hanya, ngu mhaka yako.
14Mbimo yi Abramu a nga wulela Egipta, Vaegipta va ti woni to awule wamsikati a tshurile ngutu. 15Tinduna ta Faro, ngako ti di muwoni wamsikati, ti to ya womba ngu mapswi a ku m'dhumisa ka Faro. Se wamsikati a to tekwa e yiswa nyumbani ka Faro.
16Ngu mhaka ya Sarayi, Faro a to amukela Abramu ngu manza mambidi. E mninga tinvuta, tihomu, timbongola ta vamatune, ni timbongola ta vamakati, sithumi sa mazambi, ni sa mahorana, ni makamelu. 17Aniko Mkoma a to rumela makhombo a hombe ka Faro, kumweko ni ka m'ti wakwe, ngu mhaka ya Sarayi, msikati wa Abramu. 18Sekoko Faro a to dhana Abramu a txi m'gela ku khene:
“Ngu kutxani u txi ni mahela mhaka yiya kani? Ngu kutxani u nga mbi ni gela ti to ene msikati wako kani? 19Ngu kutxani u nga khawe i ndiyangu kani? Ngu mhaka yeto, ni mtekile a txi mmaha msikati. Se konkuwa, ndiyo msikati wako, mteke, u txi tsula nayo.”
20Faro a to ninga mthetho ka tinduna takwe kasiku ve humisa Abramu hahanze ka Egipta, ene ni msikati wakwe ni sotshe si a nga ti naso.
Currently Selected:
Genesisi 12: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.